رغم أن الذاكرة الشعبية خلقت وإبتكرت عدة مسميات لاسواق عشوائية وغير عشوائية مثل سوق (القانص) وسوق (كرور) وسوق (الاخوان) فانها عجزت ولأسباب مجهولة عن إبتكار إسم للسوق الكائن أمام عمارة اراك وبرج البركة ويتخذ شكل (L) ليمر في فريندات شارع الجمهورية ، فتركته بدون إسم اللهم إلا من إسم (سوق الجنوبيين) دلالة على عرقية أغلبية من يبيعون ويبتاعون منه !!
10-30-2006, 02:00 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
Quote: السوق ده كان سند قوى أيام الجامعه وأظنو لازال كذلك عند الكثيرين غايتو من غيرو كان إحترنا
تتصوري يا تماضر السوق دا بالنسبة للكتيرين سند في اي حاجات كتيرة بعدين السوق زاتو منتعش جداً والكاش متوافر فيهو طوالي .. يعني لو عندك حاجة مستعملة او جديدة دايرة تبيعيها بتتخارج ليك هناك طوالي وما في حاجة إسمها تعالي بعدين او تعالي بكرة للقروش !!
10-30-2006, 07:00 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: وماهى السلع التى تباع فى هذا السوق ... ياناذر ؟؟
تعرف يا أبو علوة أنا كنت داير إتكلم عن السوق دا في بوست كبير لكن طلعت مشوار ولمن جيت لقيت الفي راسي والفكرة الداير أقولا إتفرقت بين مداخلات الشباب ، فهسي حا انزل البوست بتاعي كردود على المداخلات ..
يعني بوست بالتقسيط المريح
Quote: وماهى السلع التى تباع فى هذا السوق ... ياناذر ؟؟
السوق دا يا علي أساساً هو سوق زي ما بتقول بتاع (جنصصة) ما عارف الكلمة دي معاك كيف !! يعني هو بتاع ملبوسات وعطور وأحزية وموبايلات وأجهزة كهربائية وكدة ..
زمان (ولحدي هسي) الواحد لمن يقبض قروش كان اول حاجة بيعملا يطير فللي على السوق دا ، وهاك يا بناطلين جينز وتي شيرتات والشباطة الما خمج ، مش كدة وبس كمان تشتري فوق ديل (هيد فون) او ممكن نقول عليهو (ووك مان) تركب فيهو شريط بتاع (بوب مارلي) وتحشر ليك سجارة مارلبورو (الرفيعة) في خشمك وترجع الحلة وكانو (يا أرض ما عليكي إلا انا) !!
طبعا السؤال هنا : البيميز السوق دا عن باقي الاسواق شنو ؟
دا خليهو لي مداخلة تانية لي قدام .. مش قلت ليك البوست دا أنا حا اكتبوا بالتقسيط المريح !!
10-30-2006, 07:09 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
ياخى خلو الناس دى تسترزق اسا تقوم المحلية الحاسدة دى تديهو اسم وبعد ده هاك يا رسوم ويا ضرائب
الناس ديل إنت قايل المحلية ما بتدفعم ؟!! طبعا الحصل للسوق إنو لمن إنتعش وإتطور كان لازم التجار بتاعينو يتطوروا .. طبعا عرض البضاعة اكتريتا كانت مفروشة في الأرض أو في الطبالي .. أهااا .. بعد شوية ومع إذدهار التجارة دي حصل غزو للدكاكين القداما الفرندات فبقت كل مجموعة تأجر دكان وتعمل ليها فترينات جوة الدكاكين ويشتركو في الايجار وكدة إرتاحوا من كشات المحلية ..
لكن طبعا لحدي هسي في بعض التجار فارشين قدام المحلات .. بل وكمان (المفروش) أكتر من (المعروض) جوة الدكاكين .. بس البرة ديل جذء منهم بيدفع أتاوة او رسوم للمحلية والباقين مجرد ما يشوفوا كومر الكشة يا دخلوا في الدكاكين واتدسوا جوة يا كمان (فكوا البيرك) !!
10-30-2006, 07:17 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: الذوق عالي جدا في السوق ده.. والهديمات على قدر من القيافة والكلاسيك.. يعني فرق كبير جدا بينو وبين دكاكين ناس ودراوة واهل العوض في السوق العربي..
بالضبط يا دكين ، المعروض من الأليسة والحاجات التانية فاخر جداً وبتدل على ذوق عالي جدا والبضاعة اكتريتا بتجي من أفخم الاسواق العالمية ..
Quote: ايام الجامعة كنتا بلاقي تماضر بتشتري البلايز الماخمج من هناك..
طبعا الناس حا يقولو عليها ما متحضرة وكدة ، لكن لمن يشوفوا نوعية البضاعة المعروضة وجمال خامتا حا يعرفوها بنية تفتيحة ما دقوسة زي الناس البيشتروا من سعد قشرة واولاد ود سعد الله في السوق الشعبي !!
