ياجمهوريين زمان ومحموديين اليوم ... أمسكوا زولكم دا مني ... عشان أنا خليت المشاكل

Quote: عزيزى معتز القريش , الله يرضى عليك , المره دى خلينا نتحاور بى محبه , ونحاول نجعل هذا الإختلاف أكثر تحضراً وأكثر عمقاً .. ونجعل منو نهج جديد للنقاش بى موده وتجرد وصدق ومحبه للخير .. خلينا يا معتز نقود هذا الخيط إلى خيط ضؤ يسوقنا كلنا لى منابع من النور والجمال والسماح والتفاهم . نحن يا معتز ما بينا وبينك عداوه ولا غل ولا مثقال ذره من حقد أو ضغينه . وصدقنى يا معتز لا أنا لا عبدالله عثمان , لانكن لك إلا الخير ..... أها ببركة هذا الشهر الكريم خلونا نمشى بهذا إلى بر من الأمان والثقه والإحترام والقواسم المشتركه ... إذ لابد من قواسم مشتركه يا معتز ! لابد من أرضيه للتفاهم والإنسجام ..... ألا ترى أننا أصبحنا فى عالم غريب وعجيب إقتربت فيه المسافات والخطوط , وأهو نحن فى كوكب إسفيرى منطلق بى سرعة الضؤ ! معتز القريش , نحن نودك تماماً أنا وعبدالله ودعثمان , وعايزنك بشده .. عايزين فيك معتز الراقى الفنان البنعرفو داك , اللما يجلس خلف الأورغن تتحرك الأشجان والقلوب مع أنامله المرهفه الفنانه الرشيقه .... عبدالله عثمان ماشافك من قريب يا معتز , وما بعرفك ! لأنو شاف معتز تانى ! فظ غليظ , ومسكون بأفكار لا تتماشى مع الزمن .. وضد الفن وضد الحياه ! وما شاف منك الشفناهو من فن وتفانى ومهاره عاليه , وجهد كبير من أجل إسعاد الآخرين . بتتذكر يا معتز أيام التجهيز لحفل الوفاء لمصطفى سيدأحمد , لما كنت بتلم الشباب والشابات حولك للبروفات .وتقودم فى تنظيم راقى ومنسق وجميل وأداء رائع ! ولما جيت يوم الحفل الصباح ولقيتك لوحدك فى تلك الصاله , وأنت تضبط فى الأجهزه فى همه عاليه ومزاج رائع ! عايزين فيك ذلك المعتز السودانى الفنان أخو الأخوان البقالد النسوان ويقعد معاهن فى ضل الضحى يشرب الشاى , ويطايبن ويضاحكن كحال أهل السودان ! وما يشوف فى كده أى غضاضه أو نشاذ أو نقصان ! وراجع ليك يا معتز كان ألله أحيانا , وصباحات الله بألف خير .. تصبح على ألف خير يا معتز . أعود إنشاءالله وجايب ليك معاي كل كلام طيب بتستحقو