|
هل تفعلها حنتوب الجميلة مرة أخرى ؟
|
حنتوب الجميلة ... مدرسة متأصلة فى اعماق المجتمع والسياسة وان طالتها يد غريبة ... نميرى ... نقد ... الترابى ... وآخرون ... كانوا وما زالوا دعامات فى السياسة السودانية ... عاصروا جميعا مديرها الانجليزى ... مستر براون .. عاشق السودان وأسير حنتوب ، التى ربى فيها ابناءه .. وربطهم بحب السودان .... استقال بلير ... ليكون اقوى المرشيح بعده .. وزير المالية ... غوردن براون ... الذى يزعم انه ابن المستر براون مدير حنتوب وواضع نظامها ، وصاحب البصمات فى الشخصية السياسية السودانية . فهل تقدم حنتوب زهرة صمتها ببريطانيا بعد ان جفاها اهل السودان ؟ ان تأكد ان براون الابن سليل حنتوب . مجرد سؤال ؟ فيها قضيت الطفولة ... وفيها نيلا ..
|
|
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
العزيز هيثم بابكر..
اول شئ إنت ولد حنتوب؟ وأهلك منو؟
حنتوب الجميلة هي الجنة العشنا فيها أجمل عمر.. طفولتنا وصبانا..
مستر براون كان هناك ولغاية هسع سيرته موجودة.. ولو صحيح إبنه غوردون المرشح لخلافة بلير. حتكون علامة جديدة لحنتوب. وأكيد هو برضو عاش أجمل أيامه هناك..
في زول يقدر ينسى حنتوب..؟
ما أظن..
شكرا ليك للذكرى العطرة
رجا العباسي
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
الاخت رجاء لك التحية والاحترام انا ود المك نمر .... ود عدلان ود ينار ود دقنة ودعنجة ودالزبير ودنجومى ود ضيف الله ود جماع ود الصول محمد محمود ود الصفرة ود الميدان الاول ود المسرح ود الجنينة ودالرفاس ود " عائد عائد .. احمد خالد " ود براون ود الساعة فى المدخل ود حنتوب . ود بابكر " بونيه " . وتحياتى
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
Quote: انا ود المك نمر .... ود عدلان ود ينار ود دقنة ودعنجة ودالزبير ودنجومى ود ضيف الله ود جماع ود الصول محمد محمود ود الصفرة ود الميدان الاول ود المسرح ود الجنينة ودالرفاس ود " عائد عائد .. احمد خالد " ود براون ود الساعة فى المدخل ود حنتوب . ود بابكر " بونيه " . |
يااااااااااه
وزيد: نادي الطلبة، نادي المدرسين، كنتين عوض، الصول ود الزبير، عمي عبده ريًس الرفاس، عمي عثمان ريًس البنطون، أعمامنا اللمين وهباني، جورج المساعد الطبي، وعمي العوض بياع اللبن.
من سنوات مشيت حنتوب.. ومشيت لبيتنا.. للأسف لقيته أطلال.. ما بكيت على البيت، بكيت لما ما لقيت اي ملمح لحنتوب القديمة..
البركة في الناس الربتهم حنتوب.. ما شاء الله يغطوا عين الشمس.. وهنا في المنبر معانا مجموعة كبيرة منهم..
وبجد فرحت شديد الليلة بملاقاتي لزول من حنتوب الجميلة..
ليك مليون تحية..
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
ياااه ما تخيلت انو اعادة الشريط دى ممكن تهزنى زى ما عملت جورج ؟ صديقى اللدود ... كنت اجيد عليه كل حيل الاورنيك الطبى حتى اتمكن من الخروج فى خميس الغربيات .... وأكثر من ذلك فقد كان كريما معى لاننى اجيد فهم اسلوبه ...ما ان تبادره يا دكتور جورج ... الا وبادرك بنظرات تعرف تماما انك نلت المقصود .. اذكر مرة ، احد الزملاء .. كان يعانى من ملاريا فذهب الى جورج وقال له بدون اى مقدمات ...يادكتور انا عندى ملاريا ... فما كان من جروج الا ان تجهم واستدار بنظارته الكبيرة ... - أسمعى ...انا اقول ليك اندى ادان ... تفهمى هاجة ؟.... فرد الطالب : لا - تيب ... اقول ليك اندى اضان وخشم .. تفهمى هاجة ؟ فرد الطالب : لا - تيب اقول ليك ... اندى ادان وخشم واينين اتنين ... تفهمى هاجة ؟ فرد الطالب : شوية كده - تيب ... أقول ليك اندى وش فيهو ادانين اتنين وخش واينين اتنين ونخرة ... تفهمى هاجة ؟ فرد الطالب : آى - فرد جورج : وتيب ؟ انت تجى هنا تقول لى هاسى بى شنو وانا اقول ليك أندك ملاريا ولا لا ؟ رحم الله الزمن .. وحنتوب الاخت رجاء ... تفهمى هاجة ؟ . . وتيب . ولك الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
عـزيـزي هيثم ..
تحياتي ..
يعنـي وطـواط !!!!؟؟؟
أوع تكـون من المعلمـات ولا الدايـات !!!
لأنو حنيتك دي حنية الوطاويط !!!
لن ننسى حنتوب الجميلة ..
ولن ننسى شعارنا في ود ضيف الله :
ذات الحدقـات النضـرة ..
سـحرتـي عيـونـا من نظـرة ..
أيي ييي يييياااا ...
أوووووووووووووووو...
ونحن نتغنى به في ميادين الكرة..
وفي ليلي مسرح حنتوب ..
لعنة الله على سياسات التعليم العالي !!!
