يا جماعه أنا لى خمسه شهور وشويه ما عارف انا وين و لا عارف الليل من النهار والله من يوم طلعت من السودان ولحدى الليله ما عارف روحى بعمل فى شنو المهم عذاب وجروح وألم مابتحكى وبرضو عملت عمليه ولازول من ناس البورد نزل بوصت بسأل منى ولا حتى أصحابى ما قالو عنى حاجه ولافى زول سعل منى حتى من باب كسير التلج مع انى كنت بسأل عن الناس فردا فردا ومرات بدخل البورد لكن بكون عندى عشره دقائق لانى كنت منهك وعيان وشفت الموت لكن والله حز فى نفسى انو عندى أصحاب كميه لاستهان بها ولا واحد ما سأل منى وأخس باللوم بورداب السودان الشقيق من الداخل كنت زعلان شديد وقربت أكسر اليوزر نيم بتاعى وباصوردى وبرضو زعلان من بكرى عشان مابتفقد الناس المهمين لمن يغيبو والله تلاته انا كنت قايل نفسى مهم لكن اكتشفتا ليكم انى زول وهم ساكت والحاجه دى هسى منزلا روحى المعنويه بصوره ما تتخيلوها لكن تانى رجعتا لقيت أنو فى زول واحد إتزكرنى وهو أساسى والله شكرن يا زول لكن ما كانت محريه منك المهم أنا هسى جيت راجع وأى زول كان صاحبى زمان محيتو وبدور اصحاب جدد وأخص بالذكر الجنز اللطيف شايف فى وشوش جديده ظهرت بعدنا نرجع لى موضوعنا الرئيسى خم الرماد التعريف : خم الرماد هو شفقه بتحصل عندما يقرب شهر رمضان وفى رواية أخرى هو أخر يوم فى شعبان إختلف العلماء فى كونه التلاتين أو التسعه وعشرين من شعبان لكن اهل الوسط يفضلون يوم تسعه وعشرين للضمان ويقولون من الأفضل عشان لو طلع رمضان اليوم البعدو طوالى كان خيروبركه لكن لو طلع شعبان تلاتين يوم يكون زيادة الخير خيرين لكن معظم المقالب حصلت للناس البفضلو يوم تلاتين لانو مرات كتير تحصلهم كفوه ومرات ينطليهم عمك شداد بعد تسعه بالليل يقلهم رمضان كريم وكل عام وانتم بخيروأعاده الله علينا وعليكم بعرف واحد صحبى من أمدمان حصلت عليهو الحكايه دى كم مره المهم خم الرماد مصطلح ثقافى فى السودان وهو باختصار كده عمليه شفقه فى إغتراف اللذات المحلله وفى كتير من المرات غير المحلله
09-12-2007, 04:58 AM
WAD ELGAALI#4
WAD ELGAALI#4
تاريخ التسجيل: 07-11-2002
مجموع المشاركات: 2036
مثلا رمضان الفات حضرتو هنا عندى صاحبى إسم وياسر فى حلة جنبنا مخطط يجينا يلاقى حبيبة القلب فجأة ضرب لى تلفون ياخى انا ما حقدر اجى فكلم الجماعه لانو انا ما بقدر قلتلو ما لك يازول انشاء الله المانع خير قالى والله الحيوان بتاعى دا ابى يدينى اذن وفى كلامنا كدا انا بعاين فى التفزيون قلت ليهو يازول باكر رمضان قال الحمد لله من جوه قلبو وقالى تعرف دا أول رمضان أفرحبو للدرجه دى والله حيرنا نواصل
اخوى ود الجعلى سلامات ورمضان كريم والله انا دخلت البوست ده عشان شفت اسمك فعلا طولت الغيبه وانت من اكثر الناس الكنت بتابع كتاباتهم الف الف سلامة عليك ما تشوف شر ان شاء الله وكل سنة وانت طيب رمضان كريم عليك ربنايعيد عليك الشهر بالخير والصحة والسلامة لك كل المنى ولك العتبى نيابة عنى وعن كل المقصرين فيك وزى ما قالوا اهلنا اللوم بجى بالغفلة .. حقك علينا والله وده شهر توبه ورحمه ومغفرة وانت كماعهدناك حنين واصيل وكريم عشمانين فى رضاك وكل سنه وانت طيب يا ود الجعلى يا اخونا
اسماء الجنيد/ مسقط
09-12-2007, 01:01 PM
انعام حيمورة
انعام حيمورة
تاريخ التسجيل: 06-29-2006
مجموع المشاركات: 11094
Quote: يا الله !!!!!!!!!! عابد !!!!!! والله انا سالة عليك ومن جيت من الامارات اقول ليهم عابد ما خلى ليكم رقم تلفون ما خلى ليكم عنوان ما بعرف شنو ؟؟؟ والله سالت لكن ما لقيت اجابة من زول ... الحصل عليك شنو ومالك ... بالجد انا عايزة اعرف اخبارك وسلامتك وآخر حاجة انا خليتك ماشي الدوحة تتذكر لكن قلت امكن رجعت لامريكا .. المهم انت هسي وين والحصل عليك شنو ؟؟؟ اتصل بي وتعرف مكانتك عندنا ما ساهلة 0914763741 انعام حيمورة كل سنة وانت طيب ورمضان كريم
غايتو بشهد ليك بي دي يا عابد و حتي بامارة الكريسيدا
هرتنا هري مما جات لمن سافرت في سيرتكـ .
