أبقى جاي على الحقيقة..

Quote: إذا كنت مديني اليقين .. أنا ليه أفتش عن إجابة .. مادام غُناك صحى البلد سالم شقا الناس الغلابة صحى الشوارع في السما في كل تقاطع ,, بشبهك .. لونك حمامات السلام .. ضلك بيشبه - ليّ - سحابة ضحكك .. فرح كل الطفولة .. يا السكاتك ما بيشبه إلا صبرك انت لونك فيهو بسماتك .. حبابا فيهو تربالا بنادي اللوبي مهلاً لابقة الحنين - جوَايا دابا - شايلة بي كفي المحنّة .. زارعة واطاتك .. محبة .. ناس تغني وليك تريدك .. وريدي " أروتِّي " الربابة .. هي البتعرف كيف تسالمك .. كفي مابتعرف .. حرابة أنا ماتركتك للمدينة الغايبة في ضل الرتابة و ماتركتك للغياب .. روحي تعلن يوم تغيب - برضك - غيابا بس منحتك سر عيونك .. غصب عنك يا العيونك كل سؤالاتهم مُجابة,, أنا جد لفيتك .. في الأماني الكاملة بي بلداً بِرتِّب صوت مشيك و دروبا مشتهياكَ تنزل في رحابا القدرة لو كانت تفوتك ماكان بيعجزنا المزار لو كِمِل حد الصبر .. برضو تكتمل المشاوير الصغار لو الزمن إزداد عِناد .. عشمي الرِضا الساكن الديار غربة الأشواق بلادك غربتك لو قاسية .. دار حنينة لمتنا فــ ربوعك فرقتك في خاطري .. نار خاطري لو بطفيو سلامك ذكرتك تملاهو .. نار السمحة لو مالت دروبا ينعدل فيها المسار .. أبقى جاي على الحقيقة وببقى جاي .. لو حق أشار أبقى مارق .. و ماتخاف .. لو دليلك .. فينا حار .. نبقى سكة زول نريدو فيها أحلامنا الكتار يا بلاد بالإلفة غنّت .. فرحة صِبحت لينا جار .