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: حسين يوسف احمد)
|
الاخ حسين المعلمة ... لى بلدنا وبيتا المعلمة ... الله يزيدا .... بس ما تبقى زول عنجة الدابى ولا الزبير ... كلاب الصفرة . ولا جماع المنفى ... ولا ..... ......... يا دينار ولا دقنة ... البص يجيرك الله يا ود ضيف الله نحن اولاد مدرسين ساااااااى . لكن برضو قرينا حنتوب
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Elsuhaili Magzoub)
|
الاخ السهليى ياتو لبخة الميدان الاول الميدان الثانى حوش نجومى المنقة النرجس .... شفت النرجس فى حنتوب ... وين لاقاك تانى ؟ دعنا اخى نعيش فى رحاب من ظلهم اللبخ ، فلنا فيهم ود مشترك ، ورمال فى اعقاب الملابس ، بيضاء كرملة النيل فى قبالة حنتوب .. يبسط الرمل يده للغاشى والماشى ، ويمهد الطريق الى الرفاس . ورغم الزمن فلم يزل زنكى الداخليات بؤثرنى ويشدنى نحو الاعماق ... والزنكى طار ... دعه يحط جناحيه على المنبر ويظللنا بهوى حنتوب فى موسم المنقة ... ورائحة حنتوب فى نرجسها المتفتح مع اكتمال البدر. ونملى العنبر ... وزير المزيرة ... وجرس الصفرة ... ويوم ال Duty . ورؤساء الغذاءات ... لكن باقى لى انك كنت رئيس غذاءات ومكنتكها مع عمك " عزالدين " . ولك الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: شهاب الفاتح عثمان)
|
الاخ شهاب شكرا لك ولحنتوب ... تخيل صورتك دى فى الصفرة ووراك عمك عزالدين فى يوم انت فيهو رئيس غذاءات .... صندوق العيش والساردين والطحنية والفواكه لكن قطعا قوز الشاى ما صبارة كبيره ... ولك من كل الداخليات والفصول تحية ... داوم ، واياك وابولو ... ولك الود
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
بجد البوست ده قدر ما فرًحني إلا إنه دخلني في منطقة حزن وشجن غريب..
لأنه في كل كلمة كتبتوها هنا بتذكر بهاء الدين أخوي وأستاذي العلمني أي شئ في الدنيا دي.. من سواقة العجلة لغاية العربية..
بهاء كان في المك نمر.. لكنه عنده إذن يبيت في البيت عشان أبوي كان رحل. وما عندنا راجل في البيت.. وطبعا كان زعلان إنه ما ساكن في الداخلية بالرغم من ان هدومه كلها هناك..
كوزموز جورج وعادل سيد أحمد والنذير يوسف والسهيلي مجذوب وعبدالرحمن رحمة الله كانوا من أقرب الأصدقاء لبهاء ولينا.. وكان في الإجازات لما تقفل المدرسة عندهم جلسة مسائية يومية في قوز الرملة الجنب بيتنا..
والنرجس أنا بريده لأنه كان بيتفتح لما يجونا ضيوف.. كانه عايز يستقبلهم كمان.. والياسمين والفل المرتبطين لي بالصباح وإحنا طالعين الساعة 6 ونص عشان نلحق الرفاس بتاع 7 إلا ربع.. والهدهد..
يااااااا
زمن..
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Elsuhaili Magzoub)
|
الاخت رجاء رد الله غربتكم ... البحث عن دفاتر الالم فى حنتوب لا ينتهى ... ثلة من الأخيار الاطهار عبرت من الرفاس والى عالم آخر نسال الله لهم التوفيق والقبول ... المك نمر تذكرنى بصور الرؤساء ... فعهدنا كان يظله استديو الساعة بمدنى ... تؤثرك صور رؤساء المك نمر .... وآل يس فيهم ... عمر يس... عاصم يس ... عباس يس ... على يس ... اسامة يس ... وحتى القادم انس يس ... نقيب بالجيش استشهد باحداث سقوط مينزا بمنطقة النيل الازرق فى الهجوم عام 1997 م . ذكريات مؤلمة لشباب عجيب من ابناء السودان تفتقت زهرة حياتهم بحنتوب ... لكن يظل الطعم الحلو فى سيجة الصفرجية بشجرة المك نمر .. وكفتيرة العم عمارة ... والمغسلة ... ولك الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
الأخ هيثم
تحياتى نديّات
غوردون براون هو فعلا إبن مستر براون أول مدير لمدرسة حنتوب وقد عاش طفولته بالمدرسة وعلى ما أذكر أنه عند تعيينه وزيرا للخزانة فى حكومة تونى بلير الأولى فإن رابطة خريجى حنتوب التى يرأسها د. إبراهيم منعم منصور قد بعثت خطاب تهنئة بالتكليف لغردون براون.....
والتحية من قبل ومن بعد لكل (حنتوبى) وأخص من أولئك زملائى فى (جماع المنفى) .....
لكم الود
عبد الرحمن قوى
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Elsuhaili Magzoub)
|
الأخ العزيز هيثم وضيوفه الأعزاء
التحية لكل خريجي حنتوب النجباء وعطر الله ذكراها الجميلة أيام حنتوب لا يمكن أن تنسى أبداً، فيها التقينا ابناء الشعب السوداني مجتمعين في تلك البقعة الطاهرة، من الشمال والوسط والغرب والجنوب والشرق.. وفيها تفتحت مداركنا على المعرفة وكانت هي اللبنة الأولى لتكوين ذواتنا وشخصياتنا الفكرية والسياسية والاجتماعية، وحنتوب هي التي كوّنتنا وغرست فينا العلم والمعرفة.. ووفاء وعرفانا لحنتوب عليّ، جعلت أول موضوع كتبته في هذا المنتدى عن حنتوب.. أنا كنت أقيم بداخلية ود النجومي ملكة جمال الداخليات، ومن دفعتي شلة من أولادكم ناس فداسي منهم خالك أسامة يس الرجل المهذب الوقور والتقيته هنا في دبي قبل أن يشد الرحال ويذهب إلى سلطنة عمان، أتمنى أن يكون بخير وبلغه سلامي وتحياتي، ومنهم أيضاً مبارك أحمد إبراهيم والحاج علي الأمين (صجة) وعثمان عبد الرحمن (رئيسنا في الداخلية) ويوسف الأمين (أبو الحاج) ونبيل وماهر وسامي ونصر الدين حلاوي ومجموعة طيبة من الأصدقاء والأخوان. أخونا العزيز السهيلي مجذوب كان معنا في الداخلية وهو في الدفعة التي تسبقنا وكذلك عبد الرحمن قوي لهما مني التحية والتجلة. وأذكر من أساتذتنا الأعزاء استاذ هاشم واستاذ الشاعر واستاذ أحمد بابكر وأستاذ مصطفى واستاذ عثمان إنجليزي واستاذ أحمد بانقا وأستاذ حسن بتاع التاريخ، وأتى من بعدهم أستاذ الصبابي وأستاذ بابكر بتاع الفيزياء وقد زاملته استاذاً في مدرسة عبد الستار الثانوية. لا أنسى أبداً جرس الصباح وجرس الفطور والسفرة وأصوات الطلاب داخلها وهي تهدر وخروجنا إلى الرمال وقت العصرية وحوامتنا بين الميادين الخضراء ورحلة الخروج كل خميس متذرعين بأعذار واهية.. لكن أجمل فترة في حنتوب عشتها وأنا في السنة الأخيرة، ولا أنسى مباريات نجومي الدورية وقد كنت ثيردباك الفريق وكان فريقنا من أقوى الفرق في حنتوب. وأنتهز هذه الفرصة لأرسل تحياتي وسلامي لأصدقائي وزملائي بحنتوب وبداخلية نجومي ومنهم عثمان ومبارك ويوسف والحاج وأبشر وبشير بابكر تية وأسامة اللولاح وسيف علي مساعد وجلال أبو عاقلة وعمر يوسف (كلحي) ومعاذ الصادق (أبو نواس) ودفع الله يوسف وعبد القادر العوض وعبد الرؤوف عبد الله ووليد وخطاب محمد نصر وخالد محمد عوض الكريم وخالد مالك ومحمد دفع الله حق الله ومحي الدين الشريف وأمير علي بلة وعز الدين علي حمد الإحيمر وأمين سنادة وغيرهم من أبناء حنتوب الشرفاء. وعبرك أحييهم وأتمنى أن نتواصل معهم، ولمن يرغب في مراسلتي فستجدون رقم لتلفون والإيميل أدناه:
نصر الدين البشير (روبش) موبايل: 00971503445171 [email protected]
والشكر موصول لك أخي هيثم على اتاحة هذة الفرصة الطيبة
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
الرائع هيثم سلامات فتشت ليك بهناك وما لقيتك زرتها مرة واحدة فقط وكان أولاد دفعتنا فيها كثيرين: أذكر منهم بروفسور محي الدين مجدوب ، د. عبد الرحمن التقر، ود. عمر ياسين ومولانا بابكر البدري، والمهندس التاج يوسف، سيف الدين أحمودي، ومبارك محمد علي خليل. بعد تلك الزيارة "إتعقدت" "وحردت " الدراسة، إذ كنت أدرس في مدرسة ثانوية كانت تهتم بالرياضة أكثر من إهتمامها بالتعليم وكانت زي نادي الهلال والمريخ، أيام كانت منافسات الدورة المدرسية زي منافسات "كاس العالم". "وقعدت" أقارن بين مدرستي وبين "جامعة" حنتوب، نعم جامعة حنتوب بمبانيها وحدائقها وميادينها وداخلياتها وبمستوى طلابها وأساتذتها. إنها مادة "الرياضيات" أخي هيثم التي أبعدتني عن المنافسة لدخول مدرسة حنتوب حلمي الذي لم يتحقق، وماأظنك تصدق لو قلت ليك "جبت" فيها 7 من 40 فقط، وهي نفسها "الرياضيات" اللي "حرمتني" من دخول جامعة الخرطوم أمنيتي الغالية التي لم تتحقق هي الأخرى، وأحرزت فيها3 من 100، ومازلت متحسراً على عدم قبولي في مدرسة حنتوب وجامعة الخرطوم، بعد مرور السنين دي كلها، لكن كل شيء قسمة ونصيب. حنتوب وإن لم أكن أحد طلابها إلا أن لها في قلبي محبة خاصة وستظل مدرسة حنتوب العلامة الفارقة بين التعليم "وقت كان تعليم" وبين التعليم وقت أصبح محتاج لتعليم. وتحياتي لكل خريجي مدرسة حنتوب الرائعين والمميزين على امتداد المليون ميل مربع.
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
عبق حنتوب الجميلة ملى المنبر
ازيكم يا ناس حنتوب ..
السهيلي .. رجاء .. اخ هيثم
وكل من درس بمدرستها الشامخة وضربو هنبريب البحر الباااارد
في زيارتي الاخيرة لحنتوب شهر يناير 2007 ، كنت بسافر الخرطوم
كم يوم وتاني اجي جارية عشان استجم واستمتع بجوها الحلو وناسا الطيبين
بحبها موووووووت البلد دي
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: nourelhadi awad)
|
الأخ هيثم .. تحياتي وحبي .
Quote: الاخ حسين المعلمة ... لى بلدنا وبيتا المعلمة ... الله يزيدا .... بس ما تبقى زول عنجة الدابى ولا الزبير ... كلاب الصفرة . ولا جماع المنفى ... ولا ..... ......... يا دينار ولا دقنة ... البص يجيرك الله يا ود ضيف الله |
عزيزي هيثم .. لقد تجلت عبقرية حنتوب في اللقب الذي أطلقه على داخلية دينار ..
مش لقب ...... يا دينار ..
لا لقب : اسـرائيل !! فكما تعلم ويعلم كل من له علاقة بحنتوب .. فدينار تقع جغرافيا في الداخليات الشرقية ولكن اداريا كانت تتبع للداخليات الغربية
فتجلت العبقرية الحنتوبية ، وأطلقت عليها
لقب اسـرائيل !!!
أجل أنا كنت من طلاب : ضيف الله .. ويجيرك الله يا ضيف الله ...
مع الحب ..
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
ناس حنتوب سلام..
