ضباط الشرطة المحالون للصالح العام ....إمعان فى الظلم...وسلب للحقوق..... حشفاً وسؤ كيلة؟؟!!!!!

Quote: البداية : فى إجتماع دعا له مسئول البنى التحتية عقب الأمطار التى شهدتها عاصمة البلاد مؤخراً إحتشد كافة المسئولين عن قطاع الهندسة والإنشاءات والطرق والجسور والكبارى. - يا جماعة حقو الدولة تعترف بأنها أخفقت إخفاقاً شديداً فى تعاملها مع الخريف ده ، يعنى الشوارع الإتعملت دى (إتماصت) فى خمس دقائق ، والمصارف كووولها مقفولة زول نضفا مافى والمهندسين الجابوهم يرصفو الطرق ديل معظمهم فاقد تربوى سااكت شفتو ليكم مهندسين يعملو ليهم نفق يتحول لى حوض سباحه ؟ شفتو الحرفنة دى !! المدارس وقعت والبيوت إنهارت والناس رقدت فى السهلة ! الوضع يا جماعة وضع مأساوى وخطير للغاية والمشكلة إنو مافيش بنى آدم ممكن يقدر يصلح الشئ الخاصل ده ... - شنو يعنى يا ريس نفهم من كلامك ده إنو مافى طريقه نصلح بيها الحاجه دى عشان نكون ذى باقى خلق الله الفى العالم دى؟ ............................................................................................................................... - والله يا جماعة مافى غير طريقة وااحدة نصلح بيها البنى التحتية دى. - شنو؟ نستلف من البنك الدولى؟ - بنك شنو؟ الإستلاف والديون دى فترنا منها هو أنحنا العلينا قادرين ندفعو؟ الكبارى دى ما كسرت نصنا كووولها بالدين. - أها طيب نعمل شنو؟ - نستعين بى قوى خارجية. - الأمريكان؟ دى لكن ما بتكون مكشوفة. - لا نحنا ح نستعين بى قوى أكبر من الأمريكان ... نحنا ح نستعين بالجن المسلم!! - الجن الياتو؟ - الجن المسلم ... - وده ح نلاقيهو وين؟ - عادى نعمل ليهو إعلان فى الجرايد إنتو قايلين الجن ديل ما مثقفين ولا ما بقرو جرائد .. ديل العالم بتاعهم زى العالم بتاعنا ده ... وحتى أقول ليكم حاجة : فى واحد شيخ صاحبى قال ليا برضو عندهم وزارة بتاعت بنى تحتية !! - والخريف لمن يجى قاعدين يتجهجهو زينا كده يعنى! - يتجهجهو شنو؟ ديل عشان قدراتهم العجيبة دى مظبطين حالهم وما زينا كده ! - وطيب هسه نجيب لينا جان بتاع بنى تحتية من وين؟ - (أحدهم) : حقو نشوف لينا شيخ من بتاعين عيادات التداوى الملت البلد دى نكلمو كلما يطلع ليهو جن من زول يحبسو لينا عشان نتفاهم معاهو ! - لا لا ... ديل كضابين ساااكت هو ربنا جل وعلا قال فى محكم تنزيله (إِنَّهُ يَرَاكُمْ هُوَ وَقَبِيلُهُ مِنْ حَيْثُ لا تَرَوْنَهُمْ) يجو يقولو ليك الجن ح يطلع بى صباع أيدو الشمال وبى ضفر ايدو اليمين ! - (أحدهم) : أنا عندى واحد صاحبى شيخ ممكن أكلمو ليكم يحضر ليكم واحد جان تماام! - لا لا الكلام ده ما بنفع وتانى (قصة عندى واحد دى ) والشغل البى اللفة ده خلاص حقو ننتهى منها والمنافسة تكون حرة ! وما فيها أى (مجاملات) عشان المجاملات بتاعت العطاءات دى هى الودتنا فى داهية ! - يعنى ح نعمل شنو فى الحالة دى؟ - ح نعمل عطاء واضح لتشييد البنى التحتية .. بس خاص لشركات الجن ! - (أحدهم) : وشركاتنا يا ريس ما تشتغل يعنى ؟ - هو بلا شركاتكم دى الوداى البنى التحتيه فى داهية منو! - وطيب الإعلانات دى ح تنزل وين؟ - فى جرايدنا دى ذاااتا إنتو قايلين الجن ديل ما بيقرو ! ونزل الإعلان : ترغب (وزارة البنى التحتية) في تقديم عطاءات من مقاولين أكفاء(من الجان المسلم) من ذوي الخبرة والمقدرة لتشييد كافة مشروعات (البنى التحتية) بالعاصمة المثلثة. 1- يمكن الإطلاع على مستندات العطاء داخل الدرج (اليمين) لمكتب وكيل الوزارة. 2- سيطلب من (الجان) صاحب العطاء الفائز التوقيع على عقد التشييد وذلك خلال اسبوعين بعد ان يتم اخطاره بقبول عطائه . 3- يتم تسليم مبلغ العطاء المتفق عليه عند نهاية تنفيذ المشروع وتسليم كافة الاعمال الإنشائية والتأكد من صلاحيتها . 4- يجب علي مقدمي العطاءات ارفاق السيرة الذاتية للمؤسسة تحتوي على: شهادة السجل (الجنى) التجاري وشهادة التأسيس، كما يجب إرفاق الاسماء والمؤهلات وخبرة المهندسين والفنيين (الجان)الذين ستقع عليهم مسئولية تنفيذ الاعمال. 5- لا يشترط بان يكون العطاء مستوفياً الدمغة القانونية وترسل العطاءات داخل مظاريف مختومة بالشمع الاحمر مكتوب عليها: ? عطاء تشييد مشروعات البنى التحتية للعاصمة المثلثة (بواسطة الجن المسلم) على ان يكون من ثلاث نسخ مصورة بالاضافة الى النسخة الاصلية . 6- توضع العطاءآت داخل الدرج (اليمين) لمكتب (السيد الوكيل) فى موعد أقصاه ثلاثة أيام . 7- وزارة البنى التحتية غير مقيدة بقبول اقل عطاء او أي عطاء آخر من أى (جان) . صدى الإعلان : ما أن ظهر الإعلان فى اليوم التالى بكافة الصحف اليومية حتى إنقسم المواطنون بين مصدق ومكذب وقد تباينت ردود الفعل والتعليقات : - والله الجن ذاااتو بعد ده ما يعمل حاجة! - أنا خايف بعد شوية يمسكوهم أى حاجة وشوية الوظائف دى تروح على الناس والعطالة تبقى (100% ) بدل (90%). - والله أنا خايف العنوسة ذااتا تبقى (100%) يقوموا يلمو ليكا فى الجنيات (المسلمات) ديل مثنى وثلاث ورباع وبناتنا ديل يروحو الخور. - وهسه الجن ده ح يدوهو قروش وإلا ملح ساااكت ؟ - كمان حقو يشوفو لينا باقى الحاجات زى المستشفيات الوسخانة دى والدواء المافى ده ! - (الجن) ده ما بقدر يتم لينا المدينة الرياضية الخلاها رامبو (أطلال) وفات دى ؟ - القفة ... القفة ... القفة يا جماعة .. والله بقينا ما قادرين عليها كيلو الطماطم حصل ( 12) ألف !! خلو (الجن) ده (يلز) لينا النفرة الزراعية القالوها دى. - والله لو بس فريقنا ده (لقا) ليهو راس حربة (جنى) لهلوبة كده كان سكتنا ليك (الرشاشات) ديل جنس سكات ! - بس اليجيبو لينا (جنى) بدل (مكاوى ده) عشان الكهرباء دى تستعدل ! - (الجن المسلم) ده (الكلى) بتاعتو ما قاعدة تبوظ؟ خليهم يجيبو لينا (مكنات غسيل) عشان نرتاح من قصة الحكومة مرة تدعم ومرة تشيل الدعم دى ! - ناس الكلى براهم؟ ناس (القلب) ما برضو عاوزين ليهم (مستشفيات) وعمليات بالشى الفلانى والحكومة رافعة إيدا .. والله غير الجن المسلم ده زوووول يساعدهم مافى!! - هسه مش ح يجيبوهم للبنى التحتية شوفو لو ما بعد شوية حولوهم (للإنتخابات). فى مملكة الجن : بينما كان الجان شمهريرة يجلس مع بعض اصدقائه فى صالون منزله الكائن بإحدى الكوش يتحدثون عن ما آل إليه الحال من بطالة وعدم وجود شغل . - والله خلاس زهجنا من العطالة وقلة الشغلة دى ؟ زمانك بالله الشغل راقد و الواحد من الصباح يوسوس ليهو لى نفر نفرين ، يحرش ده عشان يختلس ويوسوس لى داك عشان يقبل ليهو رشوة ويكلم داك يغش فى مواصفات، هسه بالله بقوا يقومو بالحاجة دى أحسن مننا !! - إنتو ما قريتو (جرايد الإنس) بتاعت أمبارح؟ - فى شنو؟ - فى جماعة كده قالو عاوزين ليهم (جان) يمسك ليهم مشاريع البنى التحتية. - الجريدة عندك ؟ - والله كنت لافى فيها (طعمية) كدى النشوفا ليك ! - (بعد قراءة الإعلان) : لا خلاس كان كده فرجت ... ناخد العطاء ده وننفذو ونطلع لينا بى قرشين حلوين. - لكن يا شمهريرة إنتا الهندسة والإنشاءات دى قريتا وين؟ - والناس العملو ليهم (نفق عفراء) ديل قروها وين ! - ياخى إنت (جن مسلم) حرام عليك تغش الناس ديل . - والعملو ليهم النفق ديل ما كانو مسلمين؟ خلونا يا جماعة نشتغل شغلنا (يلتفت نحو ابنه) يا ود يا زمهريرة أقرأ بنود العطاء ده كويس وشوف وزارة البنى التحتية بتاعت الجماعة ديل وين وأمشى خت ليهم العطاء بتاعنا فى درج المسئول الشمال فى مكتبو زى ما طلبو. - لم تكن شركة شمهريرة للهندسة والإنشاءات والبنى التحتية (كما أطلق عليها) هى الشركة الوحيدة التى تقدمت بعطائها بل شاركتها فى ذلك عدة شركات أخرى كشركة (الريح الأحمر للإنشاءات) ومجموعة شركات (الجن الأزرق المتوسط) لأعمال البنى التحتيه و.. فتح المظاريف : بعد ثلاثة أيام إجتمعت اللجنة التى تم تكوينها خصيصا لفتح مظاريف عطاء مشروع البنى التحتية المخصص لشركات (الجن المسلم) ، على طاولة مستديرة جلس اعضاء اللجنة حيث طلب رئيسها من (المقرر) أن يقوم بفتح درج مكتبه اليمين لإحضار مظاريف العطاءات والذى لدهشته وعند فتح الدرج الذى كان مغلقاً قد فوجئ بعدد من المظاريف تفوح منها رائحة غريبة جعلت (شعرت جلدو تكلب) ! - بسم الله الرحمن الرحيم نفتح يا جماعة المظروف الأول - (المقرر يقرأ فى تلعثم) : ده من شركة اسمها (شمهريرة للهندسة والإنشاءات والبنى التحتية) - الشركة دى مستوفية كل الشروط؟ - أيواا جايبين لستة بالأعمال القاموا بيها قبل كده وكمان السيرة الذاتية بتاعت كل المهندسين والعمال . وموافقين على كل الشروط ! - العطاء بتاعهم بى كم ؟ - ....................... قامت اللجنة بفتح جميع المظاريف وبعد نقاش مستفيض أجمعت اللجنه على أن العطاء المقدم من شركة (شمهريرة للهندسة والإنشاءات والبنى التحتية) هو العطاء الأقل قيمة وهو أيضاً العطاء الذى إلتزم بجميع البنود الواردة والتى كان أهمها نماذج المشروعات المشابهة والسيرة الذاتية للمهندسين والعاملين بالشركة والذين سوف يقومون بتنفيذ المشروع ! - أها هسه الجماعة ديل يتصلو بيهم كيف ؟ ما خاتين ليهم رقم تلفون ولا موبايل ! - (المقرر) : تلفون شنو يا سعادتك .. الناس ديل قالو لو عاوزين يتصلوا بيهم لازم يهيئوا ليهم الجو ويعملو ليهم عملية بتاعت (إستحضار) عشان هم جن مش بنى آدمين ! - كيف يعنى؟ - أهو أقرأ سعادتك (يمد ليهو الورقة) .. - (يقرأ بصوت عالٍ) : - حتى نستطيع الحضور لمناقشتكم يجب عليكم إستحضارنا وذلك بعمل الآتى : - قفل شبابيك وأبواب الغرفة التى توجدون بها وإطفاء الأنوار وأى مصادر مضيئة. - إطلاق بخور مكون من اللبان الضكر ولسان العصفور والسندروس والميعة السائلة. - قراءة الكلمات والأسماء التالية والإستمرار فى ترديدها حتى ننزل عليكم وهى : سمسمائيل ، طسميائيل ، شيغاب ٍشيعايوب ، هلهليوه ، شليطاه ، شيلطاه ، امرهوش، بطميش ، اهيالموش ، مهيالموش ، كرهتيه ، برهتيه أحضر يا شمهريرة يا مدير شركة البنى التحتية . - وهسه الحاجات القالا الزول أقصد (الجان) ده نجيبا من وين؟ - بسيطة سعادتك بس ندى السواق لستة بيهم ويمشى يجيبهم لينا من التيمان كلها نص ساعة !! فى الوقت الذى ذهب فيه السائق لإحضار قائمة البخور من التيمان تم تصوير (الورقة) التى عليها الأسماء حتى يقوم الجميع بحفظها والتعود على نطق الأسماء التى كتبت عليها لا سيما وأنها صعبة النطق ، بعد قرابة الساعة من الزمن حضر السائق يحمل الأغراض التى وضعها على الطاولة : - يا موسى أقفل معاك الشبابيك والابواب دى وجيب لينا شويت فحم و(نار) من حنان ست الشاى دى . قام السائق بقفل النوافذ والباب خلفه فى طريقه لإحضار النار من (حنان) بينما أخذ الجميع أماكنهم فى إنتظار قدوم شمهريرة ، إمتلأت القاعة بالبخور، بدأ الجميع فى قراءة الأسماء وفجأتن إرتفعت حرارة القاعة ودوى صوت إرتطام بالأرض وظهر شمهريرة : - (فى خوف وهو يخاطبه) : يا شم شم شم هر هر ريرا ... والله نحنا بس الشديد القوى الخلانا نستعين بيكم ! - هل فاز عطاؤنا بالمشروع ؟ - آآآى آآآ ى وعشان كده نحنا ناديناك هسه. - (أحدهم) : طيب يا شمهريرة ممكن تقرأ لينا من الآية (6) للآية (11)من سورة الجن! - (فى إستغراب) : إنتو حركاتكم دى ما بتخلوها ؟ إنتو جايبننا نعمل ليكم البنى التحتية ولا عاوزين تشغلونا أساتذة تربية إسلامية؟ - لا بس عاوزين نتأكد إنكم فعلن جان مسلم ! عشان الإستعانة بالجان الكافر حرام. - والإستعانة بالإنس الكافر حلال ؟ - خلاص خلاص يا شمهريرة ما تزعل نحنا خلاس مصدقين إنك مسلم يلا ورينا ح تعمل لينا شنو؟ - وإنتو شركاتكم الكتيرة ومسيخة دى ما قدرت على الشغل ده مالا؟ - لا ما أصلو الحكاية فى الحقيقة يعنى. - (مقاطعاً) : هسه أمانة فى ذمتكم ده شغل تستوردو ليهو (جن) من الخارج؟ - لكن القصة ما غلبتنا . - ما لازم تغلبكم إذا كل مسئول هو ونسيبو وللا ود خالتو عملو ليهم شركة ورسوا عليها العطاءات . - وإنتو الكلام ده عرفتوهو من وين؟ - نحنا كمان بيقولو لينا عرفتو من وين؟ هو المواطن العادى عندكم عارف الكلام ده لامن نحنا ؟ أمال شوارعكم دى مطرة واااحدة بتموصا ليه؟ ما عشان شغل التلاتة ورقات ده! - هسه إنتو عايزننا نعمل ليكم شنو بالضبط؟ - أيوااا ده كلام جميل ...شوف يا شمهريرة زى ما مكتوب فى الإعلان وفى كراسة العطاء نحنا عاوزنكم العاصمة دى كووولها تعملو ليها صرف صحى ؟ وتردمو لينا الحفر الموجودة دى كوووولها .. وشوارع الظلط الما نافعة دى تعيدو لينا عملا تااانى .. - أول حاجة قبل ما نبدأ الشغل عندكم ناس هنا أخير منهم الجن ذاتو .. لازم تشيلوهم لينا عشان بيئة العمل تكون صحية؟ - ديل منو؟ - ديل الناس الما عاوزين يشتغلو ولا عاوزين يخلو الباقين يشتغلو؟ - وإنتو عارفنهم بالله. - كييييف ؟ (يخرج من جيبه قائمة) دى بتغلبنا أهى دى أساميهم . - (المسئول يقرأ القائمة تبدو عليه علامات الإندهاش ) :الله لا كسبك يا شمهريرة خاتينى أول واحد ؟! والله إنتو فعلن جن ! ؟ وتم التنفيذ : لم تمض ساعات قليلة على توقيع العقد حتى قامت شركة شمهريرة للهندسة والإنشاءات والبنى التحتية بإنجاز ما طلب منها فى سرعة ودقه ومهارة ، إمتدت شبكات تصريف مياه الأمطار فى جميع الأحياء ، كما تم إنشاء شبكة صرف صحى غطت كل الولاية حتى الأحياء الجديدة ، تم تجفيف جميع البرك والمستنقعات التى خلفتها الأمطار الأخيرة (بذل الجن مجهوداً مقدراً فى تجفيف بركة نفق عفراء) كما تم رصف جميع الشوارع الرئيسية والفرعية وتم ترميم جميع المنازل والمدارس التي تأثرت بالأمطار .. وبعد جولة تفقدية ضمت مسئول البنى التحتية بالوزارة وأركان حربه إلى جانب رئيس مجلس إدارة شركة شمهريرة للهندسة والإنشاءات والبنى التحتية وابنه المدير العام (زمهريرة) . - ممكن لو عندكم أى بيوت إستشارية أو هندسية تراجع الشغل ده عشان لو فيهو حاجة يورونا ! - يا شمهريرة هو أنحنا لو عندنا حاجات زى دى كان لجأنا ليكم. - يعنى خلاس كده مبسوطين من الشغل؟ - مبسوطين ( 100% ) إنتو عملتو فينا جميل ما ح ننساهو ليكم كلو كلو ... تانى نشوف المواطنين ديل فى الخريف ح يقولو شنو؟ (يدخل يده فى جيب البدلة السفارى) : وأهو ده الشيك بقيمة العطاء . - وده نصرفو وين؟ - فى البنك المركزى طبعن . فى طريقه للبنك المركزى كان شمهريرة وابنه زمهريرة يشاهدان ويستمعان لتجمعات المواطنين الذين إستولت عليهم الدهشة وهم يرون عاصمتهم وقد تحولت إلى عاصمة (حضارية) تضارع عواصم العالم الأخرى من حيث النظافة والجمال ... - شفت الشغل العملو أبوك؟ تقول ليا قريت هندسة وين؟ - والله يا أبوى أنا ما قايلك شيطان كده ! هسه البنى آدمين ديل إفتكرو عندك شركة وعملت مشاريع زى دى قبل كده ! - الحياة يا ابنى بقت صعبة ولازم الجان يشيطن عشان يعيش. فى (هول) البنك الداخلى جلس شمهريرة وابنه زمهريرة فى إنتظار (الصراف) بعد أن قاما بتسليم الموظف الذى على الكاونتر (الشيك) ثم ما لبث أن سمع شمهريرة اسمه يتردد مصحوباً برجاء التوجه للشباك رقم (5) . - أيوه أنا شمهريرة. - الشيك بتاعك ده تغطية ليهو مافى !!