|
|
 نص القصــيدة - بين الخليفة وامونة بت حاج احمد (Re: Amjed)
|
محمد طه القدال
بين الخليفة وأمونة بت حاج احمد
ما ضهبت أقول لقيتك
انتى فى كل الخواتم والمياتم
والنجيمات والعواتم .. والمغنين المطاليق
وما حزنت اقول بكيتك
... نحن فى حزن المخاليق
الفرح جاييك وعد
غنوة اولاد التحاريك
السعد ولا البعد
البعد ولا السعد
وانتى فى ليل الخوابى
تهاتى بينات الطوابى
تحاكى جقليب السعى
الجنيات خلو حجرك ريح يفوفى
وعين مزرقنة من شقى الفرح المرابى
ومنية الوعد الدعى
يا ديارى الوين ..أنى
تور عفين الشين ..أنى
ما اضينة وزين انى
وانت فى خوفك تكاتل رفة الطير والحفيف
وانت فى شوفك تخاتل عينة الجلبت خريف
وكنت فى اللالوبة مصلبة البنيات
النسيمات الهفيف
بطنك كرشت غى البنات نافى
ودقنك حمست جلدك خرش مافى
وكنت فى اللالوبة مشنقة الوليدات
النجومى ومحبس النفس الرهيف
وكت الوهم وافيت .. وقت العلم جافي
صدق الوعد نافيت .. مرة الصدق وافى
وكنا بنشيل الغباين والاناشيد:
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
وجينا للبقعة ام قبايل
سيل من الوادى الكبير
الكفيف شايل الكسيح
يا عيون ود اب كير
واحدة من توشكى وتقلع
تانى تقلع فى المطامير
يا جبة الدرويش
البابا بسل العيش الله بسلا؟
والبابا خدمة الديش الله بسلا؟
البابا القول بى شويش الله بسلا؟
البابا القول عضير
يا عيون ود اب بكير
عماك فى حقك ديه
لى زمنا مو جهدية
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
ويا عيونى شن بتشوفى
ويا امونة شن بتشوقى
شدرا تالا اليمامة
ولا الصقر الحمامة
ولا البطن التفوفى
يا امونة شن بتشوفى
ويا عيونى شن بتشوفى
تلت التلاتة شلق
تانى التلات محلق
والتالت جا يبشرنى
سرقوهو الدايرين حتوفى
يا امونة شن بتشوفى
ويا عيونى شن بتشوفى
سنتا والعيش بالقبضة
قلبك شاشاي للنبضة
جوني العشا ما لقوني
جهدية ماكلة كتوفي
يا امونة شن بتشوفى
ويا عيونى شن بتشوفى
شايفة الدموم واللمة
بين الدقون والعمة
ولانى فوق معلق
صقر الحدى مندوفى
يا عيونى شن بتشوفى
ويا امونة شن بتشوفى
| |
 
|
|
|
|
Amjed
فيس بوك
تويتر
انستقرام
يوتيوب
بنتيريست