خيبة الله على الاستنارة !
طيب يا شباب .. شايف دعاة المنارة والاستنارة زعلانيين .. وشغالين هرش وتحريش ... يا بكرى وقف ويا بكرى امنع ويا بكرى ارفد .. ليه يا جماعة قالو قالو المنبر بقى مظنة فتنة وبيشعل فى النيران .. كيف الكلام دا يا اخوانا قالو فى عنصريين حايمين يحرشو فى الناس ويسممو الراى العام ... والله .. نورونا الله بنوركم ... احتمال .. نكون عنصريين وما عارفين .. نحن اصلو معقول نعرف اكتر من ناس بره ديل .... عقلهم احسن مننا وبعرفو دين واخلاق وسودانيين اكتر مننا .. هو لو نحنا كنا نافعين كان قعدنا لسة هنا فى البلد كان زماااااااااان لقينا لينا بلد خواجات و(بنى ادمين ) اتعلمنا منها الاستنارة الما خمج . والله يقسم لينا شوية كدا من استنارة العولمة دى عشان نشوف الامور صاح ..ونقرا الاحداث تانى ونتعامل معاها صاح بدل التعامل البلدى دا . يعنى المعنى انو الناس القامت وزعلت وخربت وضبحت دى من بعض الاخوة ناس ما قاصدة حاجة ... زعلانة بس .. زعلانة بس !!.. زول فقد عزيز عندو وعندنا زعل قال ابكى شوية واقوم انفس غضبى دا اشوف لى كم زول البعو بطوبة ولا اجزو بسكين وامشى قدام شوية احرق لى عربيتن تلاتة واغشى معاى روضة اقزقز لى بنية نهيدا طبنجة اتمسح فيها برضو اشوف استاذة واشلت لى كم شافع كدا وبعد داك ارجع بيتى .. اها المطلوب من الزول المستنير والما عنصرى فى الحالة دى انو يقطم ويشوف ليهو جحر فى محل شغلو وفى بيتو يخش الحمام ويقفلو عليهو ويقشط معاه مرتو وعيالو وضيوفو ولو عندك زول عيان فى البيت تقول ليهو (احتسب ) واصبر لغاية ما ربنا يفرجها والمسالة تتلم .. الحكومة تنزل جيش ولا شرطة ولا ناس كشافة ودا طبعا عاوز ليهو برنامج واجتماعات الشرطة ما تكون عنيفة عشان ناس حقوق الانسان ما تزعل والعساكر يفضو الشغب بتشغيل موسيقى ناعمة وبدل البمبان العساكر تشيل ليها شمع و(فرش فلور ) ولو لقو زول بينهب فى دكان ولا بقالة ولا بيحرق فى عربية يحنسوه (عليك الله باركها وامسح لينا الحصل دا فى وشنا ) وناس الاحزاب تقعد تجتمع وترى وتعتقد وتؤكد على المرحلة التاريخية ويكتبو البيان والبيان يقراه اول شى مسئول الاعلام ويمشى مسئول الاعلام يديهو للامين السياسى ( اسمع غير كلمة فقيد السلام لشهيد السلام ودقيقة العبارة دى شوف ليها مرادف اقوى ومعبر كدا واقول ليك حاجة دقيقة نخلى اجتماع المكتب السياسى يخلص عشان نشوف اخر وهمة شنو والبيان يجى متطابق ) والكلام دى والمواطن لسه مطلوب منو - عشان ما تبقى فتنة وعنصرية - يكون زى المزرور فى طاحونة ويكون مطلوب منو ينتظر لغاية ما منظمات المجتمع المدنى تقعد وتشوف الحاصل وتناشد المنظمات النظيرة ويجو كم بروف منهم يشوفو مرجعيات الضغائن التاريخية واشكالية النخب الحاكمة وجدل الهامش والمركز وترسبات الحرب وافرازاتها على الثوب الاجتماعى للمجتمعات ودا كلو واخوك ولا اختك ولا ابوك ولا امك تكون جاهزة ومحضرة نفسها لاى اعتداء ومطلوب منها انها تصبر الراجل يمد رقبتو للضبح والمره ترش على نفسها رشة عطر وتقدم شرفها للزول الغاير دعما للوحدة الوطنية ودعما للوعى الطبقى ... المطلوب كمان لو انت زول (كويس ) وفاهم وموضوعى وما بتاع فتن لمن تجى تكتب تكتب بلغة كدا زى بتاعة (روايات عبير ) ما تخلع الناس فى البلد وما تعمل توتر .. لا ... لا .. تكتب كدا اول شى رمية ومدخل بيت شعر من نزار قبانى وتشوف ليك قصص وحكايا حلوة تقدم بها الحاصل بصورة ايجابية .. شنو كتلو فلانة وعملو لعلانة كيت كيت دا شنو الشمار الشين دا بعدين مالك ومال حلة حرقوها ولا جامع كسروه دا شنو الكلام المحبط دا والبيهدد السلام ... وبيسى للتعايش السلمى دا ! عشان كدا القصة مفروض تكون كالاتى .. الدكتور جون قرنق توفى فى حادث تحطم طائرة .. كويس .. اها قامو بعض الاخوة الجنوبيين زعلو وشعرو بالصدمة طوالى نزلو الشارع ضرب كسير لخبطة جوطة وحصل الحصل .. فى الخرطوم فى بحرى فى امدرمان فى سنار فى جوبا .. الرنك وغيرو ... المفروض طوالى الناس المتضررة تشيل جنايزها وتمشى تدفنها وما تفرش ولا تحد ولا تبكى .. ولا تغضب ... الغضب والحزن والانتقام حاجة خصوصية للجنوبيين بس ... جون قرنق مات .. يبقى من حق اهلو يعملو اى حاجة والناس تبرر لكن اخوى ولا ابوى ولا صحبى ديل ما ناس وما مطلوب منى ازعل عليهم وعلى الاسر المكلومة وتقعد (مدسية ) لغاية ما بيانات الشجب والادانة وكدا تمرق وبعدين الله كريم ... وبالمناسبة دا الحصل ... الضحايا واهلهم اول تبادى اكلوها ومشو احترمو نفسهم وخشو بيوتهم وقفلوها عليهم ... وبرضو الضغائن التاريخية دى كانت وراهم وراهم - بالمناسبة الغريبة كل الضحايا ما فيهم زول كان ابوهو تاجر رقيق ولا حتى فى تاريخ اسرتو كلها وزير ولا مدير - وناس تتلب فى البيوت ويكسرو بابك ويخلعو شباكك ... وشفعك جوه معاك قلبهم مخلوع والقلوب فى الحناجر .... خيبة الله على الاستنارة .

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]