هل قال كمال الجزولي أن الحكم على المدرسة البريطانية"انه ليس سيئا"؟

Quote: المحترم عادل عاطى بصراحة تعجبنى جدا طريقتك فى (حك الاشياء ) والله زرزار زرزره !! تعجبنى ،، لكن لك التحية وح احاول توضيح بعض ما طرا على راسى وانا بقرا فى مداخلاتك الشجاعة انا سمعت تصريح الجزولى لى ناس البى بى سى بالحرف قال انو عدم الاستئناف لاسباب عملية وليست قانونية تعلم يا عادل انو المحامى همه الاول والاخير مصلحة موكله وهدفه فى القضيه ان يخرج له باكبر المكاسب واخف الاضرار وانت لوقاعد فى الخرطوم كنت ح تعتقد انو المراة دى ح ترجم او تصلب او على اقل تقدير تجلد ولعمرى انها كانت ستكون فضيحة بجلاجل ... هيانا النفس على سيناريوهات طويلة ومجهولة لانو ببساطة ممكن يدوها عقوبة مقروءة مع اى قانون انت ما بتكون متخيل انو موجود خالص ... يعنى مثلا المواد فى قانون العقوبات ال تمت محاكمتها بيهم دى عقوبتها محدده فى القانون وما فيها ابعاد او طرد من السودان! الكلام دا ما موجود فى اى عقوبة لاى مادة ادينت فيها، وهذا ما قاله محاميها فى البى بى سى ... لما انا اتقصت لاعرف ما مدى صحة ذلك؟ عن الحكم عرفت انوالقاضى قال فى الحكم مقروءا مع قانون الهجرة !!!! وبطريقة الحك بتكون داير تعرف الاسباب العملية (وجه غامز) ياسيدى انت سيد العارفين بما ال اليه حال قضاءنا وقضاتنا معروف وسط كل المحامين والقانونيين انو محاكم اول درجة وقضاتها هم الاقل تاثرا بالسلطة والنظام القابض .. لانو ما قاعدين يتعبو معاهم كتير هم متفرغين للقضاة الاعلى بتركو قضاة الاولى يخمجو ذى ما دايرين وشعارهم النية للنار !! بجى فوق ،، اول ما يصلهم بطلعو منو شربات وطوالى بتم الغاء للحكم وبعملو فيهو الدايرنو يعنى كان متوقع جدا يلغو الحكم ويقولو ترجم مقروء مع قانون الشئون الدينيه والاوقاف !! انت عارف انو القاضى دا رفض اعتماد فتوى هيئة علماء السودان التى قدمها الاتهام كمستند .. بعد ان اعترض عليها الجزولى باعتبار انو هذا مجرد راى والاراء غير ماخوذ بها فى المحاكم وهذا ما افادت به الاستاذة منى محمود التى مثلت ايضا الدفاع فى تلك الجلسة ؟؟ اها ذى دا ناس الاستئناف كان بعملو مجانين وطوالى يلصقو ليها مستند اتهام .. اها دا تحليلى انا البسيط للاسباب العملية التى حالت دون الاستئناف بعدين اكيد هيئة الدفاع عندها ماهو اعمق واقوى من تحليلى هذا ... فقد قلت من قبل انو الجزولى اثبت مهارات وخبرة مهنية عاليه فى هذه القضية استحقت منى قول الحقيقة ولك شكرى من بعد اعزازى