أولا أيمن ده ولد جيراننا وقرينا في مدرسة واحدة.. هو اصغر مني (بالله يا أيمن ما تقول بي كم سنة )..
ورباب قرينا العام والعالي مع بعض.. ومشينا عملنا الجنسية سوا.. لو شفتي الرقم حتلاقيه متسلسل .. وقدمنا للجامعة مع بعض وجينا مصر للجامعة..
يا حسين داخلية دينار كانت أقرب الداخليات لبيتنا.. وش كده
بيتنا كان أول بيت في أول صف. وجارنا عمي عكود (محمد عبدالرحمن). وبعده عمي أحمد الطيب مع الإحتفاظ بالألقاب..
تحياتي
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
سلامات الأخ الكريم هيثم ورجاء أختناالصغيرة وكل حنتوبى سابق أوحالى,
هذا البوست البوست يعنى الكثير لكثير من الناس هنا و هو لو لاحظتم مدخل
لعدة مواضيع كلها جيد و هادف و جميل و نبيل, ارجو ان تتابع إسهاماتكم
ونحاول الإحتفاظ به أطول فترة ممكنة فهو قطعا مصيدة جميلة لمن تفرقت بهم
سبل الحياة و لم يسمعوا عن بعضهم سنين طوال.
يا رجاء يا أختى العزيزة Age ain't nothing but a number!
خالص مودتى و محبتى لأهل هذا البوست.
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Rabab Elkarib)
|
عزيزتي رجـاء ..
تحياتي ..
Quote: يا حسين داخلية دينار كانت أقرب الداخليات لبيتنا.. وش كده |
بالله ، النية العسولة ديك معناها إنت ؟؟ البنية اللي بتخلي أصحابنا في دينـار أصلو ما يزورونا في ضيف الله ..
نـاهيـك عـن المنفـى يـا قـوي ..
أكييييد يا رجاء كنتي بتتلصصي على ليالي المسـرح والفـن ؟؟؟؟
يـااااااااااااه !!!
للمـرة المليون :
لعنـة الله على (ثورة التعليم العالي)
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Rabab Elkarib)
|
أحبابى..
تحياتى نديّات
حنتوب مدرسة ثانوية (بماكينة) جامعة من جامعات الأيام دى.. أكاديميا تعلم الطالب كيف يكون مثابرا .. فصول متخمة بالطلاب فى أى ساعة نشاط رياضى (ضاج) .. كرة قدم وطائرة وسلة وتنس وسباق ضاحية .. التشجيع بعصبية تتفوق على العصبية للهلال والمريخ .. ونشاط ثقافى رصين مسرح وغناء (وبالمناسبة أنا كنت أمثل داخلية جماع فى الغناء الحديث) بجانب نصر الدين (الفتى قصير القامة الفنان الذى درس لاحقا بكلية البيطرة على ما أظن وعرفت مؤخرا انه هاجر الى كندا ) وسبقنا فى ذلك الفنان عاطف بشير .. وفى هذا الجانب كان على كل داخلية أن تقدم ليلة متكاملة بمسرح المدرسة فيها الغناء (شعبى وحديث) وافتتاحية تكون بالطبع أغنية وطنية وتمثيلية قصيرة ومسرحية طويلة من عدة فصول ... التحية لحنتوب الناس والأشياء والأماكن .. وتحية خاصة لأساتذتها الذين تعلمنا منهم الكثير .. هاشم رياضيات والاحمدى وحسين فارس .. أستاذ عثمان واستاذ بشير سعيد واحمد بانقا (الانجليزى) وبشير وعوض الكريم ومصطفى احمودى (الفيزياْء) ..عكود ومصطفى والطيب (لغة عربية) .. احمد بابكر (جغرافيا) وعمى الراحل (استاذ قوى) ... وغيرهم...
لهم جميعا التحية ...
ولى عودة
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: حسين يوسف احمد)
|
ناس حنتوب الجميلة سلام..
طبعا يا حسين وقوي ليالي المسرح دي كنا بنشارك فيها بالفعل..
كثير من الديكورات (ترابيز، ملايات، وعدة) بتكون من بيوت الأساتذة.. وزيادة كمان الفساتين والتياب للأدوار النسائية.. وكنا بنمشي كل خميس نستمتع..
لما كنت في الإبتدائي شاركت مرتين في حفلات عيد العلم من خلال كورال مشترك بين حنتوب الثانوية وحنتوب الإبتدائية..
ولما بهاء أخوي كان بيدرس في حنتوب كان ديكور المسرح لحفلات المك نمر بيتعمل في بيتنا.. كان عندنا غرفة خارج البيت عاملينها ورشة شغل.. وكانت المساعدات ما بتقتصر على المك نمر فقط.. بل ناس دينار ودقنة وأبو لكيلك والزبير بحكم الجيرة..
بجد أيام ما بتتنسي..
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Rabab Elkarib)
|
رباب يا حبيبة..
كيييف ما متذكرة.. يا حليهم ناس بلقيس عبد الجليل..
تعرفي قابلت في السنة الفاتت تماضر أحمد خالد.. وهي دلوقتي محاضرة تسد عين الشمس في إنجلترا.. قالت لي مشت زارت بيتهم بتاع حنتوب.. قعدت تبكي وتتحسر عليه. قالت لي زمان كنا بنشوفه زي الجنة.. وفعلا كان جنة بعد ما الخالة العزيزة زوجة أستاذ كعورة زرعته ورود من البحر لغاية الصالون.. وعملت ملعب تنس ينافس ويمبلدون.. البيت بقى خرابة زيه زيه باقي البيوت.. والزهور والشجر ماتوا والجنينة بقت غابة من الخشب..
بالمناسبة كنت حريصة أشوف بوابة حنتوب المكتوبة جنب الرفاس..
حنقعد ننتظر الصور بتاعت محمد.. ويا ريت نشوف محمد برضو هنا..
ودي
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: عاطف عمر)
|
لا .. أخى حسين يوسف .. بل كنت أعنى عمى (محمد أحمد قوى) له الرحمة وقد كان معلما للتربية الإسلامية واشتهر وقتها بخفة الدم والنكتة .. فقد كانت حصته (محضورة) رغم أن الشائع حالة (الدبرسة) والنعاس التى تعترى الطلاب أثناء حصة الإسلامية...
مع عميق المودة
وسأعود
عبد الرحمن قوى
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: عاطف عمر)
|
الصديق الغالي عاطف..
سلام ومحبة..
حنتوب ما كانت فقط مدرسة، بل كانت حياة.. ورغم ذلك كانت تقدم في كل عام قربانا للنيل. أيضا كانت الثعابين والعقارب القاتلة تمثل هاجسا لكل من عاش فيها. وبتذكر إننا (عادي) وفي فترات متقاربة نقتل ثعبانا في البيت أو بيت أي من الجيران. ولا زلت أذكر (إيمان) الطفلة ذات الست أعوام إبنة استاذ ساتي جارنا والتي توفيت أثر لدغة عقرب. وأيضا (بابكر) شقيق أستاذ بلة الذي كان يراعي أسرة شقيقه أثناء فترة تصحيح الشهادة الثانوية في الخرطوم.. قتلته لدغة ثعبان.. وكان شابا مليئا بالحياة.. رحمهما الله وخالكم الراحل..
تعرض بعض أخوتي للدغات خفيفة من العقارب.. والحمد لله ستر وغطى..
تعرف لو كان درست في حنتوب في السنة ديك.. كان براااحة درًسك أبوي الله يرحمه..
تحياتي..
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
Quote: حنتوب ما كانت فقط مدرسة، بل كانت حياة |
نعم يا رجاء أول من أوضح لنا هذه الحقيقة بجلاء هو أستاذنا الجليل المرحوم الهادي آدم . وتلك قصة أخرى من قصص ( حنتوب الجميلة ) . بعد عودتنا من المعسكر وفي أول يوم دراسي لنا في مدرسة رفاعة الثانوية عرفنا أن المدير الجديد للمدرسة هو الأستاذ الهادي آدم وقد جاءنا منقولاً من مدرسة حنتوب . كل معلوماتنا عنه أنه شاعر غنت له أم كلثوم قصيدته ( أغداً ألقاك ) وأن له قصيدة أخرى مقررة في منهج اللغة العربية ( ممرضتي ) .وتطوع من يخبرنا بحزمه الشديد الذي لا يتفق مع رقة الشعراء . فوجئت في اليوم الثاني من العام الدراسي بـ ( عم الصول ) يطلبني من الحصة الأولى بأنني مطلوب للسيد المدير فوقع قلبي أرضاً قالشقاوة نعم موجودة لكنني ( لم ألحق ) أن أعمل ما يستوجب زيارتي لمكتب المدير . في طريقنا توقف عم الصول لحظة في فصل ( أولى غزالي ) ليطلب أيضاً الأخ الصديق الحاج وراق فوجدتني أسأل عم الصول ( هو في شنو عليك الله يا عم الصول ؟؟ ) فأجابني ( والله يا أولادي علمي علمكم ، السيد المدير طلبكم إنتو الإثنين ) . دخلنا مكتب الأستاذ الهادي آدم و ( ركبنا سايحة من الخوف )ومعه وجدنا بعضاً من الأساتذة الذين لم نكن قد تعرفنا عليهم بعد . بعد أن تعرف على كلينا فاجأنا بالسؤال لماذا رفضتم الإستمرار في مدرسة حنتوب وأصررتم على نقلكم لرفاعة ؟؟ شرحنا له أسبابنا الحقيقية . فلم تشفع لنا ولم يقبلها وصار يحكي لنا وللحاضرين أننا قد أضعنا فرصة يتمناها آلاف الطلاب فـ ( حنتوب ما كانت فقط مدرسة، بل كانت حياة ). واستمر يجيب على سؤالنا الذي لم نستطع نطقه أن كيف عرف هو بالحادثة ؟؟ فقال أنه كان في مكتب التعليم بمدني عندما جاء مندوب المحافظة يطلب نقل طالبين من حنتوب لرفاعة وهو أمر بدا ( شاذا ) لكل من كان بالمكتب واستمر يقول أنه طلب أن يعطى فرصة أخيرة للتحدث مع هذين الطالبين لكنهم أجابوهو ( نحن مودنهم ليك في رفاعة اشبع معاهم كلام ). وبعد أن أحس الأستاذ الكبير أن جرعة ( البستفة ) كانت أكبر من أن تتحملها ( سننا الصغيرة ) عاد ليقول :- على كل حال ورغم أسفي الشديد على تضييعكم لهذه الفرصة فأنا سعيد بوجودكم معي في هذه المدرسة وسنحاول أن ننقل تجربة حنتوب لمدرسة رفاعة .Quote: تعرف لو كان درست في حنتوب في السنة ديك.. كان براااحة درًسك أبوي الله يرحمه..
|
أها يا رجاء دا الكلام البيجيب الندم زااااااتو
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: أيمن الطيب)
|
أيمـن ..
Quote: الحاصل شنو !! شايف بحصل هروب جماعى يوم الخميس!! |
إنـت بـرلـوم ولا شـنو !!!؟؟؟
الليلـة خميش الداخليات الغربيـة ..
يعني سـبب واخـد ، بخلي كلاب الصفـرة والدايات ديل يشـردوا مافـي ..
حبي ... حسين ... ضيف الله .
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
Quote: إنـت بـرلـوم ولا شـنو !!!؟؟؟
الليلـة خميش الداخليات الغربيـة ..
يعني سـبب واخـد ، بخلي كلاب الصفـرة والدايات ديل يشـردوا مافـي .. |
حسين يوسف الصهيونى و عاشق النجمة سلامات,
أخوك جونيور عديل كدة و ما وصل مرحلة البرلوم حتى
الآن لكن حبينا نثبت الواقعة و نلفت النظر لظاهرة
هروب الطلاب ايام الخميس و التفرق فى إتجاهات مختلفة
من المنطقة !!!!! رغم وجود الكثير من البرامج لكن
فيما يبدو أن الهروب و كسر الطوق كان يشكل متعة خاصة
لكثير من الشباب فى ذلك الزمن خاصة قبل الكوبرى !
تحياتى لك و كل أهل الربوة,
أيمن
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: أيمن الطيب)
|
الاعزاء رجاء ايمن نصر الدين امل قوى وبقية العقد الفريد اسبوع " دككناه " ليس بفعل صداقتى مع " جورج " والحمد لله ..لكنى احسبه كاسبوع التحضير ليوم الخريجين فى حنتوب حينما يصبح الحضور بالفصل ضربا من الواجب لغرض الحضور لكن القلب مربوط بيوم الخريجين .. وبهرجة اليوم المشهود ... تحسست اليوم المنبر بعد اسبوع من الضغط المتواصل بمنتدى علمى خارج البلاد .. وهى هى تبعات فصل خوارزمى تلاحقنى حتى بعد عشرات السنين ... خوارزمى ... فصل العلماء كما كان يحلو للبعض تسميته ... اتذكره صفا صفا ... وتستلهمنا فيه حكايات محجوب عبيد الطالب النابغة الذى درس الرياضيات من الشباك ... قبالة داخلية جماع .. ومنظر حنتوب الحلة ويستوقنى فيه ... المعلم الفذ ... هاشم سليمان .... باريحيته وسمته ، وحفظه لجدول اللوغريثمات ... وتشدنى نحوه ... انه فصل العلماء من الاساتذه ... اذكر ان المعلم الفاضل عزالدين الصبابى ... حاول مرة ان يستلم تدريس الرياضيات البحتة فى خوارزمى ، وصادف ذلك دفعتنا وكنا حينها 26 طالب فقط ... وكنا اشد شوقا من الصبابى للرياضيات البحته لكن مع " الاستاذ هاشم سليمان " الوكيل حينها والذى اعتذر لنا نسبة لاشغاله الادارية ، فما كان منى الا ان تصدرت للصبابى بمسالة من الحصة الثانية ، وكانت لحساب عدد عمال ، فانبرى لها الصبابى ووجد الحل ( سالب 2 ونصف ) ... حينها وجدت ضالتى وقلت له : يا استاذ سالب دى عرفناهم بيفرتقوا فى الحيطة ...! النص ده ... يعنى معاهم شافع ؟ ... فما كان منه الا ان انسحب معززا مكرما ، وطالب هاشم سليمان بمواصلة المشوار ... مواقف كنا لا نبرز فيها عضلات الرياضيات الا عند الحاجة ... وهذا لن يكون الا فى حنتوب ، وحنتوب فقط ... حينما يحترم العلم والمعلم ... اخى قوى ... رحم الله استاذنا الفاضل قوى ... منك فقطط اليوم علمت بوفاته ، فالله اسال له الرحمة والمغفرة ، فقد كان لى معه ذكريات لا تنسى ... ولولا انه " قوى " لكنت اليوم فى عداد العتالة بموقف " ابحراز " ... ولكم الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
الاخ ايمن سلام شكلك الخميس كنت فى سينما رودى ... وكان مشيت الوطنية ... الفلم معاد ... بس ما تتاخر فى موقف حنتوب ... وتتوه مع بتاعين الرواكيب ، والنبق .... معالم السودان المتمثلة فى كل راكوبة صغيرة بموقف حنتوب ... حيث الازيار والاباريق وجرادل الزنك .. صحون البلاستيك ، الفخاريات ، والفقاريات ، النبق " تفاح الغلابة " ، الدوم ، التسالى ، القنقليز واللالوب ... البرينسة ... بيضاء فى غير زينة ، قصيرة ، مبهرجة ، ومترفة .... يكتمل الجمال حينما تجد مقعدا بالمقدمة حيث النظر من خلال الراية القدامية ... ووضع اليد فى الشباك الخالى من الزجاج ... الفرش الاحمر ، والارضية الموكيت ، ومعالم عداد السرعة الدائرى المتوقف ، وخطوط من الالوان احمر ، أصفر ، اخضر ، ازرق ، تشابكت دون انتظام لتشكل ضفيرة السيور والاسلاك الموصلة لخزنة البرينسة ... المقود العجيب ... والتعشيقة الملبسة بمشمع بنى ، يشابه رمانة الارقام حتى 4 نهاية "الجربوكس ".. وسادة صغيرة ، ولوحة كتبت عليها آية الكرسى تتأرجح من مرأة معلقة بالسقف تنظر البرميل الصغير المودع فى وسط الصندوق ... الرفرف ، والسبت حيث أضع شنطى الحديدة متجها صوب حنتوب ... لبنية رسمت عليها زهرة صفراء ، ووصلت بين فكيها طبلة ألمونيوم خططت بخطوط زرقاء ، ومفتاحها حديد ، وسكانها بنطلونى البنى و قميصى الابيض وجلبابى السمنى ، وعراريقى الطوال ... مكوتى كراستى العربية وكتبى الخضراء ... وملعقتى ، وكوبى ، وعلبة الطحنية ، وزجاجة المربى وريالات المصاريف ... اتمنى لك ايمن رحلة سعيده الى حنتوب ولك الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: امل احمد عمر)
|
الاخت رباب الاخت امل تحياتى ، حنتوب ستظل فوق طلما انها استوقفت اهل العزائم واللطائف والمساحات الجميلة ، والسافات الطوال ... رغم بعد مشوار السنين عنها الا انها ستظل برمالها تكتب اثر أجيال من ابناء السودان النجباء ... خرير مياه الرى ، ولمعة الرمال ، وخضرة المشهد ، وظل الللبخ ، واصفر المبانى ، وتعرجات الزنك ، وقصاصات من بهوية خضراء تساقطت لتغازل " قشات وسنمكة " بجوار الشباك ... اعشقها ولا يخيفنى فيها سواد الليل ، وجلبة الصفرة ، وصوت البوم ، وأنين الضباع ، وغدر " اب دفان ".... احسبها برقراق الظل المتدلى من سطح الزنك فى عصرية بهيجة ، تغازل رؤوسنا ورؤوس الحشائش وشجرة الليمون بداخلية المك نمر ... لهم ولكم الود كله
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
داخلية جماع أو (جماع المنفى) كما كان يقال... وعنبر (الأشقاء) الذى كان يصح ان يطلق عليه عنبر (الأشقياء) ... وثلة رائعة من الطلاب ... مشاغبون لكنهم شطار ... أذكر منهم مصطفى فضل المولى (ابوقوتة) ... كان يلعب كرة القدم كما ينبغى أن تلعب .. خفيف الدم وقارىء للأدب ومثقف أكبر من سنه وقتها هو بجانب عارف بدوى سليمان (الدناقلة) شرق مدنى يفتون فى الشعر والرواية ويقرأون محفوظ وفيكتور هيجو ويحرصون على العدد الأخير لمجلة (الدوحة) القطرية أما عارف فقد كان من عشاق شعر التفعيلة وراهب فى مقام محى الدين فارس ... ترى أين هما الآن؟؟؟؟؟
وكان هناك نصر الدين ... مشاغب (والعبان) ... انهك (برندات) الداخلية بجريه ومشاغباته وصوته (الجرس) كان مطربا متميزا بصوته (السبرانو) يعشق عثمان حسين ويغنى أصعب الاغانى بلا وجل ... درس الطب البيطرى وعلمت مؤخرا أنه (يتضرع) فى كندا بعد أن عمل مساعدا للتدريس بجامعة الخرطوم ...
وكان هناك أيضا أشرف بابكر نقد وكان واحدا من (فردى) بحكم أننا جئنا الى حنتوب من أبى حراز فهو أمدرمانى ولكن والده الرجل الرفيع الاستاذ صديق نقد كان أول عميد لكلية الزراعة بابى حراز وبقى فيها لسنوات طويلة وتركها مخلفا وراءه سيرة طيبة بين الناس واشرف هذا كان ابنه الاكبر وهناك شقيقه الآخر أيمن الذى درس بالاتحاد السوفيتى وكان ذلك آخر عهدى بهما لكننى ما زلت أتسقط أخبار أشرف الذى علمت مؤخؤا أنه يعمل بأحد فروع البنك السعودى بالخرطوم ....
وهناك صديقى الراحل أسامة محمد على محمود (فردة) جناحى الرئسية بحنتوب وكنا نسميه بالحلاوى لانه حلاوى من مصطفى قرشى التحق بالكلية الحربية وصار ضابطا ...دهسته خيول (الإنقاذ) وعلمت أن الجيش أتى لاهله بجثته على إعتبار أنه توفى فى حادث حركة .. له الرحمة والمغفرة فقد كان ايضا من (حرفاء) كرة القدم بداخلية جماع ....
وهناك أيضا الاصدقاء لقمان عبد الرحمن محمد سعيد (وداللورد) من رفاعة وغازى يوسف دفع الله من الشبارقة ومعاذ العجب من ديم المشايخة ويوسف (بارل) وعضو المنبر من الدفعة التى سبقتنا دفع الله حطاب واصحابه حيدر وبابكر (البابور) وهناك من رفاق لداخلية حاتم حسن هاشم بلدياتى ومحمد حسن وعارف عبدالله وعادل ابراهيم وهؤلاء جميعهم من ابناء ابى حراز بجانب شقيقى الاكبر يوسف .. وكان هناك من رموز الداخلية على محمد على صالح (كمينة) ومجد الدين الشفيع وغيرهم ....
التحية لهم أجمعين أينما كانوا والتحية لأستاذنا المقيم بجماع أستاذ عز اليدن الصبابى كما كنا نسميه ....
ولى عودة
عبد الرحمن قوى
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: Raja)
|
الاخت رجاء تحياتى اليوم ... خميس مواعيد الخروج المبكر من الداخلية ... جو الخميس .. له طعم خاص بحنتوب ... صباحه ... صوت العصافير ... لون الرمل هبة النسيم ... جرس الصباح ... فواصل الحصص ... الفطور ... وجرس الصفرة ... التعقيب على ازيار عم عماره بداخلية المك نمر ... زيارة العنبر ... وتفقد شنطة الخروج ، ولملمة الملابس ... وقفل الدولاب بالطبلة ... المرور على ستات الفول قبالة التراكتور العتيق ... الدخول ببوابة الساعة ... التوجه نحو الفصل المزدحم بالاشواق ... والنظر من شباكه النملى الى موقف المواصلات ... ومتابعة " مؤشر الرحيل " بخروج .. بنات الابتدائية وفى مصطلحاتنا الحنتوبية كنا نقول " العشر قام " . هن هن بذيهن الاخضر .. وشنطهن الدمورية ... وجوطة الفصول ومجموعات أثقلت الخطى حول .. مسطرة ملونة تتعدد بها الاشكال ... جرس الانصراف والخروج الى حنتوب ... نحث الخطى ونمعن النظر حول دكان " عم هبانى " .. الانتظار يوم الخميس شيمة مميزه ، ومراقبة مداخل القرية وسرقة السمع لصوت .. برينسة قادمة أشياء لها ايقاع مميز .. وصوت حنون . التزاحم حول الركوب والظفر بمقعد عندنا من المستحيلات ... فنحن نعلم أن أهل حنتوب الحلة هم أهل الفضل ... حينما تزاحمك إمرأة تحمل عامود الغداء للمستشفى .... رحم الله الزمن وستفعلها حنتوب باذن الله مرة أخرى ولك الود
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
الأخ هيثم بابكر سلامات,
ذكرياتى فى حنتوب و عنها محصورة فى ثلاث سنوات من عمرى
وأنا أخطو نحو السابعة ! أى أننى لم أتشرف بالعيش حتى دراسة
المرحلة الثانوية و لكن ما يحيرنى هنا هو إرتباط قوى بتلك
الفترة بصورة غريبة ولا أدرى تحديداهل يرجع ذلك لإرتباط الأسرة
الشديد بذلك المكان(كانت للأسرة فترتين مفصولتان بعدة سنوات )
أم أنها عقلية الطفل و ذاكرته لتلك المرحلة التى تصور الأشياء
وتحفظها جيدا أم أنه ثراء الفتره نفسها و إمتلائها بالأحداث و
المشاهد والحركة ! لكن حين قراءة مداخلاتك و بعض الإخوة والأخوات
أحس كأنماهى نفس المشاهد والصور المطبوعة فى الذاكرة و خاصة
الأسماء والأماكن ومنظرالعشر القام والبرينسات و الحاجّات وداخلية
المّك تحديدا لإرتباطها بالبيت وأعمامى محمد الهادى ومصدّق الوسيلة
اللذان كانا يُعتقلان عندنا فى المنزل و يحرمان من الخروج فى بعض
الأوقات وإرتباط والدى بالمك نمر ولست متأكداإن كان المسؤول عنهاام لا,
ذكرى حنتوب حركت ماكينةالإبداع فيكم و أظنكم تستمتعون هذه الأيام
بإجترار ذكريات وأحداث و أشخاص فترة جميلة مرّت بكم يوما.
