بوابـ اللون ـة .. عن القاصد خطاب
الأعزاء جداً جميع عموم بورداب، قرَّاء وزوَّار سودانيزأونلاين يرحب بكم القاصد وحبيب اللون خطاب حسن احمد ويهديكم هذا النص المجيد والذى يفتحنا خطاب فيه على تأريخنا السودانى بلغة شاعرية هادئة، يفتحنا بوابة اللون على التأريخ ويفتح التأرخ فينا وعلينا لنعرف من نحن. بوابة اللون هو مشروع طويل وممتد عن الهوية السودانية بإعتبار أن الادب والفن الأقدر للوصول إلى هذا الكنه .. فتعالوا إلى نقاش أرحب فتحتَ الساحل للوطن الراحل في دمّي .. دفّق همّي .. غمر الحارات .. نزفتَ نزيف .. مسداري الماطر غرّقني .. آه من حِنّي .. لو أبوابك تدخلني .. لو نفّاجك جوّه بيوتك يروّحني .. و ما ألقى دليل .. أو خرطومك يقطفني .. من غصن الشوك السّورني .. وافضل طايف في كرش الفيل !!! آه لو تعلق قشه على شَعري من شجرا هناك .. ممكن تتمسّح على رجلي يا قط حيران !! و الدنيا صباح و خريفيه .. ممكن جداً تنوّت أشعارك في ضحى متكاسل يا قمري .. آه يا صاحب أنسام الصيف لو تتخاتت نشر الأحلام على حبل اليوم .. و نُّوما مِسا عل فوحا نقوم نفرش لوحاتنا في رحابا ، بوابة اللون عبد القيوم .. لاكين شتان ما بين الراهن و الحلم في الزمن الضايع للنوم !! اللوحه النادره للوطن الرايع للبيع ، بي جاي الوطن الكادح و بتحمّل الوطن الجايع و بتجمّل الوطن الساخط و بتأمل في الحال الأعوج و الميّل للبيع بي جاي قوم على حيلك أسرج خيلك كلّم غيرك أسرع يا زول أكرب بطنك أرفع صدرك أفتح قلبك طلّع حبك قدر العندك أدفع يا زول قرّب يا شاري ، كحّل عينك الشوف الشاهد للحظه فالت و موقوت فيها تدركو ، و فيها يفوت خاطفه اللحظه زي ما بتبرق حا تخفت و تغيب بسراع و اللوحه في إيد البيّاع و الناس جايين من كل فج من إى بقاع هابين كالريح هاطلين كالغيث و كالسيل جارفين صوب البوابه قاصدو رحابا الكل دافر شطر اللوحه و نداء اللون و انا المفتون بالبوح و الصون و اللوحه رجاي راكض كالغير ، و مناي أكون أول من مسَّ الميس لمسه يا فاطر الكون أرواح واشيا ومن لون ثبّتني حين اللوحه مشرعه للشوف فرّجني كل نواحيها ملّكني كل معانيها الغاطس منها و الطافي عكران فيها و الصافي درّجني سِكّاتا يا دال أقبيه كانت ، كان أسطح أوديه كانت أو كِثبان جبلاً كانَ أو غابه وريني إنسانا يا عارف ملامح إشراقو ، إظلامو نوع غاياتو ، معدّل فرحو، حزنو أحلامو مظلوم أم ظالم ؟ ثار على ظالمو و لا مسالم ؟ و لو ما ثار ، قاعد فوق راي ، أم ساي قاعد راجي الصيحه ؟ و هل ما زال في دارو أم نازح ؟ قدامو مسارات السراب فتحن راسخ دعامات السكن غارو مناحات الحزن ردحن نايبات الزمن جارو مِصيبيحو السُّقد قارح دماملو الغم فيا فاطر الكون أرواح واِشيا ومن لون تثبتني حين اللوحه مدقوقه عليها الأجراس الدّلال واقف ، و على أُهبه وقوف الحرّاس و الناس من هول اللحظه راعشه محبوسة أنفاس لا درعاً - ها اللحظه - بيقيها سوراً لا و في الإيد سهماً سيفاً لا فاس إلا الحب ، و ما الشاري غير الإحساس *** أحباب اللون ، و انتم حاثين اللوعه نحو اللوحه فاتحين الصفحه للمشهد باحساس البوص ، بارين اللمحه .. هي الأشواق ، نهباً تجتاحكم ، فاحتملوا جنون الأشواق المجتاحه .. لا توحلكم في رمالا .. و رياحا اللافحا المتكالبا .. لا تكسح بيكم في مجالا .. لا تلبسكم جلبابا .. و صليلا و متعالي صهيلا .. لا ياخدكم في ركابا .. و هديلا ، ذاك الحاني المنساب .. شارق حلقك بالغنيه .. جاهر خاطرك بالمنيه .. مستِّف محلك بسحاب .. لا تنقادلو تنساق ، فتجرع و تملا الأنخاب .. امسك في وعيك عشره .. خليك ماسك ، مسوك الضاق طعم الألوان خِبر الأحمر في التمره ، و في الجمره .. عرف أحوالا في النار هي شراره ، هي عماره ، و هي مزاجات البركان .. * طويلة طويلة الرحلة يا قاصد وهج البوابة يافاصد دم روحك نابت أزهار سوره خارت عرقك لِبُناها مونة وطوبة طويلة الرحلة طويلة ومحفوفة