|
قصيدة جديدة ل(هاشم صديق) - الصحافة اليوم
|
أقول ليكم كلام انسان بعز «نبتا» وبحب شعبو شرف الكلمه شرف الأمه للحاكم وللداير صلاح أرضو ومعنى الوعي في الفكر البقود ضالّينا لي دربو وشان اشرح واقول الدايرو لي نبتا ولي ناسا بذكركم بظلم الكهنه يا أهلي وبدور الناس تكون حاسّه تقيس افعالها بالتفكير وما تتبع مهاوى العاده والكُهان تَفَرِّق بين عبادْة النَجمْ وبين الخِشيه والإيمان. «فارماس» في مسرحية «نبتا حبيبتي»
«أ» جابت ليها يا عبد الله كتّاحه زيطه وعرضه ذكّارا وشكّارا دق نُقاره مدّاحين وطَمبارا ...... جرايد شَوفا طَشّ وطاش ودنيا غباش صف كورس من الغِربان صبح هِتِّيفه في الأعشاش. مسّاحين من الأقلام من الأقزام و.. ترزيه فنانين في قص الكضبه فوق للركبه وغنّايين ورقّاصين «هنود أفلام» جزارين محترفين في قطع الرقبه عميانين. حطابين يجزوا هواكْ بضربة فاس. ...... جابت ليها يا عبد الله زَمبارا.. وزُمبارا. كضابين وشمشارا. نقّازين ونفّاشين وسمسارا. ...... شوف الكتمه يا عبد الله قِل المويه موت النسمه دمع البسمه عَدَم الزاد. شوف اوجاعنا كيف صبحت نبيح ومزاد. شوف واعقل بإسم الله أيا عبد الله كيف «إتسنسروا» الآيات وكيف اتباقصت أوراد. ...... سبحان الدايم «مرجعيه» ناس «حنكوشه» والأولاد ناس «منَفِله» و«اب تِمْبِّله» والأحفاد. ياتو اْسلام يا حاجّه «أبوجا» وحاج «هاواى»؟! نشفتو الريق حفّرتو غريق دقيتو الطبله وشلتو الناى. قفلتو دَغَشْنَا بأكبر طبله زقّتُونا كلام في كلام وصالح عام بقينا زباين ست الشاي. ...... قاضي المِلّه باع أتراحنا يا مولاى واتْلفّت يا عبد الله زول الله جاى بي جاى لقيت حتى المثل مقلوب - الحدّاس صِبِح سوّاى. اتشنقلنا جوه وطنّا إتظلّمنا للقاضي شال الباقي واتحاكمنا. راح «فايْل» المظالم ساى.
|
|
![ICQ](https://sudaneseonline.com/db/blank.gif) ![Edit](https://sudaneseonline.com/db/blank.gif)
|
|
|
|