|
|
 حدث في مثل هذا اليوم
|
حدث في مثل هذا اليوم
قبل نيف وثلاثين
ان ولد
طفل ما
في بلده ما
من ام حنينه جدا واب معلم فاضل
تلقته الدنيا بالزغاريد فرحا والذبائح شكرا لله
تبادلت الجموع التهاني والمباركه
وذاع الخبر وعم القري والحضر
وكعاده الاطفال
ينومو
ويصحو
ويكبرو حبه
وحبه
وحبه
ويتعرضو لوقعات متكرره
وقرصات نمل
ونزله
وكحه
وربما تنجو من ملاريا محققه بفضل مروحه او ناموسيه
او ام حنينه تلفك بزراعيها فيمتص البعوض حصتك من دمها هي
ثم تاتي المدرسه
ونصحا الصبااح من الدغيش
اولي ابتدائي
وجدنا الكنز
تانيه ابتدائي
اجدادنا القدماء
تالته ابتدائي
بدايه التهام السياط الملهلبه
ورابعه والرياضيات تبدو اكثر وسامه وصعابه
ثم خامسه وتبقي الالفه لو تفتيحه وبتترسل سريع
وتقضي معظم الوقت خارج المدرسه في مراسيل لبيوت المعلمين والناااااظر
امتحان الشهاده الابتدائيه والذي تحول بقدره النظام الي امتحان الاساس
تمتحنو لما تبقا كبييييييير اطول من الزير ذاتو وهو شرط الامتحان
والان النقله النوعيه للمتوسط واضافه الانجليزي كماده اساسيه
وقشره مؤسسه
اما الثانوي العالي فهو بيت القصيد ومربط الفرس وراس البيت وخلوه شافعي ذاتو
العالي وعرس طواااالي
وللاسف مع ضيق ذات اليد والضيق العام
بعد العالي
اصبح
الشارع طوالي
ما يخصني في العالي كمرحله هو بدايه الاحساس بكل كبيره وصغيره في الدنيا
اها تتذكرو الشافع الولدهو قبيل داك ما يخصني هنا احساسه هو تحديدا
وتجربته الخاصه جدا
عموما حدث في مثل هذا اليوم ان ولد
نوعا ما كبر رغم احاسيسه الطفوليه
واحساسه الممتد بالعالم
وتجربته الكبيره قدر مبالغه
ما حدث بعد الان لا يخصني الا بمقدار تواجده في حياتي
الشغل الا ربع عشان تلفونو
الاكل الا نص عشان شوقو
السفر ملعون في شان فرقتو
النوم
والحب مردوم
كل سنه وهو طيب
وانا
انا ..
انا كان مالي ومال كده
يا حبيبي مالي ومال كده
|
|
 
|
|
|
|
|
|
|
|
Re: حدث في مثل هذا اليوم (Re: توما)
|
ســـلام توما وليك الشوق
و كل سنة و انتي طيبة
بين البعاد و الشوق فترت خطاوينا
و بقينا ما بنحوق
والله ما بنحوق
كبر الحنين ساعات
و انشرّا في الساحات
مرسال امانينا
وطلعنا فوق لي فوق
وقتين غلبنا الشوق
خجلت خطاوينا
وبقينا بس نشتاق
لي زول اونسنا
ومرات احجينا
يدينا حبة زوق
لو الحنين بصبر
تصبر امانينا
اصلو السفر ملحوق
توب الفرح ملتوق
ان كان بغتينا
الا العمر ممحوق
ملعون ابو الفرقة
ان كان تهد الحيل
وتزيد شكاوينا
والغربة لينا تسوق
بس.....
بين البعاد والشوق
تشهد اماسينا
والله بشتاق ليك
و حنيني ليكي بروق
خليني افرح بيك
مشوار سفرنا بروق
شكرا توما
| |
|
|
|
|
|
|
|
|
|
Re: حدث في مثل هذا اليوم (Re: توما)
|
وشالت شدره الريده حب
واتفتح النوار ورود
بعدين ثمر
وحتما وجود
سافر الشافع الشقي للاب المعلم الفاضل المتسبب الاول في الحدث الذي حدث في مثل هذا اليوم
وحتما لن ننسي الام الحنينه التي كانت تهش البعوض ليلا لولدها بعد ان حملته ووضعته وارضعته
هذه المحنه التي يمتاز بها ..لا اشك ابدا في انتقال المحنه عبر لبن الام ..
اعتقد ان الام ترضعك معظم ما يميزك من محنه او قسوه ..تسامح او غضب موروث من زمن فات
نعود للمحنه و الحنين ..زمان كنت اعتقد فيما اعتقد ان الكلمه واحده ..
وبعد ان علمتني المحنه معني الحنين بدرس قاس جدا درسه لنا رجل شرير
بعصا غليظه وشوارب مفتوله ولسان زفر كما تقول حبوبه ..
كان يدعي البعاد ..والبعاد رجل شرير ان قابلته في الطريق لا تلق عليه السلام
ولا تدعه يغريك حتي لو جيعان وفي رمضان ..فهو مخادع ثم غدار..
