في الفترة ديك واحنا طالعين في الكفر عمرنا عمر الزهور عمر الهناء اولاد نابحين وفاكينها في روحنا (لعابين) في الكورة وبنجضم ليك اي تيم من طرف تجضيمة شينة خلاص اي صيوان لحفلة في الفريق تلقانا في نص الحفلة قاعدين زي الساوند سيستم اخر رقيص وجنصصة شي (بلو جينز) وشي (كونص) فنايل كيف كيف وقمصان اشكال والوان وحلاقة (كارل لويس) ذااتو يقعد يتحير في الشعر ده جاذنو كيف.. اها في هذه الاجواء العجيبة ومع الجكس الكان بطاقش زي المطر فجاة لمحتها ليك (وقلت بر امن) فبديت اقصص مقص مقصين .خفة دم دمين حنك حكنين وفجاة كده الخط (شبك ياعلي) فالزولة ياجماعة (تخلع) سماحة عجيبة كلو كلو ودم شربات و(خفة دم مببباللغة) ومعاها جدية وحدرة بالعين كده الله لا وراكم ليها قريبات دي….. والامور ولعت وولع فيني انا المسكين (جمر الحي) وبقت ماشة مع اخوكم (اخر حلاوة) والجكس مبسوط وانا مبسوط والاصحاب الحاقدين غايرين (جاتهم داهية ) واخر لقاءت علي طرف البحر مع النجيلة (الخضراء ومكوية) وحبكانة الف وجوابات تجنن (ياحبيبي احنا اتلاقينا مرة) و(حبيبي اها وقلبي تاه في يوم الزيارة) (وما بختلف) والحب صعب ياعلي…وكلام كثييييييييير كلو دعاش ومحبة وصدق ومعنوياتي بقت فووووق في السماء. ونعود
05-09-2007, 10:04 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كورة بجضمها جضيم شديد وزمان كنت في المباراة يادوب اجيب لي قوون ..اها من ما الوريفة الشفيفة خشت حياتنا بقيت في كل مباراة قون قونين دي بتجي زي الترتيب …واتعلمت الاورغن وطلعت كم حفلة والجكس كان بين الحضور فجضمت ليك المزازيك جضيم السنين خليت الجكسوس (يااامن) والدموع نازلة من عيونهاولكن وييييين فالقلب ذهب مع البنية السكرية الشالت النوم من عينا وملت الدنيا فرحة ورفعت معنويات الجيش بتاعي… اها في وسط هذه الاجواء والكرنفالات والبهجة ومعنويات جيشي البقت (فوووووق) في هذه الفترة ويوم مع المغارب ساعة النسمة ترتاح علي دغش وين كده ماعارف وبعد التمرين استحميت (نضيييف) وبقيت ارقش (سراميك) بس وخشيت لي في بلو جينز عجيب وقميص كاروهات زمن الكاروهات (كاروهات) واديتا بخة بختين من دعاش ريحة كده (عجيبة مرة واحد) ..وضايرت الشعر القرقدي مضايرة (بخلال) اصلي ومشيت علي النجيلة وادندن (علي النجيلة جلسنا) فاليوم هو يوم (البرومس) مع الحنان والناس الشداد الشالو مننا (ابو النوم ذااتو)
05-09-2007, 10:06 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ومشيت لركن المحبة نجيلتنا محل كل مرة بجي الجكسوس واشبكها ليك نقة (نقن نقن) واقلب زي مليون هوبة واخفف دمي ولا عادل امام وبعد مرات افك ليك بيت بيتين من الشعر الفرمالات بتاعتي الحفظتها بعد تلتلة ديك وفجاءة جات الامورة الشحرورة لابسة المرة دي اخضر لونو (زرعي) فتخيل النجيلة خضراء والجكس لابس اخضر وانا قلبي (بقي ملاح خضرة بس) ومفروض اسمي روحي من اللحظة (خضر بشير) والجكس بتاعي يقلب اسمو(لخضرة وماءو وجه الحسن).. وفي اليوم داك بصراحة رغم الونسة والاخضر (بلومي) الذي توشحت وازدانت به البنية السكرية الا ان قلبي وبالحس الامني والوسوسة يخبرني بان هناك (شي ما) خلف افق قوس قزح بتاع الجلسة الرومانسية دي..!!![/blue]
05-09-2007, 10:08 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
واها الزمن انتهي الرسمي للجلسة وطبعا وكما العادة كان لازم اقدم البنية واعمل (قدم الخير) اوصلها بالقرب من مضارب خيام بيتهم وبعد داك اكب الزوقة واعمل شتات خالي محطات..ومررنا علي الزقاق الفيهو دكان (عمر طحنية) وفجاءة البت نطت زي العاضيها دبيب (مااااااالك يازولة هييييييي)؟؟؟؟؟ يا كرمة ياهووووو داك (فلاننننننن اخويييييييي) واقف في الدكان...!!!!! اللللللليليلة...(هكذا قلتها دون حرج فلم اكن طيلة فترة علاقتي مع هذه البت الوديعة متخيل بانني ساجد نفسي (فيس تو فيس) اما م اخو جهامة وصدر صبة خرسانة بسسسسس وعضلات (تبش) وهي ذااتها الفقرية ما حكت لي بانها تمتلك مثل هذا الاخ المصارع (الاندر تيكر)..كان الواحد لقي ليهو طريقة او شاف ليهو جهة اخري...) الليلة والف الليلة والزارعها الله تقوم يازول محل ماتقوم..!!!
Quote: فتخيل النجيلة خضراء والجكس لابس اخضر وانا قلبي (بقي ملاح خضرة بس) ومفروض اسمي روحي من اللحظة (خضر بشير) والجكس بتاعي يقلب اسمو(لخضرة وماءو وجه الحسن).. وفي اليوم داك بصراحة رغم الونسة والاخضر (بلومي) الذي توشحت وازدانت به البنية السكرية الا ان قلبي وبالحس الامني والوسوسة يخبرني بان هناك (شي ما) خلف افق قوس قزح بتاع الجلسة الرومانسية دي..!!![/
إيش الكلام ده!!!
وااااااصل عليك الله..
05-09-2007, 10:17 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
مرحب يا خالد وشكرا علي حضورك الاول علي ضفاف السيم سيم ولكن ليس بالكربون ويبدو ان الخضرة راقت لك وعجبتك يا صديقي.. ولكن صبرا فان في الامر احداث وحديث وكاسوري تقيل..صبرا يا عصام وكن بالجوار
05-09-2007, 10:22 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اخر مرة اكتفتت في حياتي الملانة شقاوة دي كان من استاذ (عنتر) لمن ضاربت الالفة بتاع الفصل وابيت يازول امشي للجلد مع المهرجلين...(داك كان كف تاريخي وخلاني الف زي مروحة التربيزة) ومن ديك قررت اني ما اتكتفت باخوي واخوك.... عشان كده مع الكفيتة الوجعتني جوه قلبي للجكس(المسكين) طوالي اتذكرت كف (عنتر الشهير) وعملت ساتر..!!! امشششششششي البيت يا زفت.!!! هكذا قالها الاندتيكر الذي تحول الي مصارع صعب المراس وسيطر علي الموقف سيطرة تامة وقام بطرد المسكينة من (حلبة المصارعة) وانا قلبي يتوجع علي هذا الكف الذي رمي به الزولة الحنينة اللطيفة الكانت قبل شوية اخر حلاوة وبقلاوة.. وكانه يريد الانفراد بالمرمي بالفارة (كريم) ويكسروا حتة حتة ويرقدوا سلطة (والله يستر)..!!! اصحبنا رغم البين مصارعين في حلبة (راس تو راس) وفلاااااااان جهامة الله لا وراكم ليهو ولا دخلكم معاهو في زقاق ضيق زي بتاعي ده....!!![/blue]