09-12-2007, 01:16 PM
فيصل نوبي
فيصل نوبي
تاريخ التسجيل: 09-16-2005
مجموع المشاركات: 14194
فيصل يانوبى كيفك وربنا يعيد شهر رمضان وانت تنعم بالصحه والحب والهناء طبعا هناء دى بت خالى والله أسمح زول لاقيتو سماحة خلقه وأخلاق الجاب الكلام دا شنو أيوا أصلو كانت مجكسا ليها واحد استاذا فى الجامعه اسمو فيصل لكن ما حصلت قسمه المهم إتخرجت واشتغلت وبرضو جات عرست واحد اسمو فيصل فهسى اسمها هناء فيصل والناس خلو اسم ابوها نهاى الجميل فى الموضوع ابوها زاتو بقى يقولها هنا فيصل المهم يازول شهادتك فى نعومه رغم انها مجروحه لكن عشانك نقبلا ولك تقديرى
09-12-2007, 01:19 PM
انعام حيمورة
انعام حيمورة
تاريخ التسجيل: 06-29-2006
مجموع المشاركات: 11094
أختنا سوما والله مشتاقين وربنا يعيدو على الكل بالبركات وكيف أخبار مسقط وشايف فى كميه من الناس السمحه سجلت من مصقط فى فترة غيابى والغريبه كلهم شعراء الحاصل شنو انتو مصقط دى كانت مصقط رأس إمرؤ القيس والله الحاصل شنو بالله بلغى سلامى وحبى للحبيب محممد المرتضى حامد بالمناسبه انا مابعرفو ولو لاقانى فى شارع الله دا ما بعرفو لكن والله بريدو لى الله كدا بس لكى كل الود الشاعره أسماء وتحياتى للاسره
09-12-2007, 02:59 PM
WAD ELGAALI#4
WAD ELGAALI#4
تاريخ التسجيل: 07-11-2002
مجموع المشاركات: 2036
نعومه الحبيبه كيفك ياخى والله مشتاقين كميات لى الخرتوم لكن زعلان لمن داير اطرشق منكم ياخى ما تسعلو منى لكن أسوى شنو ياخى باكلا فى حنانى زى ما بقول أخونا المقدس منعم بالله عاملين شنو انتى بالمناسبه البنات بخمو الرماد برضو سلمى لى على الشباب فرد فرد وقليهم والله مكسر فيكم كلكم من نادى الضباط لى الالمانى لى شارع الجامعه لى نمرة اتنين لى شارع المشتل لى الهلتون وقولى لى الهلتون خوتك خوت كيبورد وبركه الدايرين يبيعوك وبرضو كل الصحف ودور النشر وأزهرى هاشم ومنعم وماسا وعاصم وزوبه وخدور وكرفس وطلال وقالو أبوزر عبدالباقى صاحبى بقى من بورداب الداخل بالمناسبه قريت كلامك عن المرحومه سهير أحمد حامد وفتح جراحى من جديد انا بالمناسبه عمها لزم ولشد ما آلمنى رحيلها ودى الجروح الذكرتها فوق حتما حاضرب ليك ] مع حبى وتقديرى
09-12-2007, 03:23 PM
manubia
manubia
تاريخ التسجيل: 04-21-2002
مجموع المشاركات: 1284
منوبيا كل سنه وانت طيب وربنا يحقق الامنيات البلاك ليبل دى نفرا شنو اخوك باقى مامسقف فما تضحك الناس فوقى أنا قايتو اتخيلتها حاجه زى التميس لكن عليك الله بغمسوها فى العسل والله شنو
09-13-2007, 08:29 AM
انعام حيمورة
انعام حيمورة
تاريخ التسجيل: 06-29-2006
مجموع المشاركات: 11094
عابد .. الف حمد لله على السلامة وانشاء الله البركة فيكم في سهير ياخي شوف الزمن دا كيف والله سهير دي الله يرحمها من اعز اعز صديقاتي وبالجد فجعت فيها جدا ربنا يرحمها ويتقبلها وناس سهير ديل عشرة سنين ..