يوم في حمي ام شوق شديده جدا
اشتقت جدا
وحرت فيما افعل لالعن شيطان الشوق قليلا من التنطيط في التفاصيل
واتخاذها حجله ل اللعب في بلاط القلب
ينط من كلام قالته اختي ..لدعوه دعت لي بها امي
ومن يوم وداع ابي في رحلته الاخيره الي الله
الي يوم بكيت كثيرا في المطار وقلت ليك قول لي ما تسافري بقعد
ويتعثر في دقه قلب نافره لنحله دخلت من النافذه مرورا بالقرب من وجهي
خروجا من نافذه اخري بهشه قويه بالمخده
عجبني ليك بركه الوقعت ما قلنا ليك اقعد ساي
قعدنا ساي
لكن برضو
مش قال
مافي حاجه ساي
كلو عندو دين
كلو عندو راي
| |
|
|
|
|
|
|
|
|
|
Re: حدث في مثل هذا اليوم (Re: توما)
|
صــديقتي تــوما..حبابك..
لكن وينها المدينة؟
طيب ..مشيت لاقيت الهادي حامد..والمدينة نيلها صــفق..
ثــم..أنحيازا لما يخدم قضية الشــوق اياها..عبيت حضــني باللهفـة و غنيت غصـبا عني " عرفتك ..و ماياك البعرفك"..
اغتسلت بضياء الشــوق كافة..و شــلت الورد..و أســتأذنتها في السماح لي بالذهاب للتســكع في الخواطر المدائن..لأقراك تـوما(تصدقي)..و احندك ذاتي بالفرح الفـلاني..
كان الدرب مســكون بأبهة الشــوق الفارهة..كتب الولد..كتبت البنت..
و بعدها ..دخلنا في الســؤلات اياها..
و لو كان الحرف الأول هو الشــوق..اذن لما كان في داعي للحرب..فهمتها هكذا و هي معادلة تخصــني..
هاك تعريشة من عطر الكــلام..و ألقاك من تاني
و دمت
كبر
| |
|
|
|
|
|
|
|
|
|
Re: حدث في مثل هذا اليوم (Re: توما)
|
نوعا ما تغير طعم الحنين بعد فتره , غالبا لا تستطعمه اذا ما تذوقته يوميا
يصبح كمويه السليقه المتكرره رغم ان التشبيه غير بليغ لان للسليقه طعم اطعم مع القدحه حتي المتكرره منها
وعليه مع تغير الطعم تغيرت الحوجه اليه ايضا
اصبحت احتاجه بشده اكبر ك لبه العيشه بعد دواء الملاريا وك تفاحه حمراء جدا عند الاثرياء من بني الانسان
رغم عدم انحيازي للتفاح وتضامني التام مع الدوم اب راسا قوي
نعود للحوجه
محتاجين حلت مكان مشتاقين
والحمد لله علي كل حال تنم عن ميلان الحال
وما عدت احتمل اصبحت اكثر رواجا بعد تطورها من تمام والله ..ماشي الحال ..واهو عايشين
ذاك الرجل القاسي صاحب العصا وصاحب الشوارب المفتوله اضحي صاحبي ايضا
ليس صاحبي بمعني سيدي فلا سيد لي بعد..
وبعد لا تعني ان لن يكون فالدنيا بقت ما معروفه ..
عموما تصاحبنا وليس تصادقنا فللصداقه معني اخر متراكم مع حليمه في بيتهم
اعتادت ان تنتظرني بحصتي منها كامله وتفاجئني بها حال عودتي البيت
قررنا انا وذلك الرجل الغليظ القلب والصوت انو نبقا اصحاب وذلك لانو تعبنا من المناقره واللعن لبعضنا البعض
بشكل يومي لحظي متكرر ..الومه اكثر لانه سبب كل الحزن المتراكم الذي اثقل قلبي ..ويحملني المسئوليه الكامله
لازعاجي المتكرر له بشكل دائم ..يقول انه قد ارتضي لنفسه هذا المصير بعد ان توزعت جميع الادوار الاخري
اتي متاخرا وكل اختار دوره ..جاء الفرح مبكرا والسعاده والامنيات والحلم وحتي الحزن كان اوفر حظا منه في الاختيار
حيث اختار دوره وكان متيما بالدموع فاختار صحبتها الدائمه..اتيت متاخرا جدا ولم اجد غير دور البعاد اللعين
تلبسني وارتضيته وارتضيت اللعنات المتلاحقه لي ..
المهم بقينا اصحاب وقررنا انو بدل ما نتناقر بشكل يومي انو نشيل احزان بعض فللبعاد احزان ايضا
وغنينا العميري معا
ولما غلبني ريح الليل مت براي عود واقف
غلبني اساوم الرجعه وده ليل الغربه متناهي
فيهو الغربه
قبلو الغربه
بعدو الغربه
والافق الرقد ساهي
ساهي
ساهي
كتبها العميري الجميل ومات ..كانو كان بقرانا
ويبكينا
و
امد ايدي بس لي وين
اقاوم كيف زمن لاهي
لا نفع التودد فيهو
لا جاياهو حنيه
شتت املي في الموجات
كتر في العشم جيه
وووووووووووووو ده
كلوووووووووو من السواحل ديييييييييك
ومن ظلم المعديه
انا البعت الفرح لليل
ياااااااااااا ليييييييييييييل
وغشوني
المراكبيه
| |
|
|
|
|
|
|
| |
توما
mohammed alfadla
Kabar
عبدالماجد فرح يوسف
فيس بوك
تويتر
انستقرام
يوتيوب
بنتيريست