|
وجه في الغربة
|
في أول جولة حرة لي بالمدينة الخالدة ، أوائل الثمانينات ، مررت علي الميدان الرئيسي الذي يقع أمام تقاطع خطوط القطارات والبصات بوسط روما . كان جالساً لوحده علي كنبة من حجر الترافنتين الأبيض ، سارحاً ببصره في فضاء الميدان الذي تزينه بعض الأشجار وتعلوه قباب بعض الكنائس العتيقة . تشير تضاريس وجهه الحادة وبشرته الداكنة إلي جذور ضاربة في تربة وسط وشرق أفريقيا . أبطأت الخطي ، ثم توقفت أمامه . وبعد لحظة من التردد بادرته قائلاً :- السلام عليكم . الأخ سوداني ؟ حدجني بنظرة قاسية ، أتبعها بقوله :- " .... دينك .. ودين نميري بتاعك . شكلي دا إيطالي ؟ " همست في سري ، إن كان هذا أول القصيدة فكيف يكون آخرها ؟ . هممت بالإنصراف ، ولكنه ناداني بلهجة آمرة :- - تعال هنا . مالك ؟ عايز شنو ؟ - ما عايز حاجة . بس قصدت أسلم عليك . جذبني إلي جانبه بالمقعد الحجري ، فجلست علي مضض . سرح ببصره مرة أخري في فضاء الميدان ، وتنهد قائلاً :- - أنا دنقلاوي . إتربيت في بورتسودان ، وركبت البحر . لفيت مواني الدنيا دي كلها وانتهيت في جنوة . - وليه جنوة ؟ - تعرفت علي فتاة في الميناء . ثم أطرق صامتاً . - وبعدين ؟ - السفينة فاتت وخلتني في الميناء . - وانت كنت غاطس وين ؟ لم يجب . وواصل حديثه :- قروشي كملت ، والبت فاتت خلتني . جيت روما واتطقشت لغاية ما لقيت لي شغل في مرقص - بتعرف ترقص ؟ - نظر إلي بإستياء وقال :- - أرقص شنو ياخي.إذا في واحد عمل دوشة ، أشيلو وارمي برة المرقص نظرت بإرتياب ألي جسمه النحيل ، فواصل حديثه :- الحكاية مشت معاي ، وإتعرفت علي بنات زي الدهب المجمر. كل يوم مع واحدة جديدة - من غير مؤاخذة ، بي شكلك دا ؟ ( لم يكن جذاباً بالمرة ) - الشكل ما مهم يامولانا . البنات ديل عايزات " الأبيض " ، يدمرن بس . ( علمت في مابعد أن "الأبيض " هو الإسم الحركي للهيروين والكوكايين وسط التجار ) - لاحولا .. ومعقول تستمر علي كدا ؟ - دي بلد حريات ، والسوق مفتوح ، عرض وطلب . وكمان إشتريت لي جواز سفر ، وسكنت في بنسيون ( فندق متواضع ) . - إشتريت جواز ؟ - أيوه جواز سفر بريطاني ، بتاع واحد بروفيسور في الجامعة - بتتكلم جد ؟ - أيوه . قلت ليك السوق مفتوح ، سوق الحرامية ، عرض وطلب .عايز اي جواز ، أمريكي ، بريطاني ، أسترالي ، يجيبو ليك . تطلع الصورة الفيه وتخت صورتك . بس تدفع . - ياخي حرام عليك . جواز بروفيسور بريطاني ؟ - أعمل شنو ؟ لو عايز تنوم أو تتحرك هنا لازم يكون عندك جواز . - وبعدين ؟ - الحكاية مشت . سهر بالليل ، وأبيض ، ونوم بالنهار . لغاية ماجانا البوليس في يوم من الأيام وأنا راقد في البنسيون مع واحدة من البنات ديل . أخدو كل البضاعة المعاي والجواز البريطاني ، أخدوني علي الحراسة وخلو البت نايمة في نوما . هناك سألوني ، الجواز دا حقك ؟ قلت ليهم أيوه . ضربو تلفون للقنصلية البريطانية ، وقالو ليهم عندنا بروفيسور بريطاني معتقل وبنحقق معاه بتهمة تجارة المخدرات . قام القنصل بجلالة قدرو ، جاني شايل سندوتشات وبيرة وعلبة سجاير . لما شافني إبتسم وسلم علي ، وقال لي :- Stolen passport . Right ? قلت ليه Yes . أداني السندوتشات والبيرة والسجاير ، وشال جواز أهلو وفات . حكموا علي بأربعة سنين سجن . - لاحولا .. وبعدين ؟ - أنا هسه جيت طالع من السجن ، تجي أنت تقول لي ( مقلداً نبرتي الخجولة ) :- السلام عليكم ، الأخ سوداني ؟
سيف
|
|
|
|
|
|
|
العنوان |
الكاتب |
Date |
وجه في الغربة | Saif Mahmoud | 10-19-07, 06:20 PM |
Re: وجه في الغربة | اسعد الريفى | 10-19-07, 07:00 PM |
Re: وجه في الغربة | Saif Mahmoud | 10-20-07, 08:30 AM |
Re: وجه في الغربة | اسعد الريفى | 10-20-07, 11:46 AM |
Re: وجه في الغربة | هاشم أحمد خلف الله | 10-20-07, 12:07 PM |
Re: وجه في الغربة | Saif Mahmoud | 10-20-07, 03:57 PM |
Re: وجه في الغربة | Saif Mahmoud | 10-21-07, 05:05 AM |
Re: وجه في الغربة | Saif Mahmoud | 10-23-07, 05:11 AM |
Re: وجه في الغربة | Saif Mahmoud | 10-25-07, 12:46 PM |
Re: وجه في الغربة | Mohammed Elhaj | 10-25-07, 02:17 PM |
Re: وجه في الغربة | اسعد الريفى | 10-25-07, 09:46 PM |
Re: وجه في الغربة | Saif Mahmoud | 10-26-07, 02:14 PM |
Re: وجه في الغربة | salma subhi | 10-26-07, 03:11 PM |
Re: وجه في الغربة | Saif Mahmoud | 10-26-07, 05:26 PM |
Re: وجه في الغربة | Saif Mahmoud | 10-26-07, 06:04 PM |
|
|
|