|
صلاح شتات -- بالله شوف الساعة كم
|
ختيت فرح طين الكلام فوق الدروب وسط الجروف جوه القلوب بالله لو تسمح تشوف الساعة كم الساعة موعد طلتك فرحا يشابى وينتظر ضحكة مواعيد الحروف طعم الوئام
إتفضلو إتمهلو الريدة حجواتنا الزمان إتفائلو الريدة ميعاد الحنان الساعة ميعادك تمام
إتفضلو إترصو قدام العشم ولامن تدق الساعة كم يدق قليب النيمة ديك أهلا تعالو اتفضلو داراً تشيل غنية حضورك وتنتشى ظلاً ظليل حاضن نداوته ومشتهيك نسمات بتغزل فى النهار مسرح بهاك الإنتظم يمرق غناويهو ويجيك ريحة مناديل العشم والأغنيات نفس الألق نفس الطعم إتفضلو زحو الستار سيبو الوجع خلو الندم بالله لو تسمح تشوف الساعة كم صُد لى سماك تتلم نجماتك عليك قمرك مجرتق بالنضار شافك قريب حياك بالضو وابتسم بالله لو تسمح تشوف الساعة كم
|
|
|
|
|
|
|
|
Re: صلاح شتات -- بالله شوف الساعة كم (Re: أبوذر بابكر)
|
Quote: بالله لو تسمح تشوف الساعة كم صُد لى سماك تتلم نجماتك عليك قمرك مجرتق بالنضار شافك قريب حياك بالضو وابتسم بالله لو تسمح تشوف الساعة كم
|
برضو لينا ميعاد
بالتلاقي ،،،
لمن يهل نجمك
تماااام ،،،
تبقي أنت الضوء
يرمق مسااام
الجسم ،،،
آبا ذر بابكر لك صافي العشُم
،،،،أبوقصى ،،،،
| |
|
|
|
|
|
|
Re: صلاح شتات -- بالله شوف الساعة كم (Re: أبوذر بابكر)
|
الساعة كم؟ لو كنت عارف الساعة كم .. لو كنت فاهم .. ما كان المواعيد صارت وهم .. ما كان الرصيد في الجيب عدم .. ما كان بكينا ليلاً طال .. وحالاً مال .. وما كان بتلقانا اليوم نخم تراب بيتاً كبير مال وانهدم ..
زمان كنا بنعرف الساعة كم .. لما كنا واحد .. لما كان الحلم واحد .. لما كان الدرب واحد .. لما كان الغيم هو العشم ..
تقول لي الساعة كم! الساعة لحظة رحيل الغنوة والفرح والنم .. ساعة تجيك زينوبة مكندكة محزوم خشيمه ترسم دمعة تكتم آهه تتألم ..
الساعة لحظة زمن ظالم لحظة سفر فوق مدارج الوجع والهم .. والساعة عمراً كتبناه فوق اللوح .. ومشوار مشيناه .. قدم قدم .. والساعة شتات كوماً كبير رصَّيناه بالدموع والدم ..
والساعة يا سيد الاسم .. رغم العتاب واللوم .. الساعة لحظة حضورك موسم خريف يهزم حريقنا ويبتسم .. .. . بس إنت .. قول لي الساعة كم؟
| |
|
|
|
|
|
|
Re: صلاح شتات -- بالله شوف الساعة كم (Re: شتات)
|
مسدار الشتات
حرفك بطر الموج وكتين يهابش القيف نضمك فكة ريقا بايته ومرحباب بالضيف جيتك عِينه نديه جايه خريف وغناكَ مسداراً مهيد فينا تم الكيف
صلاح ودار الشقا عز الطشيش والغربه صلاح الفى القليب ساكن انبساط ومحبه صلاح موية جدولاً حاضنه الخدار منسربه صلاح نيمنا الحنين جاتو الطيور منكربه
صلاح مخلاية الزواده البيها فكة ريقنا صلاح خدرة جروفنا السمحة كاسية فريقنا صلاح هداي النفوس ياكا العدلتا طريقنا صلاح حرفك فى الفواد مكمون وياهو رفيقنا
مما قمنا خلينا الفريق فارقنا جرحاً فينا نوسر والوحيح حرّقنا فوق شوك الظعن عافرنا وادردقنا يوماً اسوداً طفشنا من جنب العزاز ومرقنا
| |
|
|
|
|
|
|
Re: صلاح شتات -- بالله شوف الساعة كم (Re: أبوذر بابكر)
|
الجميل الراقي إحساسو أبوذر: غايتو انا ما ضليع في الشعر ومتسلبط في عرفة الأغاني لكن القريتو فوق ده أجزم وبنسبة مليون الميّة إنو أغنية من الطراز العااااااااالي جدا جدا جدا وتنفع قصيدة غنائية ولو تبعك القصيدة دي يا أبوذر فعندك واحد من خيارين : الأول تخلّيني أتعلم فيها التلحين .. التاني تخليني أسوّقها ليك عند بعض معارفي من الفنانين .. بس بالله حقوق الطبع محفوظة لي بعدين
Quote: صُد لى سماك تتلم نجماتك عليك قمرك مجرتق بالنضار شافك قريب حياك بالضو وابتسم بالله لو تسمح تشوف الساعة كم |
ده كلام كبيييييييييييييير علينا والله ..