والله يا عابد اتذكرتك يوم ماشين نودع غادة نوري في المطار وقبل ما نمشي المطار جبنا فتة الفول من ابو خليل انا وماسا وسمرية وحكيت ليهم عن اليوم دااك ..
الف حمد لله على سلامة غادة كمان ...
حا ابلغ تحاياك خاصة لعبد المنعم بعد ما يجي اصلوا قالوا الايام دي في الشرق !!
تحياتي وفي انتظار تلفونك
رمضان كريم وكل سنة وانت طيب
اما حكاية خم الرماد عندنا العشاء بشكل دسم قبل رمضان بيوم .. وفي السنة الفاتت خمينا الرماد برحلة لجبل اولياء ..
مودتي
09-13-2007, 09:17 AM
Rawia
Rawia
تاريخ التسجيل: 11-23-2002
مجموع المشاركات: 8396
نعومه تانى انا طبعا سهير الله يرحما ويغفر ليها ما شفتها من سنة سبعه وتسعين لكن إجازتى الفاتت لاقيت عزو وروضه وأحمد لمن مشيت لهم فى البيت المهم يازوله كترى ليها من الدعوات فى الشهر المبارك دا والله يا انعام لولا انو الموت حق علينا لما ضحكت يوما بعد رحيلها فاذا كان دا حالى انا ما شفتها عشره سنه فكيف يكون حال أمها وابوها وأخوتها وزوجها والود الصغير حيقول ماما لى منو يا انعام بالله يا انعام الدنيا دى مش تافهه يازوله والله مقدر حزنك وانا حضربليك السبت بإذن الل
09-13-2007, 08:44 AM
قرشـــو
قرشـــو
تاريخ التسجيل: 02-05-2002
مجموع المشاركات: 11385
لك التحية ورمضان كريم وربنا يقدرك على صيامه وقيامه ويتقبل منك صالح اعمالك ويجعلك من معتقيه من النار ....
والله ياخوى ما عندنا وش كله كله نتكلم معاك وغايتو انا اتضاريت بالتهنئة الفوق دى لكن اكضب عليك ... والله ما سألنا حقيقى لكن هنالك سبب انا مما جيت ( برضو غبت غيبة طويلة ) لقيت الناس كلها عملت شتات ناس حردانيين وناس مضربين وناس اخونا بكرى خرتهم عدييييييييييييل كده ونزع باس ووردهم ما عارف لقيت الحكاية عجيبة وبينى وبينك الواحد خايف يسأل من زول ( ولانى لم احضر الوغى) يكون الزول البتسأل منهم سوى ليه بلوى كبيرة ويقوموا يصنفوك انت ذاتك معاه ... ناس البورد ديل كده بلخبتوا الكيمان والله .. غايتو يازول الحمد لله على سلامتك وقالوا المرض زكاة الجسم والحمد لله انك بخير وعلى خير
اما اخونا اساسى والله اشهد ليه زول قدامى والزيه نادر والله ( ده ما كسير تلج ليه ) والله يديه الصحة والعافية
منور البورد يا سيدى والله يديك لامن يرضك من الدايرو ..... قرقر قرقر قرقر قرقر
مع مودتى
09-13-2007, 08:45 AM
انعام عبد الحفيظ
انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: كلمة "خم" أما قد تعني شيل وتحميل ولم كل ما يمكن «خمه» مثلاً فلان دا كاتل الجدادة وخامي بيضها كلو، والرماد الولدته النار والكال عمنا حماد بتاع الخيل المجقلبة يعني عادة نهاية الأفراح وبداية الأحداث حيث تصيح النائحة الليلة سجم خشمي واااارمادي، ويقولون فلان دا سجمان ورمدان، ومصطلح خم الرماد الأيام دي ماسك الجو نحن خامين الرماد واها يا جماعة ح تخموا الرماد وين؟ هل يعني نحن 11 شهر ماكلين شاربين في يوم خم الرماد ح نخم في بطنا البكفينا طوال الشهر، وسألنا عن الاستعداد لشهر التوبة والغفران هل بي لحن متجرسين ومفلسين ولا بي لحن يا شهر الصيام شرفتنا.
