هنا فداسي-2

Quote: والله زي كلامك ده لينا منو سنين، ويا زول الغربة بشتنتنا خلاص، وخلتنا زي الطرشان، لا نقدر نشارك أهلنا في ونستن، ولا كلامن بقى بتفهم لينا ، عليك الله يا ود شيقوق أخوي في عوجة أكتر من كده لمن الزول وسط عولو يكون قاعد زي الأطرش في الدفة، والله ياأخوي الغربة شدة ما شينة، الزول كان كسب وراها الدهب اللحمر برضو خسران، عليك الله في أسمح من الزول يكون قاعد ملازم أمه الطاعنة في السن احلب ليها غنيماته، واربط ليها سخيلاتها واعلق لبقرلاته، ومن دغش بدري يجي شايل كورتو كان مليانة لبن ولا غباشة روب، واقعد في حداها، وكل ما تشرب ، احلف عليها واقول ليهاعليك الله يا أمي كان ما شربتي لامن تشبعي ،اجبري بخاطري الله يجبر بخاطرك، أها وقتين الضحوة تكرب يجيء شايله ليها عصيدة ح أأأأأأأأرة بملاح روب حادق ريحة سمنو البلدي تشهي الماش بالدرب، وتقعد إت في الواطة وهي فوق عنقريبه الهباب ، وتشيل الهبابة وتقعد تهب ليها في العصيدة عشان تقدر تشيل ليها لقمة لقمتين وكلما تاكل ليها لقمة تفرح وكأنك أكلتها إت ، بالله عليك في أحسن من كده. أها أخوي ما بستغنى والبهائم ميعاد جيتن قربت، وورانا الصرار والعلوق والحليب،والتسوي في أمك إن شاء الله تلقاهو في جنياتك ، أها ياأخوي ودعتك الله واشوف وشك بخير