|
كورتنا ما بين ارضية الملعب و رداءة الفنادق و ارهاق السفر
|
الهلال و المريخ و كمان الاولمبي في كل رحلة نسمع قبل المباراة الشكية من ارهاق الطيران و لحظة الوصول رداءة الفنادق و بعد المباراة الشكيه من ارضية الملعب مع انو اسواء ملعب خارج السودان ارضيته بتكون احسن من ملاعبنا على حسب زعمي و انا و الله شايف دي ما اسباب الناس ديل اصلا ماشين يلعبو كوره ما شهر عسل يعني اي اوضه جنبها حمام مناسبه بالنسبه لينا كسودانيين و دي ما حاجه بتمنع الكوره لو جينا لي البايغرافي بتاع لعيبتنا ح نلقاهم كلهم اما من الولايات او ساكنين امبده و الحاج يوسف (يعني شبه كاكا ود العز ما فيهم) لكن واضح انو الشكيه دي بتجي في الاول من الاداريين امثال الوالي و الدقير و الارباب لانو ديل طولو في حياة العز و الرفاهية و جربو فنادق الدنيا دي كلها خمسه و سته و سبعه ليهم حق يشتكو لكن ناس بهاء الدين و سفاري و حموده بشتكو مالهم من الفنادق بالنسبه لموضوع السفر و ارهاق الطيران دا دايما بيحصل لينا جوه الخرطوم ناهيك عن السفر لي خارج السودان و السفر لي تونس عن طريق الدوحه اريح من السفر لي الحاج يوسف شارع واحد لمن تركب هايسات الوحده و ينزلوك جنب بيت الامين دفع الله اما حكاية ارضية الملعب دي فمبتدعها ريكاردو في البدايه كان بيشتكي بعد المباراة تبريراً للهزيمه لكن في الفتره الاخيره لمن الناس كشفو الحكايه صاريشكو قبل و بعد المباراة وممكن ريكاردو يكون معزور لانو من البرازيل لكن ناس هيثم مصطفى مشكلتهم شنو في الارضيات دي
يا ربي مشكلة كورتنا في شنو * اللاعب عندنا فاقد تربوي طيب الحاج ضيوف دا قرا متين * التغذيه و بنية اللاعب و ثبت ان بنية اللاعب السوداني تتفوق على الاخرين و هناك من يقول التخطيط السليم وناس الكنغو الديمقراطيه ديل خططو لي كورتهم متين ما زمنهم كلو حروب و هم افضل مننا يا ناس مشكلة الكوره عندنا في شنو ؟
|
|
|
|
|
|
|
|
|