|
|
 المغترب السوداني بي القديم وبي الجديد..
|
اما عارف لكن عندي إحساس إنو الشعب السوداني هو أول شعب عرف الإغتراب بمعناه الحديث خصوصاً عبر بوابة الخليج ..
والأغرب إنو السودانيين إغتربوا في الخليج في زمن كان فيهو السودان أفضل بكثير من أي دولة خليجية أو عربية أو أفريقية وكان من المفترض أن تكون الهجرة عكسية ..
اهل الشمال هم من بدأ الإغتراب والغريبة إنهم بيتعذروا بي أعذار واهية وونسة مكررة :
نحن يا ولدي إغتربنا عشان نهرب من الإستعمار !!!!
المحيّر وحسب روايات التاريخ (وإن كنت أعلم إنها مغلوطة) إلا إنو ناس الشمال تحديداً (نوبيين دناقلة ومحس ) ما إتعصروا شديد من الإستعمار وكانوا أول مرحب به ..
ولو إتجاوزنا النقطة دي عشان ما تكون محل خلاف فالإستعمار كان ممتاز جداً حسب روايات الحبوبات وما كان بمعنى الذل والهوان البنسمع بيهو أسة ده خصوصاً في الأربعينات والخمسينات بداية الإغتراب..
أعرف من الدناقلة والحلفاويين والمحس من دخل الخليج في بداية الخمسينات وإلى الان ماشاء الله ..
لفت نظري حدوث تغييرات في مفاهيم الإغتراب والمغتربين وهي نظرة شخصية أحببت أن تشاركوني في نقاشها للوصول لحقيقة معينة ..
في رأيي إنو مفهوم الإغتراب والمغتربين في الخليج تحديداً مرّ ويمرّ بمرحلتين :
المرحلة الأولى(الاباء والأجداد) :
هي مرحلة إغتراب أبّهاتنا وأجدادنا للخليج بغرض تحسين الأوضاع والمعيشة والحياة الرغدة ..
نقولها وبكل صراحة هذا الجيل أفادنا في شئ مهم ولعله فقط هو حصاد الغربة الذي إستطاعوا فعله وإن كانوا لم يغتربوا من أجله ..
الجيل ده عمل السمعة المتميزة للشعب السوداني من مكارم الأخلاق والصدق والأمانة والترابط الأسري والدرجة العلمية العالية بين العرب ..
لكن يبقى السؤال :
هل هذا هو سبب إغترابهم ؟؟؟
خلونا من الكلام المجمل والأغراض النبيلة والسامية والتي هي أرفع من المال والكسب وإنو المغترب سفارة و و و و و ..
بكل صراحة الجيل السابق من المغتربين خرج من أجل المال والأغراض الحياتية الأخرى (بيت عربية مشروع ...)
للأسف الجيل السابق من المغتربين ضلّ الطريق تماماً في إدراك غايته الحقيقية وزرع عادات (إغترابية) بايخة إن صحّ التعبير ..
فهم من وضع مفهوم إحضار المواد التموينية وهم من أسس لفهم إنو المغترب لازم يجي شايل شنط كتيرة وهم من أسس لفهم إنو تجيب هدايا للقريب والبعيد وهم من أسس للإهتمام بصغائر الأشياء من هبهان وقرنفل ومعجون أسنان وبشاكير وباكو السجاير والكوشتينة للنادي..
هم من أسس لمفهوم المغترب لازم يشرب عصير بالصباح ولازم يصحى متأخر ولازم أولاد الحلّة يبطلوا أشغالهم ويكونوا قصادو ..
ده كلو كوم ومفاهيم مغتربين زمان داخل بلاد الغربة كوم تاني!!!
بكل أسف مغتربين زمان زي ما وضعوا لينا ساس أخلاقيات ممتاز إلا إنهم كمان رسّخوا مفاهيم سيئة عن السودانيين وهي مغلوطة تماماً ..
أول المفاهيم دي إنو الممغتربين عندنا بيسكنوا في السكن الرخيص المتواضع البعيد الرخيص بحجّة التوفير !!!
وعشان ما أتفهم غلط انا بتكلم هنا عن المستطيع والقادر ذو الدخل الميسر ..
عندهم فهم غريب جداً يقولوا ليك نحن لييه نعمّر في حتّة ما حقتنا وليي نفرش فرش غالي في بلد ما بلدنا وليي وليي وليي وكلها كم سنة ونرجع فمافي داعي للبعزقة !!!
ويتناسى هؤلاء إنو إقامتهم في الشقة دي ممتد لأكثر من عشرين سنة والسكن فيها بيكون أكتر بكتييير من سكنو في بيتو الموعود في السودان !!!
لا يفرق بين الصرف البزخي في السكن وبين الإهتمام بمكان الإقامة ونحن الشعب المتعود على التغير حتى في السودان العفش بنغيروا (على جميع الطبقات فقيرة وغنية) متى ما سنحت الفرصة ..
مغترب زمان يقول ليك انا بلم عشان أعمل البيت ويلم ويلم ويلم لمدة تلتين سنة عشان في النهاية يمشي يأجر البيت لي منظمة وهو يسكن في بيت إيجار !!!
حتى في موضوع العربات ثبّت المغترب السوداني إنو يعشق ركوب العربية الخردة والموديل القديم من التايوتا بفهم إنو البوكسي السيوبر وال 78 أفضل وأجود من الكامري 2007..
وبعدياً عن مدى صحة المقارنة فالفهم الأصلي للمغترب القديم برضو انا أحسن لي أتجدع بي عربية موديل السنة في بلدي وهنا أركب أي شي ما مشكلة ..
وهنا لا بد للإشارة إنو انا بتكلم عن اصحاب الرواتب العالية والأوضاع الممتازة من أطباء ومستشارين ومهندسين وقانونيين ومدراء ..
وهنا أحكي قصة حكاها لي زميل إنو في سوداني مدير قسم وعندو وضعو في الشركة وزول علّامة وما ساهل ..
طلب سلفة لشراء عربية فما كان من مدير الحسابات اللبناني إلّا وصدّق ليهو بي سلفية مقدارها (اربعة ألف ريال فقط) ..
السوداني دخل هايج لي اللبناني وقال ليهو كيف تديني اربعة الف بس دي شوية شديييد؟
فما كان من اللبناني إلا وقال ليهو :
يا "زول" يعني إنت راح تشتري بي أم ولا ليكزس ؟ ما أكيد حا تروح تشتري ليك كريسيدا موديل 78 مستعملة !!!!
الموضوع الأكثر حساسية ومسار الجدل الدائم هو موضوع اللبس والأناقة لدي السودانيين ..
انا شخصياً مقتنع بي إنو الجيل السابق وجد حظه من الأناقة أكثر من جيلنا ويكفي إنو الاباء والأجداد لمن كانو بيلبسو البدلة والفول سوت كان الناس لسة بي السروال (إن وجد)..
والأغرب والأعجب إنو كل سوداني تتونس معاهو يرئ نفسو ويقول ليك والله السودانيين ما بيعرفو يلبسو ..
والحق يقال في الناحية دي إنو في بعض الظواهر السالبة التي رسخّها البعض وهم يذهبون للمساجد بصورة غير لائقة عراقي خفيف وجلابية قديمة ده لو ما مشى بي بجامة نوم !!
اما بخصوص الشبشب فحدث ولا حرج !!!
المغترب القديم فشل فشلاً زريعاً في الإستثمار وحصر نفسه في الإستثمار الضييق الذي يكفي فقط ل "قفة الملاح" ..
فهاهم مغتربو الزمن الماضي يفكرون في محل إتصالات أو حافلة روزا أو تركيب عطور أو بص سفري أو دفار الشنقيطي الشهدا أو ركشة وأخيراً الأمجاد ..
المستثمر الخلااااص إتقطع بيعملا قطع أراضي ويبيعا بعد كم سنة !!!!
جيلنا الحالي أو جيل المغتربين الجدد كما أسميه هو صورة عكسية تماماً لمغتربي الجيل السابق ..
جيلنا الحلي نعم وبكل صراحة أفقد الهوية السودانية ملامحها المرسومة في السابق خصوصاً الأخلاقية منها فهاهو السوداني النصاب وهاهو السوداني المزوّر وهاهو السوداني السكران و و و..
ونعم ربما قل المؤهل الأكاديمي المعروف عن شهادات السودان الجامعية المحترف بها ومدى نجاح الخريج السوداني زمان ..
ولكن !!!
هذا الجيل نجح تماماً في تغيير مفاهيم المغترب القديمة وعقيمة فهاهو ينزل الإجازة ومعاهو شنطة هدومو بس كم غيار على فتيل ريحة والباقي قروش في المحفظة ..
وهاهو يلغي بند الهدايا التقليدية ويكون أكثر عملية فالمحتاج للقروش تديهو كاش والما محتاج أصلاً تسقطو من حساباتك ..
وأما في المفاهيم السكنية فها هو الشباب يقتنع تماماً بي إنو طالما في إمكانية للسكنى المريحة ولا أقول الفخمة فلا مانع متى ما خدمته الإمكانيات ..
وهاهم الشباب الان يركبون أفخم الموديلات لا لشئ ولا لمظاهر بقدر ما هو يبحث عن راحته النفسية وربما النظرة المستقبلية ..
وها هو شباب اليوم يعرف كيف يستثمر وبطرق متطورة أفادت البلد أولاً وأخيراً وأفادت الجيل الحالي نفسه من شركات ونقل خبرات من الغربة و و و و ..
نواصل كان الله مد في العمر....
|
|
 
|
|
|
|
|
| العنوان |
الكاتب |
Date |
| المغترب السوداني بي القديم وبي الجديد.. | عمر الفاروق | 11-05-07, 11:00 AM |
| Re: المغترب السوداني بي القديم وبي الجديد.. | walid taha | 11-05-07, 11:12 AM |
| Re: المغترب السوداني بي القديم وبي الجديد.. | ابو عثمان | 11-05-07, 11:24 AM |
| Re: المغترب السوداني بي القديم وبي الجديد.. | عمر الفاروق | 11-05-07, 04:25 PM |
| Re: المغترب السوداني بي القديم وبي الجديد.. | عمر الفاروق | 11-06-07, 07:46 AM |
 Re: المغترب السوداني بي القديم وبي الجديد.. | شهاب الفاتح عثمان | 11-06-07, 07:54 AM |
| Re: المغترب السوداني بي القديم وبي الجديد.. | عمر الفاروق | 11-06-07, 08:20 AM |
| Re: المغترب السوداني بي القديم وبي الجديد.. | Hisham Ibrahim | 11-06-07, 10:08 AM |
| Re: المغترب السوداني بي القديم وبي الجديد.. | نادية عثمان | 11-07-07, 11:44 AM |
| Re: المغترب السوداني بي القديم وبي الجديد.. | Hisham Ibrahim | 11-07-07, 12:28 PM |
| Re: المغترب السوداني بي القديم وبي الجديد.. | عمر الفاروق | 11-07-07, 03:09 PM |
| Re: المغترب السوداني بي القديم وبي الجديد.. | خالد حاكم | 11-07-07, 04:27 PM |
| Re: المغترب السوداني بي القديم وبي الجديد.. | خالد حاكم | 11-07-07, 06:27 PM |
|
| |
عمر الفاروق
فيس بوك
تويتر
انستقرام
يوتيوب
بنتيريست