|
|
 التجمع دقس !
|
سلام يا شباب ... اها رجعنا وطبعا الاسبوع الفات البورداب فى الخرطوم كانوا مروقين خضره ومياه ووجوه حسنة ماشاء الله ربنا يزيد ويبارك وعقبال كبارنا ما يعقلو ويلزمو الجابرة دى ويطلعو شوية من قصة (اداهو ما اداهو ) دى .
السبت الفات دا اجتمعت لجنة مشتركة من المؤتمر الوطني الحاكم في السودان والحركة الشعبية، مع وفد التجمع الوطني الديمقراطي المعارض الذي عاد وفد منه الأسبوع الماضي من العاصمة المصرية لإجراء محادثات مع الحكومة. خلال هذا الاجتماع الذي جرى أمس السبت عرضت اللجنة على وفد التجمع منحهم أربعة وزراء اتحاديين وخمسة وزراء دولة لكافة القوى الشمالية، على أن يكون نصيب التجمع وزيرين اتحاديين ووزير دولة.
لكن وفد التجمع اعتبر ذلك إخلالا باتفاق القاهرة، وقال الناطق باسم تجمع الداخل علي السيد إن ما طرحته اللجنة المشتركة كان مفاجئا وإن النسب التي عرضتها أقل بكثير من الـ14% التي حددتها اتفاقية السلام.
( تسعة وزارات ) بس .. والله شوية يا على السيد اخوى ... (16 ) سنة من معتقل لحجز لسفر وجهجهة فى المطارات والمؤانى ونضال شى بالحنك وشى بالبونية وحاجات اجن و انحناءات للحمامة وتجو تفطرو ليكم على اربعة وزارات اتحادية وكم زيها وزارات دولة يعنى ( باك قشاش ) ... والله ناس المؤتمر الوطنى والحركة الشعبية ديل ببالغو وما عندهم خوة حقو كان فى اجتماعات اللجنة يجيبو ليكم بكتة ورق فلسكاب ويخلوكم تعزلو لانكم اصلا ناس كتار ومحمولين هسة الاربعة والخمسة ديل يلحقو لمنو الاتحاديين عاوزين حقهم وناس الشيوعى عاوزين حقهم وناس التحالف الفيدرالى عاوزين حقهم وناس عمك فاروق ابوعيس والفريق عبد الرحمن سعيد عاوز حقو ودى كان قبلتو بالنسبة دى معناه ناس قريعتى راحت الفى التجمع كلهم جرو هوا لانو التسعة حيكونو من علية القوم وباقى الكوادر بتروح فى حق الله .
طبعا ناس المؤتمر الوطنى فى القصة دى ما عندهم قشة مره ..التجمع دا لا حقهم ولا عندهم بيهو شغلة ، الحكومة ناسا ناس احزاب البرنامج الوطنى لكن التجمع دا زول الحركة الشعبية ويا ما كسرو ليها التلج وانو قرنق بيمثلهم وبيحفظ ليهم حقوهم ولكن يا فرحة ما تمت قرنق زاتو جلى المسالة ... هو فاضى ياخى ... اخير يشوفو مصالحو قدامو ملفات خمسمائة كمندر عاوزين تسكين ورتب فى الجيش وعمك مفتح قطع فى نفسو رتبة فريق اول عشان تانى عبد الرحمن سعيد دا لو خشى عليهو لازم يصلح البوريه ويحضر نفسو زى التعليم ويسمع الاوامر و ما يقوم يغضب وتشيلو هاشمية الجيش ويسمع عمك قرنق كلام سخن (شوف يا ضابط انت قايل نفسك شنو انت عقيد وانا فريق يعنى سنيرتى اقدم منك واقدم منك افهم منك وارجل منك ) .. اها قرنق بقى فريق اول وسلفاكير بقى فريق يعنى تانى عبد الرحمن سعيد الا يصرف الجزاء لناس فاروق ابوعيسى الملكية ! اها الحركة الشعبية خلاص وبعد ما وصلت ميس الحكم عاوزة تشوف نفسها مالها ومال القراية ام دق وكمية الكوادر والقيادات العاوزة وزارات فى الحكومة الجاية باسم التجمع اكتر من حيث العدد واقل من حيث التاثير وهسة بالله شفتو فضيحة الوفد الوصل الخرطوم بالله دى جنس حالة جو فى انصاص الليالى عشان تشوفو التوقيت والترتيب الغلط ودا كان اثرو واضح فى الاستقبال الكحيان والفاتر للوفد واللى هسة ما فتح الله عليهو بندوة ولا مخاطبة جماهيرية وغايتو لو ما زول زى التيجانى الطيب كان الوفد دا استقبلوه موظفين فى الدرجة (14 ) من ناس العلاقات العامة الشغالين مع سبدرات وعشان كدا ناس الحركة عملو حميل وما هببو لعلى السيد ولا غيرو ، جون قرنق زول ذكى ونبيه وشفت بتاع سياسة عارف انو التجمع من يومو منتهى لكن قال نستفيد منو عشان يقدمنا للسودانيين والقوى المختلفة الرافضة للانقاذ ويقدمنا برضو لدول زى مصر وكدا وبعد ما المرحلة دى انتهت خلاص يمشى فى الباىباى واى زول يشوف مرقدو و(ينام على الجنب اليريحو يا مرعى بتاع الكليمة ) وناس التجمع ديل ناس طيباين وقعدو يزعلو وهسة صحف الليلة شابكين ليك العالم نشكك فى موقف الحركة ونشجب موقف الحكومة والشى الضيعهم انو عينك فى الفيل تطعن فى ضلو ... ما العقيد جون قرنق دمبيور قائد الحركة الشعبية - هى نسيت سعادة الفريق اول والنائب الاول لرئيس الجمهورية - كان فى هيئة قيادة التجمع يعنى منهم وفيهم ولو الحركة زاتها ما بقت حريصة على حلفائها الحكومة ما اظنها تكون احرص ... دى سياسة يا جماعة يعنى شنو مقصات وشلاليت وحفر وردم اى دقسة طوالى تمشى مدن الملح ولا تلقى هناك عبد الرحمن منيف ولا عبد الرحمن ابوزهرة .
يا جماعة ما تزعلو ... معليش نحن بنتكلم .
|
|
 
|
|
|
|
|
| العنوان |
الكاتب |
Date |
| التجمع دقس ! | محمد حامد جمعه | 07-31-05, 02:20 AM |
 Re: التجمع دقس ! | محمد حامد جمعه | 07-31-05, 02:55 AM |
 Re: التجمع دقس ! | A.Razek Althalib | 07-31-05, 03:00 AM |
| Re: التجمع دقس ! | محمد حامد جمعه | 07-31-05, 03:05 AM |
| Re: التجمع دقس ! | Dr.Mohammed Ali Elmusharaf | 07-31-05, 06:52 AM |
| Re: التجمع دقس ! | محمد حامد جمعه | 07-31-05, 08:40 AM |
 Re: التجمع دقس ! | tmbis | 07-31-05, 09:02 AM |
| Re: التجمع دقس ! | محمد حامد جمعه | 07-31-05, 09:07 AM |
| Re: التجمع دقس ! | Elmosley | 07-31-05, 08:56 AM |
| Re: التجمع دقس ! | محمد حامد جمعه | 07-31-05, 09:01 AM |
| Re: التجمع دقس ! | عثمان حسن الزبير | 07-31-05, 09:21 AM |
| Re: التجمع دقس ! | محمد حامد جمعه | 07-31-05, 09:24 AM |
| Re: التجمع دقس ! | عثمان حسن الزبير | 07-31-05, 09:25 AM |
| Re: التجمع دقس ! | محمد حامد جمعه | 07-31-05, 09:26 AM |
| Re: التجمع دقس ! | Elmosley | 07-31-05, 09:47 AM |
 Re: التجمع دقس ! | WadAker | 07-31-05, 09:56 AM |
| Re: التجمع دقس ! | عثمان حسن الزبير | 07-31-05, 10:49 AM |
| Re: التجمع دقس ! | Elmosley | 07-31-05, 10:54 AM |
|
| |
محمد حامد جمعه
فيس بوك
تويتر
انستقرام
يوتيوب
بنتيريست