محاكمة شرفاء مؤتمر الطلاب المستقلين والحركة الشعبية يوم السبت القادم!! فلنجعلها قضية رأي عام...

Quote: NNC، تطابقت أقوال اثنين من شهود الدفاع في قضية اغتيال طالب النيلين المعز حسن والذي حدثت وفاته في الثامن من فبراير الماضي حول أن المتهم الأول عثمان اسماعيل بشير وهو طالب بكلية الهندسة جامعة السودان كان يوم الحادث يقود عملاً خاصاً باللجنة العليا للرسوم الدراسية لطلاب دافور بالجامعات . وعقد اجتماعاً يوم الحادث الموافق 8 فبراير عند الساعة الثانية عشر والنصف ظهراً في الشئون العلمية بجامعة النيلين ضم 19 طالباً قرروا أن يلتقوا مدير الجامعة ، وكان من ضمن المفوضين للقاء المدير المتهم الأول ، والذي ابتدر مخاطبة طلابية اعقبت لقاء إدارة الجامعة كانت في ساحة النشاط لجامعة النيلين كان المتهم الأول متحدثاً أساسياً فيها حسب إفادة شاهد الدفاع الأول ياسر المدو أمام المحكمة بالأمس والذي أبان أن المتهم الأول مع عدد ستة طلاب آخرين غادروا جامعة النيلين يوم حادثة اغتيال الطالب المعز عند الثانية والنصف ظهراً إلى جامعة السودان . وأبان ياسر في شهادته إلى أنه قام بإبلاغ أحد الطلاب الستة والذين كان المتهم الأول معهم في رسالة عبر الهاتف الجوال إن جامعة النيلين تشهد حالة من الشغب وحذرهم من الاقتراب من الجامعة ، ونفى الشاهد معرفته المسبقة لأي احتكاك مباشر بين بين طلاب مؤتمر الطلاب المستقلين وطلاب المؤتمر الوطني في اليوم الذي اغتيل فيه المعز . وكان هذا ما أكده الشاهد إبراهيم جيفارا حول العمل الذي تم يوم الخميس والمتعلق بالرسوم الدراسية لطلاب دارفور ، وأضاف أن المتهم الأول عثمان غادر معه إلى المنزل الذي يقيم فيه بأم درمان بعد أن اكتمل عمل اللجنة العليا للرسوم الدراسية من جامعةالنيلين إلى جامعة السودان وظل معه في المنزل من الساعة الـ 5 وحتى الـ8 مساءاً. وفي ما يلي ننشر محضر جلسة أمس الخميس كما تحصلنا عليه .. استجواب شاهد الدفاع الثاني المحكمة: الإسم : ياسر مردو طالب في جامعة النيلين العمر 24 سنة السكن ام درمان بعد اداء اليمين استجواب الشاهد من قبل دفاع المتهمين الاول والرابع : { وضح للمحكمة علاقتك بالمتهم الاول ـ علاقة برابطة ابناء دارفور بالجامعات وتعارفنا عن طريق لجنة رسوم ابناء دارفور. { بتعرف عن البلاغ شنو؟ - سمعته عن الصحف { وقائع ما حضرته مع عثمان، المتهم الاول ؟ - يوم الخميس بالضبط يوم 8/2/2007م كان عندنا مخاطبة في جامعة النيلين نحن كابناء دارفور لمناقشة الرسوم الدراسية وتقابلنا بالتحديد في النشاط الخارجي بكلية القانون . { الساعة كم ؟ الساعة 12 ونص ظهراً. { بعد اللقاء؟ - ذهبنا للشؤون العلمية. { انتو منو؟ - اللجنة العليا لتقرير الرسوم الدراسية وعقدنا اجتماعا استمر ربع ساعة بعد ذلك قررنا مقابلة مدير جامعة النيلين. { عثمان كان وين ؟ - كان معانا وهو من المفوضين في اللجنة. { معاه منو؟ - معاه انا وموسي حسان قابلنا المدير والتزم لينا بتحقيق مطالبنا مكثنا مع المدير ربع ساعة وبعدها جئنا النشاط لعمل مخاطبة للتوضيح لطلاب دارفور ما حدث في اجتماع مدير الجامعة . {المخاطبة وين؟ - في نشاط كلية القانون. { منو المتحدث في المخاطبة ؟ - عثمان اسماعيل .. واشار للمتهم الاول. { الحدث بالضبط؟ ـ بعد المخاطبة قررنا الذهاب لجامعة السودان - الغربي. { الماشي جامعة السودان منو؟ - عثمان ـ مصعب ـ رشدي ـ كرار . { انت وين ؟ - انا في النشاط اتصل بي شخص بعرفو بتلفون قال نتقابل في العربي { المحكمة : الزول قابلتو في العربي وين؟ ـ في عمارة الذهب { بعد ذلك ؟ ـ تاني بعد شوية ضرب زول بعرفو قال لي في جامعة النيلين في احداث والطلاب جارين قلت له انا بعيد في السوق العربي وعملته رسالة لابراهيم جيفارا وقلت له ما تجوا الجامعة . { الزمن داك هم وين ؟ ـ في جامعة السودان- الغربي . { بعد الرسالة مشيت وين ؟ - مشيت البيت ü استجواب الشاهد بواسطة الدفاع عن الحق الخاص، الدكتور موسي العالم : { انت من وين في دارفور ؟ - من نيالا { عثمان من وين ؟ ـ ما بعرف منطقته بالضبط. { عثمان صاحبك ؟ ـ ما صاحبي. { عثمان دفعتك ؟ ـ ما دفعتي. { هو في سنة كم ؟ ـ ما بعرف. { اول مرة قابلتو وين ؟ - قابلته كثير في الجامعة. { علاقته بابناء دارفور؟ - رئيس اللجنة العليا للرابطة. { مشيتو الشؤون العلمية كم مرة؟ - كثير { وضح الايام بالتاريخ ؟ - من بداية 2003 ـ 2004م { قبل يوم 8/2 قابلتو المدير العام كم مرة ؟ - ولا مرة { انت في ذاك الوقت ما لابس ساعة؟ - ما لابس ساعة. { عرفت الزمن كيف ؟ - عندي موبايل. { قضيتو كم في الشؤون العلمية ؟ - ربع ساعة. { في افادتك للمحكمة قلت فارقت عثمان الساعة الثانية والنصف قابلتو تاني متين ؟ - يوم السبت. { انت حاضر الاحداث؟ - لا ما حاضر {انت من الطلبة المستقلين ؟ - ما عندي علاقة بهم. { حاضر مخاطبة يوم الاربعاء ؟ - ما حاضر. { غير عثمان بتعرف منو من المتهمين؟ - بعرف ين ماثيو ـ واشار الي المتهم التاسع. { يوم الخميس كان عندو ركن انت حاضرو ؟ - ما حاضروا. { انت في النشاط سمعت صوت رصاص ؟ - ما سمعته. { قلت قضيت مع عثمان ساعتين ونصف تاني ما بتعرف حاجة عنو ؟ - نعم. { عثمان قال ليم حتكون في مشاكل اليوم في جامعة النيلين بين الكيزان والمستقلين حصل؟ - ما قال لي اصلا. { جيفارا اسمو منو ؟ - اسمو ابراهيم. { بتعرف مجدي عكاشة ؟ - ما سمعت بالاسم. { المخاطبة مع طلاب دارفور شملت الوضع السياسي الراهن في الجامعة ؟ - ابداً. الاستماع للشاهد الثالث المحكمة الاسم : ابراهيم صالح ابراهيم { شغال شنو؟ - طالب. { العمر؟ - 25 سنة { السكن ؟ - بحري بعد القسم تم الاستجواب بواسطة محامي المتهمين الاول والرابع الاستاذ ساطع محمد الحاج: { آخر مرة جيت جامعة النيلين متين؟ - يوم 8/2/2007م { من شهر واحد الي الان جئت كم مرة ؟ - مرتين . { الخلاك تذكر انك جئت الجامعة يوم 8/2؟ - نحن كطلاب دارفور لدينا اشكال في الرسرم قررنا الاجتماع كل 15 يوم في الجامعة بغرض التنسيق لاعفاء طلاب دارفور من الرسوم بالتحديد يوم 8/2كان في لجنة عليا لمتابعة الرسوم يرأسها عثمان اسماعيل. واشار الي المتهم الاول، حضرنا يوم الخميس وذهبنا للشؤون العلمية . { حضرتم الشؤون العلمية الساعة كم ؟ - الثانية عشر والنصف الي الثانية والربع { منو الحضر ؟ عثمان وياسر ،مصعب وعيسي اسحق واخرون. { بمثلوا شنو ؟ جزء من اللجنة. { بعد ذلك ؟ - اداني عثمان تكليف لابناء دارفور بجامعة السودان الغربي لانتظارهم لاجراء الاجتماع هـناك . { اداك التكليف وانتو وين ؟ - داخل الشؤون العلمية جامعة النيلين. { جيت راجع متين؟ - حوالي الساعة 2 وربع نهاية حديث عثمان . { المتحدث الثاني منو؟ - ياسر المردو. { عثمان كان شايل شنو؟ - كرتونة لدعم تسيير اللجنة العليا للرسوم . {كان وين ؟ - داخل المخاطبة . { المسافة بين المخاطبة وكلية الاداب؟ - حوالي 400 ـ 450 متر { الاركان الشغالة لحظة المخاطبة عندك فكرة عنها ؟ - ماعندي فكرة. { عرفت كيف الساعة 2 ونص ـــ 2 ونص وخمسة ؟ - شفتها في الموبايل لان لدينا ميعاد مع طلاب جامعة السـودان . { بعد المخاطبة الحصل شنو؟ - بعد ذلك تحركنا لجامعة السودان. { معاك منو؟ - عثمان وكرار ومصعب. { وصلتو جامعة السودان الساعة كم ؟ - حوالي 3 وخمسة. { اجتمعتوا مع ابناء دارفور وين؟ - في جامعة السودان في نجيلة علوم. { الاجتماع استغرق كم ؟ - ساعة وعشر دقائق. { في هذه اللحظة ما هي الاخبار من جامعة النيلين ؟ بعد الاجتماع قالوا نشرب بارد وبعد البارد قلنا ليهم ماشين البيت . { انت ومنو؟ - انا ومصعب وعثمان وكرار وغيث. { طلعتوا باي شارع ؟ - الشارع شمال الاستاد. { بعد ما خرجتو ؟ - ونحن خارجين جاءت رسالة لغيث من ياسر وقال ليهو في مظاهرة في جامعة النيلين حاولوا اطلعوا في نفس اليوم الوقت نحن كنا وصلنا السوق العربي غيث والحاج مشوا الصالحة وانا وعثمان ومصعب وكرار مشينا بانت وصلنا بانت حوالي 5 وعشرة الي 5 وربع { المتهم الاول عثمان عمل شنو ؟ اول حاجة استحم واتغدينا بعدها نام وصحي واصل معانا لعب الكوتشينة. { صحي متين ؟ قبل اذان المغرب. { ظل موجود معاكم لمتين؟ - الي بعد اذان العشاء. { انت من وين في دارفور ؟ - من نيالا حي الوادي. { عثمان من وين ؟ ـ من زالنجي. { عرفت عثمان متين ؟ 