|
|
|
 Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
بله أخوى سلام ,
نان انت دخلت فى نصها وقاعد جنب الآرنيق , ومنوهط فوق البشنتيق , ومودرلى كوشارى ساوو تحت الواسوق قبل الجر , وبعد دا كلو ماكا عارف اللقدابى يا شينى ؟؟؟
اللقدابة ياها البيقولولا ناس بلد فوق الصالة ولا البرندة !
لكن عليك شيخى ود الحيران وجامع التور , انت يا صح ماكا عارفا ؟
ولا بتنزبلع ساكت ؟
ووكت اصلك جيت لاعندنا هينى , قننب اكللك تريمة واملا خشمك لا تمشى مننا مريوق شى !
وبعدين سد الكبد هو بالكوشار داك وسوولى فوق الآرتيق لا عوقبان بجى صادى وكت احش قشى واسقى العبور والعناق .
وودعتك الله يا عشاى .
وقبال ما انسا , عليك الله كوركليى لأب نعوف هو , قوللو ست البنات قالتلك جيبلى القيروانة من بت ود يحمد الاملابا الجرارى ديل , فيحال اصبحن خلا , ومافيهن ولا كبيقة !
ست البنات .
| |
 
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
لنى ( لنا ) ,
حبابك واليوم السعيد الليلى جابك !
البت العديلى الماب تسووى اللوم وماب تعرف النضم المسيخ الكعب !
نان يا لنى اخيتى قالولك نحنا ناسبناكون ساكت !
مو فيشان سمحين وزينيين وبتعرفوا الواجب وماب تضيموا الزول !
والليلى لقدابتى نورت ونورا بقا وشلع !
ووكت الدرب جابك عيللى تملى خشمك وتفكى الريق بالقراصى معاى !
أوعك تقوليلى ماب تدوريها , ولا ماب تعرفيها !
والسبروق حار واخدر دابى فركتو , باقى حارسى اخيتى منى بت خوجلى , اندهدهت بالحيل !
وشحد ربى نجيك فى السمح والخير يا صباحة الخير الميبيريكى !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
سلام يا الحيبان !
يا اخوانى ناس الحيكومة المموشنين ديلا بلا الشى الكعب ما عندهم سووا ?
يصفقوا البينييى عبير بت خيرى فيحال نضمت الصح ???
الله يصفقون المرض الينضفلنا البلد منهون ومن فقورون الملونا بيهو دا !
الناس ديلا دحين بلا الجخ والشى المغتغت عندهم سيبلى شى ?
بينية الناس يصفقوها ليه ? كانوا وليانا ? ولا هم بيعرفوا للويليى شى ?هو الزمن دا فى ولين عاقل بيصفق ?
نان هون ماسكين البلد كولها بالغسب ! ومجويعننها ويلملموا فى خيراتنا ويسووا فى جيوبون ! الرسول دا حديسن زين شى ?
أساعيتى يا الجنات أخييتكون يصفقا الريويجل الما عندو عرض دا كيفن ? البلد بقت جهدييى تانى ? يا يمة يا سيدى الحسن راجل كسلا فوقى وفوق أخياتى اللعبوبن الهوامل ديل !
نان قالولون بنوتنا هاملات ولا ما عندهن راى و بصيرى فى الدينى دى ?
والله فيهن واحدات اخير من مييى منهون !
أسا عيتى عبير دى أكنها تمشيلون وححدا وكت كوركولا ماها بت فارسى !
والله بس ورتون الفيروسييى الصح المو كضب وهوراط ساكت ميتل البيسووا فييو هون دا !عفيت منها !
يبقالى الريويجل الصفقا دا زاتو بس انهجم وقعد ينضرب من فوق لا تحت وكت شافا واقفى قدامو !
ويمكن بيقتلو تشبه مهيرة بت عبود فارسة زمانا !
ويبقى اخدلو تلاتى ترسات لا ورا فوق كورسييى وقررب يلحق الزينيين ديلك !
يا ربى اسع اكنو قايل رقبتو فارس الحوبة وكت شال ايديتو الشاحدى ربى عليها ما تنرفعلو تانى دى وصفقبها بت القبايل المو هينى عبير ?
نان هيى اريتا بت البلد لى حدها ! نان خافت ولا قالتلو الكلام الدايرو ! ميى مغغستو وفقعت كبدو ! بس الكلمى بالكلمى !
نان اصلو الخلا ينحرق اشينو انتو قايلينو ?
هو اكنو حسب فهمو الكملان قايل رقبتو بيخوفا وتجينا صادى مزهلله وتقوللنا لا تفكوا خيشيمكون دا بى فريد كلمى فوق ناس الحكومة ديل !
بس كل زول فيكون يموت بى مغايسو لا يمرقلو كلمتن كعبى فى حق الناس ديل !
لكن هى عفيت منها ، سووتلهون الكى والقرض النى !
وبدل ما تقططعو فى مصيريناتا ، مرقتو كولو للناس ، وهون عاد النار انطلقت فيهون !
أصلو الناس الما عندهون استحا زييهون بس الزول يفرجبهون الله وخلقو ! فيحال يتوبوا لى أبد الآبيدين من سيويى الخوازيق للناس !
كمان كملوا خمجون كولو قبلوا عليى الحريم الفوق الجوع دا كولو ساترات حالين ، كمان يشوفن فى العوجى ويسوكتن ?
وليداتن ينجاضوا من الجوع والسهراجا الماهون لاقينلها دوى ، لا حكيمن يشوف العليهون !
البار اللات الميرارى فارشينهن فوق واطات الله قدام الاسبتالى ، مافى صحتن تقولهون دا اعوج !
والابرى الواحدى بالشى الفلانى ! نان دايرين عبير تسكت ليى ميتين ?
ربى يكسرلك ايدياتك وصويبعاتك الانمدن على ويشييها الصبوح ، يالشين وماب تشبه خلق الله المرحمنين !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
ويا رحيم سودانى كونك تفكر فى الويبسايت شيتن مو هيين !
وانا على القسم طوالى فى حواك ومعاك !
نان انا وحات سيدى منيمنى وحالفى شيتن زى دا اصلى ما ببضع فيهو !
وحات عباس اخوى الماب احلفبو بالكيضب ، ولاهو هيين !
بس انتو يا الجينات الزينيين انلموا وتعالوا !
باقى انا بس يخربنى فى الخرابى الاسمو الاعنترنت دا !
لكن بهببش معاكم لامن القالى صيرفى وبصارى !
باقيلكون جاييى اقيف احققب ايديى ساكت واعاينلكون ?
انا بس اصلى الضييم ماب ادورو !
وكمان مكججينى الزول المموشن الاشو !
والله خلقنى لا انحيير لا راسى انقطع فى امرن الناس مغروديين فييو !
احمد ربى !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
واحلالى ووا حلاالى !!الليلى بس مو جيدلى !
منى بت جارة خالتى الحيبيبى حيبيبة قساى الماب تحمل أزاى !
أمانى مشتهاكى جنس اشتيهى ، وميشتهى نضمك وجيتك لاعن لقدابتى البيقت خلا بلاكى يالمستورة
الخاتى القول !
ويا حيليل عمى خوجلى البتوقد نارو ليل ونهار للغاشى والدانى !وان نام جيعان ماب يهمو ان
بيقوا ضيفانو بطرانيين وشبعانيين !
لابيكل لابيمل من قولت حبابكون ، المباشر الماهو مكاشر !
وسليميلى عليى جارة خالتى المابتعرف قولة مافى ولا فتر !
وتانى يا منى لا تندهدهى كدى شى !
ولا تدى بينيتك الزوينى دى عوجى ! نان انتى مهملاها ولا بتسوى زول فى بوكانا ! مو
ساووالا يا زيبيدى لا تموعى ! الله يخليها ليكى !
وسليميلى عليى اخياتك وناسنا فردن فردن !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
حليمى البينييى الفاهمى أم فكر ،
حبابك وقدم الخير جانا معاكى !
وانتى يا حيبيبة قساى ، جاييى من البلد البعيدى ديك ، ونخليك عليى كيبيباية الشاى !
مالنا يا يمة ? قالولك نحنا فسليين ?
الليلى مو انتى براكى ، البوطان كولهون والحرررم الكانن معاك فى الليعب السمحات المسخننا
عليى ولادنا ديلكا ،هون أوالى قالولون انفرجوا ، ولا قالولون شوفوهن سمحات هن ولا
نحنا ! مو كولها خيلقت الله ، نان هن سوون رقبتن سمحات ، واكننا نحنا عزلنا الشنا
بيطوعنا ? مو مخير الله فينا عاد !
واكان نحنا شيناتن فايتات فى الشنا ، متل البعشوم ! ! مو يانا اخواتون ? البيسوينا
شينات وهون سمحيين اشينو عاد ?يا جماعة شوفوا الميحن دى عليكون الله !
عيللى يبقوا ماهون اخواننا ! عيللى تقعدين تفطرين بالقراصى والسبروق الحار دا ، حيتين
اسويلكين الشاى المو خمج !وديلك السمحات بسويلن البن !ماهون ناس شاى ، بيعرفوا القهوة وححدا!!
وانا عارفاكى راسك موجعك من النضم الكعب السيميعتى دا !!
انتى كنتى تسوى التصاوير فى طرف هيدمك ، وتمورقى بيشيش من اللعب متل التكنك جاييى تفتيشي
البوطان السوغار ، وتسووى رقبتك اكنك جاييى صادى ، وتقولى يا مندايم !
باقيلك كان فى زولا شافين ولا خوزقك فيهن ?
غايتو البتجى من السما بتحملا الدايمى !
وسليميلى علي حواء وموحومد وبوطانون .
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
نادييى الزينى زى البينيات الزينى المكملى !
لامن احش تمرى ، وابيع العنبلوك والعبور وابيع التساكر !!
واكسر شعراتى ديلا !
وابنيلى سرووقتينى فوق الآرتق الليلى فيحال البهايم لا يشبين ياكلينلى تمرى الشارا دا !
واغيير الكبد والكوشار الاكلتين الارضى دى !
واجز غينيماتى فيحال الحر والصيف الفى وشينا دا !!
واشيل الحلبى التحت الحرازى داكا يلحملى قيروانتى الانقدت من نقل المى !
ويسويلى ميجوز فيحال اسووى فييو التمر والقراصى اللت التمر !
حيتين بعدين اجى اصوبن هيديماتى ديلا واسويهن فى القيفيفة اللتى دى !
واكوس الويليد اب نعوف يحجزلى فى لورى عطاييى قدام ! باقى انا ماب اقدر أقننب جنب
الرجال شى ، وكمان فيحال قعد اسف !
أها يا نادييى اخيتى حضرى الشاى والقراصى لامن اجيك فى مصور ، بلد ولاد الريف ! قالوا
باردى وناسا خلوقا ما ليهون حد !!!
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
ست البنات
يديك العافي ان شاء الله
من زماااااااااااان اتاوق داير ادخل اللقدابه دي لكين مشاغل الدني زاتها ماها مخلانه ، لكين والله الليلي قام من اول الصباح زهجان ومكبسه معاي والغريبة لقيت نفسي أغني :
بلالي متين يجي
آيمه سيد بيتي يعود يجي
الرسول يا ود عمتي
انبقيت داير جمتي
رسل التسريح اللجي
قلت تعرفي دي حالها ما عندها حل غير انك تمشي تاخد لك قعدة في لقدابة ست البنات ، أكان شوي تنسى مرارة الغربة والاغتراب ، غربة يا ستهن طااااااااااااااالت ومسخت وما أظن بت ود الفكي اتغربتها ، مع انه غربتها كانت من البلد للخرطوم .
الشاعرة ما اتخيلت خلاص ودعمتها رسلها التصريح وبقت زولة سفر وأمها تبكي عشان مفارقاها قالت لها :
يمه لا تتمني البكي
الغربة فيها بتد الفكي
غربة بتد الفكي لا فيها صقيع لا فيها اسنو ولا فيها مطر شغال ليل نهار ولا فيها عرب أجلاف يستفزوا انسايتك ليل نهار ، غايتو الله يكون في العون يا ست البنات .
معليش يا ست البنات مكبس معاي من أول الصباح قلت أجي أفضفض شوية .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
اب قساى ،(يا ربى كتبت اسمك صاح ?)
حبابك ومرحبتين يا اخوى ! والله لا جاب ضيق الخولوق والكيفريين !
ربى يجبر بى خاترك ويزيح منك الغومى والكوربى كولها !
قوتالى بت تد الفكى منغريبى فى الخرتوم ?
واا حلالا يا يابا ! أريتا غوروبتى بعد دا ! واريتا غوربت السرور الوسط الناس الطيبيين
المباشريين ، اللابيضيموك ولاب يخلوك براك ، بس ان غيب منهون فريد يوم ينشدو منك ، وان
مرق منهون يقفروك !
والله يرجعك ويرجعنا من البلد الفيها الضيييم والغبايين والمغاييس !
بالله الزول من تصبح لامن تغيب جنسو ابن ادم ما ينقور بابو ????
حسبى فى عجبى ! ناسن بس الزول ان بيقى جارون ما يعرفوو مييت ولا حيى ! فلاحة يلاقوك
يقولولك بى ريويسون كدى ، يرمحوا بى ريويسون متل اتكننهون قعد يجوكا ! وحكمت الله عجلانيين
اتقول لاحقينلهون جينازى ! بس البلد كولها تجرى تجرى اتقول زاكيهون عبد العيش ! ولا
المرفعيين ! انتو الناس ديلا كريعاتون ديلا ماب يوجعينهون من الخب دا ? بس يخوبوا فى
المشى ! ديلا بس كانوا ينفعوا فى شيل صنب ! وحات ربى يصلوها فى دقيقتينى اتنين فقطن !
وودعتك الله يا اخوى ، والله يفرجا عليكا .
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
يا ايتها النفس المطمئنة ارجعي الى ربك راضية مرضية
بقلوب يعتصرها الالم والأسى وحزن عميق ... انعى لكم
الوالد العزيز مولانا الخليفة / عوض خوجلى ..ابا الشهيد مصطفى
الذى اسلم الروح الى بارئها وانتقل الى جوار ربه
فجر اليوم السبت 19 مارس 2005 بمستشفى همر اسمث بلندن
بعد رحلة مع المرض الذى داهمه مؤخرا
رحم الله والدنا مولانا الخليفة عوض خوجلى
الرجل السمح الزين زو الخصال الكريمة
الرجل الصامد الصابر على فراق اعز ابنائه
الشهيد مصطفى عوض خوجلى والذى أعدم
غدرآ وزورأ وبهتانا مع شهداء رمضان
والذى ظل صابرآ لهذة الأذية طيلة هذة السنين
لا حول ولا قوة الآ بالله العلى القدير كل نفس ذائقة الموت
اللهم ارحمه واغفر له واجره من عذاب النار
ومن عذاب القبر وادخله الجنة مع الصديقين والشهداء
اللهم تقبله القبول الحسن وانزل شابيب رحمتك عليه
اللهم ألهمنا و ألهم أهله الصبر وحسن العزاء واخلفهم خيرا منه
وللحاجة الصابرة الخالة جارا ولكل أبنائه وبناته
وجميع آل بيته أحر آيات التعازى والمواساة
وإنا لله وإنا إليه راجعون
أخيراً ترجل ..ابا الشهيد العم / عوض خوجلى
وللأخت منى عوض خوجلى احر آيات التعازى
عماد عثمان
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
أخيتى الحيبيبى منى ،
الله يجبر كسركون ، ويصبركون ، ويرحم عمى خوجلى ويجعللو الجنة مسواهو ،
والموت سبيل الأولين والآخرين ، والدوام للواحد الأحد .
وبس ضوومة النضم غالبنى !
وغايتو با أخيتى البتجى من الله كولها مقبولة .
نان باقيلك الصابوكون دا ما صابنا نحنا كمان ??
انتى قايلى المرحوم كان ابوك براكى !
مو كان حتى نحنا ابونا كمان !
والليلى حتى نحنا انيتمنا معاكون !
الله يرحمو ويغفرلو .
وشاحدى الله الكريم يلزمكون الصبر كولكون ، ويصبر خالتى جارة الزولة الصابرى طول عمرا !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
عماد الهدى ورضى ،
تنعللا وما تندللا يا صباح الخير !
عيللى يا يابا لافخانى دحيشيى هول اب نعوف !
انطلقت من حبلا ، وجيت امسكا ، لفختنى متل اللفخة اللت الحيكومى الواقعى عليها اليومين ديل !
قالولك يا اخوى مندهديهيين جينس دهدهة فى الدينى دى بيكلام امريكا دا !
النوم يضوروا ليهون !
بس كل واحد فيهون ساووى مخلات القروش تيحت راسو وماهو عارف يقبل شيقيش !
ضاقتبهون الوسيعى ، ربى يضييقا عليهون مالا دا !
عيللى فى واحدن يقولولو سبدرات باقيلى امريكا نيستو ما جابت اسمو فى اللوح الللا دا !
ونيستلها واحدينن كتاار تانى !
باقيلك مابتنظكرون لا عوقبان !!
أها الدحشى الشوم دى انطلقت فوق حوض البيرسيم درنتو لحقتو الصيح !
أساعيتى ترقووتى أتكن فيها بالزيت والقرض من اول البارح ، ورقبتى معا السما !
انت يا عماد ناس منى ما قالوا عوك شى ?
والويليد الميبيريك سمبتيكو وينو ? ان لمميت فيهو قولو الغونيى اللت النعام بس ابت ضوومة
تنقر تانى !
كوت فرحانى لى عدم نقرا فيحال كوت حزنانى عليى وفاة عمى خوجلى !
عيللى اساعيتى فكينا الحيد !
واساع انت ماب تجينا اصلك فى بلدنا البعيدى دى !
يسعلنى الله مصنصينين وححدنا لا جار لا حبيب يبقى دورينى شافع فطيم ما ينقر بابنا !
يا كافى البلا !!
البلد دى هى صيح سمحى ! عيللى وحدتا مورة بالحيل !
وليدن ليى نفيسى اختى قاللى رسيليلى الاقفز التمر الساويينو منظر ساكت دا !
باقى مرة قوتلو التمر هينى صيص ساكت يخربو اسم التمراييى !
بس يقييلو تحتو وينصوروا تصاويرون دى ويقوموا يشيلوا اهلون !
عيللى تيميرة واحدى ماب يخوتها !
يسعلنى ربى التمر ريقان ريقان ، زولا بيسعل من قفييزو مافى !
شوفت الناس ديلا تغاهون حدو ويين ?
اساع دا انكان عندنا فى البلد كان تمر هبوبو ما يلحق الجارى !
أها ودعتك الله ، ولا تنقطع من اللقدابى دى شى !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
يا نسامه ...... سلاك عليك
والله يا ست البنات أخيتى
اليومين ده مزنزق فى اكل عيش العيال
وروحى مضايقى من البسو فوق الخونة اللصوص
وكمان كت حادى على عمى عوض خوجلى
وعيضاً على خالى أحمد عبد الحليم
والجماعة المندهدهين ديل خليهم يبلو راسن
وبعدين ما فى جيه بتلمهم ما عندهم صليح
وخليهم كدى نوم الجداد ولا سهره
والقريشات الكوشوها دى كلها خليها التنفعهم
وإن كان للبسموهو سبدرات إن كان نافع كان مسكوهو
ناسو القدام أصلو ناس الجبهة لمو كل واحد مطرود من إتجاهو
يعنى المانفع وما فيهو فايدة فى حزبه يضموهو ليهم
لأنو واحداً زين ما بيقبل عليهم
وبعدين الوليد سمبكتو ده ضوومة مانى عارف جيهتو وين
ومنى بنية عمى ظنيتا ماها جات من السودان
وحمار الجن ده صادفتك وين ماها بتشوف العوين التانيات
الله يكسر رقبتها ورقبت سيدا كمان
كان بدور تضيع عليى أخيتى والله سلامى كبيرة خلاص
دايرالا كرامى ... نسويها أن شاء الله
وعيضاً إنشاء الله الجيه ليكن قريب ننسقلها بالتلفون
وأنا ما دايرلك الوحدة ان شاء الله نتلم بعندك
دحين تلفونى مو معاكى شى
وشايف حبيب نورة جا تاوك وفات قوليلو أن بقيت غبت تانى
نشكلك محكمى فوق اللقدابى والحكم عليهو مسبق نشد الشربوت الماخمج
ونحرمو عليهو
لك خالص مودتى
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
حبيب نورة العيدييل وزين ،
انت كوت غايب ليك زمن ما عتبت اللقدابى ! ان شا الله خير ?
دحين الليلى جيدن جيت ، وسمعنا حسك وانطمننا !
عيللى اخيانك كولهون بس فروا من اللقدابى لا خبر لا اتر !
لكن حديسك كيف سمح وعجبنى وسرا بالى بالحيل !
أمانى فرحانالى فرحا !
بس فى الحيكومة الجايين يهبدوها لينا دى !
كانوا ساووين فوقنا ابعررام !
يقدلوا ويخوجلوا وينقزوا فوقنا ، ونحن يا يابا ريقنا نيشف ، وعومرتنا بيقت خلا ! حسبى فى عجبى !
بس البيمدو للضيف ماهو فى ! البيوت عدمانى نففاخ النار !
نششفوا البحر والسمى !
الله دا كريم واجواد !
الفرج بيجى من عندو الجليل الرءوف !
نان قايلينها بتدوم اصلا ??!
اكان خللوا الجخ والخمج دا ، كانوا انعدلوا ، وكت اصيلون مكديبين فى كراسى السجم دى !
عيللى الفرعنة ماب تقدم سيدا !
عليك الله يا حبيب نورة تسلملى عليى نورا ، وباكر تجيبا معاك فى ايدك للقدابى دى !
وكدى ادنا شيوييى من نضمك السمح دا تانى !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
اساع باقيلك يا عماد ناس العيكومة ديل يسوكتوا يكضيبوا فوق الناس كدى لامتين ?
الزول ان بقى مرق يكوسلو جدادتن ليهو رايحى ، يسووهو مرق فيشانون فى المظاهرا !
أها أول البارح جدادتى الحمرا مرقت من الصباح ، وللعشييى ما صدت !
مرق قوت الاشوفها طارت شيقيش ، بلا القالك تصويرتى فى التلفزيون قالوا مرقت مع الناس
البهلليلولون !
أساع دا كلام ?
وعاشة بت عميتى مرقت تكوس فى وليدا الساقوو للجهاد وماها خابرا عيللى البوطان قالولا البطاح رفعوا غسب !
ومسك اليمن بت خالى الطاهر يسعلنى الله كانت بتهرج وشايلالا موطرق تكوس فى عنبلوكها الليل
الضحييى انفكا من مراحو والبيكيين الغار فييو ما انعرف ، بلا سووها قعت تناصف فى
امركا فى طريق المحكمة اللتون دى !
هى بس ياوالله مكججناهون !
أها البيخليها تفتتر من بيويتا فيحال تحاميلون أشينو ?
والناس الشايلينلهون جينازى حتى هون ما عتقوهون ، قالوا ديل منيمينيين عيللى يقاتلوا
امركا فيحال جاييى تودى الحيكومة كوورجا لى البلد البيقولولا لاهاى دى !
انت يا عماد لاهاى يا ويين ?
دحين مو هنووك عيند أوسلى وقبال الحيجير والمقل ???
لا تبقى بلدن قريبى الناس ديلا يجونا تانى صادين بعد ما ننفكا منهون ?!
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
سلام يا عماد ، وحبيب نورة ،
انتو صنيتو وكرستو كدى مالكون ?
نان بس تناغمونى وتحتلو تانى ما اشوفكون ضوومة ، الكلام دا مو اعوج منكون ??
أها عماد الله يخدر ضراعو عيرفنا شايل الشغل وقال اعذرونى !
انت يا حيبيب نورة الوهدبك اشينو ???
يعنى القراصى بردت ، والجدادى اتقول الصبى الشاطر شالا ورماها فوق حيليلة سبروقى كشحتو لى
لحقتو الزينيين !
ودا كولو فيحال قوت الاخودلى غيميدة لامن الجيناد ديلا يجوا !
دا كلام يا ناس ?
الله يجيبك ليى يا منى حيبيبتى العيديلى بت خالتى جارة !
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
ست البنات أخيتى
كيف حالك نعلك طيبى
الله يعدلى عليكى شقيش ما تقبلى
ويديك الفى مراضك ويسهل سكتك
أى أنا عارف إتأخرت عليكى الأخرنى
كنت شايل السوق أبيع لى تمباك لقيتلك الخلق
الأعمى شايل المكسر نشدتهم ... البطان حدثونى
قالولى رايحين يتظاهروا ضد الحيكومى .. قسم بالله وحات سيدى الحسن
قت ما أتأخر عليهم ختف عصاتى ومعاه مار رجع عليى الساعة .
****
البارح ما كملتلك الحديث ألليل الحيكومة
قبال كدى حدثتنى عمتى سعديى بت جدى قالتلى
ناس الحكومى المطرطشة دى يقابضو فى البطان
ويرفعوهم فوق البطاح ... داك اليوم جناياً للخدر رسلوهو
قالولو أمش فسراع شيل الأركى عشان يجيب الداية لبنية موحمد صالح
بطنه وجعتى دايره تلدى الولد خب فسراع جاهم راجع بعد
حولين رفعوهو ناس الحكومة ودوهو الجهاد
يعنى أن ما جات بت الهدى بالصدفة ولحقت ولدتا البنيى كانت ضاعت
آه ماقتلك من المظاهرات شلت لناس خالى سرالختم
قلت اشربلى عندو شاهى لقيتلك معاهو محمد خير وعلى ود الرواسى
وست نور بت أبو سوار وسيد احمد كرنديس
لقيتن ليكى ماسكين حديث ... لاهاى ..
قتلهم ست البنات قالت لاهاى ماها بعيدى عيند أوسلى
وقريبى من الحجير والمقل
خالى سرالختم قالى .. يا البوم لاهاى مو هنى
فوق الصعيد بعد بكان يقولولو المسيد وقبال الكاملين
قتلهم البكان ده قريب ...
بلدن قريبى الناس ديلا يجونا تانى صادين بعد ما ننفكا منهون ؟؟؟
آه وينو أكلك ناولينى القراصى فسراع وملاح السبروق سخنيهو ..
أخيك/ عماد
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
واحلالى يا عماد اخوى !
ويين لاقيت ناس ستى نور بت ابسوار ، وموحومد خير ، وود الرواسى ، وسييد احمد كرنديس ???
يا يابا ليى زيمون ما شفتهون ولا اريتون !
الله ينعل الغربى الكعبى البتشتت الناس فى بيكناتن كوتور !
انت بتحدسنى بى سوات ناس الحيكومة الزهاميل المزهلليين ديل نان ? !
البارح لقيتلك الويليد بقال ويشييو كولو واريم من الصفييق والدق !
سعلتو ، قاللى ناسن يقولولون ناس الأمنى ! بس واقعيين فى الناس فدقى !بس البيصور ويشييو
ساكت يمسكوا يلففخو ويقفلوهو فى بوكانن مضللم كدى ، لا موية لا كيسرى ! قوتلو نان
جايين يصووموا الناس بالغسب ??
وغيلا كمان يبقى يسوولون فييو عاضرى كمان !
الناس ديلا خللى بالك ماهون هولنا ولاهون مننا ضوومة !
السووا البيسووا فيها دى سووات ناس برا ديلاك !
وبعد ما عدموا البلد اسم الشى البياكلوا الناس ، وكتتلوا الويليدات ، ومرقوهون من
اشغالون ، وردموا روجال الناس فى السجن ، وقالوا يا دينى ما فيكى عيللى نحنا ،
وخربوا البلد والبلدين ، اساعيتى وكت امركا جاييى تكاتيلون ، قبللوا عليى الناس اللا
ايدون لا كوراعون فيشان يحاموولون ! ويمورقوا ولاد الناس فى الشوارع فيحال يكاجرولون
الامريكان والانجليس !
نان دا بيحيلهون من الغومى الجاياهون ?
قيبيل وكت قعدوا يظلوموا فى الناس ، كانوا ماهون عارفيين حق الناس ماب يروح ?
أها اليرجو الراجيهون ! ما يقوعدوا يفنجيطوا عاد !
بس بيقوا يقبيلوا عليى مصور ، وعليى السوعودييى ، وعليى اشينو ماب اعرفو !
نان دا كولو مااب يحيلهون ! بس ياهون الوقعوا !
زمان الناس وكت تضييقبهون الوسيعى قعد يقبيلوا عليى امركا ولوندون ! اساع هون يقبيلوا
ويين عاد ! ياهين زاتن الدايرات يكجيمينهون !
الليلى عاد عيللى يسووا سووات الجيقر الزرو فى التوكول المافييو طاقة ! عاد ينوط بيى
ويين ?
وامركا هينيى ! يا حيليلون من الراجيهون من اللاب ينوم ولاب يغفل من عبادو !نان
قالولون حق الايمى دى بيروح ساكت ?
ويا حافر حوفرة السو ، وسسع مراقدك فيها !
ولا تنوهدب عليى القراصى شى لا تبقى ساقطى ماب تنوكل !
انت دحين منى بت جارة خالتى ما جات تاوقت قبال شيوييى بالطاقة وصدت ??
ست البنات .
| |
|
|
|
|
|
|
|
|
|
Re: البركاوى ، والقنديلة ، ، والقراريص ، والسبروق الحار ، والمى البارد ، فى لقدابتنا ، وعلينا ج (Re: ست البنات)
|
ٍسلام عليكون ،
الليلى جيت قشيت لقدابتى ، وقييل فيها راجى البوطان والبينييات ، يبقى لاعوقبان بيجو !
نادييى اليومين ديلا بس ماها فيى ضوومة !
ومنى أخيتى مانى عارفاها ويين ? يوما داكا جات انتاوقت ومشت سلام ما قالتا ليى !
وعماد أخوى يبقى الميسيكيين مشدوه فى الشغل الله يخدر ضراعو !
والخدر ود عمى عطا المنان بس الشى الخلا يمشى مننا ما عرفنا جنسو شنو !
ورحيم سودانى يا ربى يبقى طييب ??
وود القرير داكا اصلو بس ليهو كمين دور ما ختا كريعو هينى !
وصديق الموج بس يا اخوانى كان مرة مرة بيقول حبابكون ويمشى !
والباقيين بس بوكانون مانى خابرا ويين !
ست البنات .
| |
|
|
|
|
|
|
| |
أحمد الشايقي
ست البنات
lana mahdi
raheemsudani
Muna Khugali
Halema2
ABU QUSAI
yasiko
حبيب نورة
فيس بوك
تويتر
انستقرام
يوتيوب
بنتيريست