أما بالنسبة لهذا الشتات فنقول:
مهما يشوف الساعة كم تلقاهو غارق في المحن .. ما أصلو حالو دوام كده وديمة فارق في الزمن .. مرات يكون مبسوط خلاص ومرات يقلّب في المجن .. مرات يفوت حد العقل ومرات تقول الزول ده جن .. ومرات بسيمتو تحيّرك ومرات تشوف عينيو بكن .. ومرات بكون غيمة فرح بس ديمة فيهو الهم سكن .. ومرة مرة يكون معاك مرات كتيرة بعيد ركن .. ما عرفنا هل( رافع السعر)أو أصلو بس طبعو العجن..
| |
|
|
|
|
|
|
Re: صلاح شتات -- بالله شوف الساعة كم (Re: أبوذر بابكر)
|
أبـوذر المطـر ود السمـاء التريـان صقر الجو .. دخري الحوبة ..وعشا الضيفان خريفك نترة ..برقك قبلـي .. خير وأمـان حروفك خير تخدر في التراب عنب ألوان منو الغيرك بسد البحر يسند الواقعة والعطلان
Quote: مما قمنا خلينا الفريق فارقنا جرحاً فينا نوسر والوحيح حرّقنا فوق شوك الظعن عافرنا وادردقنا يوماً اسوداً طفشنا من جنب العزاز ومرقنا
|
د. محمد بادي قال :
Quote: منو البقدر يطاول حرفك المعقود علي برقا حرير وهلال مسطور فوق رقاب البرد فوق الصخرة والتمثال بعد الحال رحيلك يا المشرشر في مداخل الدنيا كالاوصال رحيلك هزَّ في العقدة ومجامع الروح كما الزلزال ارمي الدمعة فوق الدمعتين ياعين بعداليلة حابساها الدموع لمين كتير من ساب ديارو العامرة هاجر فوق درب وداي كتير من عدا فوق مركب بلا يوادع بلا يناشد كبار القوم وياخد راي كتير ياعين وكتير الراحوا ما عادوا وكتير البمشوا منو جاي
|
أبوذر يا جميل .. أنت قلت .. محمد بادي قال .. وأنا ما قادر أقول ..
هاشم .. تشكر يا لذيذ يا رايق .. عمر فاروق .. تحياتي يا زعيم ..
| |
|
|
|
|
|
|
Re: صلاح شتات -- بالله شوف الساعة كم (Re: Osman Musa)
|
العزيز عثمان موسى
تحايا وود غزير
هنا تتشابه الأيام يا صديقى
الخضرة تبدو وكأنها تتشح بلون الحسؤات العتيقة المقيمة
أما شهر ابريل
فحاله مثل ما قال شيخا "توماس شتيرن إليوت" فى أرضه الخراب
APRIL is the cruellest month, breeding Lilacs out of the dead land, mixing Memory and desire, stirring
أحييك يا عثمان على مشاركتنا سكب بعض المداد القلق هنا
عله ينبت بعض الإخضرار
| |
|
|
|
|
|
|
Re: صلاح شتات -- بالله شوف الساعة كم (Re: أبوذر بابكر)
|
أبوذر المطر، و صلاح شتات؟ .. معا في بوست واحد؟
.. و إذن، إنه لقاء الشمس بالسحاب.. .. فمرحى للعشب، و الأطيار، و ُسمّار تهزمهم الدهشة.. .. و سنظل مثل ذلك ( الزنجي ) الذي تحيّر في الرياض؛ أيجني الورد أم يجني الأقاحي..
فليتدفق نهر الشمس و ليشرق شعاع المطر..
ودي الأكيد
| |
|
|
|
|
|
|
|