|
Re: ما هو تعليقك على صورة اليوم الموافق6 يونيو؟ (Re: الكابلى)
|
لو كان الفقر رجلا لقتلته ***********
آه يا غبش ما عندي ليكم غير نغيم .. برجوه ينفض لي غبار زمن القسا .. الكتاحة يهد عرجون نخل صبر الغلابة الطال .. يحت يخرت .. تباريح الأسى الممدودة فوق نور الدغش يا نورة آه ..
*********** الناس تقول مدقوقة طالعة على الحقاب مفلوقة بي حجر الصعاب المرة .. نازلة على البحر مشروقة بي موية السراب الفرة .. مشنوقة عقاب .. بالمرة من كتر العذاب الحرة في طايوقه داب يا المرة كيف بقت الرقاب مسيوقة بي قيد السلاب منشرة من نشر الحجاب في عروقا .. وإشتد الخراب من بعدما انبلج الفرج من ضيقا .. خدعوها بي حيلة كتاب رفعوه فوق سن الحراب ودهت الهزائم خلقتا فالناس بدل عن نقتا التلقى فكة ريقتا وبدل القصور الفي خيال .. التبقى ماهلة كريقتا وما جاتا راحة طلقتا .. إلا التعمر طلقتا بي بندقيتاً حقتا .. بي ها الشوارع وبقتا تنسدا منك دقتا .. ودم فلقتا .. ومر شرقتا .. ونار شنقتا يا دقن دينك سرقتا ********** عرفت الشقا والشقاوة إلا ما عرفت تغش شايلة طولة البال من الله .. ومن أراضينا الإثارة وماشي تكدح طول نهارا وترجى لما الليل يفلل .. تسرق ألمي عشان خدارا عشان صغارا ولما ترجع لي ديارا تنزف أحلام الفقارى من عويناتا الحيارى لي غبار الحال تقش فوقو للآمال ترش نورة تقعد صاحي تحلم .. بي بيوت بي نور ودش وبالمحبة تشق دروبا .. ولي قلوب الكل تخش نورة تحلم بي وجود ما مشت بينو القيود أفضل أفضل بي كتير .. بي وطن من غير حدود نورة تحلم بي عوالم زي رؤى الأطفال حوالم لا درادر .. لا عساكر .. لا مظاليم لا مظالم نورة تحلم .. ولما تحلم نورة ترجف ولما ترجف نورة تحلم .. ولما ريح الواقع المر .. لي عشيش أحلاما ينسف نورة تنزف ولما تنزف بالا يهتف .. يوم حا تنصف يوم حاتنصف وتبدأ تحلم .. ولما تحلم نورة ترجف ولما ترجف نورة تحلم صاحي تحلم.. وصاح بتحلم صاح بتحلم ************
|
|
|
|
|
|
|
العنوان |
الكاتب |
Date |
ما هو تعليقك على صورة اليوم الموافق6 يونيو؟ | بكرى ابوبكر | 06-06-02, 05:46 AM |
صورة اليوم | Kalankakoal | 06-06-02, 07:04 AM |
Re: صورة اليوم | قرشـــو | 06-06-02, 07:24 AM |
Re: صورة اليوم | wadazza | 06-06-02, 07:35 AM |
Re: صورة اليوم | رومانسي | 06-06-02, 07:37 AM |
Re: صورة اليوم | sunrisess123 | 06-06-02, 02:36 PM |
Re: ما هو تعليقك على صورة اليوم الموافق6 يونيو؟ | الكابلى | 06-06-02, 02:41 PM |
Re: ما هو تعليقك على صورة اليوم الموافق6 يونيو؟ | yasiko | 06-06-02, 03:03 PM |
Re: ما هو تعليقك على صورة اليوم الموافق6 يونيو؟ | ابو يسرا | 06-06-02, 03:18 PM |
Re: ما هو تعليقك على صورة اليوم الموافق6 يونيو؟ | Tumadir | 06-06-02, 04:23 PM |
Re: ما هو تعليقك على صورة اليوم الموافق6 يونيو؟ | malaz | 06-06-02, 05:04 PM |
Re: ما هو تعليقك على صورة اليوم الموافق6 يونيو؟ | Sudany Agouz | 06-06-02, 10:58 PM |
|
|
|