جيبوا الخرفان والشية تكون كتير ة والشطة والليمون وصوانى الفرن والله السودانيين قلوبهم بقت حجر

Quote: الحبيبة أم وضًاح.. سلامات ومحبات.. أغرب تعليق سمعته من قريبتي الأخذتني معاها لتقديم عزاء في زوج قريبتنا. قالت لي: أحلى كبدة ممكن تاكليها بتاعت بيت البكا!! وما أخفي عليك سر. مشينا بعد الفطور وأصر أهل البيت على تقديم الفطور لبت علوية الجاية من بعيد.. أها خليت بالي من الكبدة.. وما لقيت الكبدة براها. كل الأكل معمول بإخلاص ونفس حلو.. سبحان الله. بعني الناس بتفصل بجد ما بين المناسبة والأكل بتاعها!! .. قبل ما أمشي: في رمضان الفات فقدنا بت خالتنا الزهرة الجميلة "ندى أحمد نجيب". حضرت من نيالا حوالي الساعة 2 ظهرا. وطبعا كنت في مطار نيالا من 6 صباحا. ووصلت وعزيت وعزيت وما كفًيت "ندى" الكانت بتشتغل معاي في نيالا في منظمة الصحة العالمية، وجات الخرطوم لإجازة أسبوع ماتت فيهو. لما جا وكت الفطور فوجئت بما لذ وطاب من الطعام. كسرة وعصيدة و3 ملاحات، وشية جمر وشية صاج، وكبده وفول بزيت السمسم وجبنة. وحاجات تانية ملت صينية إتخيل لي إن نص قطرها 100 سم. زائدا العصائر والمشروبات كنت جعانة موت. وقعدت عشان آكل أول زاد لي من الصباح. وكانت معاي في الصينية بنات خالاتي أخوات ندى وصديقتها القريبة الكانت عندها مواعيد مع ندى فجات لقتها ماتت! بدينا الأكل. لاحظت إن الصديقة ما بتاكل. وقدر ما يخسموها تقطع بس حتة رغيفة. قمت سألتها براحة لأنها كانت جنبي. قالت لي: الأكل ده إحتفال بموت ندى. آكله كيف؟ أنا حزينة ما مبوسطة بموت صديقتي. فورا إتوقفت عن الأكل. لأن كلماتها حقيقة. كيف نحتفل بموت أحبابنا..؟ شكرا ليك وإنت بتحاولي تصححي العادات القبيحة البقت أقوى من الحق ودي