|
Re: حـكاية البنت التي ســكاها القـمر (Re: Kabar)
|
صـديقي ايمن..حبابك كل سنة وانت بخير..كتر خيرك على الحضـور..وصدقني الفول في ذات نفسه ..احيانا ما يكون بؤرة التذكار..وما تقاسمناه مع الاصـدقاء من البوش والتسكع هو اجمل مايدعونا للحنين..وصدقني لو فصدت دمي في هذه اللحظة التي يلفها صقيع الشمال وجليده..حتما ستجد فولة وغير مكسورة كمان.. كتر خيرك..
صـديقي جمال ..بين قوسين منتهى الأمل..حبابك كانت صديقتي اقبال..التي اهديتها هذا النص المتواضع.. دائما ما تبتدئ رسائلها لي بعبارة شفيفة و تكتب لي..سـلاما قول من رب رحيم.. وانا بدوري اقول لك..سلاما قول من رب رحيم.. كل سنة وانت طيب..وكتر خيرك
صـديقتي الشفيفة حد الحزن واللمعان..شـيري..حبابك كل سنة وانتي بخير.. لكن المأساة يا شيري..تكمن عند حافة غرورنا وتهيؤنا بانه بالخيال والحزن والحلم يمكن لنا اعادة صياغة الدنيا..وقتها تغدو الأشياء مد من التماهي..حتى الجنون في ذات نفسه لا يستطيع استيعابه.. كتر خيرك على التواصل..وبشرى الفاضل قد شـكل جزء كبير من وجداني وعلمني الصبر ومواجهة الخوف بسخرية عاتية..وكتابته دائما ما تؤكد لى بان الاشياء يمكن ان ننظر لها من الناحية التانية..التحية له.. اما ماركيز..فانها حكوة اظرط من حكوة هاجر بت الشم..ولقد امتعني كبقية خلق اللـه..ولكن هناك اخرين شكلوا مدارات مباهجي الصفية..بورخيس..استورياس..ايزابيل الليندي..ولكن ادماني توقف عند المجنون جورجي امادو.. اما صديقي احمد الملك..فهو الاب الروح لجيلنا المقهور باحزانه المجانية..وقد علمنا القدرة على القول بنبرة ثابتة الذبذبات..نعم يا شيري قرأت الخريف ياتي مع صفاء ولأربعين مرة.. كتر خيرك يا حميمة وماتنقطعي..
صـديقي علاء..يا ود الدهشة..حبابك انت عارف حصلت حاجة غريبة قبل شوية..طبعا اليومين دي الواحد بقت بتجيهو هلاويس جميلة خلاص..ومنها كنت استعيد في ذاكرتي واحدة من حفلات مهرجان الموسيقى الأول..وكانت في دار النشر بجامعة الخرطوم..وتوقفت عندلحن اغنية ثم ضاع الأمس منا..وكانت تؤديها فرقة الخرطوم وتري ..ان لم تخني الذاكرة وادائها رومانتيك..وطفر في خيالي عازف جيتار..وسالت نفسي ياربي الزول ده يكون قريب تمبس؟ التحية ليك ..وللخرطوم لمن كانت تتحرش لياليها بتصيد الحاجات النادرة..كتر خيرك
صـديقي واستاذي براهيم..حبابك لينا طـولة..وقرمانين.. اللعنة على ابكر ادم..لقد قضى معي الاسبوعين الاخيرين من ديسمبر..وطفنا الدلنج شارع شارع..درب درب..وعزينا بعض في بعدنا عن مدينة العيون الجميلة.. اما زهاء الطاهر..امنياتي له بالفرح اينما كان..خصوصا قدرته الحميمة على كلكلتنا بالدهشة.. اما عادل القصاص..امنياتي له بصـفاء يمتد في اللامنتهى ..لكي يمارس استفزازنا بعبارته الأنيقة التي تجعلنا مد من الشهيق.. وبالمناسبة ذات صفاء من القصص التي اداوم على قراءتهاباستمرار..سواءا كان النص المنشور بمجلة حروف..الله يطراها بالخير..او في مجموعته ..صليل غيابك.. وبهم يا صديقي نباهي..و نقول لثقافة الـ dot.com طظين.. كتر خيرك وما تنقطع..
صـديقتي الحميمة..بلقيس..حبابك كومين من الفرح ليك..وتالتهم الشوق ود.. كل سنة وانتي بخير..كتر خيرك على السلام العظمة..بالمناسبة عاجباني جدا اغنية السايقة العظمة..وبحوزتي تسجيل لواحدة من الشباب اسمها منال الأزهري..طبعا الفرق كبير..لكن اسـوي شنو..في غياب الماء وجب التيمم..
Quote: سـأطل لمن اتفك من شبكة كلامك |
حبابك بالطلة..وعارف شــوفك دايما بيخلق الاختلاف.. واللــه..من هسـع قلبي زادتـو نطاتو..وخايفك تشـوفي لي الحتة البتجيب الهـوى.. ولو قدرت ارجعك الدلالة تاني..تب اكون ما قصـرت وحبابك كتير..وما تنقطعي..
صـديقي ياسـيكو..حبابك نعم يا صـديقي..نتمنى جن ود ابنعوف..بكل صدق..عسـى ان يمنحنا القدرة على احداث لمحة التـوازن.. كتر خيرك وياريت تسمع لى معاك ..اي حاجة..واكيد ح نتلاقى فيها.. ابقى واصل وما تنقطع..
كتر خيركم ..ودمتم كبر
|
|
|
|
|
|
|
العنوان |
الكاتب |
Date |
حـكاية البنت التي ســكاها القـمر | Kabar | 01-17-04, 09:38 PM |
Re: حـكاية البنت التي ســكاها القـمر | aymen | 01-17-04, 11:45 PM |
Re: حـكاية البنت التي ســكاها القـمر | HOPEFUL | 01-18-04, 06:09 AM |
Re: حـكاية البنت التي ســكاها القـمر | shiry | 01-18-04, 08:22 AM |
Re: حـكاية البنت التي ســكاها القـمر | tmbis | 01-18-04, 12:55 PM |
Re: حـكاية البنت التي ســكاها القـمر | ابراهيم حموده | 01-18-04, 02:03 PM |
Re: حـكاية البنت التي ســكاها القـمر | ملكة سبأ | 01-18-04, 10:29 PM |
Re: حـكاية البنت التي ســكاها القـمر | yasiko | 01-19-04, 04:50 AM |
Re: حـكاية البنت التي ســكاها القـمر | Kabar | 01-20-04, 07:12 AM |
Re: حـكاية البنت التي ســكاها القـمر | أمير بابكر | 01-21-04, 02:09 PM |
Re: حـكاية البنت التي ســكاها القـمر | بت قضيم | 01-20-04, 08:07 AM |
Re: حـكاية البنت التي ســكاها القـمر | Kabar | 01-21-04, 07:38 AM |
Re: حـكاية البنت التي ســكاها القـمر | yasiko | 01-20-04, 08:12 AM |
Re: حـكاية البنت التي ســكاها القـمر | AlRa7mabi | 01-20-04, 10:59 AM |
Re: حـكاية البنت التي ســكاها القـمر | THE RAIN | 01-21-04, 08:11 AM |
Re: حـكاية البنت التي ســكاها القـمر | بت قضيم | 01-21-04, 08:28 AM |
Re: حـكاية البنت التي ســكاها القـمر | ملكة سبأ | 01-21-04, 11:53 AM |
Re: حـكاية البنت التي ســكاها القـمر | Kabar | 02-14-04, 08:37 PM |
|
|
|