2003م { عرفتو كيف ؟ هو رئيس رابطة طلاب دارفور بجامعة السودان . { في صلة قرابة ؟ - لا { علاقتك باسرته؟ ما بعرف اي زول، امه قابلتها اليوم في المحكمة. ü استجواب الشاهد بواسطة محامي الحق الخاص { بتقرا وين؟ - جامعة السودان. { ما عندك علاقة بالنيلين ؟ -ما عندي. { بتقرا في سنة كم ؟ ثالثة. { تخصصك شنو ؟ -محاسبة. { عثمان ساكن وين ؟ في ام درمان لكن وين ما عارف. { مشيت معاه البيت ؟ -ما مشيت { انت في اللجنة التي شكلت لمقابلة المدير ؟ -نعم { عثمان كلفك لتمشي جامعة السودان بعد الدخول للمدير ؟ -قبل الدخول للمدير { بالضبط الساعة كم ؟ - 10:2 - 15: 2 وربع { اخطرت كم واحد ؟ -4 اشخاص { من هم ؟ الحاج ادم محمد وغيث واحمداي {الرجع معاك منو؟ -كرار ورشدي ومصعب. { جيتو لقيتو المخاطبة شغالة المتحدث كان منو ؟ -عثمان اسماعيل وكان في خواتيم حديثه. { المتحدث بعد عثمان منو ؟ ياسر المردو { ياسر اخذ كم من الزمن ؟ ربع اوثلت ساعة { عثمان اتكلم ن شنو في المخاطبة ؟ عن اشكالات الرسوم الدراسية لطلاب دارفور في جامعة النيلين { تقصد شنو بخواتيم حـديثه ؟ -الجزء الاخير من المخاطبة. { كان فيهو شنو؟ - تحدث عن العمل علي حل مشاكلنا الدراسية حتي لو لزم الامر رفع خطاب لرئيس الجمهورية { المتحدث منو بعد ياسر ؟ - انتهت المخاطبة { الشرب الشاي منو ؟ - انا وعثمان وياسر ورشدي ومصعب { ياسر طلع الساعة كم ؟ 3 ودقيقة او دقيقتين { ضرب تلفون؟ - رسل رسالة لياسر . { قعدتم كم من الزمن بعد الشاي ؟ -حوالي ثلث ساعة او 25 دقيقة { المسافة من نشاط النيلين الخارجي الي جامعة السودان تستغرق كم من الزمن ؟ - حوالي 6ـ 7 دقائق { انت صاحب عثمان من متين ؟ -ما صاحبو. { عثمان احد المستقلين ؟ -ما عارف. { انت اتجاهك شنو؟ - حركة جيش تحرير السودان جناح مناوي. { علاقة عثمان بمناوي ؟ - عثمان عضو اصيل في الحركة. { يعني شنو اصيل ؟ -يعني زول منضبط. { انت وظيفتك شنو في الحركة ؟ -عضو { بتعرف منو في المتهمين؟ -ما بعرف زول { عثمان قعد معاكم كم في البيت ؟ -من الخامسة والنصف الي الثامنة والنصف مساء { عثمان كان لابس قميص لونو شنو ؟ -ما بستحضر. { البنطلون ؟ -اسود { اتغديتو بي شنو ؟ كسرة بي ملاح بامية. { طبيخ ولا مفروكة؟ -طبيخ. { في سلطة ؟ -طماطم وبصل اخضر. { في صنف تاني؟ - بطاطس ومعاها عيش. { في لحمة ؟ -لا { الكلام ده علي الارض ؟ في السباتا؟ { كان يمنيك منو؟ -يميني مصعب شاي. { شمالك ؟ -كرار وبعده عثمان. { عثمان مواجه منو ؟ -ما بستحضر واستجابت المحكمة لطلب محامي الحق الخاص د. موسي العالم برفع الجلسة لعدم مقدرته علي مواصلتها نسبة لمرضه علي أن تعاود المحكمة جلساتها في يوم الاربعاء 21 نوفمبر الجاري لمواصلة استجواب الشهود.