Quote: ُيقال انو مدعوم من مجلس الكنائس
بالمناسبة يا دكين ..
أكبر مستفيد من السوق دا كان الحركة الشعبية ، طبعا العمل السري بتاع إستخبارات الحركة كان مركز شغلو وإستقطاباتو مرتكز على السوق دا ، لو متذكر في الذكرى الاخيرة بتاعت تاسيس الحركة المتحدث بإسم الحركة في الداخل (إسمو منو كدة رمضان) !! ما نسى إنو يرسل تحية للسوق دا والتجار بتاعينو بإعتبار مساهمتو الكبيرة في عمل الحركة السري في الزمن داك ..
عشان كدة أنا بعتقد إنو الحركة الشعبية بالإضافة لي مجلس الكنائس كانت هي الداعم الرئيس !!
10-30-2006, 07:21 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22556
أسعارم ما معقولة هي غالية عديل بس هي نوعية البضاعة المن نوع (الغالي بي غلاوتو يضوقك حلاتو والرخيص بي رخصتو يضوقك مغستو) !!
يعني مثلا أنا شخصيا كل عيد باخد هم الشبشب والجزمة لأني بعيد عنك عندي كراعي أطنو مقاسا 54 أو حاجة بالشكل دا (التقول كراع كنغارو) !! المهم أنا مقاسي ما بلقاهو إلا في السوق دا ومش كدة وبس .. كمان في مقاسات اكبر من كراعي زاتا !! لكن لمن أخش السوق دا واخد لي جزمة وشبشب تاني باقي العيد بتمو موية ساكت من الفلس !!
10-30-2006, 07:26 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
طبعا لفظة سوق الحرامية .. برضو إبتكار شعبي لي أي سوق عشوائي أو غير معترف به (شعبياً) .. لكن لو ديل حرامية .. البضاعة دي سرقوها من وين ؟ السودان كلو تخش أفخر المحلات ما تلقى ليك زي نوعية البضاعة دي !! أما لو قصدك حرامية في السعر فدي حاجة تانية !!
Quote: كل عام وانت بخير جيتك تالت يوم ما لقيت زول
ما قصرت والله مشيت ازور العريس عثمان الزبير .. نشوفك بالله ..
10-30-2006, 07:27 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الحبيب ناذر كل سنة وانت طيب متابع معاك قبل ما صاحبنا يجي ويدفق شوالات الشعر وبوستك الرائع ده يمشي سابع صفحة ما حصل مشيت السوق الافرنجي والا تسكعت في هذه البرندات للفرجة واحيانا للشراء محبتي محمد علي المشرف مختار
10-30-2006, 01:21 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
الكلام دا أمكن كان زمان زمن إشتريتي البلوزة البرتغالية شفتي أنا لو عندي مثلا 10 ألف بقدر أشتري بيهو قميص بيستاهل القروش دي ، لكن ما بلقاهو في سوق الجنوبيين دا !! وممكن يكون عندي 40 ألف وأشتري بيهو قميص تاني بيستاهل القروش دي ، لكن ما بلقى القميص دا إلا في السوق دا !! وبي نظرتي للقميص وإحتمال مقارنتو بي سعرو في دول تانية او تقدير قيمتو بس من خامتو حا اعرف لو بيستاهل ولا لا !!
Quote: بعدين أى شئ بقى بالقطاعى حتى البوستات
إتضح لي خلال تجربة البوست دا انو البوست بالقطاعي عندو طعم خاص أخير من كب الشغلة كلها (دُردُلُبْ) !!
10-30-2006, 01:23 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
تعرف يا ناذر: اخوك اول ما اتخرج من الجامعة قاموا شالوهو مساعد تدريس في الجامعة وصادف الايام دي عندنا عمنا جاي من المانيا ونظام اخوك عايز يكرم عمو وكده .. وبعيد عنك العم عامل فيها راستا مان وجايينا بي شعر لي نص الضهر وكده .. اها يا مان قاموا جوهو ناس الأمن ونحن ماشين وقالوا ليهو في واحدة بت جات اشتكت لينا وقالت انت بتستفذ مشاعر البنات في السوق فبالله يا تلم شعرك ده ولا بنحلقوا ليك صلعة .. اها يا مان انا قلت دي فرصة اتجدع لي عمي ده واهدي ليهو هدية راقية وقمت قلبت ليك سوق امدرمان قلب عشان القا لي طاقية استايل بتاعت بوب مارلي ديك . يا زول بكرة من الصباح مشيت وقفت في الخزنة عشان استلم المرتب ومن الخزنة وجري على سوق الجنوبيين بتاع الخرطوم البتتكلم عنو ده .. سبحان الله لقيت الطاقية بي كل سهولة لكن انقر الحصل شنو ؟؟ الحصل إنو لمن اديت الراجل قروش الطاقية اكتشفت إنو ده نص مرتبي تخيل طاقية بي 50 الف !!!!! انقر انا مرتبي ما كان 100 الف ؟ يا ناذر السوق ده سبب رئيسي في غربتي وتجيك رندا تقول ليك سعرو معقول !! بعيد عنك رندا دي شكلها بتتكلم عن سوق ستة بتاع الحاج يوسف خصوصاً لمن طلع عندها بلوز برتقالية ولا شنو يا رندا؟
10-30-2006, 02:10 PM
تماضر الخنساء حمزه
تماضر الخنساء حمزه
تاريخ التسجيل: 10-13-2006
مجموع المشاركات: 5215
Quote: اذواقهم و بضاعتهم جميلة. والبعض طور نفسة نحو شكل دكان واضح المعالم.
لكن يصر الاغلبية على افتراش البرندات و مجابهة الكشات..
الأذواق الجميلة والبضاعة الراقية والتطوير المنواصل سمة في السوق دا .. أما البيفترشوا البرندات فأعتقد إنو اصحاب الدكاكبن كلهم بدوا كدة ، يعني مع التطور والتطوير حا يعملوا دكاكين وحا يشتغلو تجار جملة وكدة ..
10-31-2006, 02:18 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: يا زول بكرة من الصباح مشيت وقفت في الخزنة عشان استلم المرتب ومن الخزنة وجري على سوق الجنوبيين بتاع الخرطوم البتتكلم عنو ده .. سبحان الله لقيت الطاقية بي كل سهولة لكن انقر الحصل شنو ؟؟ الحصل إنو لمن اديت الراجل قروش الطاقية اكتشفت إنو ده نص مرتبي تخيل طاقية بي 50 الف !!!!!
لا حظ ياعمر سعر الطاقية دي كان قبال غربتك وإنت اظنك إغتربت بعد فتح القسطنطينية مباشرة !! يعني هسي سعرها حا يكون بي كم ؟!! عمك إذا داير يجي إجازة المرة الجاية أقنعوا يمشي القاهرة احسن ليهو وما يجيك هنا !! أو لو داير يجي خليهو يغير ستايل شعرو لي (مايكل جوردان) عشان ما يضيعك
10-31-2006, 02:19 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: دي ما دعايه عديييييل كدا .. مبروك المحل الجديد الفتحتو في نيفاشا ..
تعرف انا يستحيل افتح محل هناك لأي زول مجامل وما بقدر ابيع لي أصحابي إذا جوني بنطلون جنز بي 150 ألف جنيه وهم حا يقولوا علي حرامي أو مستهبل لو بعتو ليهم بي كدا !!
لكن شايف تجارة (الإسكراتشات) والموبايلات ماشة في السوق دا ، يعني لو فكرت ممكن اعمل لي محل موبايلات أو تحويل رصيد (قدر ظروفك)
10-31-2006, 11:59 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
يوم صرفت الماهية و مشيت علي السوق دا قلت الليلة لازم جزمة شرط و فعلا لقيت جزمة عجبتني و بعد الاتفاق على السعر( التاجر كان شاب جنوبي) أداني الفردة اليمين و قال لي دقيقة بس و قطع الشارع من الناحية التانية و جاب الفردة الشمال و اكتشفت ان العرض يتم بصورة ذكية اذ يتم عرض الفردة اليمين بواسطة أحد التجار و يقوم زميل له بعرض الفردة التانية و بذلك يتم الاستفادة من فرص عرض أكبر، و يبدو هذا كان قبل فترة طويلة اماالآن اصبحت امكانياتهم افضل و قد لا يحتاجون لذلك.
سوق شارع الجمهورية يا سلام و يالها كانت ايام عندما كنا برالمة فى الجامعة كانت زيارة للقاهرة تكفي لقضاء امور الجنصصة للعام الدراسي لكن فى سنه من السنيين جانا حرامي فى غرفتنا فى داخلية جامعة الخرطوم و نظف الغرفة كلها من ملبوسات القاهرة و الله ياناذر الهدوم كانت جميلة و جديدة و الما جديد منها مارق دابو من الدراي كلين ههههههاهاهاهاها المهم رجعنا وفرشنا البكاء طوالي لكن واحاتك تاني يوم ساكنيين هدومنا فى سوق الحرامية بدون جدوي ياخي في زول يسرق ليهو ١٤ بنطلون جينز ليفييزهاهاهاها و ٤ ساعات و ٩ قمصان و ١٧ تي شيرت دي ما شيله عديل كده لكن انقذونا ناس شارع الجمهورية و بتذكر واحد من زملانا فى الجامعة كان عندو علاقات واسعة ادوني الملابس و الجزم بالدين وجزء مدفوع من شير شباب الجامعة لكن القمصان و البنطلونات كانو حايميين بينا زي المروحة شداااااااااااااااااااااااااات ساي يا حبيب .. الجودة احسن من اشياء القاهرة لكن من الملاحظ انو فى السوق ده ما ببيعوا اي حاجة ساي الحاجات كلها ماركات و عندهم حسن المعاملة
11-01-2006, 01:04 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: و مشيت علي السوق دا قلت الليلة لازم جزمة شرط و فعلا لقيت جزمة عجبتني و بعد الاتفاق على السعر( التاجر كان من شاب جنوبي) أداني الفردة اليمين و قال لي دقيقة بس و قطع الشارع من الناحية التانية و جاب الفردة الشمال و اكتشفت ان العرض يتم بصورة ذكية اذ يتم عرض الفردة اليمين بواسطة أحد التجار و يقوم زميل له بعرض الفردة التانية و بذلك يتم الاستفادة من فرص عرض أكبر،
شفت الناس ديل تفاتيح كيف ؟!!
