|
|
 تاني واحد يقول لي انطق "هساهيسا" الا اكلم ليه عواطف ادريس…
|
الناس دي كلها شابكني "غرابي ما بعرف يتكلم عربي" و الكلام ده من زمان خلاص…
اتذكر اول مره جيت الخرطوم في زمن نميري و كان لي يومين بس … اقوم امسكني بوليص الكشه … الله لا جاب الزمن داك تاني … الا النصيحه كان احسن من الزمن الحالي…ده
البوليص يدخلنا انا و قريبي الهراسه و يسالني انت من وين … انت من الحصاحيصا …. اقولو لا… و تاني يسالني انت من الحصاحيصا و اقولو لا…
في الاخر قلت ليهو انت ما تسالني و بس و خليني انا اقول ليك من وين انا…. تاري هو كان دايرني اقول الهساهيسا و طوالي يسفرني في الاتجاه المعاكس …
علي كل حال في النهايه لقي عندنا اثنين جنيه … شالها مننا و قال لينا اتخارجو…
جيت و حكيت للناس و سالتم عن سر الهساهيسا… ضحكو و وروني السبب … انا من اليوم داك و متعقد من الكلمه دي…
و الناس طوالي شابكني و في صيغه جمع كمان "انتو ما بتتكلمو عربي كويس" … النصيحه انا في المدرسه كنت كويس في العربي و طوالي بجيب ال 90% و زياده و حتي في امتحان الشهاده الما جهاديه ديك جبت فيهو 85%...
ال15% الشالوها دي حق المعلقه الابيت احفظها … قلت "معلقه من 100 بيت" كان بتودي الجامع ظاتو ما بحفظو ليكم… اصلو انا حلفت زمان انو كلام كتبو زول ما بحفظو … في الابتدائى كنت بحفظ الاناشيد عشان ما انجلد…بس
النصيحه برضو … في المعلقه كنت حافظ بيت واحد في قصيده عمرو ابن كلتومه … و انا اقول الزول كيفن مسمينو علي اسم امو و عندنا في البلد الاسم ده حق النسوان و بس… علي كل كنت متكيف من البيت البقول "و كشحا قد جننت به جنونا"
تاري العرب في الزمن داك كانو تفتيحه اكثر من هسى … سبحان الله … الناس ماشه لوراء في شنو…
القصه دي حارقاني شديد و ما عارف اتسد كيف في الناس البتقول لي ما بتعرف عربي كويس… لغايه قبل يومين القي بوست عواطف ادريس و من خلالو عرفت انو الناس دي كلها عندها مشكله مع العربي في كلمات كتيره…و بس فالحين فينا نحنا…
نبدا بالواحد و الله واحد…
تزعه
تزعه و تسعين
غال
البغاء
و هباني ظاتو
…
تاري كلنا في السوي هوي و كده …
عرفت سركم خلاص…
حلفت الا امشي البس عقال و اتفاصح فيكم…
ايش تبخي يا ظلمي…
عيش لونك…
ايها الشباب النشامه…
تاني اليقول لي انتق حصاحيصا … الا اقول ليه … قول "تسعه"… او انادي ليه اواتف…
|
|
 
|
|
|
|
|
|
|
|
Re: تاني واحد يقول لي انطق "هساهيسا" الا اكلم ليه عواطف ادريس… (Re: Mahjob Abdalla)
|
الأخ محجوب
ظريف والله، إنت فى هسن إيسا
ولا الناس بالتغلط فى أسماء الله الحسنى كم!
تزعه وتزعين ..
هو ما بس فى النطق، كمان فى إستخدام بعض الكلمات فى غير معناها.
أدكر فى السعوديه نبهنى أحد السعودين عن إستخدام
السودانيين لكلمه الليلة .. لتعنى الزمان خلال ال 24 ساعة لليوم
مثلاُ يقول معزوم فطور الليله .. وهو يقصد اليوم، أو النهار ده
وبرضو كلمه ساكت بمعنى مخالف لمعنى الكلمة:
والله ساكت بس ما إتفرجت فى الكورة!
هليناك الليله فى آفية ساكت
| |
|
|
|
|
|
|
| |
Mahjob Abdalla
فيصل محمد خليل
بابكر التوم
نادر الفضلى
فيس بوك
تويتر
انستقرام
يوتيوب
بنتيريست