05-09-2007, 10:26 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
الموقف صعب والزنقة تاريخية والكبع حاصل حاصل وكان لازم التفكير في حلول سليمة حقنا للدماء 1- افتح حوار مع الانديكر ده ونحاول نمنطقوا 2-لا نبادر بالاثم والعدوان والهوكات..ونشوف اخر و ونضعه تحت الرقابة لللصيقة لانو زي ده (بنيتو ) بتكون لحام هوك منو تاني الواحد اسبيرات ما ينفع..!ّ!!! 3-تشحد الله يجيب (حجازين) من مافي ويحلوك من الشبكة ده 4-تعمل (ياااااع) وتشتت وكان هذا الخيار خيار مرفوض وغير وارد (هيييييييع) يازول (هوكات هوكات) كبع كبع والرهيفة تنقد..!!![/blue]
05-09-2007, 10:29 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
وفي اثناء محاولاتي الجادة لفرض لغة الحوار مع صديقنا (الاندر تيكر) استطاع الماهر اندر تيكر تلحيقي ثلاثة (هوكات زي السم) عينك ما تشوف الا النور هوكات ثقيلة وصعبة البلع وسريع سريع تخليك تشوف الدنيا طشاش طشاش....(وبرضو قلنا خير الراجل اخو الحبيبة اللطيفة) والبتجي من الاندر تيكر يحملها (العاشق الولهان) وحاولنا فرض لغة الحوار مرة اخري الا ان الاندر تيكر تمادي وناول ليكم صحبكم بهوككك رهيب شديد المرة دي بصراحة هووك ما بنسكت عليهو ابدا وغير قابل للهضم ولا بد من الشكل والكبع وان طال السفر ويا اندر تيكر صبرنا علي الاذي الجسيم طويلا معقولة نقيف مكتوفي الايدي ومنزوعي الارادة عشان تكسرنا كسيرة الدريش في العويش....لالالا...!!! _________________
05-10-2007, 11:13 AM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 23067
وطوالي يازول اول شي لحقت الاندتيكر سريع سريع الاربعة(هوكات سريعة) جازفتها مجازفة وسط حسده العالي وعضلاته التبش ونفذت هجمة مرتدة ناجحة (عطا ابو القاسم ) ما يعمل زيها,,, وكده حبايب اربعة (هوكات) لاربعة (هوكات) وكده درون....والكاسوري دور والاندتيكر بصراحة كده جاب فنيات جديدة و بنيو بقت صعبة خلاص ومركز ة وحارة (حقنة ملاريا بس) لكن (شو فيني اسوي) لازم اقاتل واضارب وارد الصاع صاعين واستدعي مخزون الخناقات بتاعتي القديمة التي طال عهدها واضرب يازول لفت رايت وزي ما تجي تجي ومحل ما تصادف تصادف والله يهون بعد داك..... ونواصل
05-10-2007, 02:23 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ده نوع الشكلة الكنت تتمني انك شايل (عكاز) ولا يد(ليبر) من الحماقة تفرطق راس الزول الواقع فيك ضرب (دق العيش) ما زيو.. لكن البنية كانت هي سيدة الموقف وتلهث لهث محموم لكي توصل بنيتك رغم قلة (قوة حصينها) الي هذا الاندر تيكر الشرس..الذي لايرحم ولا يترك رحمة الله تنزل ونعود
05-10-2007, 02:30 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
شكلة ليها ضل مع الاندر تيكر ابو النسب العجيب تخليك تكره الحب والشلاقة البخليك تجكس بنات اخوانهم (بنيتهم) لحام زي صاحبنا الشبكة ده وتواصل القذف المتبادل بنية وراء بنية وهوك ياتي م ن حيث لا يحتسب وبنية تفكها انت مطرح ما( تسري تمري) والدشمان نارو ولعت في السماء.... وفي لحظات الضعف والهوكات الاندرتيكرية الرهيبة (بينك وبين نفسك تقول يا ربي البلد دي ما فيها حجاز ولا شنو).. ياخ ديك هوكات انا ماعرف الزول ده (ما عندو رحمة في قلبو ولا مامومن عديل كده...كافر ياخييييي)..!!! ونحن في عز الضرب و الكبع المتبادل كنت حريص وحسب خبرتي بتاعت الشكل حريصا تماما الحرص علي عدم الاقتراب من الاند تيكر ده كثيرا..(تفك بنيتك وتبعد علي الاقل مترين) لانو زي صاحبي ابو النسب ده لو مسكك كربون تاني موضوعك بايظ (وبموتر قريدر ما تتحلا) يلحقك (سيدو) المصارع العجيب الذي قيل انه متخصص في هذه الحركة الرهيبة التي تتيح للمصارع وضع رقبتك ثم توجيه ضربات للراس بعدها موضوعك بكون بايظ ورغم محاولات الاندر تيكر تطبيق هذه الحركة وحسم هذه الجولة لصالحه بالكربون القاضي الا انني كنت اردد في سري ويييييييين يا اندتيكر (الكربون ده تلقاهو عند الغافل)...!!!! _____ونعود____________
05-10-2007, 02:35 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
ودار الكاسوري دورات وجولات كرا وفرا ومرة هوكات ومرات لبع وكبع فجاءة كده ربك رب الخير يجيب لينا حجاز من عدم (والحجازين ديل بقوا صعبين ونادرين اليوم داك) عمك (فتريته) الزول المحترم الكلمتو مسعوعة في الفريق جابتو السكة (عفارم عليك يا عم فتريته) يا احسن حجاز في الشرق الاوسط يا رجل النوايا الحميدة المبادرات التي تجي في وقتها(لاني بصراحة فتريتة ده لو اتاخر شوية كده اندتيكر ده كان لحقني غنم زهرة)... كنت حريص ومبسوط وفاكر عمك (فتريتة) اول الواصلين الي مكان (الكبع) ومتخيل مافي زول تاني شاف الحاصل يقوم كمان (يفك الشمار) ويولع في الفريق انو الاندتيكر كسر كروومة كسر ثقيل ..ولكن ظني خاب لمن كحلت كده بالجنبة ولقيت عمك (عمر طحنية بتاع الدكان) ماخد ليهو كورنر زي السم وبتفرج في الكاسوري وشكلو كده متكيف.. اهههههها منك يا طحنية ياجبان يا رعديد عينك من قبيل في الدفس والهوكات تتطاقش والبنية مدورة وعامل لبتون وتتفرج يا طحنية يا جبان يا الذي قاعد تبيع السكر بالسوق الاسود وتحت تحت قالوا بتبيع (بنقو) ذاتتو اصبر لي يا طحنية بنظمك..ياجبنة يا متامر مع الاندر تيكر
05-10-2007, 03:29 PM
محمد الطيب حسن محمد الطيب حسن
تاريخ التسجيل: 03-31-2007
مجموع المشاركات: 1609
Quote: الموقف صعب والزنقة تاريخية والكبع حاصل حاصل وكان لازم التفكير في حلول سليمة حقنا للدماء 1- افتح حوار مع الانديكر ده ونحاول نمنطقوا 2-لا نبادر بالاثم والعدوان والهوكات..ونشوف اخر و ونضعه تحت الرقابة لللصيقة لانو زي ده (بنيتو ) بتكون لحام هوك منو تاني الواحد اسبيرات ما ينفع..!ّ!!! 3-تشحد الله يجيب (حجازين) من مافي ويحلوك من الشبكة ده 4-تعمل (ياااااع) وتشتت وكان هذا الخيار خيار مرفوض وغير وارد (هيييييييع) يازول (هوكات هوكات) كبع كبع والرهيفة تنقد..!!!