هل شعبان شهر الجرسة والزوغان؟ لأهلنا بساطة وعفوية وأريحية ولهم حياتهم الخاصة في الريف قد يكون الجهل بالأشياء، وهو أحياناً خير من المعرفة التي تغير العادات والتقاليد كما يظن البعض.. سبباً في كب الجرسة فيسمى شهر شعبان وهو كما يقول مولانا محمد الحسن الخطيب شهر عظيم وفيه الحسنات مضاعفة وينبغي فيه الإكثار من الدعاء والصيام وهو أفضل تدريب لاستقبال شهر الصيام. يسمى عند حبوباتنا كما حدثتنا الحاجة آمنة محمد الفكي بشهر قِصيِّر لأنه يمر بسرعة بسبب التجهيزات من عواسة الآبري الأحمر أو الحلو مر والآبري الأبيض وارساله للمغتربين في البلاد البعيدة وشهر شعبان أو قِصيِّر لأن الخوف من رمضان في الخرطوم الحارة ومسخنة جداً في ناس بسووا خم الرماد، ومن المفارقات الطريفة أن شهر شوال يسمى الفطر وبعده الفطرين، يعني تعويض للثلاثين يوماً، وبعده الضحية ثم الضحيتين، وكلها شهور أكل وشراب، ثم الويحيد، وبعده الكرامة شهر حلاوة المولد، ثم تاني الكرامات، وبعده ثالث الكرامات، ونحن الآن في نهاية قِصيِّر في أيام تسمى أيام خم الرماد ويختلف الخم حسب ميول وثقافة وفهم الزول الخامي.
البصل الأبيض لليوم الأسود * الخالة ست البنات ادريس خم الرماد خاص بيها هي وبقية الحريم هو خم العدة من السوق من جكاكة وجرادل وكبابي وصحانة إضافة للبهارات والشربات مثل الكركدي والعرديب والقنقليز، وقالت بنشتري البصل ونقطعوا وننشفوا قبل رمضان لأن سعره بزيد وشكت من أن السكر بقى غالي وهو أساسي في رمضان، وقالت أهم شيء دقيق العصيدة والبليلة، وقالت مرات بخش ختة صندوق بتقع لي الصرفة مع رمضان أما العشاء الأخير بس مديدة دخن والسحور بي نشا. * ولعله يحصل أحياناً خم رماد كثير في بعض المؤسسات يبدأ في شعبان تحت مسمى الإفطار الجماعي للنقابة الفلانية أو لناس فرتكان حيث يتم أحياناً خم التكلفة من الناس الجايين الفطور وحتى الناس الفاطرين.. ولعل ظاهرة الإفطارات الجماعية الفيها كتير من البذخ والبذار بقت واحدة من العادات الضارة التي ينبغي التقليل منها بتقليل الخم وهنا كتير الرماد ما بينفع أفضل شيء الخم دا يمشي للناس الرايدنو ومحتاجين ليه.
