اها يا اهلنا.. التراث اصلا هو ريف..هناك في الفضاء الحر الذي لا يعرف القيود و تعقيدات ناس المدينة..و الإتيكيت..و الحواجز.. قرية خماس الدونكي.. قرية تقع في شمال مدينة ابوزبد..و في جنوب شرق مدينة النهود..و المنطقة يسكنها اهلنا الحمر (بفتح الحاء و الميم معا)..و هم ناس ابالة.. هناك التراث ..خصوصا الغناء صعب و قاسي خلاص و فيهو تحديات كبيرة..يعني لو الزول ما فنان جدجد ما بيقدر عليهو..و برضك الزولة لو ما عندها ملكة بارزة وواضحة ما بتجازف..و صعوبة تراثنا اهلنا الحمر انو تراث صوتي.. لا يعتمد على أي الة موسيقية..و هنا يكمن الجمال النادر في اعتقادي.. مقاربة تانية ممكن الناس تراجعها معانا..و لأنو اهلنا حمر هم ابالة بطبيعتهم..فيلاحظ الريتم بتاعهم يشبه حركة الجمال.. حركة بطيئة..راسخة..متماسكة.. اها التراث قبال ما يصل الأبيض و الخرتوم.. بيكون مرق من سماحة القرى الحميمة و الريف..
تجمعني بقرية خماس.. علاقة السرحة (الرعي)..و فرقانا كانت بتعدي بيها ايام الخريف في رحلتها للشمال..
و هنا بعض المداخل.. للفرجة على هذا الفيديو..و هو من قرية خماس..و تم تسجيلو في القرية..
المدخل الأولاني.. مسرح الأداء.و في كردفان بنسميهو المدي..و هو المكان الذي يتجمع فيهو الشباب و الشابات للغناء و الرقص..و دايما المدى بيكون بعيد عن الفريق و مكان السكن..و الفكرة دي أنو الشباب و الشابات عندهم حساسية اجتماعية عالية..و ما بيكونو ما دايرين يزعجوا الكبار..اضافة لذلك.. لأنو المدى بيتيح حرية تعبير عالية (سواءا بالكلام الغناء أو بالرقص)..و النس لو لاحظت في طرف الفيديو صورة شجرة..و احتمال في نفس المدي و تحت نفس الشجرة تكون مرقت اغنية (اندريا) اياها..!! المدخل التاني..الفيديو قدم نموذج للشباب الذكور..و هم يدخلون على الدائرة..طبعا في معظم مجتمعات كردفان و دارفور (بقارة و ابالة) البنات بتقيف في شكل صف دائر الشكل..و هن العندهن القرار (بلغة ناس المزيكا)..و الأولاد بيجو داخلين (الجواب)..يعني الحكاية هي عبارة عن حوار جماعي يشارك فيهو الجميع..و خلافا لمجتمعات البقارة.. يلاحظ في مجتمعات الأبالة أن الرجال تشارك في الصفقة (ضبط الرزم)..! المدخل الثاني..الأولاد هم البيغنوا..و البنات بيقومن بالرقص..ويلاحظ ادخال ايقاع دلوكة..و هي تشبه فكرة ايقاع الربة عند اهلنا الجوامعة و البديرية..و يلاحظ أنو الأولاد اصواتهم قوية ..ايضا.. ايقاع الدلوكة فيهو حاجات كتيرة من ايقاع الكرنك عند اهلنا النوبة..!
غايتو عشرة فيديوهات من اهلنا ديل..يعد شوية يجوكم اهلنا الخواجات..و ناس كتيرة قاعد تشاركنا الإستمتاع بهذه المواد..و كل زول/ة بيتفرج من زاوية ما انزل الله بها من سلطان..غايتو قريبتي واحدة قالت تبحث عن ثقافة الإبل عشان تفهم رقيص الحكامات ديل..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة