الكابلى وأغنية سعاد

دقت الدلوكة..قلنا الدنيا مازالت بخير..أهو ناس تعرس وتنبسط
تككت سروالي الطويل سويتلو رقعات في الوسط
في خشمي عضيت القميص أجري وأزبد شوق وانط
لامن وصلت الحفلة
زاحمت الخلق
وركزت
شان البت سعاد
أصلي عارف جنها في زول بيركز وينستر
لكني عارف إنها لو كلو زول في الحلة بالسترة انجلد
ياني الآزاها وجنها
برضي عارف اظنها
تحت
تحت
بتحبني
ديمة في صرة وشيها يلفحني شوق نافر لبد
وركزت للحرقة المشت فوق الضلوع تحت الجلد
ضميت قزازتي مرقت عن طرف البلد
وسكرت..سكرت جد
وانا جايي راجع منتهي
لاقتني هي
قالت تعال
كبرت كراعي من الفرح..نص في الأرض نص في النعال
اتلخبط الشوق بالزعل
اتحاوروا الخوف والكلام
هـــــــي ياسعاد على ودسكينة وكلتي في خشمو الرماد
على ودسكينة ومات أسى..وأنا بت بلاك ملعون أبوي لوكنت أرضى أعرسها
وانا ياسعاد وكتين تصبي سحابة تنزلي زي دعاش
بفرش على روحي واجيك زولا هلك تعبان وطاش
وانا ياسعاد وكتين أشوفك ببقى زول فرشولو فرش الموت وعاش
قالت سعاد: بطل كلام الجرسة..انجض ياولد
مزقت روحي نتف نتف مرقت من وجيب القميص تمباك وحب وعرقي واسف
طبيت قزازتي وصلت لي طرف البلد وسكرت جد
اذنت في الشوك والسلم
وسرحت بالناس والغنم
وركعت للعرقي البكر
ورقدت في الألم الحكر
وحلمت زي شالني ومشى فوق زحمة نبي الله الخضر