اها اهلنا (أهل العوض) تلقاهم في سوق اللفة بتاع الكلاكلة داك مخلين الدكان فاااااضي ما فيهو غير برشين وعنقريب والفروة بتاعت الصلاة وما فيهو ولا فردة شراب ؟!!
أها البضاعة بتكون الوكت داك محملنها في بوكسي بتاع لبن موديل 45 وحايمين بيهو في الشارع ويكوركو بالمكرفون (أي حاجة بي خمسة) و (اي حاجة بي سبعة) و(جايبنو بالطيارة وبايعنو بالخسارة).. وهم جابوهو باللواري من شلاتين وحلايب !! من الصباح للمساء ، ويكونو خسرانين حق البنزين وحق كبسولات الانتي بيوتكس بتاعت التهاب الحلق وحق حجارة البطارية بتاع الميكرفون البيكوركو بيهو (ما تعرفم طالعين يبيعو هدوم ولا طالعين مظاهرات)
11-01-2006, 01:08 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
مرتاحييييييييين والله !! قلت لي القاهرة ؟!! في زمنكم ما كنتو بـ (تتجارخو) إستراليا بي هناك ولا شنو ؟!!
Quote: فى سنه من السنيين جانا حرامي فى غرفتنا فى داخلية جامعة الخرطوم و نظف الغرفة كلها من ملبوسات القاهرة و الله ياناذر الهدوم كانت جميلة و جديدة و الما جديد منها مارق دابو من الدراي كلين ههههههاهاهاهاها المهم رجعنا وفرشنا البكاء طوالي لكن واحاتك تاني يوم ساكنيين هدومنا فى سوق الحرامية بدون جدوي ياخي في زول يسرق ليهو ١٤ بنطلون جينز ليفييزهاهاهاها و ٤ ساعات و ٩ قمصان و ١٧ تي شيرت دي ما شيله عديل كده
أحمد الله الزمن داك ما كانوا غخترعو الموبايلات !! يمين كنت تبكي لي حسي
Quote: ادوني الملابس و الجزم بالدين وجزء مدفوع من شير شباب الجامعة لكن القمصان و البنطلونات كانو حايميين بينا زي المروحة شداااااااااااااااااااااااااات ساي يا حبيب ..
زمن ... هييييييييييييييييييه !!! يا حليل هسي زمن تاجر يدينك ولا يضمنك .. أي حاجة يقول ليك (كاش بس) !! الشيكات المعتمدة زاااتا بقت في تلتلة ..
Quote: الجودة احسن من اشياء القاهرة لكن من الملاحظ انو فى السوق ده ما ببيعوا اي حاجة ساي الحاجات كلها ماركات و عندهم حسن المعاملة
ودا أهم حاجة ..
11-02-2006, 05:55 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
المضايقات التي يعاني منها التجار الجنوبيين في سوقهم كثيرة لا تعد ولا تحصى ،فإذا إستثنينا الكشات والحملات الدائمة التي يتعرضون لها من قبل السلطات ، فهنالك حالات الريبة والشك التي تعتري الكثير من زوار هذا السوق وذلك بتساؤلهم فيما بينهم عن مصدر البضاعة وما إلى ذلك من أسئلة ، ثم والأهم هو صعوبة تعامل تجار الجملة الشماليين مع نظرائهم الجنوبيين ..
حكى لي أحد أصدقائي من التجار الجنوبيين أن الكثير من التجار الشماليين خاصة في أسواق الجملة كسوق ليبيا يتحاشون الدخول في معاملات مالية ضخمة مع التجار الجنوبيين رغم توافر كافة الضمانات اللازمة !!
أما والسبب .. فهو يقول أن الموضوع (عنصرية فقط ليس إلا) !! وأنا أتساءل عن صحة ذلك ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة