|
|
 ودعناك الله هاشم شعر عزمي احمد خليل
|
ودعناك الله هاشم
شعر عزمي احمد خليل
إلى توأم الروح وصديق العمر أبدا الراحل المقيم
الفنان هاشم ميرغني
منو القال ليك رحلت
وهواك في قلوبنا ساكن
تهون الروح عشانك
ويوم ما بتبقى هاين
عيوننا تنوح حزينه
تـفـتـش ليك تـعاين
ولو حاولنا نصبر
غيابك فينا باين
حليل ناس راما بعدك
وسوداه وراكا فاتن
####
زمان غنيتو ريدنا
وواسيت كل جريح
وما خبيتو حزنك
وكان واضح صريح
عمه الدنيا عشقك
وملا الكون الفسيح
وللعشاق بنيت
من فنك ضريح
المجنون شفيتو
وبيك جن النصيح
####
ذكراك فينا باقيه
وما بننساك محال
نرجاك كل لحظه
مهما البعد طال
وحاتك ما بنقنع
غيب وارجع تعال
لكن ما بإيدنا
ليك المولى شال
خلاص حان الزفاف
وخلاص العمر زال
####
تغني إنشاء الله بكره
للحور الحسان
وتصدح بي غناكا
في روض الجنان
ودعناك الله هاشم
في ذمة الرحمن
ليك الجنه نسأل
والتوبه والغفران
ويجزيك الله خير
عن كافة الحبان
واشنطن 1/6/2006
|
|
 
|
|
|
|
فيس بوك
تويتر
انستقرام
يوتيوب
بنتيريست