|
الأسلحة الكيميائية وحقيقة استخدامها في السودان في منتدى ميديكس للحوار
|
|
 Re: والله مشتاق للمة اهل زي دي.. والعز بالاهل! (Re: ايوب عبدالرحيم)
|
العزيز ايوب
يا حليل السودان الجميل اللي كانت كل ايامو حلوة زي دي!
شوف الناس دي ملمومة وودودة كيفن ومليانة حنية وسلام!
الله امين يا ايوب وبالذات انا زول ربيان قرى وحلال يعني
زول(ريفاني) قح وكل مناسباتنا كانت زي دي اخوات وبنات وخالات وحبوبات وعمات
وجارات واعمام واخوال واخوان ووووو!
مودتي
| |
 
|
|
|
|
|
|
|
 Re: والله مشتاق للمة اهل زي دي.. والعز بالاهل! (Re: Magdi Ahmed Elsheikh)
|
الاخ هشام
لك التحيه...
فعلا العز اهل ,,,
ومشتاقين كتير لارض الحنان...
وعز الاهل....
للجلسه ديك وقت العصير...
تحت النخيل
في القيفه جنب البحر...
والهمبريب ضاربنا تب...
والساقيه بهناك تدور...
والطنبور يقول...
ياناسي هوي العز اهل....
ناسا نضاف من جوه تب....
ماشالوا جواهم ضغينه....
قلوبم حنينه...
ويضمك الصدر الحنين..
ياوليدي ياجنا حشاي...
تعال اضمك جواي...
مانت ما ود قساي..
وانت ضوء القبيله...
اشتقنا ليك..
واشتقنا ياناس للزريبه..
ياوليدي هوي قوم..
قوم قوام...
قوم اسقي البهايم واحلبم..
وجيب اللبا...
وجيب اللبن...
نسوي شاي المغربيه...
دخل علينا ود الخزين...
داير شنو يا جناى...
رسلني ليكم ابوي الخزين...
وقال ليك ياعم حسين...
حرم تجي مالليله كرامة بت فطين...
وجيب معاك اولاد بابكر...
واتلموا ناس الفريق..
بدون دعوات الكروت...
اتلموا في السهله قدام الراكوبه....
معموله من سعف النخيل..
وتسمع النضم السمح...
وتجيك زغاريد الفرح...
مالليله كرامة نوارة الفريق..
بت فطين الراسيه وعزيزه...
والدلوقه دقتا بت عديله..
وغنن البنوت كمان....
غنا حنه وضريره...
وغنوا لاولاد القبيله...
ووسط الداره....
قامن بنات العز للرقيص..
وعاد شوفو الرقيص الما خمج...
مارقيص زمن الخراب..
رقيصن عفيف ..
عفاف اهلنا المشو ...
وخلونا للشقي والعذاب....
وادن الشبال لاولاد القبيله..
ما هم رجال..
رجال رجال..
واقفين رجال..قاعدين رجال...
وحرم رجال
وهم اصل الرجوله.
يلاقوك بشاش وطيبه وحنان..
ووقت الحاره...
هوي ياوليد اقيف...
ديل راكزين عديل
اهلنا الغبش عيون حمر..
ماشايلين بنادق ولا كلاش...
بس عصايات مكان...بضم الميم
وماشين قدام...
مالي وراء..
مابهابو موت ...
لكن دايرنو تب..
ومابدورو الدنقير لي تحت..
رافعين الراس لي فوق دوام...
والبحني راسو..ما ضوء قبيله..
والله مشتاقين..كتير
والشوق مطر لارض الوطن...
لعز الاهل وعز القبيله...
اشتقنا ياولدي كمان..
لي ضل الضحي..
قاعدين في حوشا وسيع...
في عنقريبا سمح...
ومرقو متين...
وحبلو قوي,,,
فتلو حسن ود حسين...
والقهوه جات كمان..
واتعدل المذاج...
قلت بنها ام الحسن....بنها بضم الباء
وقام البخيت لجنو داك...
ما هو دوباي الفريق....
يدوبي لينا دوبايو السمح...
دوباي اهلي العزاز...
اهلي الحنان...
والماعندو عز يشرب من موية البحر
اخي هشام جات كده وبدون رتوش الساعه واحده وخمس وعشرين دقيقه 6/4/08.
.بالرغم انو لسه متوعك وخرجت اليوم من المستشفي بعد وعكه المت بي امس.
لكن ده جاء نتيجه للعنوان للشوق للمة اهل زي دي والعز اهل فقد لمست وتر حساس
واختلطت بمداخلة الاخ د.طارق في بوست منتدي الذكريات بكلية الطب ج الخرطوم زمان
بالسؤال عن صحتي في نفس الزمن فاختلطت هذي بتلك وكان ما كتبت ومواعيد الدواء
وان شاء الله يكون ليها وقع عندك ووالله كتبتها وما قريتها واستاذنك ان انقلها
كده لبوست منتدي الذكريات بكلية الطب ج الخرطوم زمان...لانها ولدت هنا
واستغفر الله لي ولكم ونلتقي ان كان في العمر بقيه
| |
|
|
|
|
|
|
|
|
|
Re: والله مشتاق للمة اهل زي دي.. والعز بالاهل! (Re: Magdi Ahmed Elsheikh)
|
العزيز دكتور مجدي
سلامات
يا زول شكرا علي الكلام البرد الروح ده والبسفرنا توووووش لاهلنا في الزمن السمح
دااااك وداااك زمن حالة ما سمح يا مجدي تخيل انو حتى الذاكرة ممكن تخزن اشياء لا تحس الا بالشم يعني ممكن اتذكر(شميا) ريحة نوار النيم او ريحة الدوم والنبق .... ريحة دعاش صباحيات...حتى ريحة (زبالة) وريحة(فرير دمور المسخ الارياح) وممكن تذكر اشياء تحس بالاستطعام باللسان....طعم ملاح ويكاب...طعم عجور وتبش بالشطة والليمون وطعم شاي الصباح بلبن(مقنن) من كنتوش حبوبتي بت عسمة..يا الله...!
شكرا مجدي
| |
|
|
|
|
|
|
|
|
|
Re: والله مشتاق للمة اهل زي دي.. والعز بالاهل! (Re: هشام هباني)
|
ضل الضحي الرامي ..... وشمس شتوية دفاية
وريحة البن ... لما يفوح في قلاية
وفروة جدي .. صورة جدي .. لمن جيت أمد يدي
وجدي ... أديني تعريفة .. (( بتقراء الحمدو يالمبروك ))
بقراها
وشأن تعريفة ألقاها ... بجود في القراية كمان
وإيه يا يمة والله زمان ...
مشتاق يا يمة لي ملاح النعيمية ...
وريحة صاجك المحروق ... لما تسوي طعمية
وغباشة روب ... وعنزة حلوب
بدور أرحل أجيكي هناك
ضاقت بيا يمة هنا
بدور أتمسي بعيونك ... وأ صابحك يا حبيبتي أنا
صباح الخير علي عيونك ... أتاري الدنيا من دونك
شينة ومرة ما بتندار
دي مرة مرارة يايمة ... دي مرة وحارة ذي النار
ولو بدوري أحكيلك عن أحوالي في البندر
من وين عايزة أحكيلك
من وين أبداء بس من وين
دة شيتا كلو شين في شين
هنا الزول العديل ونصيح ... وحاتك إنت يا الغالية
بعيش حياتو يوماتي بي وشين
وزولتي الحتة حبيتها ... لقيتها براي تحب زولين
وإيه يا يمة ... والله زمان ... وأنا والحزن متواعدين
شرابنا المر .. طعامنا المر ... ونفرش من رصيف الذل ... فراش وغطي
وقرايتي الجيت أنا عشانها ..... مرات بمشي للجامعة ... تمامة عد
مخنوق يمة داير أموت ... ناس تاكل في بعضيها ... ناس أشباها ذي الحوت
أخيرا أرجع أجيكي هناك ... ضاقت بي يا يمة هنا
بدور أتمسي بعيونك ... وأصابحك يا حبيبتي أنا
صباح الخير علي عيونك .... أتاري الدنيا من دونك شينة ومرة ما بتندار
دي مرة مرارة يا يمة ... دي مرة وحارة زي النار
وقشة عيني من النوم .... بشيلها معاي هموم باكر ... قبل ما أبداء هم اليوم
أختها خطوتي الأولي أعدي الباب ... تبداء تدق طبول الهم
خواطر تذهل الألباب ... وأقابلك يا شوارع الجن ... أشد وتر الحزن وأعزف
تموت غنواتي يا يمة ويخنقني الغنا وأنزف .... خيال بيتنا الحنين يرجف
خيال بيتنا القديم يهتف .... صور تنزاح وتتلم
وأشوفك بي خيال حالم .... تشاوري و ترقص السبحة ... ملامح العابد الصايم
تشع فوق جبهتك سمحة .... وشيبك يحاكي ضي النور ... مزدان يمة في الطرحة
وتبسم لي ... أمد إيدي ... أقول أتلافاكي يا السمحة
يتلاشي الحلم وأصحي ... ويتقطر عرق مالح ... وزي عصفورة منجرحة
فارقت الفضا البارح وإيه يا يمة .... والله زمان
وهم .... كل المدن وهم .... وهم غرقانة في زخم الحضارة الغم
حضارة بتحصد الإنسان وتزرع في مكانو الغم
وقصر القول
شايل اللوم ............ ويوما جابني للبندر وحاتك إنتي يا الغالية ... دة يوما شوم
ولابسني الخجل ... من راسي لي كرعيا ... شايلو و أحوم
وهادي الحالة في الخرطوم ... بس عايش ... شقي ومهموم
وإنت .............
الله يسلمك
أمي الله يسلمك
ويديكي لي طول العمر في الدنيا يوم ما يألمك
أمي ( دار السلام )
يا حصني لو جار الزمان
ختيتي في قلبي اليقين ... يا مطمناني بطمنك
خيرك علي بالحيل كتير ..... يا مرضعاني الطيبة بالصبر الجميل
يا سعد أيامي لو درتي قلبي أسلمك
أنا مهما أفصح عن مشاعري ... برضو بيخوني الكلام
وقولة ( بحبك ) ما بتكفي .... وكل كلمات الغرام
يا منتهي الريد و مبتدا .... إنشأ الله ليا يسلمك
ويديكي ... لي طول العمر .... في الدنيا يوم ما يألمك
هشام اخوي هذا هو ولدكم ود النيل الابيض قد عبر عن احاسيسنا
( أمي الله يسلمك ) ......................... التجاني حاج موسي
مودتي
ود البرعي
| |
|
|
|
|
|
|
|
|
|
Re: والله مشتاق للمة اهل زي دي.. والعز بالاهل! (Re: هشام هباني)
|
العزيز هاشم هباني
تحية وتقديرا
هذا الشوق العارم الجارف الذي تحمله بين جوانحك
لهو دليل على قلبك الكبير ( المليان حنية )
ربنا يرجعك لريحة الدعاش البسبق المطر
ويرجعك لي نخيلنا البطاول القمر
ولي بيلنا الجاري وديمة منهمر
الله يرجعنا لي اهلنا ولي وطنا واصحابنا وحبايبنا
| |
|
|
|
|
|
|
|
������� ��������� � ������ �������� �� ������� ������ ������� �� ������
�������
�� ���� �������� ����� ������ ����� ������ �� ������� ��� ���� �� ���� ���� ��� ������
|
� Copyright 2001-02
Sudanese
Online All rights
reserved.
| |
هشام هباني
ايوب عبدالرحيم
Magdi Ahmed Elsheikh
كمال علي الزين
Saber Abdelhadi
shaheen shaheen
منزول محمد توفيق
فيس بوك
تويتر
انستقرام
يوتيوب
بنتيريست