ذلك البدوىالرائع : محمد طه الــقـــدال

مسدار أبو السرة لليانكي
محمد طه القدال
أماتي القبيل
بي حنهن لجنّي
كرفة وقلدة
كيف شوق اللبن رجني
حزناً جاني في ميع الصبا يلجني
اطلع مني يا جلدى المنمل جني
اطلع مني يا حزناً بقى مكجني
خلني أبدا مسداري
وأودي قفايا لي داراً بقت مي داري
جيتا ...
وجلدي بينو بين عضايا الشحمة
إلا النار بقت قدامي
جلدي الليلة بينو وبين عضايا المافي
الا تراني شوال الكبس
نفيخ جرايب الورم هدامي
في جلدي الورم قولنلي
واللا صحي الورم عضّامي
سفريتك مي في النية
ماها الكانت محرية
خابراك عريف
ذم واللا قيام الوردية
مالك ؟؟؟
تريان ومندي
كاسي الكتان والهندي
قولك ككيف ترجي البيشان
واللا الغربة البي الزندي
برقا عبدلّي الوزن
يا طاش يا جاب المزن
فرق يا لضيف
فعل الغضبان
ام فريفرات الحزن
وشن القعدة
يا أبو السرة
شن القعدة في ضل العمارات أم كمرة برة
ضقنا الحنضل اليانكي وبلعنا المرة
كملت كوتة التمباش صفعنا الحرة
العشم خوهت بردن ليالي الحرة
الشم خوهت بردن ليالي الحرة
والبراق برق من منا جاب القرة
شوف عيني الصقير بجناحو
كفت الفرة
تلقاها ام خدود الليلة مرقت برة
مرقت برة
مرقت برة تغلي مديدة الحلبة
التسمن ردفها
السمن المبستر يانكي
والويقود بعيرات الدخان في العين
وفي الفشفاش يسوي عمايلو
شن فايدة مديدة الحلبة والويقود
بشيلو اليانكي
يا أبو السرة
قامت من دخاخين العمى تلمع
وشيها
اليانكي مستنيها
كان اليانكي مستنيها في مراية
السجم في الليل
لقيتها متل فريخ الطير
مرق ود عينها من ود عينها
رجافة المزمل حمى
جفلت منو
وقعت عندي
صدرها بغلي
يا أبو السرة
شفت اليانكي في ود عينها
سقتها للبحر يمكن يغسل عينا
من اليانكي
فتنا الحجرة بالكتة وغطسنا مسافة
تبقى قدر مسالك الريدة
وما لاقانا من يغبانا في البحر
القدر تحتاني
ناس عارفاها
ناس عارفاكا
ناس عارفاني
نادينا القعوي والبلطي
قرقور السمك ودانا لي دابي
الخُشش
نادينا عمال الطمي
عمال الطمي الصارقيلا والقرموط
وود المويه
وفتنا عليها
كانت نايمة
عجال البحر حارساها
كانت نايمة بين حجرين وضل
ساسوية
وعمال الطمي الصحونا لمو حصى البحر
قسموهو يات من كان سبع جمرات
دابي الخُشة قال أدوها في
الجمرات تلات سبعات
قلنا أدوها في الجمرات تلات سبعات
مسكنا دربنا
وعمال الطمي الصحوها خابرين الدروب
مرقوبنا في مشرع مسارب الضي
لقينا الدنيا تترجانا
قوقا القمري خوي صقيروعوى حدي
وعمال الطمي الصحونا لمو علي البعرفو الصي
حصى القيزان
دوابي الدارقة والسحلية
والناس التحت خابرين عمايل اليانكي
مرة معونة للقاف ومرة دوانكي
شن معناهو جيبها ان كان ملوهو بوانكي
وصوتها مكتمو القربين سيوف وسوانكي
قولن لي الاخلو ديارو
دمك فرهد في نارو
غور في الأرض
طارو صقرين
أولاد الأرض ما طارو
لحمي غطى بن عمي
شو صار حالو يا إمي
منديل العرض في بيت الدين
دمي ما يخلي دمي
أنا من دير ياسين
صرنا في جزر التين
عم نسقي بعض
حب الزيتون بدو يرجع للطين
صابرا تحت الدورية
صابرا فوق الدورية
صابرا فوق الدورية
يا حال الضد
لحم الطفلين نابت غصن الحرية
جذري مو في شاتيلا
ما قال حالي يا ويلا
حنا في الأرض
أرض فلسطين
يا إمي هيلا هيلا
يا إمي هيلا هيلا
يا إمي هيلا هيلا
هيلا هيلا هيلا
هيلا وهيلا يا أبو السرة كج العين
تخبر الشنة من الزين
تفرز الطاري من الساري
يا أبو السرة كج العين
ومدو صباعك السابي
قول لي الغافي يا زول هوي
وهو يا غافي يا زول هوي
أرخي الفُردة للعنافي
شد القمري بالحوبابي
في مسدارنا
شلنا نهارنا
في ايدنا من ساسنو البحر عقدين
مسكنا دربنا
وعمال الطمي الصحونا
خابرين الدروب مرقوبنا في
مشرع مسارب الضي
لقينا الدنيا تترجانا
قوقا القمري
خوي صقير وعوى حدي
وكنا جماعة
دابات الأرض والسايمة
عوامة البحر والطير
وحتى الغيمة قصاصة الأتر
فوق راسنا شايفة الدرب
ضنيب اليانكي
:قال القمري لي الضليلة
خلك صاحية زوغ اليانكي لا
يودرنا
:قال الدابي
ان يغباها ما بيغباني
ولما الشم مودعة غاربة
وصمت جملة الصقار عيونهن كاربة
أبقو ألف
بفوت لي المتلكن ناهضين
وفوق دينا عريباً غادي
قال السحلي لا تغشوهو
ديل عربان توابع اليانكي
وخلوها العريب الغايبة
السراق طبيقو معاهو
تيجاناً عروشها الخروع
الهش الهويش
النار تعلب فوق عقال العرش
ولا خسانا بي هادي العروش الهربة
يا ابو السعرة لا عقال
مسكنا دربنا
وعمال الطمي الصحوها
خابرين الدروب مرقوبنا من وادي
الضلمة الكان
عُقُب لمينا في باقي الجمع
قاصدين دريب اليانكي
سنور الغيب في الكنغو
وصبرا من جنوب أمريكا
ومن كلهاري ديباً ضاوي
والتمساح وليد أمازون
ونمراً في النمور كمبودي
وأم رخم الله مكسيكية
ولم لمينا
لم لمينا والشمش البتوقد فوقنا
شد شديدنا لا التمثال مشيل روقنا
عالم حر يدوعل فوقنا
لي يوم سوقنا
نبصق فيهو في عينيهو جر
واسواقنا
يا شمسي طلي .. طلي
شاوري ع بيتي دلي
كيال الكيل .. ختياري مات
ظلي عم يحرس ظلي
عادل ع خيي ميلي
خيي ما يحمل شيلي
ما خف الشيل
تاني المرات ناطر رصاص سيلي
عيني في الفيل ما ظِله
كلنا ندريه ما نضله
يا ويل الويل
نرمي الجمرات عدّ المستشهد كله
نرمي الجمرات عدّ المستشهد كله