لا تشْكي لِي .. ببْكيلك

Quote: لا تشكيلي أبكيلك ... براى كايس سبب .. و العَبْرة متوسدة جوف الحَلِق .. و الدمعة في طرف المآقي .. شويـــــــة و تنزلق .. فتيل فانوس البُكا .. أرهف من رهيف .. هبْشة و يتفتق .. لو شكيتلي .. ببكيلك .. متعود.. أقعد براى متوهط الروح و النفس .. و أتحاشى النحيب وسط الخَلِق .. لا تشكيلي أبكيلك .. ال فيني كافي و زيادة .. كل القصص صارت مُعادة .. لا تحكي لى .. عن البنية العاشت وفية ...... و ما لاقت مُرادا ولا عن زولا هميم ... متوسد الأحزان وسادة لا تشكيلي أبكيلك ... لا تغرك مني صرامة ولا شجاعة ... ببيع الدنيا و متاعا .. بس ما أشوف زولا ينتحب .. بتحاشى شوفتو .. و بتحاشى صوتو .. أتاوق أتمعن ملامحو .. ألقالو العذر .. إستغفر أسامحو .. حرقة حشاى ما بْتقْبل شفاعة .. لا تشكيلي ببكيلك ... قالوا ال بيشوف هَمْ غيرو .. بتْهون عليهو كل همومو و ال بشوف عريان ال كِسا .. بتْضيق عليهو هدومو شن بسوي ال مشلْهت يومو و بايْت القَوَا .. مع ال قام من نومو ضامن كومو لا تشكيلي ببكيلك .. فرْق الليل و النهار بين ال بِخُتْ القرش فوق القرِش ضايق صنقيرة الهجير و نومة البِرِش و بين ال جاهو الحظ منساب مُنْبرِش لا تشكيلي ببكيلك .. بحلف بالنفيس و الغالي متغرب .. بس لا جافي لا سالي و لولا حبيب ال قسا الغالي ما كنت بعرف كيف كان بكون حالي ... لا تشكيلي .. ببكيلك