امتداد الدرجة الثالثة ذلك الحي المتفرد

Quote: فرحي بيهم ملئ حد الكبابي امتداد الدرجة الثالثة الأصل و الجذور ........ أنا محمد سيداحمد محمد صديق مولود في الامتداد مربع 7 بيتنا كان فاتح في بيت ناس بلاص و جيران ناس زيادة الشيخ وناس علي غريبة .... الانتماء للوطن نبع من هناك .... كنت صغيراً حينها عندما صرخ الوالد الجنية أب عمة شرطوا جاب لينا الحمى شرطوا كنت ادرس حينها في المرحلة الابتدائية الصف الثالث ..... وكان آخر الدنيا في تلك الانتفاضة مركز سمير بالنسبة لي , وكنا نلوح بعلامة النصر لذياك الكمومر الذي يحمل رجالات الجيش ونهتف جيش واحد وشعب واحد ..... النص :: سكن الوالد في الامتداد في أواخر الستينيات بالتحديد عام 1968م قادماً من جمهورية المانيا ليعنل مهندساً بمصنع الخرطوم بحري للغزل والنسيج . ولا تجود ذاكرتي هنا إلا بالقليل من الذكريات التي أنعشها هذا البوست الفنان . أولاً :: الخميس لمة الكتشينة والخروف والشية بالصحن الكبير و بيت ناس خميسة .... ولمة ناس حاج بابكير وعبد الرحمن الفكي ويا ناس السعودية وبالأخص ناس الرياض معاكم أولاد عبدا لرحمن الفكي طلال العملاق والتاج البليد وبتذكر أنا في أولي ابتدائي في مدرسة الامتداد خمسة بنين أستاذ صلاح أستاذ مادة العربي شداه هو وخالي محمد كاموته محمد عبدا لرحمن اخو محي الدين بوب مربع 11 البيت الفيهو حلويات سوهندا حقت ولد من أولاد بابكير عموماً كان لابسين الاتنين لبادة( مردفين ) واللبادة كانت عبارة عن شوال خيش .... ثانياً :: كواست غنم حبوبتي في خور جانقي الفاصل بين الامتداد والعشش ولمن نجيب الغنم البيت وأقول لي أخواتي ذات الأصل الألماني أي والدتهم من ألمانيا انو الغنم أكلوا الورق المجدع في الخور ذي ماهو واحكي النكتة بتاعت الاتنين المساطيل الدخلو الحمام بي كراسات ................واحد قال لي أخوه أنت بتفض سطر ولا شنو ................. ثالثاً :: عمك بتاع القش الكان في أول مربع 11 أنا زعلان جداً عشان نسيت اسمو والله حد الموت وأنا السنة كلها جايب القش منو للغنم .... رابعاً :: عمك بتاع التلج الفاتح في مركز صحي سمير وللأسف نسيت اسمو ..... خامساً :: انتخابات الديمقراطية الاخيرة :: وانا عمري حوالي تسعة سنين كنت لافي الامتداد مع الوالد وكان عربتو شينة شديد بوكس موديل 1978 وقام ناس الحزب المقطعين كالعادة عملوا ليهو توم وشمار احمر و وقعوا في البوكس ملصقات تشير إلي رمز الفانوس .... وأقيمت ندوة تحدث فيها الشفيع خضر والشيوعيين الحضروا الندوة كانوا بساط جداً وكانت العربات الواقفة عن جيرانه الاتحاديين ناس بلاص اكتر من حضور الندوة.... ومازلت أتذكر هتافي من علي ظهر البوكس الفانوس إنشاء الله يفوز , وخسر الأستاذ الشفيع خضر ..... أتمنى أن أواصل ....