أنا زول عيان جيبوا لي فطور: * في بحري وقفنا عند ناس عماري الجمري وقالوا إن التمباك ضار بالصحة وسبب في الجرسة وناس يسموه الدهب الأسود وبقولوا إن سفة مع السحور تنسيك الفطور. * فواز، صاحب طبلية قال إن شراء السجائر والتمباك ح يقل في رمضان وانو في ناس يشتروه الأيام دي كتير جداً. اما عمنا محمد الخير قال لي زمن وقفت شراب الشاي خاصة شاي الصباح ووقفت الجبنة لأنها أيام بتعمل للواحد صداع ويتمنى زحمة المواصلات تخف عشان ما يفطر في الشارع. * وفي ناس من يجي رمضان يعملوا فيها مرضانين ويباروا الدكاترة وعشان يطلعوا ليهم رخصة ودا برضو نوع من الجرسة. * ومن الاستعدادات تلقى ناس في الحلة يخموا في التراب ويرصوا في الطوب عشان يعملوا زوايا صغيرة في الشوارع عشان فطور بره لأي زول عابر سبيل وهو من الايجابيات البقت تختفي شوية شوية من الحارات. أها يا جماعة خميتوا الرماد ولا لسع؟ * جويرية شيخ الدين سألنها تعرفي شنو عن عادة خم الرماد قالت دي عادة سودانية قبل كل شيء وغالباً تكون آخر جمعة في رمضان أو آخر يوم في شعبان ودائماً في شكل أكل كميات كبيرة من الطعام وبعض الناس يستغل اليوم في ممارسات لا يمكن ممارستها خلال رمضان.. وأنا أحب أخذ صورة من صورها وهي الرحلات الجماعية مع تناول المشروبات المعروفة. اما محمد حامد الهادى قال : اتمنى من طلاب الجامعات الالتزام بالعادات والتقاليد السودانية السمحة فى يوم خم الرماد وعدم القيام بالممارسات غير الاخلاقية ويعرفوا ان اللة وراهم وشايقهم . * أما اسمهان عبد الله قالت رمضان الفات كنا في الداخلية وقلنا نتعشى بدل الفول والعدس عشوة سمحة ونخم الرماد بي أكل تمام المشكلة صاحبتنا ميادة مشت السوق اشترت لينا سمك بعدما عملنا ليها شيرنق وصبحنا أول يوم في رمضان عطشانين وريقنا ناشف السنة دي لو خمينا الرماد ح نعمل عصائر. * أما مبارك الهادي السيد فقال نحن ح نمشي شلة سوق الناقة ونضرب اللحم وأنا أفضل خم الرماد بي الباسم أو بالكوارع وعليها كمان باسطة وطوالي النوم. * أما الأستاذ نادر عثمان قال ح يخم رماد حفلة الفنان محمد الأمين.. نفس الخم قالته زميلته حنان اسماعيل لكنها تفضل أي فرقة كوميدية مثل تيراب.. وآمال حسين قالت معزومة رحلة في شمبات وواحدة في ود العقلي في الكلاكلة وما عارفة تمشي وين. * سفي ام درمان حي الملازمين شباب في دافوري مسخن قال أيمن بدر الدين الواحد يجري دمو وينشط لانو زي المواعيد دي لياقة مافي وتاني ح نعمل دورات بالليل غالباً بعد التراويح.. أما تامر معاوية قال نحن جاهزين موية ونور وخامين الرماد مع الفرقة الاثيوبية لأنو دي آخر «جبجبة» تاني ممنوع إلا بعد العيد. * أنس سليمان قال ح يخم الرماد في بورتسودان لأنو مسافر فالآذان هناك قبل آذان الخرطوم وانو ناوي يسافر عمرة وبعدها زوغة ويمشي يشوف خم الرماد بتاع ناس العقالات كيف. لحن الختام: * وتبقى ظاهرة خم الرماد والاستعداد لشهر رمضان بكل محاسنها وعيوبها ظاهرة سودانية.. تحية لناس مجلس الإفتاء وهم في انتظار الهلال بكل امكاناتهم ونسأل الله الصحة والعافية لكل زول غير صائم بعذر شرعي والهداية لأي زول جرسة ومستهبل.. وما ننسى أهلنا ناس الاذاعة والتلفزيون وهم قد استعدوا لشهر رمضان كما يستعد فريقنا القومي للمنافسات الخارجية ويظهر ح يخمونا ساي السنة دي... ومع السلامة تصوموا وتفطروا على خير وتحية لكل مسكين وشحاد قدام الجامع الكبير ولو داير تعرف عددهم كم أقيف قدام الباب وقول بأعلى صوتك يا الصايم ديمة شوف ح يجيك كم نفر. ----- منقول من صحيفة الصحافة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة