الأخ عمر التوم شرفني كثيرا مرورك الكريم علي هذا البوست ... أبوداؤود صاحب حنجرة عملاقة ورائعة وهذا بالإضافة لإختياره المتفرد لأغنيات كتبت ليتغني بها هو وحده...وإني لفي غاية الشوق السعادة لقراءة البوست الذي سيوثق روائعه... ودمت
07-27-2007, 06:18 PM
omar altom
omar altom
تاريخ التسجيل: 07-15-2007
مجموع المشاركات: 921
والله والله....انك قد اطربتنا حد الطرب......وليتك لم تفعل .....فقد تركتنا نصف سُُكاري او ُقل
سُكاري -لافرق- فالا لحان تُسكِر كما هي تُطرب ومن ذا الذي لا يَطرب وانت تغني
لوموه اللاهي........في الغرام بالله
قولوا ليهو الحب.....شئ طبيعي الاهي
الغرام ما بخير ....بين كبير وصغير
من زمان الحب......أمرو فينا يحير
يا جميل يا نضير....خلي هجرك غير
مابكرة والله الحب....بتلقي عمرو قصير
ونحن ننظر الي علبة الكبريت فما ذالت في مكانها كما تركتها ,وهل يستطيع أحد
أن يستنطق عُلبة ثقاب فاذا هي ُتدوزن آذاننا قبل الحانك!! وتكاد تحترق من كثر ما طربت وهي
تتحرك بين اصابعك فتارًة هي في اليمين ومرةً هي في اليسار وهي علي كل حال علي نسق اللحن
حتي وان وقعت علي الارض فذلك بعض من الايقاع والذي بينك وبينه حكاية جعلت استاذ الموسيقي يقول لتلامذته:
الكلام القلناه عن كتابة الايقاع ده ما بينطبق علي عبد العزيز!!!!عبد العزيز ده موضوع براه!!!!
ثم يخرج اسطوانة قديمة وعليها صوت الرجل
عذاري الحي
ياعذاري الحي......رفقا بالحياري !!!!
أرأيتن حبيباَ قد تواري؟؟؟
وبلغ سلامنا الي صنوك برعي محمد دفع الله وقل له بان عُوده يشتاقه وان الحانه تبكيه واننا ما زلنا مستمعين جيدين ربما اكثر من علي المك – صاحبكما - الذي هو الآخر رحل وعلي شفتيه –اقتراحٌ- بتعديل جملة لحنية لم تعجبه, ومالك أنت والالحان يابروف؟؟؟؟؟-يقول برعي ضاحكا ويبتسم عبد الله عربي صاحب الكمان الراقي ولسان حاله يقول : وانا مالي!!!! بينما عبد العزيز يسأل برعي: الكاشف ده جاب المقدمه الموسيقية بتاعت ( فتنته بيه) دي من وين؟؟؟؟انحنا اولاد امدرمان قاعدين هنا جنب الاذاعة ما عرفنا نعملها....يجي هو من مدني شايل معاه الالحان الصعبة دي؟؟ والله انا كنت قايل مدني دي غير القطن ما فيها حاجة. ويضحك الجميع............... ونبكي نحن .
(عدل بواسطة omar altom on 07-29-2007, 10:39 AM) (عدل بواسطة omar altom on 07-30-2007, 08:31 AM)
07-29-2007, 07:07 PM
نها محسن أبورأس
نها محسن أبورأس
تاريخ التسجيل: 04-04-2007
مجموع المشاركات: 856
الأستاذ عمر التوم صدقا لا أدري ماذا أقول...فأناأعتقد أنه ليس هنالك قول أجمل أو أبلغ مما ذكرت وإنه ليشرفني حقا أن نجتمع في عشق واحد ألا وهو الغالي عبدالعزيز محمد داؤود.... وكما قلت فقد تركنا الراحل ونحن سكاري من الروعة والجمال ولكن طالما هنالك من يهوي الجمال ويتذوق روعة اللحن والأداء فحتما لن يموت عبدالعزيز محمد داؤود...فهو باق وسيبقي....
الدكتورة المعتقة الفنانة نهي سلام أطنان اختيار جميل وموفق ضربتينا في التنك تماما تسلمي يا عزيزتي وواصلي لينا من الجراب الكبير الداساهو وما تبخلي علينا خصوصا والذكري السنوية لأبوداؤد علي الأبواب
أستاذنا الكريم معاوية طبعا إنت عارف إنو لغاية أبوداؤود ومافي تاني كلام...بصوتو الدافي البوصل الواحد لمرحلة السلطنة... أنا عارفة إنو جرابك أكبر وأثمر وده كلو من بعض ...أقصد من كل ما عندكم... وياريت تتحفنا دايما بالروائع زي ما معودنا... وألف شكر علي المرور..
