|
للأغبياء فقط ...عفوا ...الاذكياء..يبتعدون او يمتنعون
|
جاوب بصراحة:
هل انت محب للشمارات ؟؟ هل فضولك يدخلك احياناحتات ضيييييييقة ؟؟
الاجابة بكل بساطة نعم. انت كذلك وإلا لما دخلت الى هذا البوست برغم انه معنون للاغبياء فقط (ما تمد بوزك).لحظة من فضلك هناك احتمال ثالث:
وهو انك انسان والانسان بطبعه يميل الى اكتشاف الاشياء لذا دفعتك غريزة المعرفة الفطرية الى سبر اغوار هذا العنوان العجيب (ريحتكم دي عارف).
ما دفعني الى التساؤل حول مدى فضولنا وحبنا للشمارات قصة عايشتها وانا طالب بالثانوي العالي اليكم تفاصيلها:
كانت المحطة الوسطى بحري تغلي من درجة الحرارة واكتظاظ العائدين الى بيوتهم مع انتهاء الدوام اليومي موظفون, عمال, طلاب وغيرهم من السائرون بلا هدى وفجاءة وبلا مقدمات (دورت شكلة ليها ضل) بين اثنين من الكاظمين الغيظ استخدمت فيها كل الوسائل الادمية المتاحة لالحاق الاذي بالاخر من لكم ورفس وعض وخلافه. تجمهر حول المتشاجرين خلق كثيرون باصرار عجيب على متابعة الحدث من اقرب نقطة لمستوى النظر.وبدأت ساحة العراك تتنقل بين الاكشاك صعودا وهبوطا والرهط المتجمهر معها من المتنقلين.الى هذا الحد والامر لايثير الغرابة؟؟؟؟ ولكن بعد قليل من احتدام العراك بدأت الكفة تميل لصالح احدهما ..فأسلم الاخر ساقيه للريح (بعد ان قال الروووب).. وابت زهوة المنتصر الا ان يطارده فهرولا ..وهرولت خلفهم الجماهير زاحفة بإصرارها العجيب على متابعة الحدث من اقرب نقطة لمستوى النظر حتى ميدان عقرب (لاحظ المسافة) حيث احتمى المقلوب على امره باحد البيوت الطينية البسيطة هناك ووقف المنتصر يردد كالمعتوه وانفاسه تتلاحق: (ما قلت راجل تعال تاني) ثم التفت الي المتجمهرين مأخوذا بنشوة النصر وكأنه يبحث عن ضحية اخري صائحًا: وانتم مالكم في شنو انتو ما عندكم شغلة ولا شنو؟ وتراجع الجميع القهقرى.اكاد اجزم بان كل من كان في انتظار المواصلات في المحطة الوسطى قد هرول حتى ميدان عقرب بإصرار عجيب على المتابعة الدقيقةوانا منهم (اي والله). بعد ذلك بدأ الجميع رحلة العودة من حيث اتوا والعرق يسيل مدرارا وابتسامات بلهاء مرسومة على الشفاه الجافة..وازدادت حرارة شمس مايو من فوق رؤوسنا وكأنها ساخطة علينا ولسان حالها يقول: (بتاعين شمارات دي امة دي).
هؤلاء نحن فضوليين بالفطرة لذلك احييكم على مروركم الشمورتي الكريم نورتم البوست.
على فكرة هنالك مجموعة اسئلة مرت بالخاطر: ما هو الفرق بن الفضول وحب المعرفة (الكتل الكديس)؟. وما هو الشمار ؟ من اين جاءت الكلمة ؟ وهل هو ضار بالصحة(ناس القرحة والمصران العصبي)؟وماهو تأثيره على العلاقات الانسانية؟ هل هو سلوك ام ظاهرة؟. وهل نحن كسودانيين فضوليين لدرجة قف ام ماذا نسمي ما يحدث من تجمهرات غير مبررة لمجرد حدوث شئ طفيف؟؟؟؟؟؟.
مودتي محمد
|
|
|
|
|
|
|
|
Re: للأغبياء فقط ...عفوا ...الاذكياء..يبتعدون او يمتنعون (Re: mohmed khalail)
|
محمد خليل أنا غايتو جابنى الشمار، لكن شايف في (36) نفر تاوقوا وكسحوا، إحتمال ما يكونوا أعضاء، لكن الشمار ما ذاتوا خشم بيوت وقيل أن أجمل الشمار ما قيل همساً، وأعتقد أن الشمار كلمة لا تحمل (ذنباً) مثل كلمة القطيعة.
وأظن أن أغلب السودانيين بيحبوا الشمار (موت)، والواحد تكون بتتكلم معاهو في موضوع جادي يقو فجاءة يقول ليك (ياخى كدى خليك من كلامك دا خش لينا في الشمارات.
أنواع الشمار: 1- شمار عادي (ويبدأ دائماً بكلمة سمعت الحصل) 2- شمار تقيل (وميزته أن ناقل الشمار غالباً يبدأ بتحديده فيقول "عندي ليك شمار تقيل" 3- شمار حارق (الواحد يقول ليك عندى شمار محرقنى عايز أقولو ليك) 4- شمار سياسي ( ومن علاماته أن يتم نسبه لمصدر مقرب مثل (يا زول ما تسمع كلام الجرائد دا نحنا عندنا جارنا شغال في القصر قال لي ............. حتى نهاية الشمار)
وعلى العموم لنا عودة وما تفوتونا الشمارات
| |
|
|
|
|
|
|
Re: للأغبياء فقط ...عفوا ...الاذكياء..يبتعدون او يمتنعون (Re: الصادق اسماعيل)
|
ود اسماعيل
حباب طلتك وكيف شمرتو يا الحبان والله الجماعة التاوقو ديل خايفيين اخشو تثبت عليهم التهمة لكن احييك على شجاعة الاعتراف وبيني وبينك الشمارد ده عايش في عروقنا ومتغلغل في شرايين المجتمع لدرجة انو في اغنية مشهورة بتقول
الشمار تقيل انا تاني ما بجي فوق الحلة ديك انا تاني ما بجي
وأحلى حاجة تصنيفك للشمار لكن نسيت نوع مهم جدا وهو الشمار الضااارب اها اقول ليك واحد شمااار ضارب: هسي في البوستات دي قالو نانسي عجاج حتغني في استقبال سفير السودان في السويد على ما اظن لكن الحمد لله نفووه بسرعة ده لو قعد لي بكره كان طلعوها عاملة جولة عالمية للغناء لسفراء الانقاذ
والى شمار قادم يا نبييييييل
| |
|
|
|
|
|
|
Re: للأغبياء فقط ...عفوا ...الاذكياء..يبتعدون او يمتنعون (Re: مبيوع)
|
مطربنا النبيل الاصيل ود مبيوع
حاشاك من الغبى والغبيان
واوافقك تماماً بأن أسوأ انواع الشمار ما يكون مصدر للرزق ده بقى اظنو شمار مع سبق الاصرار والترصد ويستحق العقوبة بالتوقف عن التشمير مدى الحياة. لكن في مثل هذه الحالة سينام الاذكياء ملء جفونهم وتكتظ الشوارع بمظاهرات البقية الباقية.
ولك يانع الود بلا شمار وكسبرة على مرورك المعتق
| |
|
|
|
|
|
|
Re: للأغبياء فقط ...عفوا ...الاذكياء..يبتعدون او يمتنعون (Re: mohmed khalail)
|
العزيز محمد
غايتو أنا جابني الشمار الحار(حار دي لزوم التقنين) و بيني و بينك معجبة جدا بكلمة شمار علي ما أظن كان في موقع اسمه شمارات.كوم عملت ليه قوقله سريعه و ما لقيته ما بتزكر المادة الفيه ربما تكون السيرة الذاتية للشمار. شكرا علي البوست الكامل الدسم و الظرف الأتاح لينا الفرصه للتعبير عن مدى الاعجاب بكلمة شمار (وجه ميت من الضحك) و ان شاء الله تكون بطلت فضول في الشمس الباردة
و الابتسام الويك اندي في ميزان حسناتك
فردوس
| |
|
|
|
|
|
|
Re: للأغبياء فقط ...عفوا ...الاذكياء..يبتعدون او يمتنعون (Re: Firdouse)
|
الجميلة فردوس شما الخير
دايما اقول لي روحي الفردوس المفقود شاعرة رقيقة تاية في نورث كارولينا بين القراءة والقراءة. عن تساؤلك
(و ان شاء الله تكون بطلت فضول في الشمس الباردة)
اقول ليك حاجة الفضول ده زاتو القاد ناس نيوتن واديسون و اينشتين وابن حيان والفريد نوبل وجرهام بل ومدام كوري وغيرهم للاكتشافات العظيمة والرفاهية النحن فيها دي يعني الناس ديل لو ما شمورتيه كنا لسه نحن عايشين في عصور الظلام.
لكن بيني بينك انا فضولي يتناسب عكسيا مع تقدم السن.
مودتي
Quote: و ان شاء الله تكون بطلت فضول في الشمس الباردة |
| |
|
|
|
|
|
|
|