|
|
 الى الزعيم بكرى ابوبكر 00 وفى اخير الكلام لا اخره يهمنى رأى بقية الاعضاء
|
هى اسئلة ، وان كان زمنك لايسمح بعاجل الاجابة
فلك التأجيل 000 والتبجيل والاحترام
فى اى تاريخ بدأت اول مشاركات البورد؟ مع ذكر اول خمسة مشاركين؟
وهل هم موجودين الان ؟
بعدها اقترح على الاعضاء ، دة طبعا لو شاء الله وظلينا
من رواد ( الحلة ) ، نقيم احتفال سنوى او نصف سنوى فى البورد
ويكون اليوم مفتوح لكل المشاعر الطيبة والنداءات
وليكم على مستلزمات اليوم المفتوح ابتداء من الصيوان وانتهاء
بناس تاجوج والنجمة حيرجعهم بيوتهم بعد الحفلة منو ؟؟
وياود الجيلى ياريت تساعدنى بزينات الحفل ، لانك ليك صولات
وجولات محسوسة فى ( زقاقات ) النت ، يعنى تنزل لينا العاب نارية والوان
قوس قزح وكل الحاجات الحلوة ، ويومها عايزين نحتفل ب ( شيوخ ) البورد
ونجدد ذكرى اول المشاركين ومشاركاتهم ، وبعد نتيجة التصويت الحر
نكرم كل من : صاحب اجمل شعار ، صاحب احلى توقيع ، صاحب اكثر مشاركات
ونرسل رسائل ودية للغائبين من البورد
اعلم ان بعضكم لاتروق ليه الفكرة وبيعتبرها نوع من الهزل ، ولكنى اؤمن بان هذه الاشياء هى التى تعطى الحياة معنى الجمال ، وتجدد فى الانسان حب الحياة والعطاء الرفيع 0 كما اعلم انو ممكن نختلف فى اكتر من رأى واكتر من واقعة لكن اؤمن بانها لحظات رائعة ، ربما لن تسمح الظروف باللقاء وتظل صور مرسومة من خلال احرف وعبارات ، وقد نفترق ويجئ غيرنا للبورد
بس ياريت نكون نحن من صنع الحب فيه 00
وكلنا يدرى ان الاخوان فى البيت بيختلفوا لكن يظلوا اخوة واحبة ، كما محسوس فى البورد مشاركات بعض الاعضاء لمجموعات بعينها ، ودة شئ لا انا ولا غيرى ممكن يرفضه ويفرض غيره ، لان كل شخص ليه بيروق ليه زوق معين واسلوب محدد ، حتى فى البيت ممكن تكون بتحب اخوك الصغير اكتر من الكبير ، لكن فى الاخر بيجمعكم حب واحد ، واذكر استاذ التربية الاسلامية بمدرستى الثانوية ، كان بيحكى لينا كتير عن اسرته واولاده وفى مرة الطالبات سألوه عن تعلقه الكبير بواحدة من بناته دون الاخريات فجاء رده : ماحاعرف اشرح ليكم ، لان دة شعور
مابقدر اترجمه لكلمات ، لكن فى يوم حتكونوا امهات
وحتعرفوا ( فى الجنا عندك جنا ) 00
بصراحة العبارة دى كان لاول مرة اسمعها وبعدها ماسمعتها ، لكن
حسيتها فى بيوت كتير
فاذا كان البيت كدة ودى علاقات الدم والرحم كدة ، فمن الضرورى نختلف نحن
لكن نرجع على الحب نجتمع فى ( حلة ) بكرى ابو بكر 000
من يوافقنى!!؟ 00
|
|
 
|
|
|
|
|
| |
OmDur
فيس بوك
تويتر
انستقرام
يوتيوب
بنتيريست