بنصل الاشواك ومكهربة بى فاتك الأشواق وإياك والكاذب من الاضوا ضوك واحد وهجك واحد فإياك يا قاصد إياك طويلة الرحلة طويلة فلا تغمد يا قاصد لا تسهى لا تفتر يا قاصد لا تلهى كان أخد التعب منك ماخد مد ودك لى اقرب ود ممتد نحوك بين الودين بنفتح الحقل تَلِجُو الإتنين حقل الكلمة قال الشيخ المادد ودو لى حبيبة نضيرة وهم والجين حقل الكلمة - تعرفى يا بنتى يا حبيبة اللون - سمعاً يا حبيبو كلى آذان - أنا من النور فتَّح عينىّ وشفت الدنيا لقيتنى مدلّه بيها ومفتون آه يا بنتى يا حبيبة اللون من البوابة قال الجد الأكبر لينا زى ما جدو الأكبر صرَّح وهم صغار فى طور الفتنة - قُدماً يا شيخى يا حبيب اللون واصل قول مطقت شغاف البوح جواى - قال الجد خاص جداً زمن البوابة وخاص أكتر الجيل البطرق أبوابا أما من يدخل ويشهد للوحة ومزاد البيع فذاك أخفَّ - حقاً والعجب الشارى - صدقتى .. - مالك يا حبيبة ... عيونك مالا عيونك يا حبيب اللون - تلهبنى الاشواق تلهبنى ... يا حبيبة يا حبيبة اللون - إحتمال الاشواق المجتاحة درع القاصد - أعلم أيتها الحبيبة لكن ما حيلتى وهاذى العصافير - أى عصافير ... عصافير - الثوانى ... الثوانى ألا تريها ... هى تباعاً تمرق منى ... تصفق محلقة خارج العش ... خارج الوقت خارج الساعة - عش ... يا حبيبة ... ساعة ... أىٍ - قلبى يا حبيبة قلبى ألا تريها ساده الفضا حولى شاقة بى شقشقاتا سكون المكان صاخبة حين تغادر صاخبة حين تعود للعش عصافيرى الثوانى ثوانىّ العصافير منذ طور الفتنة وهى على هذا الحال منذ يفاعتى يا حبيبة إزدادت والعمر شراسة خرَّمت صدرى بمناقيرها اللعينة قدقدتنى حولتنى لى غربال ... آه - أمسك فى وعيك عشرة مِسُــــوك الضاق طعم الالوان ياخابر الاحمر فى التمرة وفى الجمرة يا عارف أحوالا فى النار أمســك أمســك يا قاصد فى وعيك عشرة مِسُـــوك الضاق طعم الالوان أمسك فى وعيك مسكان الوعى درع القاصد أمســك يا حبيبة أدرأ عنك جنون الأشواق المجتاحة - كتر خيرك يا حبيبة - شكراً يا قاصدة - عفواً يا قاصد ... ده الواجب الرحلة طويلة يا حبيبة - صدقتى حقاً الرحلة طويلة - يا سرب العصافير ... يا سربو الضال أكتب أهو الافقِ قدامك لوَّن بجراحاتنا السما غنى العذابات كلها دوزن أنينا ونغما يا سرب العصافير أكتب أهو الافقِ قدامك * كما فى الحربِ حقول ألغام، فى الرحلة تقوم، حقول الكلام يقوم الحقل تحتك .. فوقك جنبك فجاة فى شكل يراع ولا فراشة، إثر الود الممتد بينك وبين مادد ولأنو الرحلة طويلة ونَفَس الرحلة نفس واحد ... لوكنت مدحرج وديان أو جبلاً صاعد نافض كثبان أو دغلاً متشابك فارد، ولا راحة أمامك غير الحقل ! يبقى الحل، مددان ودك لى مادد. لذا تزخر ها الرحلة بحقوله تلقاها نهاراً تتراقص كفراشات، وبتطرِّز للثوب الماهل ليلاً كيراع. لذا أى فراشة رقصت حولك أى يراع هو عبارة عن حقل كلام مفتوح للتو والجنو أتنين، إتدوزن بيناتن ود زمن الرقصة بيدلل على سعة الحقل إيقاع الرقصة ماخود من ألوان الود الممتد أما شكل الحركة فمراية طرب الودين فى كنف الرقصة * فيا قصَّادة يا الشايلين وهج البوابة يا شارداتها وشرَّاده يــا وارداتها وورَّاده طويلة الرحلة طويلة طويلة ولا وقفان لا قعدان لا نومة تاخد .. لا قفوة لا لهواً وارد لا سهوة، والحل واحد هو الحقل فأمدد ودَّك لى مادد عسى ولعلَّ تلجو الأتنين حقل الكلمة وتكون الجمَّة قد تجمع ودينتكم رؤيا، جائز فكرة أو تسطع فى حلوقكم نمَّة وارد .. وارد جداً إحتمال الفرحة وارد يا حبيبو إحتمال الفرحة وارد يا حبيبة أحباب اللون الرحلة طويلة والحل فى الحقل، هو الوقفة حين لا وقفان هو القعدة حين لا قعدان وهو الحلم فى الزمن الضائع للنوم آه يا صاحب أنسام الصيف لو تتخاتت نشر الأحلام على حبل اليوم وننوما مسا على فوحا نقوم نفرش لوحاتنا فى رحابا بوابة اللون عبد القيوم * يا داخل هذا المنهال عليك ، هذا الهاطل ، ليس سوى الشلال .. بقدر اخضرارك ، عليك ينثال .. معدّل ما تحملو من حب ، يحدد نسبة مطرك هذا الهامي .. فتعال موفور الحب مترامي .. تكبر قطراتك تبتل ، مِن فروة راسك ، لي إحساسك ، تتندى الطل ، فموفور الحب تعال .. فتحظى بسخاء الشلال .. و يا داخل ، هذي الهابا عليك هي النسمات ، زخات العطر وطني القسمات ، سناري الطلعه مروي النفحه مهدي الرايات و هي العبق الساري صايل و جايل في الروح ، نعم المسرى هببانو عليك ، كما لمسانك وتر الكون و انت العازف بين احساسك و الفكره فتعل موفور الحب مترامي أما لو كنت ضعيف العاطفه متواضع فقطراتك - أيضاً - حا تكون قد تغشاك ملامسةً مهامسةً قد تتعداك فلا تحظى إلا بأطيافا الضّهابا و لا تتبرد غير في مرمى سرابا أما لو كنت مثقوب القلب عطلان العاطفه و معدوما فعارٍ إنت تماماً قداما جلدك ما هو جلدها هدومك ما ها هدومها و همومك ما كانت يوما لذا الأبواب دونك موصوده و نهاية رحلتك الباب و بالباب حاتظل ما لم تغلق ثقب القلب ما لم تقفلوا ما لم تجبروا ما لم ترقع !! فالثقب ، يا قاصد وهج البوابه ، أهدر حبك واراقو نبضه تنقط ورا نبضه خلاهو يدفق في الفاضي فدفق ، دفق في التربه الغلط و انبت ظلط و اصبح خالي و بالتالي ، حين تفتحوا ما بتلقى حباً كي تدفع في شان اللوحه .. و ذاك الموقف - بالكاد - محرج ، و افضل تعرف من بره .. فالجيب القلب و العمله الحب ! و الجيب مقدود ، و الحب مافي !!! فيا ترقع يا قاصد ، يا ترجع !! فالجيب مقدود ، و الحب مافي !! فيا ترقع يا قاصد ، يا ترجع !! و افضل تعرف من برّه ... * غرفةالمراقبة فني 1 :- ياخ ده يراع غريب جدا .. شايفو بيظهر ويختفي كيف؟ فني 2 :- التماس طارئ .. فني 1 :- دي الحالة الوحيدة اللا نحنا ولا النص حيكون عندنا قرار فيها فني 2 :- شنو يعني ! فني 1 :- حنضطر نلتقطه .. ياخي ده شوفه داخل في كم كاميرا عندك .. يختفي هنا.. عشان يظهر هناك، بس حاولو انكم تثبتوهو في كاميرات محدده وعالجو مسالة الصوت عشان نقدر نعرف البيدور شنو، في الحقل ده بالتحديد. واضح انه ده التماس طارئ فعلا. فني 2 :- الصوت مبهم لكن أفتكر ممكن يتعالج.. فني 1 :- ده صوت طائر ولا شنو.. طائر فعلا فني 2 :- ده.. ما عرفتو لسه ! فني 1 :- آ .. ده .. دقيقه فني 2 :- شنووو..؟ فني 1 :- .. السقد .. فني 2 :- أيواه ده الأخ الما بنوم فني 1 :- هو غالبا بنوم .. يعني برخم بكون بالنهار وبمارس حياته بالليل زي الوطواط والبوم.. كدي نسأل لينا واحد من ناس البيئه عن المعلومه دي. فني 2 :- ياخوي نحنا ما علينا .. المهم ندير غرفة مراقبتنا دي بتقنيه عاليه واحكام. فني 1 :- بالضبط .. مالنا نحن ومال الكلام .. نحنا نتكلم من خلال أدواتنا زيما قلت .. درجة ضو..درجة حراره .. صوت كيف .. صورة .. لون حريف .. نضبط شغلنا . فني 2 :- أفتكر نحن كده جاهزين نخش على الحقل.. هذا الطارئ فني 1 :- هيا بنا.. جاهز ؟؟ فني 2 :- مويه ونور.. فني 1 :- أرح ... فني 2 :- خشينا. * لا صوت غير صوتك يا ’سقد الهم جربان الأنت مباريهو بي نقديك نَمْ ورطان السَمْعان لي ردحيكَ وانت الرافع لحزنه في الضَلمه علم أسكت يا ’سقد اسكت حسك لا ليك حاحاي ها العتمة لا صايد براهو النوم هو مجافيني وانت مكنكش في حِباله سالي وجابد من تحت الغفوه تقج طربان شقات الوَسَنَه تكون لابد من حالة البيت زازيت ومرقت للا بيت نازح.. أها.. إرتحت .. رضيت! فرشت حسكنيت الأرض .. رقدتَ فريت السما إتغطيت دايرني أصنقر..! دايرني أفز .. أختِر أمشي.. قول ولا أصنقر أحسن ..دايرني .. ما بيناتنا .. قسماً عظماً إلا تقول أصنقر أحسن شايفك صنيت أها .. أكتف يديني تقريني .. أمرق كِتباتي تمليني.. مليتني الكِتال .. حافِظ .. خَربَان الديار ... هِجرانه .. حافظ صمْ مليتني النزوح ..نازِح مليتني الهوان .. مليتني الدرادر ..ساكت مالك !! ما تَملي ... * فني 1 :- .. أخيراً هذا هو الإلتماس الطارئ فني 2 :- زِهج لكن الراجل .. ياخي لكن ده ُسقد ثقيل خلاص فني 1 :- أثقل منو الواقع الوضع الراجل في الموقف ده فني 2 :- القصه كلها ما ليها أي مبرر فني 1 :- نرجع للرحله .. * في كسر التحول من فراشة إلى يراع يراع إلى فراش .. مرقت يرول من النهر فتحت (طاقة) النهر وخرجت خرجت والموج .. سابحه ومرقت رابحه.. راكضه أكانت رابحه بتجري كما ركضت بدري قاصده المهدي فى قدير .. ركضت رابحه ووقفت مندي .. أريتك يا قاصد واقف وقفانه .. بنت السلطان واقفه أكانت وبتغني .. في وجه الإعدام يا قاصد أعدام السلطان عجبنا الأب ومندي عجبنا صادحه بالموال هاك يا صدحان .. أذا أنتو أعدمتو عجبنا الآن أعدمتو السلطان عجبنا كُتار لسع جايين جايين جايين لسه الولدان من تحت الشمس مباشرةً جات مارقه هدات رغم السُل واللقمه المافي شح الماء العذب الصافي هدات جات مارقه أنضر ما يكون رفعت إيدها بتحي هداب وكل القاصدات ..كل القصاد وهج البوابه من باب الجبل التاني مرقت تاجوج حار القصاد على مين ترسى النظره هدات أم تاجوج .. تاجوج ولا هدات تاه الشوف بين الجبلين بتوقيت واحد هبطوا الإتنين صخره بصخره درَج الجبلين واختلطوا تماماً بالناس حاثين اللوعه نحو اللوحه بإحساس البوص بارين اللمحه أحباب اللون محتشده مهيره بالغُنا بانت وزنت في صوتها آلات كل الجوقات كل النوت الأفلح في تدوينه القمري محتشده مهيره بالغُنا بانت محتشده أكانت .. الرمح المبري بالغنوه بتطلق عصفور النار من قلب الشعب تشجي العصافير باللون وهج البوابة آه لو غنوا مهيره ومندي سوا لو غنوا دويتو .. آه لوشالوالغنوه سوا داك يبقى هوى أكبر من سعة القلب داك يبقى هوى داك يبقى هوى داك يبقى هوى * ماك غلطان- # 1 ده هوى الأوطان أشرح طان وأروي العطشان حاكي الغمام لا إنسان فوق للسودان.. لا إنسان كالغيطان طوقك سيطان يا الخمجان دايماَ غبطان يوت طربان طرب الشربان دون الأنام هز البان واشجي الركبان الرقصان فوق الأغصان ليك يا حمام قلبك صان في جوفو حصان نوح يا حمام الفيك بان دون الحبان يا العجبان الماكَ جبان للعشمان وطنك ده أمان خاتي الملام إنت كمان جارك في طمان أبكي جُمان واطرى زمان كنا ضمان وهوانا يمان أطرى فلان وليالي عنان وين يا سلام كنا حُنان والحله جنان نوح يا حمام اليوم آن للمحنه أوان ضل المُرام مافي أخوان وحياتنا هوان نوح يا حمام يا الولهان ولهك دلهان وين المُرام ما في دهان للعرضو مهان إلا الحِمامْ * " وُد العميري يقابل وُد الخليل فيحلق - ظل الفراش # 2 الذي كان للعميري/ الخليل. "وُد مصطفى يقابل وُد الخليل ليحلق ظل الفراش الذي كان لمصطفى/ الخليل وُد المك يقابل وُد الخليل ليحلق ظل الفراش الذي كان للمك/ الخليل وُد عبيد يقابل وُد الخليل ليحلق أيضاً ظل الفراش الذي كان لعبيد/ الخليل # 3 فآه يا صاحب أنسام الصيف لو تتخاتت نشر الأحلام على حبل اليوم ونوما مسا على فوحا نقوم نفرش لوحاتنا في رحابا بوابة اللون عبدالقيوم فراش عميري/الخليل:- في لهيبك أشوف ساحل كالفراشه أجيك راحل يا لطيف الطيف شتا عندك صيف أهوى وابقى في نار فراش مصطفى/الخليل:- ماك غلطان ده هوى الأوطان لا إنسان فوق للسودان .. لا إنسان أشرح طان واروي العطشان فراش عبيد/ الخليل :- جسم الغُنا كان معلول كان هلكان قاصر النظره لذا كان لابد من إحداث ثوره ترُج السايد وتبث الوطن من جديد في الزول كان لازم يتعافى الجسم عشان يقدر يقاوم # 4 فراش مصطفى/ الخليل:- من جنان رضوان أصلك لذا كل ربيع فصلك إتنفس فوح تتنفس ناس ورياض وبحار فراش المك عشان كده صرتو حداه وبرز الدور الطليعي للفنان وكان بالتالي لازم تُساءلوا من قبل صمويل عطيه مدير المخابرات " فني 1 :- تعالوا معاي نشوف - في توقع النص لما دار بين الخليل وصمويل عطيه إبان وعقب ثورة 1924 وتغنيهم بأغنية الشرف الباذخ * فنى 1 :- ليتنى كُنت هناك فى ذلك الوقت. فنى 2 :- ليس بالضرورة أن تعيش الوقت ذاته والمكان .. المهم هو تنسم روح كل ذلك، فالرجل على موعد مع مدير المخابرات اليوم. فنى 1 :- سيكون لقاء حافل دون شك. فنى 2 :- بالتأكيد .. أنا أحاول الآن مدِّ أجهزتى نحو مكتب صامويل . فنى 1 :- انا احاول الآن ذات الشئ مع الخليل .. برئاسة البوستة والتلغراف بالخرطوم، حيث يعمل .. بالمناسبة هل تظن أن خليل كان على علم بهذا الإستدعاء قبل وقت كافى فنى 2 :- أنا ارجح أنه علم قبل قليل .. ساعة او ما شابه ذلك فى ذات اليوم فنى 1 :- أنا اعتقد أيضاً ذلك .. فأن يخطره إبراهيم زكى سعد .. نائب ملاحظ التلغراف او السرجنت هكس .. بإستدعائه من قبل صامويل عطية .. فى ذات اليوم .. وبعد وقت وجيز .. هذا جزء هام من تجهيز الطريدة المشاغبة للمصيدة فنى 2 :- دعنا نلقى نظرة على الرجلين فنى 1 :- أحب أن أفعل ذلك .. هيا بنا فنى 2 :- فكرة طيبة .. أستطيع أن أرى صامويل الآن فنى 1 :- مهلا مهلا .. أها .. هاهوالسيد فرح .. جالس فى هدوءه المعتاد يدخن فنى 2 :- صمويل يطالع تقارير الخليل متفحصاً .. أما زال يقوم بذلك !! رأيت الرجل يفعل ذلك مرات ومرات .. يدونٍ بعض الملاحظات هنا وهناك فنى 1 :- الخليل يطفئ السجارة بهدوء .. ينقر عدة نقرات على التلغراف وينتظر،... أمين .. هل انت هناك (تأتيه نقرات من الجانب الآخر للإتصال) .. نعم أنا هنا .. أمين خليل يصلح كرافتته .. وينقر راداً .. الذئب الأكبر .. فى إنتظار الصيد الثمين منتصف هذا النهار .. يرد الطرف الثانى .. إنت .. كيف !! ينقر الخليل .. تمام .. كُله تمام .. حأمثلكم فى أول إجتماع رسمى للأدب والسلطة .. يرد الطرف الثانى عديلة يا أمين .. قلوبنا معاك .. ومعاها .. يرد خليل .. قلبك صان فى جوفه حصان إنتو وهى فى الغرفة المختومة بالشمع الاحمر .. يرد الطرف الثانى .. أبشر بالخير .. أنا ناقر هسى لى كل المحطات .. وهناك حيكونوا حولك أخوان .. جوة المبنى وبره .. تمرق منصور يرد الخليل .. حيى كل الواقفين .. أنا زول مشية الوقت أزف .. أمين يقف الخليل يعدل سترته .. يتناول قداحته وعلبة السجائر .. يغادر المكتب فى شموخ .. يوقع على تفتر الخروج مسجلا الوقت AM 11:30 فنى 2 :- واللة سرحت بى جنس سرحه .. فعلا يا ريت لو كنا عايشين الزمن داك .. صمويل عامل كيف ؟ فنى 1 :- .. عادى جداً .. كم مرة شرب شاى وقهوة .. خلط القهوة بى كم قطرة ويسكى .. عمل كم تلفون .. لكن شكلو جاهز للقاء الخليل .. خليل عامل كيف ؟ فنى 2 :- على شارع النيل ماشى وبيدندن .. قوم وقوم كفاك يا نايم شوف وشوف حداك يا لايم مجدك ولَّى وشرفك ضلَّ وإمتى تزيد زيادة النيل يا نُزلانا أمرقو الزمة كيف ينطاق هوان الأمة شالوا حقوقنا وزردوا حلقونا ديل دايرين دمانا تسيل فنى 1 : أكيد هو بيدندن بالكلمات دى .. وصور الطلاب وهم بيرددوها فيها فى الشوارع بتتراءى قدام عيونو فنى 2 : وده البجنن قلم المخابرات فنى 1 : نحن ونحن الشرف الباذخ دابى الكر شباب النيل فنى 2 : يا الله يا ابو الشباب .. صاحبك وصل مكتب صامويل .. فنى 1 : ده الكلام .. فنى 2 : طرقات على الباب المفتوح .. فنى 1 : .. نعم !! .. ماذا يمكننى ان افعل لك !! خليل : أنا خليل فرح بدرى. .. لقد طلبت حضورى لمكتبك .. فى هذا التوقيت صامويل : نعم .. شكرا لحضورك سيد خليل فرح .. انا صامويل .. صامويل عطية خليل : شكرا سيد صامويل عطية صامويل : كيف هو الشغل سيد فرح خليل : على مايرم سيد عطية .. شكرا لسؤالك صامويل : عفوا .. لم أسالك ماذا تفضل أن تشرب .. شاى .. قهوة خليل : اشكرك على هذا الكرم .. لقد تناولت كلما أستطعت حتى الآن صامويل : .. عظيم .. سيد خليل .. علمت أنك لست موظف ممتاز ومهندس مقتدر فقط وإنما أيضا شاعر وفنان على درجة من الخصوصية خليل : أشكرك على كلماتك .. ولو انها اكثر مما أستحق صامويل : أنا صادق فيما ذكرت فى حقك .. قل لى .. نحن ونحن الشرف الباذخ .. علمت انها لك .. أعنى كلمات الاغنية. خليل : هى من تأليفى شعراً وموسيقى صامويل : هذه قدرات فائقة .. سيد فرح .. اين تجد الوقت لكل ذلك خليل : لا أبذل مجهوداً كبيراً .. ولا وقتاً .. كما تعتقد سيادتكم .. هو هكذا يأتى .. الشعر او قل تأتى الكلمات مغناه صامويل : أنت تعزف آلة العود .. سيد فرح خليل : نعم صامويل : غريبة .. العود ليس آلة معروفة هنا كيف تمكنت من ذلك. خليل : أخذت قواعد العزف عليه من منشديين صوفيين كانا يستقدمان من مصر خصيصاً كل عام للمشاركة فى إحياء الذكرى السنوية للسيد أحمد بن إدريس بحى الموردة بأمدرمان صامويل : هذا مثير للإهتمام .. قل لى خليل : نعم صامويل : حول تلك الأغنية .. ماإسمها !! خليل : الشرف الباذخ .. إن شئت أن تطلق عليها إسماً صامويل : هل يمكنك ان تتحدث عنها خليل : بالتأكيد .. لكن هل هنالك سؤال معين ! صامويل : حسناً .. أن تذكر مصر والسودان .. خليل : نعم .. نحن إخوة وأشقاء .. يربط بيننا النيل العظيم .. صامويل : أجل اعلم ذلك .. هل هذا كل ما هناك ؟ خليل : دون شك هنالك الكثير صامويل : هل تحب ان تتحدث حول ذلك خليل : إذا رغبت صامويل : ارغب بالتأكيد .. لكن .. ربما فى وقت آخر .. الآن .. هل يمكننى أن أستمع للأغنية من مبدعها مباشرة. خليل : بالتأكيد سيد صامويل .. فقط أخشى .. أنك تعنى الآن صامويل : هل هناك مانع ؟ خليل: بعد إذن سيادتكم فالوقت .. والمكان للعمل صامويل : ولكنه عملى .. ألا ترى ذلك .. أن ألم بكل ما يدور خليل : أرى ذلك .. لكن تحفظى ينبنى على سببين .. الأول إحترامى لديوان الحكومة هذا حيث إعدت على العمل فيه فقط .. الثانى إحترامى لفنى فأنا لا اقدمه إلا فى مقامه وبالشكل المناسب .. ألا ترى سيد عطية أننى لاأحمل العود ! أما بخصوص الإستماع .. فلا مانع لدى متى توفرت الأسباب .. ولك أن تختار المكان .. حتى لو كان منزلكم فلا مانع لدى .. صامويل : أقنعتنى سيد خليل .. ويشرفنى أن أستقبلك بالمنزل .. أى الأيام تفضل ؟ خليل : وأنا يشرفنى الحضور .. ليكن مساء بعد غد .. إذا كان هذا لا يتعارض و .. صامويل : لا .. البتة .. ماذا عن السابعة مساء بعد غد ! خليل : مناسب جداً .. إلى اللقاء صامويل : إلى اللقاء إذاً .. سلام خليل : سلام صامويل : سلام سيد خليل فنى 1 : لكن ده اجتماع تاريخى فنى 2 : حأمثلكم فى أول إجتماع رسمى للأدب والسلطة فنى 1 : بصراحة .. سيد صامويل .. مهمتك صارت صعبة فنى 2 : ويا نجبا .. يا حُذق .. يا من من صميم شعاركم دخول المآزق .. مهمتكم صارت #5 أصعب . فنى 1 : إجتماع تأريخى فعلاً فنى 2 : آه .. يا عزة .. لو أعرف .. متين بالتحديد .. بديتى تتشكلى فى معمل الخليل فنى 1 : عديلة آمين .. قلوبنا معاك .. ومعاها فنى 2 : هى ليست أغنية .. او أغنيات يهتف بها المتظاهرون الذين تهبهم رياح الثورة القادمة من الشمال فينتشون صادحين فنى 1 : الرياح تهب من هنا سيد صامويل .. كما والنيل مرةً .. لم يحاول الجريان من الشمال للجنوب فنى 2 : قلبك صان فى جوفه حصان .. إنتو وهى فى الغرفة المختومة بالشمع الأحمر فنى 1 : حتعدد إجتماعاتك يا صامويل والنجبا .. عبيد عبدالنور .. العبادى وأبوالروس مرة ومرة .. مرات فنى 2 : أنا ناقز لى كل المحطات .. وهناك حيكونوا حولك أخوان جوة المبنى وبرة .. تمرق منصور فنى 1 : حيى الواقفين .. أنا زول مشية .. الوقت أزف فنى 2 : الوقت فعلا أزف يا أمين .. مانشوف الجماعة ديل عاملين شنو فنى 1 : تقصد ظلال الفراش فنى 2 : ظلال الفراش ما فاتحين الحقل أساساً .. أنا قاصد فنى 1 : آآ .. صامويل والخليل فنى 2 : عليك نور .. جاهز فنى 1 : أرح .. فنى 2 : مشينا .. صامويل : أحس إهتزاز التاج فوق رأس الملك الآن عطر مزعج يتجول فى ردهات القصر طيور مدربة على القنص تجرد سترات الجنود من كل أنواع الرتب وانواط الجداره الشاب ثابت.. هادى وثابت.. وعليه تهذيب حد الاحراج حولنى لى خانه الاجابه.. وانا.. مفروض علي اكون فى خانه السؤال.. ما بغنى قال.. فى ديوان الحكومه.. عشان بحترمه بتحترمه.. يا خليل اكثر مني؟؟ مش كده وبس ده عزم نفسه عندى فى البيت!! استدعيتنى يا خليل ولا انا الاستدعيتك!! قال ايه!! نعم هنالك الكثير وكان المفروض اتلعثم .. اضطرب.. اعتذر.. اهرب من السؤال!! لا.. ده كله ما احصل و... ..نعم هنالك الكثير.. اعلم ان هنالك الكثير.. لقد قلت كل شئ وبفجاجه تحسد عليها.. .. انت شنو طفيلى دخيل .. و.. و .. ديل دايرين دمانا تسيل و .. قوم وقوم كفاك يا نايم شوف وشوف حداك يالايم واغنيهالي اكون كمان دايرنى اطرب!! شاعر.. ده الكان ناقص شاعر وفنان كمان .. اساله عشان اربكه .. اين تجد الوقت لكل ذلك؟ فيطمئننى منزرا .. لا ابذل مجهودا كبيرا ولا وقتا.. كما تعتقد سيادتكم .. هو هكذا ياتى .. الشعر .. او قل تاتى الكلمات مغناه.. ده الكان ناقص قصيده كاعلان الحرب تبدو بالنسبه لي وتحريضيه من الدرجه الاولى واذا كنت انا المواطن المعنى بى .. قوم وقوم وشوف وشوف .. فهذا اشبه بملاءه من الدبابيس لا استطيع معها الرقاد وده شعب غريب يا صامويل الثورة عنده تسكن تحت الجلد مباشره اقل وخذه تصحيها .. وتحوله لى بركان لمن القى ليهو شاعر بالمواصفات الشفتها دى لا.. ده كتير وبعدين بالثقه والصرامه دى!؟ ..اكيد ما بتحرك وحده .. اكيد متحرك ضمن نسيج متكامل .. تنظيم. الشرف البازخ بتاعتك ام ضفاير تطلع لى مين حسنا سيد خليل .. اشوفك بعد بكره *** فنى(1):- هذا ما كان من امر .. صامويل عطيه كيف الخليل عندك بهناك فنى(2):- الخليل .. والشارع . يكاد انساب جواهو ..من العزوبه والخليل متناغم وظلال الفراش فى السبحان.. ظل الفراش الواحد\ للخليل المنقسم مع بقية ظلال الفراش متاكد جدا عزه هناك كانت حاضره وانا مع صامويل فى المكتب .. اكاد اسمع همساتها .. انفاسها .. أكانت تلفحنى .. اشوفها يا ظلال الفراش خلفه مباشرة تتراءى فى الصورة المعلقة على الحائط تزح الشخص الجالس فى الصورة لتجلس هى عزه بي ذاتها وصفاتها.. البت المرَّقتها من روحى #6 حاحاها الدوش طبعا لاحق وسلاها من حلق الفنان وردى اشوفها تنظر بى حب نحوى قول يا زول.. عيونا أكانت بتطمني وبتحمَّلنى مزيد من المسئوليه بى ارباكه لى صامويل .. عزه أكانت بتثبتنى صامويل إسال.. وعزه تطلع فى الحاجات .. من دقات التلغراف الكتب.. الجرايد.. المجلات.. تكشف احوال العالم . فى الاجتماعات تثبت للمحضر والمفروض بكره يكون وتفتح عزه أكانت فى المدارس بالعرق السودانى كانت مع بابكر بدرى والعبادى وحدباى ..احمد عبدالله صالح عبد السيد .. البنا وابو صلاح.. كانت مع عبيد حاج الامين وعلى عبد اللطيف.. إسال صامويل وتضحك قدامى ووراي عزه مسنود كنت بالناس الطيبين.. المالين الوطن الناس ال.. لو قامت شالت.. الشيله تقيله أكانت مهما تكون وكان راقت قالت القول الزين تضحك قدامى .. وانا قاعد قدامو والنجبا وراى واقفين رغم الجديه..وصامويل بسال..عزه اكانت دايما تضحك.. رغم الموقف.. مرات توشك تضحكنى وتهمس فى اذنى... : الغد ارحب الغد ارحب يا خليل..الغد.. وانا لو بى مرادى اقول..القالو وراى هاشم اقيف وسط البلد واهتف بريدك يا صباح عمري بريدك.. #7 مرقت يا ظلال الفراش داك النهار والبت الطلعتها من روحى فتلتها فتلان كبرت وصارت انسان ومرقنا سوى ٍٍ.. من المكتب . كل النجبا شافوها معاي قادلين فى الشارع ونتونس ذي اي اتنين اتدوزن بيناتهم ود ومفتوح بيناتهم حقل كلام... فراش مصطفى \ العميرى مكتوبه فى الممشى العريض شيلة خطوتك للبنيه مرسومه بالخط العنيد فى ذمة الحاضر وصيه شاهده التواريخ والسير والانتظار..... ومازالـت قريحـة خـطاب تنبـضُ بوابــــة اللــــون بوابـــة اللـــون بوابــة اللــون بوابـة اللـون بوابة اللون تابعوا هنا سادتى ما دار من نقاش ومداخلات عندما بدأ نص بوابة اللون يتخلق حديثاً ويتخولق كما يردد القاصد وحبيب اللون منوت " بوابة اللون " ، نصٌّ مثير لخطاب حسن أحمد ، يفتح ُ أبواب التأمل !!!

العنوان	الكاتب	Date
بوابـ اللون ـة .. عن القاصد خطاب	منعمشوف	11-17-04, 12:25 PM
Re: بوابـ اللون ـة .. عن القاصد خطاب	anwar abu gaidaa	11-17-04, 01:11 PM
Re: بوابـ اللون ـة .. عن القاصد خطاب	منعمشوف	11-18-04, 07:35 AM
Re: بوابـ اللون ـة .. عن القاصد خطاب	عصام عبد الحفيظ	11-18-04, 07:52 AM
Re: بوابـ اللون ـة .. عن القاصد خطاب	مصطفى عجب	11-18-04, 08:06 AM
Re: بوابـ اللون ـة .. عن القاصد خطاب	منعمشوف	11-18-04, 08:22 AM
Re: بوابـ اللون ـة .. عن القاصد خطاب	منعمشوف	11-18-04, 09:03 AM
Re: بوابـ اللون ـة .. عن القاصد خطاب	مصطفى عجب	11-18-04, 08:52 AM
Re: بوابـ اللون ـة .. عن القاصد خطاب	بارعة	11-19-04, 02:43 PM
Re: بوابـ اللون ـة .. عن القاصد خطاب	بارعة	11-26-04, 11:28 AM
Re: بوابـ اللون ـة .. عن القاصد خطاب	مناهل محمد الحسن	11-19-04, 10:36 PM
Re: بوابـ اللون ـة .. عن القاصد خطاب	منعمشوف	11-26-04, 10:12 AM
Re: بوابـ اللون ـة .. عن القاصد خطاب	منوت	11-26-04, 12:30 PM
Re: بوابـ اللون ـة .. عن القاصد خطاب	منعمشوف	11-26-04, 05:57 PM
Re: بوابـ اللون ـة .. عن القاصد خطاب	khider	12-01-04, 08:21 PM
Re: بوابـ اللون ـة .. عن القاصد خطاب	صباح حسين	12-01-04, 09:00 PM
Re: بوابـ اللون ـة .. عن القاصد خطاب	Ameer Farouq	12-01-04, 11:19 PM
Re: بوابـ اللون ـة .. عن القاصد خطاب	صباح حسين	12-02-04, 06:42 AM
Re: بوابـ اللون ـة .. عن القاصد خطاب	ابو مهند	12-02-04, 10:26 AM
Re: بوابـ اللون ـة .. عن القاصد خطاب	منعمشوف	12-02-04, 12:31 PM
Re: بوابـ اللون ـة .. عن القاصد خطاب	منعمشوف	12-02-04, 12:39 PM
Re: بوابـ اللون ـة .. عن القاصد خطاب	منعمشوف	12-02-04, 01:09 PM
Re: بوابـ اللون ـة .. عن القاصد خطاب	منعمشوف	12-02-04, 01:28 PM
Re: بوابـ اللون ـة .. عن القاصد خطاب	Tumadir	12-02-04, 01:52 PM
Re: بوابـ اللون ـة .. عن القاصد خطاب	khider	12-02-04, 02:09 PM
Re: بوابـ اللون ـة .. عن القاصد خطاب	Tumadir	12-02-04, 02:25 PM
Re: بوابـ اللون ـة .. عن القاصد خطاب	منعمشوف	12-02-04, 02:25 PM
Re: بوابـ اللون ـة .. عن القاصد خطاب	منعمشوف	12-02-04, 02:29 PM
Re: بوابـ اللون ـة .. عن القاصد خطاب	Nagat Mohamed Ali	12-02-04, 11:26 PM
Re: بوابـ اللون ـة .. عن القاصد خطاب	Tumadir	12-03-04, 00:49 AM
Re: بوابـ اللون ـة .. عن القاصد خطاب	منعمشوف	12-03-04, 10:42 AM
Re: بوابـ اللون ـة .. عن القاصد خطاب	Nagat Mohamed Ali	12-03-04, 10:55 AM
Re: بوابـ اللون ـة .. عن القاصد خطاب	Hadia Mohamed	12-04-04, 07:38 AM
Re: بوابـ اللون ـة .. عن القاصد خطاب	بارعة	12-04-04, 05:36 PM
Re: بوابـ اللون ـة .. عن القاصد خطاب	Tumadir	12-04-04, 05:56 PM
Re: بوابـ اللون ـة .. عن القاصد خطاب	Tagelsir Elmelik	12-09-04, 08:03 PM
Re: بوابـ اللون ـة .. عن القاصد خطاب	Nagat Mohamed Ali	12-05-04, 04:45 PM
Re: بوابـ اللون ـة .. عن القاصد خطاب	Osman Hamid	12-06-04, 02:30 AM
Re: بوابـ اللون ـة .. عن القاصد خطاب	مناهل محمد الحسن	12-07-04, 05:10 AM
Re: بوابـ اللون ـة .. عن القاصد خطاب	منعمشوف	12-08-04, 02:41 PM
Re: بوابـ اللون ـة .. عن القاصد خطاب	طلال عفيفي	12-08-04, 02:51 PM
Re: بوابـ اللون ـة .. عن القاصد خطاب	Osman Hamid	12-09-04, 00:46 AM
Re: بوابـ اللون ـة .. عن القاصد خطاب	طلال عفيفي	12-10-04, 01:39 AM
Re: بوابـ اللون ـة .. عن القاصد خطاب	khider	12-10-04, 02:17 AM
Re: بوابـ اللون ـة .. عن القاصد خطاب	Osman Hamid	12-15-04, 02:11 AM
Re: بوابـ اللون ـة .. عن القاصد خطاب	khider	12-15-04, 02:24 AM
Re: بوابـ اللون ـة .. عن القاصد خطاب	Tumadir	12-15-04, 02:41 AM
Re: بوابـ اللون ـة .. عن القاصد خطاب	منعمشوف	12-29-04, 05:42 PM
Re: بوابـ اللون ـة .. عن القاصد خطاب	Ameer Farouq	12-30-04, 01:48 AM
Re: بوابـ اللون ـة .. عن القاصد خطاب	طلال عفيفي	12-30-04, 04:11 AM
Re: بوابـ اللون ـة .. عن القاصد خطاب	shiry	12-30-04, 04:19 AM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]