07-30-2007, 07:38 AM
نها محسن أبورأس
نها محسن أبورأس
تاريخ التسجيل: 04-04-2007
مجموع المشاركات: 856
......وليس كل مريض يداويه طبيب..... فبعض العلل تداويها الالحان .....لذا فعبد العزيز داوؤد
كان -وماذال- هو (طبيب )ارواحناعندما تحترق ومن غبره كتب روشتة ل (حراق الروح) عنما يغني : اينعت في الروض زهرة......!!!!! وهو (صيدلاني) قلوبنا حينما تعتل ضرباتها فيعيدها الي معدلاتها الطبيعية....... وهو( تمرجي) مشاعرنا...عندما تختلط ببعضها فيعيد ترتيبها ....,ومن غيره يملك ميزان قياس ضغط الاحاسيس ؟؟
أستاذ علاءالدين أولا ألف ألف شكر علي المجاملة الرقيقة وعلي مرورك الكريم في البوست الذي شرفني.... أنا إسمي نهي محسن أبوراس حلفاوية ولي عم إسمو محمد لكن ليس من ديم التعايشة... أشكرك مرة تانية
07-31-2007, 08:24 AM
نها محسن أبورأس
نها محسن أبورأس
تاريخ التسجيل: 04-04-2007
مجموع المشاركات: 856
أخي الكريم عمر التوم أتفق معك تماما فيما تفضلت وذكرت فأبوداؤود تستمتع بغناءه وأنت مسترخ ويثير شجونك وأنت مهموم ويحلق بك في العلياء وأنت سعيد فهو فنان كل الظروف والأوقات.. ولكن ما يحز في نفسي أنني لم أشهد ذلك الزمن الذي غني فيه أبوداؤود وأسكر فيه الناس ..لو إلتقيت به فحتما كنت سألازمه وأستمع إلي حديثه الشجي وغنائه العذب.... ولكن يسعدني كثيرا أن أجد من يشاركني إعجابي الكبير بشخصه وفنه.. ودمت سيدي الكريم وهذا إهداء مني لكل عاشق لأبوداؤود... وأنت أولهم... ودمت...
كيف الحياه غير ليمك في بعدك أصبح حظي زي لون هضليمك يا نعيم الدنيا يا حليف الخدري التايه في نعيمك ما دام هاجرني أرسل لي نسيمك و أنعش لي روحي بندى جسيمك أو طيب المسك الفايح من تبسيمك يا أماني حياتي البيك نور إقليمك يتمنى التبري يلمع كأديمك مشتاقه الشمس تظفر بي ليمك تاخد من نورك تلثم لي قديمك يا فرع البانه المايل في خميلك من قامتوا حبيبي متعلم ميلك يا البدر التم ما بتم تكميلك لو ما تجعل لي محبوبي زميلك سيوف الهندي من لحظة عينك ليه بيها تصيبني إيه بيني وبينك غير كوني بريدك و حياة خدينك كف عني صدودك يا روحي و بينك ليك حق في صدودك و تيهك و تذليلك ليك حق تهجرني ... و يكتر تعليلك ما دام فردي ... على جيلك تمتاز بالعفه المانعني أجيلك مع صدك و هجرك لا زلت أريدك و منام عيني بين حظوظ جيدك تيه بي نعيمك مولاي يزيدك ضيعت حياتي تسلم لي إيدك
07-31-2007, 08:50 AM
omar altom
omar altom
تاريخ التسجيل: 07-15-2007
مجموع المشاركات: 921
تآآآآآآآآآآآني جبتي ليك غنية ح تخليني قاعد في البوست ده وما ازح من جنبو!!!!!!!!رائعة عمر البنا (كيف الحياة غير ليمك) من درر الحقيبة وتغني بها عدد كبير من المغنيين قبل عبد العزيز ولكن لما غناها زولنا ده سيد القصيدة(ود البنا)-والعهدة علي الراوي- حلف يمين مافي زول يغنيها بعدعبد العزيز وقال كأنو بيسمعها لاول مرة!!!شفتي الجمال ده كيف؟؟؟خسرانين نحن الما حضرنا الايام ديك وهسة قاعدين هنا في آخر العالم وما فاهمين اي حاجة!!!!!
شكرا كثيرا يادكتورة( you made my day )وشكرا كمان لي متاهة بكري ابوبكر الالكترونية الخلتنا نتقابل هنا.........ونحكي عن عبد العزيز...
تحياتي
07-31-2007, 08:07 PM
نها محسن أبورأس
نها محسن أبورأس
تاريخ التسجيل: 04-04-2007
مجموع المشاركات: 856
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة