|
Re: مثلما تشتاق الشفاه الظامئة للماء 00 اشتقت اليكم (Re: ابوعبيدة حسن محمد)
|
ابوعبيدة حسن أظرف شيء أن هذه الكارافته ذكرتني موقف حدث لي بمدني حيث أوصلت عريس وعروسه للفندق وكنت البس { شيك } كما يقول المصريون البنت الجميلة في الاستقبال كانت تفتكرني انني العريس لأنو العريس بيني وبينك كان لابس حاجة كده كيف ماعارف المهم طلبت بياناتي والذهاب للغرفة قلت ليها ياريت لكنني ليس العريس !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ابوحراز)
|
أبو حراز
طال علينا غيابكم والله يا حلوين قدر ما ننسي العلينا برضو مشتاقين
مشتاقين للصور الحية فى كتاباتك مشتاقين لست النفر مشتاقين لأصحابك أهل العوض مشتاقين ليك إنتا ذاتك ياخي بس في غيابك يا غالي إتغيرت حاجات كتيرة منها ومنها بس أهم حاجة بعد كم شهر كدا تاني ما ح يكون فى بنطون رفاعة كبري بس يعني الواحد فى الحصاحيصا لما يزهج يتمشي ويمشي يشرب شاي فى رفاعة ويجي راجع
مودتي فضل كرار
كسرة عاوزين نعرف كنت لابد وين؟؟
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Mustafa Mahmoud)
|
مرحبتين مصطفى محمود أين تلك الروائع التي كنت تتحفنا بها من كلمات نزار نزار يجعلك تترنح وتنتشي وتشطح بعيداً بخيالك عندما تقرا بلقيس تشعر بأنها كل نساء السودان ومن منا لم يهدي حبيبته بعضاً من عشق نزار صدقني 00 في كثير من الأحيان تحتاج المرأة لكلمة للمسة حب ولإنحناءة دافئة تحتاج لأنفاس ممزوجة بكلمات هذا الرائع وحينها ستتغير حتى فصيلة دمها نزار سبر أغوار المراة ودخل الى عوالم كانت مغلقة علينا طاف في خارطة المراة الأنثى والمرأة المبدعة والمراة الروح !!! كل إمراة جميلة في بلادي لكنها تحتاج لمن يستوطن في هذا الجمال لمن يحوله الى رحيق والى ألق !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Fadl Karrar)
|
أخي فضل كرار لو أتيت لذلك النهر الذي يستلقي عليه هذا الكبري لوجدتني أأتي هنا لأتنفس وآخذ جذوة من أنفاس الحصاحيصا المترعة بالعشق هنا تتدلي أقدام هذه المدينة بالنهر وكأنها ترفض هذا الجسم الغريب المسمى كبري رفاعة الحصاحيصا صدقني عندما تذهب للضفة الأخرى برفاعة وتلقي نظرة عند الغروب حينها لن ترى الحصاحيصا بل ستشاهد مدينة مسروقة من الجنة في هذا المكان الروحي العجيب ربما ارسل الله أحد ملائكته ليلامس بأجنحته أطراف المدينة!! كنت هنا وكانت ست النفر وابنتي مآرب ونون هي الأخرى أتت معنا ونساء رائعات أتين من كلية التربية وخرجت الحور العين من الامتداد وود الكامل وحتى ناس الله أكبر كانوا متواجدين آنذاك ينظرون مثلنا لهؤلاء النسوة اللائي قطعن ايديهن !!! أخي 00 لهذه المدينة نكهة رائعة لكن مايغيظني هذا النهر الآثم الفاجر حينما يلتف حول خصرها كل حين وحين ويداعب شعرها المنسكب حتى الخصر وحتى الأنهار في بلادي تظمأ لكن هذا النهر حينما يظمأ يقبل هذه المدينة من النهد الى النهد ومن الأهداب الى الأهداب فيتركنا نحن الرجال في حيرة ويترك النساء في قمة النشوة !!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ابوحراز)
|
ياخي بي الراحة علينا والله يا ابو حراز عندك مقدرة علي السرد ،،، عجيبة خلاص أجمل ما فيك عشقك للمدن وللتفاصيل الصغيرة
تعرف الزول القال الأذن تعشق قبل العين أحياناً أكيد كان بستمع لي واحد زيك كدا
إنتي فيك شئ أصيل من أهلنا وهو الثقافة الشفاهية
بي عودتك عاد للمنبر بعض ألقه القديم
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: abas)
|
أخوي عباس بن فرناس الحمد لله الاتزوجت وجبت ليك عيال وبركة العين الطايرة دي وقعت في واطاة الله غايتو الواحد بعد مايعرس كل شيء بطير ليهو في راسو حاجات كتيرة قلنا والله ما حانشبع منها لكن والله بيني وبينك غرقنا فيها غرق شديد وهسي ناطه لينا في حلقنا قال عرس مبكر قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ابوحراز)
|
المبدع أبو حراز أول حاجة غير العنوان بتاع بوستك ده وبطل الحركات دي شفاه شنو كمان ما تقول شلاليف " والله يا أب حراز مرات كده بجيني إحساس أقلع نعلاتي لمن أكون داير أدخل بوست من بوستاتك ، وكأنني في حضرة ولي أو في زيارة مكان روحي مقدس.
Quote: سكنتم في أعماقي منذ ذهبت عنكم |
شوف يا أب حراز يا أخوي أنا ما داير أشرح البوست وأشرشحك قدام الناس ، لكين حكاية سكنا دي بترتب عليها مديونية وإنت سيد العارفين ويا ندفع يا تقوم كمان تشيل العدة والإثنين ما عندنا ليهم طريقة المهم أنا ممكن أقبل بالسكن لو عملت لينا الإسكان ده مشروع خيري أهو حاجة تلقاها قدامك وغير كده أنا حا أسكن عشوائي في أى حته وأنتظر الخطه الإسكانية. سعيد كل السعادة بطلتك وعودتك ويبدو أن أرض الجدود وست النفر والنيل والقمر والناس الطيبون قد زادتك إبداعاً على بداعك. وفي إنتظار الأخبار والموضوعات وعلى الطلاق من يوم ما إحتجبت عن المنتدي لغاية الآن خانتك فاضيه لأنه عند طريقة في اللعب مميزة وذات نكهة خاصة
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: abuguta)
|
اب قوته انت من زمن الفولاذ والعكاز ؟؟ ياحليلك والله تصدق لو شفت الرجال في السودان أصبحوا حاجة عجيبة جداً الواحد مما يقولوا ليهو مرتك جات يقوم يدنقر حليل زمن جدودنا الماتوا وفكونا في الهواء العكاز مضبب والعين حمراء والنسوان الواحدة فيهن لاتحل ولاتربط هسي عليك أمان الله كان قليت أدبك تربطك في كراع العنقريب والغريبة الواحدة بالليل تلقاها مسكينة خلاص
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: almulaomar)
|
أخي الملا عمر
Quote: أول حاجة غير العنوان بتاع بوستك ده وبطل الحركات دي شفاه شنو كمان ما تقول شلاليف " والله يا أب حراز مرات كده بجيني إحساس أقلع نعلاتي لمن أكون داير أدخل بوست من بوستاتك ، وكأنني في حضرة ولي أو في زيارة مكان روحي مقدس. |
قلت لي تقلع نعلاتك عديل والله آخر زمن 00 ابوحراز عاوز يتقلب شيخ يمكن ماتصدقني كان معانا شيخ في زيارة وقمت بتوصيله لمدني والله الموبايل بتاعه ماوقف نهائي معاك سوسن معاك اريج معاك تماضر معاك نازك يمكن لحد ماحصلنا مدني أكثر من 38 واحدة اتصلن عليه قلت ليهو ياشيخنا ديل منو قام قال { ديل حيرانا في الله } قال حيران قال !!! طبعاً عمك لابس أخضر زي الأهلي السعودي والله لاوقفنا في مرور ولاعبور عشان تشوف ليك قلة أدب قوانين أها استفدت منه لمن جاء مسافر أخذت منه الشال الأخضر والشال الأخضر دا في السودان لمن تشيله زي الشايل ليك بطاقة فريق أول !!!
قلت لي الخانة فاضية ياليتها لو كانت خانة أرض في المنشية أو العمارات ست النفر زعلانة على عدم البناء وتوصفني دائماً بانني مغترب فاشل كمان قال شنو 00 انت بتضيّع قروشك في الفارغة والمليانة أظنها مفتكرة القروش هنا { خم } الصحفيين قسموا لينا اراضي لمن مشيت أشوفها سافرت ساعتين من الخرطوم أها بيني وبينك دي مش أحسن منها الواحد يتكامل أهل العوض ؟؟
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: HAMZA SULIMAN)
|
حمزة سليمان البورد طاعم بامثالكم خاصة عندما يأخذ من أنفاسكم نكهة الفلوت والساكس أذكر ذلك البوست الذي صنفتنا فيه عندما كان سودانيز أون لاين في قمة مجده أين تلك الدكتورة النطاسة صاحبة القلم الرشيق والتي أطلقت عليها الفلوت صاحبك كان الساكس والآن اصبح جردل وجركانة بلاستيك وصحن مطرقع حليل ايام زمان وحليل ايام الكرسي الساخن هسي كلهن عرسوهن ما شاء الله قبل فترة دخلت واحدة معاي عن طريق الماسنجر وببراءتنا المعهودة بدأت أسألها عن أحوالها والحمد لله أنني لم اشوت ضفاري فأتاني الرد أنا زوجها ياحيوان اياك أن تتداخل معي مرة أخرى ومن يومها عملنا حظر لأشياء كثيرة جداً قال ساكس قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: اساسي)
|
والله يا اساسي انت في الجضوم تغلبني 10 / صفر وعارفك ما حاتجيب الصورة لكن خايف تكون اتلحست بعد العرس مالك يا أخوي بقيت زي بروة الصابون ومن يوم دخلت القفص ماقامت ليك قايمة والله أنا عافي من هشام يازول هو وابوحراز بناضلوا في المنتدى بدون خوف عمك قرشو من اتزوج التانية عليك أمان الله أصبح في خبر كان والعامل لينا فيها جعلي يكورك اليوم كله جعلي جعلي مما عرس قرينا عليهو الفاتحة قال قرجة قال 00 وين صاحبنا دا قلنا ليكم ماتعرسوا 00 ماسمعتوا كلامنا العرس ياخلاك نجيض ياخلاك نيء!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Raja)
|
رجوية
Quote: صديقنا الزمان وهسع ولغاية ما نموت عثمان..
شوف الما إشتاق ليك منو..؟
بجد مفاجأة حلوة طلتك الليلة.. |
شكراً ليك كتير لكن المفاجأة الأحلى حروفك التي تسكن في الأعماق وكمان بتحرض الانسان على الابداع كنت عاوز أقول كلام جميل كتير لكن قالوا المنبر أصبحت عنده لجنة رقابة عشان كدا الواحد بعد دا الا يدخل وهو متوضيء
أخبارك شنو واخبار القاهرة معاك
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Elmosley)
|
أستاذنا الموصلي
والله حلو دي أمها نفسها ماحصل قالتها لي قال حلو قال
شكراً على رفع المعنويات وكيف أخبارك الفنية أتابع معاك عن طريق الجرائد أمنياتي لك التوفيق
تعرف قلنا ندخل عالم الفن من اوسع ابوابه وقلنا ساعة حظنا سيء في الصوت أحسن نشوف لينا مدخل تاني والصوت كما تعرف لايصلح الا في مزادات بيع الأثاث المستعمل أها صاحبك مبسوط اشتري أورغان يامهاوجهاز ديناكورد ومشينا السودان قلنا خلاص يادوب الواحد كدا حايغني أها أهل العوض طبعاً شاطرين في التنظير وكل واحد يقول ليك أها إنت كده بديت تعرف الاستثمار
أها قوم يا الفنان أمشي حفلة بصحبة الأجهزة الجديدة وقلنا الحمد لله الحفلة ب 300 الف بكرة القى ليك الفنان وجهه متورم وعازف الأورغ مكسورة يده وفني الساوند عليك أمان الله وشو كلو مخربش دا كلوا عشان محول الكهرباء ضرب والحفلة جاطت ودقوا جماعتنا بالعكاكيز
قال استثمار قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: زول ساكت)
|
زول ساكت تعرف نحن اصبحت علينا رحلة الشتاء والصيف نشتي في ودربيعة ونصيف في الحصاحيصا العجور رخيص جداً والبامية والطماطم لكن اللحمة حاجة صعبة جداً مرات تمشي تشتريها تقرب تعضي الجزار مرة طالع كبري ودربيعة لقيت واحد واقف قلنا خلاص ان شاء الله نشيل منه حق البنزين على التسودها علينا قمت اتعرفت عليه طلع قريبك وضاعت الأجرة في خبر كان قلت ليهو والله أنا غلطان الوداني أهبش ناس الحجاجاب شنو
قال حق البنزين قال
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ابوحراز)
|
شكر خاص للأخ الأمين دياب من الرياض لاتصاله وتعليقه على البوست والشكر للأخ من بلجيكا والإخوان الذين اتصلوا من الحصاحيصا ورغم أنهم جميعاً رجال لكن رغم كل ذلك لهم التقدير والاحترام
بالمناسبة كثيرون منهم يودون الانضمام لسودانيز وبعضهم قاريء للمنتدى منذ اربع سنوات والبعض منهم يود مني التوسط للأخ بكري للإنضمام الينا وكثيرون منهم لايعرفون أنه ربما يصدر قرار في اي لحظة باقالة قدامى المحاربين في البورد{ ويقال في رواية أخرى { المخرفين } بالبورد والعبد لله منهم لأنني أرى أن هناك دماء جديدة وشابة ربما تعصف بنا في اي لحظة ولقد عانيت من هذا الأمر بالسودان فالكل يعتبرك أن مدة صلاحيتك قد انتهت ولو قلت لواحدة في أثناء الونسات الجميلة أنك متزوج فسرعان ماتهرب منك قلت لإحداهن ماقلتن { راجل المرة دا حلو حلاة } قالت لي دا كلام حفلات ساكت !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ايهاب)
|
ايهاب مدني تغسل وجهها كل يوم من ضوء القمر وأحياناً تتنفس بعمق اسألني عن سمك جاد الله فكل ما أمر بهذه المدينة أذهب لهذا المطعم العريق هنا كل الناس يأكلون الفقراء والأغنياء والشحاذين وعساكر الحركة وحتى النساء الجميلات يأكلن السمك { سبحان الله } أتيتها مرة خلسة برفقة ست النفر فاحياناً نشرد من الأبناء لناخذ قسطاً من الراحة الروحية في أحد فنادقها وبالطبع لانسلم من الفضول فقد يسألوننا ألف مرة الى أين أنتم ذاهبون نتحجج بحجج كثيرة تتألم ست النفر بالفندق وتتحسر على تلك الأيام الخوالي عندما ترى كل عريس وهو يتأبط عروسه وكأنه يخاف عليها أن يتخطفها الطير لكن رغمم أننا عرسان بالزمن الضائع ولكن عندما نخرج تعود أعمارنا من جديد ويعود شبابنا وتعود اريحيتنا أدعوكم جميعاً بان تأخذوهن الى رحلة عسل جديدة بثوا في دواخلهن الحب والشوق والوجد لامسوا شعرهن واسكبوا في دواخلهن كل عصارة الحب !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: بنفسج)
|
بنفسج اسم جميل جداً وحروفه مترعة بالعطر شكراً على المرور سأحكي لكم الكثير لكن قبل كل شيء أن أعضاء من سودانيز أون لاين زارونا كانت جلسة رائعة ذهبنا الى رفاعة وعلى تلكم الجنائن الرائعة كانت الجلسة الحلوة سجيمان وناذر الخليفة وعبير خيري وحيمورة وانعام والمهندس وماسة وآخرون كانت بحق جلسة رائعة جداً ومما زادها روعة أهل رفاعة فقد كان استقالهم حاراً وشهماً الا انه بعد كل ذلك خرجنا من المولد بدون حمص خاصة عندما عرفن الحالة الاجتماعية لأبوحراز
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: بنفسج)
|
بنفسج
Quote: ست النفر دي اظنها طالباك (طن) (مغائس) |
أمها مرة قالت لي : والله لو عارفاك انت الحاتتزوجها كان مارضعتها ورميت شطري دا للكلاب
تقول أنا قاعد أعضي بنتها
صدقني يحبوني كثيراً رغم مشاغباتي فهم أهلي وبيننا قواسم مشتركة كثيراً أما ست النفر فهي تعرف أن حديثي لايتعدي لساني والناس المثلنا أحسن كتير من الغتيتين
يعني نحن واضحين لكن جماعة { من البيت للجامع ومن الجامع للبيت ديل الواحد مايرقد ليهم في أمان !!! قبل فترة كان عندنا عسكري مسكين جداً في الحصاحيصا دا بيخاف من زوجته موووووووووووووت الراجل المسكين مات أها بعد يومين جات زوجته التانية تاريهو ابن الذين دا متزوج ليهو 10 سنوات والله مرتو الزي نشرة الساعة { 6 } انفشخت في واطاة الله دي وكان الجنازة مادفنوها كان خنقت ليك المرحوم
قال مغائس قال
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: maia)
|
maia
شكراً كثير على الترحيب
أهديك هذه المقاطع الجميلة
Quote: بين عينيك والغمام شبه قديم فلون عينيك 00 مثل لون الغمام ولون الغمام 00 مثل لون عينيك حينما يغشاهما المطر !!! |
هذه الخواطر الشعرية الجميلة قراتها باجازتي في السودان كانت على لسان إمراة وهي تهدي هذه الكلمات الرائعات لمن تحب
طبعاً أول مرة اعرف أن النسوان ديل بكايات جداً مرات تحننوا ومرات تجننوا
يعني هسي الزولة الكتبت الكلام الجميل دا مفروض نهائي ماتحرد وماتتكرفس وماتزعل من زوجها مهما حصل !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ابوحراز)
|
الاخ ابوحراز
والله فعلا كلمات جميلة جدا ، يعني مفروض الزولة دي الكلمات دي تعمل ليها سقف رومانسية لعشرين سنة لقدام
عارف النسوان ديل بكايات بكا شديد ( طبعا ما كلهم ) (حسه يجيني عكاز طاير)
لكن عادي ممكن تلقا ليك واحدة من النوع البيقول شعر في زوجه وبتغني ليهو قدام الناس ، تقول منبع رومانسية واول ما تشوفه تلقاها تقول ( ها السقيل ده جا) ..!!!
وتاني مراحب بالعودة
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: maia)
|
تحية مايا
Quote: عارف النسوان ديل بكايات بكا شديد ( طبعا ما كلهم ) (حسه يجيني عكاز طاير) |
وشوفي البكاية دي كمان بتقول شنو
Quote: ان حبي اليك ليس منه شفاء لكنني مقهورة الحظ كملائيين النساء ومشدودة الأعصاب ان تنفخ الآن في أذني لتطايرت دخاناً في الهواء فانا بدونك ضائعة ضائعة ضائعة كالسمك الضائع في عرض البحار وأنا بدونك إمرأة بلاجسد بلا رحيق بلا ضياء !!! |
هذه الأبيات الشعرية الجميلة تقولها لي ست النفر ولكن عندما أفارقها أما عندما نكون سوياً فالحديث يدور حول المكياج والكوفير والبصل والزيت !!! قال قوارير قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: انعام عبد الحفيظ)
|
انعام ما أجمل هذه اللوحة التي تمثل شعارك كل يوم أرى هؤلاء الأطفال وهم يذهبون ببراءتهم المعودة ليسلتقوا على النهر يأخذون الماء وذرات الرمال الذهبية سواحل المراة وسواحل هذا النهر الذي يتلف حول الحصاحيصا جميعها بلا حدود يالها من لوحة رائعة كنت فقط قبل اسبوع هناك الناس والليمون والنعناع والشاي والقهوة ورائحة المانجو الرخيص جداً والبنطون الذي يزرف دموعه الأخيرة ليفارق هذا المكان ونساء حد الروعة يغسلن اقدامهن بالنهر حملت هذه الانطباعات وأنا ذاهب للبيت وكنت على دعوة لحضور ملتقى أدبي بكلية التربية بالحصاحيصا كنت اخال أن جمال هذه المدينة يكمن في غروبها ولكنني عندما وصلت للكلية وكانت الأنوار طافئة وجدت جمالاً من نوع غريب حيث بدا القمر يتسلل خلسة ليسرق أنفاس المدينة ولم يكتف بذلك بل بدأ يداعبها ويلامس أهدابها ورأيتها تتثاءب وتغفو ومن ثم تنام على صدره !!!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: المسافر)
|
أيها المسافر في الأعماق صدقني لاتحلو الإجازة الا في اللحظات الأخيرة وصاحبك { حرن } وحرد السفر وقررت في هذه المرة أن لا أعود للسعودية لكن ست النفر كانت تصر في كل يوم بالعودة تتحجج بعدم وجود منزل لنا واستخدمت كل وسائل الضغط وأخيراً قرر العبد لله الرجوع وفي اللحظات الأخيرة قعدت تبكي طيب ياجماعة ماقلتوا عاوزين البيت ؟؟ واذا كان البيت 14 سنة لم يقم فهل هذه السنة ستبني لنا منزلاً ؟؟ كل اصدقائي بالسودان وجدت كروشهم مترهلة ويركبون عربات فخمة وكل ذلك لأنهم يعملون مع ناس الله أكبر قلت لهم لقد تركت ايام الجاهلية وجئتكم الآن لأكون معكم قالوا لي يازول هووووووووووووووووي امشي شوف ليك حركة شعبية وكان ماعجبتك شوف ناس مناوي أخيراً قلنا لاهذا ولاذاك أخير نكون ناس جنة ومشينا لناس ابن حنيفة وابن تيمية وعملنا جلابية قصيرة والحمد لله كل يوم متعشين ضبائح بعد نهاية المحاضرة
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: nourelhadi awad)
|
أبو حراز يمكن ولفك علي البنطون خلاك تظلم الكبري الجاي لكن ليه ما يكون الكبري دا زي الحزامى البربطو البنات فى نصهم وبي كدا تكون البت كاملة المواصفات الخصير خاتم وال وال وبالذات الكبري دا ح يسهل التواصل بين فن الحصاحيصا وجمال ناس رفاعة بين شعراء البطانة وفاتنات الحصاحيصا
فضل كرار
كسرة إنشاء الله بعد ما الكبري يتم عازمك فيهو جكة
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: nourelhadi awad)
|
nourelhadi awad نعم تشتاق الماء الماء !!! مثلما تشتاق الشفاه الظامئة للشفاه الظامئة ومثلما تشتاق الأرض لأنفاس الخريف ومثلما يشتاق الشعر الغجري المجنون ليلامس الخصر في غفلة من صاحبته ومثلما نظل نشتاق للوطن لنلامس أهدابه ومثلما نشتاق لنختلس النظر لمن نحب ولو من ثقب الباب ومثلما نظل مائة عام أو يزيد مشدودون الى رحم أمهاتنا ومشدودون الى اثدائهن في معجزة طبية خارقة
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ملكة سبأ)
|
ملكة سبأ توقعت في اجازتي هذه أن أأتي من سبأ بنبأ عظيم لكنني لم ألتقيك سألت عنك كثيراً ونحن نلتقي في جلسة سودانيز الرائعة برفاعة قالوا لي ذهبت { لتحش التمر } لهذا أدركت جيداً لماذا كان الحصاد وفيراً بالشمالية بلغي تحياتي اليهم جميعاً واعتذاري ايضا لكل من حرمتنا الظروف اللقاء بهم ولكن من أخبار الغتاته التي لابد منها أنني حضرتا خلسة للدروشاب وكثت فيها يومان ومن ثم رجعت !!!كيتاً عليك !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: زول ساكت)
|
زول ساكت
Quote: الناس ديل ترب صالحين |
بركة شنو ياخي صاحبك كان طاشم وسكران طينة عليك أمان الله قعدنا { نتكل } فيهو يمين وشمال عشان ينزل لكن { كتلنا } بالضحك كمان قال شنو من الصباح ماقاعد ياكل الكسرة لأنها بتسوي ليهو حوامض أها يا ابن الذين بتعمل شنو قال بيشرب جردل { مريسة } الغريب ماشي يشيل ليهو فاتحة في زول متوفي عجيبة بلادي ياعباس أهلها يتواصلون حتى وهم في قمة النشوة قال ترب صالحين قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: ولياب)
|
ولياب شكراً على رفع المعنويات الناس يقولون دائماً { مياه على مد البصر } ولكن 00 في الخريف كانت الخضرة على مد البصر في بلادي كانت تعانق الأرض وأحياناً تتسلق هذه الخضرة الجبال في منظر أكثر من رائع يا أخي هذا الوطن المسمى السودان جميل جداً عشرات الأنهار تنساب في عطاء رائع كل يوم وارض حبلى بكر تعطي بلا تزمر وأشجار وبذور تنمو في كل مكان وطن به أكثر من 20 نهراً تكفيه مدى الحياة ولكن يحاول بعضهم أن يضيف اليه نهراً آخر من الدماء !!! يعقبه نهر من الفساد الاداري وأنهار أخرى أكثر قساوة تلوي عنق القانون وتغير مجرى الحقيقة!! صدقني 00 هذا الوطن الجميل مليء بالموارد ومليء بالخير والعطاء والابداع استغرب كثيراً عندما يفارقه أهله في غربة مؤلمة والله 00 لو تم توزيع ثروات هذا البلد على أهله لبقي الكثير منها لتوزيعه على الدول المجاورة لكن 00 للأسف هناك كروش متخمة ومترهلة هي التي تبتلع كل خيرات هذا البلد
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: زول ساكت)
|
زول ساكت وهكذا انتشينا!!! أفكر كثيراً يا اخي في الاستثمار في المديح ففي السودان حينما تحمل { طارا } فإن قفة الملاح واشياء أخرى ستدخل بيتك جاري مادح منذ ثلاث سنوات الان بنى له بيتاً فخماً جداً وقد استغربت في اجازتي هذه كيف بنى هذا المنزل وهو لامصدر دخل له سوى المديح فسألته كيف بنيت هذا البيت ؟؟ فقال لي : بناه القووووووووووووووووووووووووووووووم !!!! فقلت له : عندي بودربيعة 6 قطع اراضي اجعل هؤلاء القوم يبنون لي بيتي وخذ منها قطعتان هدية لك !!! ضحك كثيراً وقام بتوزيع هذه النكته الآن كلما أأتي لمناسبة عزاء أو فرح بودربيعة يسألني الناس القوم كيف يا ابوحراز ان شاء الله بنوا ليك بيتك ؟؟ قال قوم قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Muna Khugali)
|
Muna Khugali
شكراً على الترحيب مشتاقين ليكم كتير جداً
طبعاً ربما في القريب العاجل أقوم بتغيير هذه الصورة لأنني كلما أنظر اليها تصيبني بكثير من الاحباط
عارفة ليييييييييييه ؟؟ لأنو القميص المتصور بيهو دا عزيز جداً وعرفني بسودانيز أون لاين يعني هو عادي مش زي اقمصة دي كابريو وتوم كروز ورونالدينو لكن بيذكرني بلحظات جميلة جداً القميص دا على التنحسها عليهو بدلوه بي { كبايتين وكفتيرة } !!! يوم اتذكرته وقلت والله الليلة كان البسه يعني كده نوع من التغيير
أها لمن سألنا عن القميص قالوا لي : والشاي البتكرطع فيهو كل يوم دا جابوا ليك من وين ؟؟ قلت ليهم ياناس أنا اشتريت السكر والشاي والهبهان والنعناع أها 00 يا اب خشماً عريض والكفتيرة الكلمناك عنها مية مرة ماجبتها مالك
قال قميص سودانيز قال !!!
| |
|
|
|
|
|
|
Re: مثلما تشتاق الشفاه الظامئة للماء 00 اشتقت اليكم (Re: Ahmed Daoud)
|
أخي أحمد ولك من الأشواق بقدر محيطات العالم
بعيداً عن السياسة : تسأل المراة زوجها بعد كم سنة زواج هل تشتاقني ؟؟ هل تحبني ؟؟ هل مازلت جميلة في نظرك ؟؟؟ وهل وهل وهل وهل وهل ؟؟؟ ماعارف ليه الواحد بتقعد تجقلب بعد عشرة سنوات زواج ؟؟ ماقلتو مافيكي يادنيا الا نحن ؟؟ قال نحن قال !!! بعدين لاحظت في إجازتي هذه ان معظم الرجال أصبحوا ماسووووووووووورة وماسورة هذه لمن لايعرفها هو الزول الكذاب وحتى هذه المواسير منها أنواع يعني لو قالوا ليك دا ماسورة مصنع معناها كذاب كتير جداً يليه ماسورة البترول وانت نازل لحد ماسورة الموية يعني راجل تكون قاعد معاه في سوق ليبيا يقوم يتصل عليهو تاجر عاوز منه فلوس فجأة صاحبك يقول ليهو والله أنا في كبري شمبات !! بقدرة قادر يتحول سوق ليبيا الى كبري شمبات أما فشخرة النسوان في الموبايل فهذه تحتاج لبوست خاص كل أغراضها الواحدة في شنطة اليد الا الموبايل أول ماتجي مناسبة بكاء أو زواج تلقاه في اليد وتضرع بيهو يمين وشمال أسأل الله دائماً أن لايعطي السودانيين المزيد من القروش لأن الدنيا لو اتبهلت عليهم فعليه العوض ومنه العوض
| |
|
|
|
|
|
|
|