*أمشو شوفو الأهل و إنشاء الكريم تلقوهم طيبين سالمين و لنا عودة
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: أيمن الطيب)
|
الاخ ايمن الطيب حنتوب كلها طيبين ... النيل الجناين الميادين اللبخ النرجس السنمكة الرملة الزنك الأزيار برش الصلاه حيضان النجيلة الزهور ميادين السلة التليسكوب الجرس الساعة الداخليات المسرح الماسوره البابور الرفاس الطلمبة الطير وبيوت المدرسين الصفرة وحتى " ابولو " والتكيلات ولك الود
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: صديق عبد الهادي)
|
صديق
تحياتى
أنا شخصيا درست فى حنتوب أيام مايو ... يعنى ما كان هنالك إتحاد للطلاب بل هناك لجنة للغذاءات كان يمثل داخليتنا فيها واحد من أكبر المهرجين (ممثل بالفطرة) إسمه عز الدين آكشن .. لا أدرى أين هو الآن لكننى أتوقع أن يكون من ذلك النوع الذى ركب قطار الإنقاذ ....
له ولك التحية
عبد الرحمن قوى
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: هيثم بابكر)
|
محمد إبراهيم علي بواسطة عصام البرلوم علي الرغم من بعد المسافة الزمنية لازالت ذكري حنتوب تثير في النفس أشياء شتي وذكريات بعضها مؤلم والبعض الآخر مفرح (يجازي محنك يا جورج اسي كان في داعي لي سيرة البحر دي ) . قوي أو السنير عبد الرحمن حمد النيل صاحب الصوت الآسر وهو يغني لنا ويقصر المسافة ونحن نتسلل بعد تمام التاسعة لسينما رودي وعندما يشتد الطرب باشرف نقد (ود العميد) ويحاول ان يجاريه يصيح عليه احد عساكر حامية الكبري مهددا لعبد الرحمن شقيق اصغر من دفعتنا عز العرب حمد النيل لا يقل عنه جمالا في الصوت ولازال صدي صوته يتردد في جنبات حنتوب وهو يغني بسال من شعرها الذهب والحوت (فتح الباري الشفيع والنور عنقرة )يطالبانه بالمزيد داخلية حماع (المنفي) من الداخليات المميزة أولا لبعدها عن سنتر المدرسة وقربها لحنتوب الحلة وسهولة التسلل منها في اتجاه سينما رودي أو حتى التكيلات لأصحاب المزاج أو لحضور حفلة في حنتوب الحلة مع ما في ذلك من مخاطرة ولكن كنا نحتمي بأولاد دفعتنا من حنتوب الحلة (مجذوب حمد , جمال الصقري وآخرين ) اغتيال حنتوب وداخلياتها جريمة حرب يسال عنها ما يسمى بثورة التعليم العالي
| |
|
|
|
|
|
|
Re: هل تفعلها حنتوب الجميلة مرة أخرى ؟ (Re: abumonzer)
|
ابو المنذر " صخشيا " ... ومن مين ؟ " ود ابراهيم على " ... مرحبتين ... ومراحب بابو المنذر ... زول "مدرسة طه كرار " المؤتمرجى ... دى من مدرسة المؤتمر مدنى " ... لعلها لحظات الخميس هى التى تجمع ابوالمنذر مع ودابراهيم على ... حينما يجتمعان للتزود من باسطة " الميرى لاند " ... او المرور على ... حلوانى الحرمين والبحث عن ... تيراب الباسطة .. فحنتوب قد علمتنا .. تدكين بعض الريالات وتوفيرها لكيس الباسطة ... حامل الربع ... وبسبوسة لم اجد لها مثيل ... الاجتماع يوم الخميس بمدنى والمرور بشارع ... سنكات جبرونه ... حيث حلويات " الشانزليزيه " لم يكن ضمن الاجنده وكذلك المرور على فندق يوغسلافيا " لا ادرى لماذا يوغسلافيا فى مدنى أو حتى التعريج على " سلا " كانا ضربا من المدنية والتحضر والنظر الى " العمارات " الحديثة فى مدنى ... ومثلما كنا نتندر على ابناء "غرب الجزيرة " وفى رواية اخرى " غرب اوروبا " حينما يخرجون الى ذويهم نذكرهم بالحديث عن " حلاوة نور " ... "الكهرباء " حنتوب ستظل بكل جمالها صورة لا تمحوها سياسة أو يخدشها ثورة ... لانها ... حنتوب . ليتنا نعود مرة اخرى ليس بالضرورة على صحن الفته من بوفيه المسرح ... ولكن على بوست من طعم خاص .. والمساحات تقبل حتى حوش المؤتمر مدنى . ولكم الود
| |
|
|
|
|
|
|
|