وانقدت ولا لسه ؟؟؟
انت عارف انا لو محلك اول حاجه بدي كف عشان بينك وبين نفسك تقول انت الغلطان اديتو كف
تم لينا سريع بالله ((فلم هندي بس ))
05-10-2007, 04:20 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
رغم الحضور المفاجي للحجاز الذي لايمكن ابدا ان ينال عكاز (عمك فترتيه) ديل الحجازين يا بلاش مهما كانت شكلتك بتضمن تماما ان الحرب ستضع اوزارها وترفع الرماح والسيوف بكلمة حاسمة (يا اووووولاد ده شنو ..ده) ياخ احبك يا فتريتة وبس لوتديني جانص يا( عمك) ارد علي الجاسو س ده الكم (بنية) المافيها رحمة دي.... بقدر ما ابهجني وسر بالي حضور (فتريتة) رمز السلام والنوايا الحميدة (الاخضر ابراهيمي) انا كنت عارف الخضرة الدورت في النجيلة دي الليلة بتجيب خبري الا انني ومع الانهاك والتعب والكبيع الحاصل زعلان شديد لموقف (عمر طحنية) المتواطي الذي كان نموذج للمشاهد (السلبي)..عينو في الكبع والكاسوري عجاجو في السماء وعامل فيها (ميت) وماخد كورنر يتفرج..... اصلو انا من زمان (مكجن) طحنية ده..وسمعت تحت تحت انو بيع السكر بتاع الفريق في السوق الاسود وكمان الليلة مع الزعلة دي اطلعوا ليكم بتاع (بنقو) ذاااتو.. ونعود......!!!
05-10-2007, 04:48 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
عملت جرد سريع للمخلفات في المعدات والارواح التي تباينت ما بين (ورم) في الشلوفة الامامية (بقاها كيلة وملوة) علي العليها وفلعة سلاخية كده ناتجة عن (هوك من الهوكات الثلاثية الابادة في بدايات المعركة الرهيبة دي..!!!! وبعد فحص سريع لحالة الاندرتيكر حتي يطمئن قلبي علي اختبار الكفاءة والمقدرة الشكلية بتاعتي لاحظت ايضا ان هوكاتنا احدث ورما (ما بطال) في العين اليسري للشرس الاندر تيكر وكم خربشات مجدعة في اماكن متفرقة من وشو (الشايفو) انا اليوم داك (زي الكبك) واكعب.....!!!
05-10-2007, 05:18 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
فتريتة نزع فتيل العراك وتحرك كل (قرد منا ) الي حاله وانا حاسي بغصة وحزن ليس لحالي الذي لايسر عدو ولا صديق ..بل لحال الوريفة ال الليلة الله قال بقولها في البيت لمن (الاندرتيكر ده يرجع ليها في البيت)...ياخ ده انا العامل فيها فصيح ده (جهجهه) دفاعي, باقي ليكم زولتي الوديعة المسكينة دي الليلة (كيف يكون الحال)... وفي الطريق وانا مقطع القميص الكاروهات والزراير (رقدت هبطرش) قطعها الاندر تيكر قطع الله موينه وكهربته.. وانا في الطريق قعدت اتخيل بنيات الاندرتيكر الرهيبة دي واقعة في الجكسوية و وحال امها المسكينة التي تسرب الي جلسات الخضراء بانها تعاني من الضغط (اذن الليلة ميتة وخراب ديار) (دق جكس وموت ام) وكل السبب هو قلبي العامل زي االلكونده ده,,وبديت احاسب في روحي واوبخها توبيخ السنين..
05-10-2007, 05:45 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها في داعي لجنس ده حسي ضلوع البنية تتكسر والام الضغط يجيب خبرها وانا كان مالي ومال البنات الملانات مشاكل ديل (اخو عضلات تبش) وام ضغط واحتمال سكري وشكلة انتهت الي ما انتهت عليه من ورم شلاليف وحضور مخفي للزول بتاع الشمارات (عم طحنية) الخشمو خفيف وطبعا بكرة حيوزع الشمار التقيل لكل محطات البث الارضية والهوائية وشوف ياجبنة وهاك يا ودع وهاك يا قرقرة (يقرقرنك السم يا ناس عوضية شرقرق)... شاحد ربي الخبر ده ما يصل عوضية (شرقرق) طبعا حتدي القصة توم وشمار تقيل وتعمل دبلجة وتغير في السنياريو بتاع الاكشن واحتمال تغيير الفيلم ذااتو والممثليين)...وكان وانا في طريقي ملي بالهموم ورغم اني حمدت الله علي العواقب التي جات شبه سليمة..وخروجنا سالمين معافين من معركة مع زول (فيل) زي ده كانت مكسب كبير لقوي الحب والسلام في كل العالم...
05-10-2007, 07:11 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
الا ان الهواجس لازالت تتمحور في الاتي 1- التفتيش المنزلي للحاجة (جاي من وين..وشلوفتك دي مالها مورمة كده..وقميصك ده مالو زاريرو مقطع) وسوال منكير ونكير وما تعرف تتخارج كيف من المحاصرة الرهيبة دي.. 2-حضور عمر طحنية صاحب الخشم الخفيف وعواقب (يوم بكرة) واول مرة تتمني انو يوم بكرة ده ما يجي كلو كلو 3- الكسر الذي في انتظار الوريفة وخوفي علي حاجة نفيسة من الموت والعقاب الضميري 4-هاجس (عوضية شرقرق) ومعرفتي العميقة بامكانياتها الشمارية ومقدرتها علي توضيب الاحداث وزيادتها موية لدرجة تجعل (اجعص) جعيص يصدقها....
05-10-2007, 08:09 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
كل تلك الهواجس والهموم قررت اني اداهم (عبس) صديقي وكاتم اسراري والاستشاري الذي لايشق له غبار ولا يتواني في تقديم النصح والارشاد رغم طولة لسانه وزهجه الدائم وتندره من كل الاشياء فكان القرار..هو كنغ كنغ ضرب متوجس علي باب بيت ناس (عبس) صاحب الجغرافية المطرفة من ذلك الفريق..!!! مرحب شنو جاييينت بالليل ده يا زول انت حرامي ولاشنو ولا ما عندكم عشاء في بيتكم..؟؟؟؟ هكذا قالها عبس وهو لا يهتم لدخولي السريع في ذلك الظلام الدامس..؟؟ ياخ دقيقة عشاء شنو وحرامي شنو..!! انا ياعباس اتكاسرت مع (اخو فللللللانة كسر شديد)..!! اخووها منووووووو اوع يكون (عمر هوك)..!!![/blue]
05-10-2007, 09:19 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
هنا نهض عباس سريعا واقام تفتيش سريع للراس والضلوع وهو يرتجف خوفا ورغم كل شي لقد كان (عباس طرمبة) هو صديقي وفردتي ودوما هو طيب القلب واخو اخوان ...!! وهز عبس راسه وقال لي يازول انت متاكد انو اخوها ده ياهو المفتل وطويل داك..؟؟ ياخ يا فردة والله انت لو ما مت من هوكات (عمر هوك ده) تاني موت ليك مافي تاني قريبات دي.. ياخي عمر هوك ده الله طلعك منو ساكت وانت زول جسمك قوييي ساكت والظاهر الله بريدك..!! لاني شفتو مرة في السينما كسر ليهو 4 شباب كبار ومكان ورقدهم سلطة الله نقلوهم ببوكس راقدين هبطرش للطواري وسبعة يوم راقدين في الانعاش....!!
Quote: الاخ عبد الكريم والله موتني عديل من الضحك خصوصأَ لما كنت منتظر الحجاز
مرحب اختي عواطف والله يدوم الضحك والسعادة.. ولكن يا عواطف الرجال (عصر) علي شديد وهوكاته كل مرة قوتها زايدة وحرارتها بقت في السماء وبعد ده لاحياة لمن تنادي من الحجازين.. والغريبة دكان (طحنية) ده يومي زي المواعيد ديك كان ملان بالناس اليوم داك (نفاخ النار) مافي .. (عالم حاقدة وغير حريصة علي التواجد في الزمان والمكان المناسبين)
مرحب ابوحميد والله الشمشرة عندك ولكن خوفي وكل خوفي من وصول الشمار الي محطات (عوضية شرقرق) الارضية فساعتها سيتم توزيع الشمار علي كل جلسات الجبنة والودع ومعاها (توم وشمار وكسبرة كمان)
05-11-2007, 00:42 AM
ودرملية ودرملية
تاريخ التسجيل: 07-27-2002
مجموع المشاركات: 3687
سلامات وعوافي والله ياكريم "سيم سيمك حار ياخي" ده جكس متعب خالص .."عمر هوك" ياخي انت الله شاف ليك ساي ياحبة ده كان فكفك صواميلك .. بعدين والله "طحنية" زعلني زعل المعفن الفقر الكريه ... يعني بس تلقاهو ينبذ فيك في سرو "كسرو لي ياهوك كيكي الفصيح دا طلع ديشو زاتو لافي في الحلة ما مخلي بنية حايمة ما شاغلا تفو يتفو البلا" ..
Quote: اهههههها منك يا طحنية ياجبان يا رعديد عينك من قبيل في الدفس والهوكات تتطاقش والبنية مدورة وعامل لبتون وتتفرج يا طحنية يا جبان يا الذي قاعد تبيع السكر بالسوق الاسود وتحت تحت قالوا بتبيع (بنقو) ذاتتو اصبر لي يا طحنية بنظمك..ياجبنة يا متامر مع الاندر تيكر
بالله طلع بتاع بنقو وببيع عرقي في قزاز الجاز زاااتو ... طحنية ياعفن يا حاقد .. هاهاهاهاها.. والله ياكريم قطعتا مصاريني "كناية عن الضحك" "وكناية عن الانبساطة" .. والعذارى امانة ما بيستحقن ان "نموت في دروبهن الوعرة وان نتطقش كيفما اتفق الهوى والحب" كونهن لطيفات الروح ولذيذات في الحديث والسلام والقُبل الملهمة .. . . بعدين ياخي واصل ماتجهجه باكاتنا كدة
05-11-2007, 08:37 AM
معتز القريش معتز القريش
تاريخ التسجيل: 07-07-2006
مجموع المشاركات: 11343
Quote: بالله طلع بتاع بنقو وببيع عرقي في قزاز الجاز زاااتو ... طحنية ياعفن يا حاقد .. هاهاهاهاها..
مرحب بودرملية تضحك ومبسوط يا حاقد.. طحنية يا عبدالرحيم زول (فاره) وحاقد وانت كدي شوف الاسم (طحنية) قالوا تمشي دكانوا تسال يا عمر عندك بصل..؟؟ يجيب لالا والله لكن عندي طحنية حلوة خلاص..!! تاني ياعمر عندك كبريت؟ لالا والله لكن عندي طحنية حلوة خلاص..!!! .. شفت الوهم ده الطحنية معلقة ليهو في راسو عشان كده ناس الفريق شبكوا (عمر طحنية ..عمر طحنية).. .... انا لزمن طويل ما موجوع من هوكات (الاندر تيكر) بقدر ما موجوع من (حركة طحنية) البايخة دي الزول حاقد بتاع بنقو وزي ما قلت انت بييع عرقي رجينة (ممكن بدسوا في صفائح الطحنية العارف منو)
05-11-2007, 09:08 AM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
هنا كرهت ليك عباس طرمبة واليوم اللماني في جنس اصحاب زي ناس عباس طرمبة..ديل وكوركت فيهو بكل غضب (طيب يا فقر لمن كنت انت يا زفت عارف انو البت دي اخت عمر هوك) ده ليييييه يا عباس عامل (ميت) وما عاوز تباصي لي المعلومة دي...!!؟؟؟ ليييه يا طرمبةياحاقد..!! اوريييييييك هنا نطط عباس عيونه وتقمصته روح الخبث الذي اشتهر به (طرمبة).. ما كنت عامل لينا فيها (قيس ابن منو كده ماعارف)..!! وفاتح لينا فتح السنين وعامل مهم وسلطان (برناوي* ظاااااتو).. ياكرمة ارح معانا الحفلة في فريق (زنقو)..!! وبترد لينا لالا يا وهم انا لو بمشي مع زيكم ديل كان جكس زي ده طفش من زمان.. يا وهم ..!! ياكرومة بكرة الهلال والمريخ لعبين تعال احضرها معانا.. هلال ومريخ واحضرها معاكم انتو ياوهم انا يا فارات بكرة عندي (برومس ) من الجكسوية في النجيلة اقعد اتلهي معاكم عشان اتفرج في برشم وجلال كادوقلي ياوهم وفي خلقكم الجايبة لينا الفقر دي..!!!
