درر ودرّاب... مقتطفــات فضــائية.. فاضية...

Quote: غايتو النشرة حقتا هى وفيروز زيانى الا تشيل التلفزيون وتطلع بيهو الخلا! او تكون موطى الصوت وخاتى اصبعك قريب من الــ Recall button حقت الريموت كونترول عشان ترجع لى قناة اقرأ! عالم جبانات بشكل! جنى

والله يا جني (ختفتها من خشمي) ياخ ديل مذيعات ناجحات وزي ما قالوا ثنائي العاصمه
ديل ناس التلاقي البيروي شوقي والحديث البيجبر بخاطر ، والقنوات ياريتا تقفل وكلو برنامج ياريتو باكر.
يعني البنيات ديل موضوعم ما شكل وبس لكن فيهم حاجه كده (تقطع نفس خيل) الوجع ولما تسمع نشرة الأخبار حتى
عن بغداد والرمادي والأنبار تعتقد انها عن حدائق بابل، مش مرات كده بكون عندك حرقان وهايبراسيدتي يضيقوا
عليك الدنيا؟ أها ديل زي الأندروس والكاسلتزر مش زي هاله سرحان التي تخلف فيك توترا عصبيا بعلبة الألوان
البتكشحا في وجهها قبل أن تطل عليك وتفقع مرارتك باللغه المصطنعه البلاستيكية بطعم البوليستر.

في جانب آخر هناك عدة عوامل لها دور في السالفه دي ، فعلى سبيل المثال القنوات المرموقه لها إمكانيات
استقدام خبراء في التجميل والديكور وهندسة الصوت والضوء والماكياج وتلك اشياء تحتاج لأموال ضخمه ولك أن
تعرف أن أوبرا وينفري بتقبض راتب سنوي قدره 260 مليون دولار وهذا يساوي دخل بعض دول العالم الثالث لنفس
السنه وبالتالي يمكن لأوبرا استخدام جيش من الخبراء ومستشارين حتى في طول الإبتسامه من حيث المدة أو ما يفتر
عنه الثغر من أسنان ومتين تلبس كاجوال ومتين تلبس رسمي أو ملابس سهره الخ..مش زي العنقاله إياهم، ياخ الميديا
في العالم كله أصبحت علما يدرس ولايترك فيها شئ للصدفه أو المجاملة أو (الولاء).
بالمناسبه انت الواحد كان تابعك بتوديهو مكان أخطر من الكاتاراز ونحن ما (عالم جبانات) نحن كنا نشاهد النشرات
في حضور البنتاغون والمارينز والأسطول السادس كأمة عربية واحده ذات رسالة خالده ونسبة للمنعطف الخطير الذي تمر
به الأمة قررنا اعتزال الكوره وبنوره ولا للسلطه ولا للجاه هي لله هي لله ولا نامت أعين الجبناء.