فكونى مافى زول يمنعنى !!

Quote: الغالية ناديا عثمان المحترمة العيد مبارك عليك وربنا يحقق أمانيك عيدنا في المدينة المنورة ووالله العظيم فيها تحس بان الاحزان تتساقط من روحك كما تتساقط حبيبات العرق من البدن واراودك احساس بانك عايز تنطط زي الشفع الصغار لان الروح بقت خفيفة ومن قلبي اتمنى ان تحضري للمدينة المنورة وابوفاطنة يشيل همك وغمك وترجعي تزعططي . اليوم قرأت لك : فكونى مافى زول يمنعنى وكل المداخلات ولكن القيد منع والبركة في الهوت ميل العفينة دي . اخوانك واخواتك والله تب ما قصروا معاك ونحن معروفين ومافي شعب عندو زي عاداتنا ووقوفنا مع بعضنا ساعة الحارة وخاصة الملمات الكبيرة كما هو حالك وهذه الوقفات لها اثر كبير في تخفيف الحزن والألم ولكن الحزن الدفين كالسرطان يعاود ادراجه ويزيد المه حالما ينتهي مفعول المهدئات . ولكن من حكمة الله تعالى على عباده ان غرس فينا خاصية النسيان Automatic Format لكي تستمر الحياة هذه الخاصية موجودة في كل انسان ولكن تختلف درجة الاستفادة منها من شخص لاخر ومن موقف لاخر في نفس الشخص الواحد ولكن الانسان الفطن يحاول الاستفادة القصوى من هذه الخاصية ليتمتع بكل درجاتها وقطار الحياة لايتوقف اعلم يا ندوية حزنك عميق وكل الذين يحبوك يتمنون ان يتقاسموا هذا الحزن وربنا يلهمك الصبر والسلوان . لو لا مرارة الحزن لما عرفنا حلاوة الفرح والغريبة في ناس بحبو المر اكثر من الحلو !!!!! ما قاصدك يا ندوية ولكني اعرف ذلك واقول ليك حاجة الحزن له لذة نفسية اذا كان في حدود الجرعة المظبوطة زي المخدر اذا زادت الجرعة تدخلك في نفق يصعب الخروج منه . ندوية ارفعي معنوياتك براك بقناية طويلة يعني شنو مثلا جيبي جريدة سودانية فيها كلمات متقاطعة وحضري قلم رصاص مبري بالجنبتين زي عبدالجليل محمد عبدالجليل لا لا احس بجنبة واحدة لان اللستيكة مهمة للمسح وقبل ما تبدي في الحل ختي ليك شاي في النار بشرط تكوني بتولعي في البوتجاز واتصفري اوس اوس حركات المصريين ديك يا خي ديل برفحوا روحن براهن يعني بعرفوا يرفعوا معنوياتهم بالصح ولا بالكضب يعني سوي الشاي وانت تصفري وتغني ويا حبذا لو معاها شوية سكسكة ، البشير بسكسك عشان ازبط السياسة بالكمونية ، لو عندك شربوت خلليهو واربطي سنة بالشربوت وبعد دا زبط شديد للصباح .... الاحزان تدغدغ النفس وتردخها لحين من الدهر وقد تصفى النفس بعد الحزن وتدخل في افراح جديدة وهكذا دواليبك وادراج الرياح تجبرك على السير في اتجاه واحد . الانسان ليس له خيار في كيف تسير حياته انه مخير في نواياه وتفكيره فان كان حسنا يتمه له الله ويكافأه على احسانه وان كان سئ النية ايضا يتمه لكي لكي يعاقبه على النية السيئة ومن هنا جاء الحديث انما الاعمال بالنيات ولكل امرئ ما نوى ، استشهد احد الصحابة فحزنت زوجته عليه حزنا شديدا وعلم رسول الله بذلك فذهب اليها يعزيها فقال لها اسأل الله ان يبدلك خيرا منه فقالت في نفسها لايوجد افضل منه ومرت الايام وتزوجها رسول الله فتذكرت ما قالته في سرها يومذاك .......... انت نيتك سليمة وطيبة والطيبات للطيبن ووالله العظيم انسان بهذه الصفات الحميدة ان الله لجبر بخاطرك ويبدلك باطيب منه ويبدل حزنك فرحا ..... اسع بفكك تبكي لكن ما بخليك كان ما سويتي الكمونية بالجبنة . مخلصك عبدالله محمد عبدالله