05-11-2007, 01:43 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها بعد حادثة الاندر تيكر الشهيرة وسيرتها التي ضربت البوادي والحضر قلت يا ود هووي بعد ده اعملن لبتن من سيرة الجكس دي واخد فترة نقاهة شوية لحدي ما نشوف اخرتها (شنو) مع القصص البتجيب ليها كبع دي... ولكن في يوم من الايام جات (ندوية بت فرعون) وفتقت القص تاني..دي ندوية فرعون وما ادراك ما ندوية فرعون.(وعشان خطورة قصتها حنبيقها ليكم بالاحمر)
لو شفتوها بتشبه القمر المتاوق من السماء حلاوة وذوق وخضرة لون وعيون زي السم وكلامها زي الورد في تلك البلدة لابسة (لبني) واخ انا من اللبني اللبساهو نادية داك عاينت لي بعيونها الكبار ديلك. وحدرت لي ومن ديك النوم جافاني وبقيت بشوفها ليل ونهار وبشوفها جوه نظارة المساحة الشغال بيها كل يوم وقلبي دقاتو زادت وبقيت مسسسسسسسسسسكين وبحلم (بنادية) لحدي ما يوم قويت قلبي وقلت هلا هلا ولبدت ليها جنب الدكاني بتاع (عمك علي) ناديةازيك ممكن اتكلم معاكي شوية.. عايز شنو يا زول؟؟؟ لا ما عاوز حاجة بس كنت داير اديكي الجواب ده جواب شنو؟ اقريه وبعدين تعرفي كدي جيبو... اديتها الجواب واديتا قلبي معاهو..ومشيت البيت دون قلب لاني قلبي كلو ختيتو ليها في الجواب...ومشيت انتظر وعليكم الله انتظروني انتو كمان عشان اوريكم عن نادية فرعون ستة الحلا
05-12-2007, 04:05 PM
عبدالكريم الامين احمد عبدالكريم الامين احمد
تاريخ التسجيل: 10-06-2005
مجموع المشاركات: 32520
اها اليوم داك وانا جاي علي الدكان وبغني براي عذبني وزيد عذابي يمكن قلبي يقسي القي ليك ندوية قاعدة في الدكان واشترت ميرندا ومعاها اختا الصغبتونة (رنو) وما اشوف ليك الا ورنو دي تخت لي ورقة في يدي وياسلام عليك يا رنو يا رسول المحبة والدهشة وحسيت بالجواب تقييييييل خلاص في يدي وجريت علي البيت وكل بالي في الجواب في الجواب المشي وجاء دهء ولكن ظل السوال يا ربي الجواب ده جاب شنو؟؟؟ جاب الفر ح والحب والريدة ولاجاب الميتة وخراب الديار والكلام الكعب البسل الروح والبيت بقي لي ابعد من القضارف...ونواصل مع بت فرعون
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة