|
|
 ثرثرات تحت المطر !
|
يوم امس وحوالى الخامسة والنصف تقريبا اكرم الله الخرطوم وبرها بمطر مدرار وغزير امتد لنحو ساعيتن مع فروقات ورشات خفيفة اتصلت الى ما بعد الثامنة وبالجد المطرة كانت قوية وليست عارمة كما وصفتها احد صحف الخرطوم لاننى وبالقياس والتذوق فقط - ناهيك عن القاعدة اللغوية ودلالة اللفظ - اعتقد ان العرم ممكن ان تطلق على السيل وليس المطر ... ولا شنو الفهم ....
المهم ... كنت اثناء هطول المطر داخل مكتبى و هناك اظلام قد حل قبل مغيب الشمس بالفضاء خلف زجاج النافذة فشعرت بالقلق لان السحاب كان شايل والخبر الاكيد قالو البطانة اترشت .. وسريع كابست التلفون ... يا خال - فى الكلاكلة - اسمع فى مطرة نزلت عندكم فاجابنى ... غرق عديل ... اها انشاء الله مافى حيطة وقعت ولا اوضة انقدت ... فاجاب ... لا كويسين بس فى سبلوقة عاملة مانع - والرجل عسكرى متقاعد - ومعناه ان هناك حاجز او عائق يمنع نزول المياه عبر السبلوقة ... فشكرته وشكرنى وبالطبع لم ينسى بعد تحيات الوداع ان يعود الى لب المكالمة ويسالنى اخوك بقى كيف ... وعمك فلان لقى ملفو الضائع فى الاراضى و امك عملت شنو فى كيت وكيت .. بالله خليها تضرب لى بعدين لمن ترجع البيت ... ثم انتهت المكالمة فافترعت مكالمة اخرى هذه المرة الى منزلنا ... لا يوجد احد يرفع السماعة .. اكرر المحاولة .. فيستبد بى القلق والغيظ والضيق فاضطر للاتصال على جوال اخى الاصغر ... ترن ... ترن ... ترن ... فياتى صوت ايمن : يا محمد ...يمطها بصورة تضايقنى .. فارد كيفك ... وين انت هسة فيرد ... فى مصطبة ناس على ابو زقدة وبرندة دكان ناس بشارة ... فاقول صائحا شنو ... فيرد وقد استاء من صياحى مالك .. ما تجوط ياخى ما كنا قاعدين فى الدافورى والمطرة صبت قلنا ممكن تكون رشة خفيفة لكن زرتنا هنا ..فشعرت بالضيق ..وانا اصرخ دى جرجرة منك انت شايف السماء ملغمة تمشى تتلمى فى البيت ولا تقعد تتحاوم هسة الحاصل شنو هناك انا ما عارف ، هسة من محلك دا لو تعوم تمشى البيت وتضرب لى من البيت وتورينى الحاصل شنو ... انا زول مرض عارف الناس كلها هسة فى شغلها ومحل قرايتها وانت تمرق تخلى البيت يا زفت فيطنطن بكلمات لم افهمها وان لاحظت انه فى معية حشد من الشباب يدعمون الامطار وموسيقاها بجدل صاخب .. ..
ثم انصرف لبعض اعمالى فى المكتب والتى كان معظمها منحصرا وقتها فى فتح النافذة بحذر والنظر الى القرب المفتوحة من المساء على الخرطوم ...لا حولا ... الظاهر الليلة زى ما قال احد الشيوخ زمان (الخرطوم دى يا غرقة يا حرقة ) ...اها الغرقة محمدانا ... ثم انظر الى الساعة فالاحظ ان الوقت تاخر لوصول اخى الى المنزل من (مصطبة ابوزقدة ) ...فاتصل على تلفون المنزل فاسمع الجرس يرن ولا احد يرد ويرفع السماعة ...ازداد اضطرابا ... فاجرى مكالمة الى هاتف اخى (الزفت ) ...فياتينى صوت الفتاة الغياظة ... عفوا هذا الرقم لا يمكن الوصول اليه حاليا .... يا اللللللللللله ... اهتف ... فاعيد الكرة ... وتعود الفتاة ... ثم اعيد الكرة ... فيظهر لى اخطار الرقم الذى تطلبه مشغول الان ! ...بسم الله الرحمن الرحيم .... ما هسة لا يمكن الوصول اليه ...ثم بعد محاولات مضنية يخش الرقم ... رن .. ترن ... فياتى ايمن ... يا محمد ... فارد بغيظ ... قافل موبيالك مالك ياخى ... فيقول والله ما قفلتو بس الشبكة كعبة ... فاساله اها وصلت ... فيقول اى ..... طيب ليه التلفون الثابت مافى زول بيرد فيقول عمر - شافع بالمنزل - طقش التربيزة ووقع رمى التلفون وكضم الكضم منو عمر ولا التلفون فيقول التلفون .. فاتمتم الحمد لله ! ثم اساله اها الحاصل شنو فيرد مافى حاجة ... بس فى موية ركنت فى الحوش وبفتش فى طورية عشان افتح المجرى ... بعدين الراكوبة مخزنة موية وعاوز انزلها واصرفها ...لكن فى مشكلة ...فاسال بذعر ... شنو ... فيرد ببرود الموية قاطعة والكهرباء كملت .. تكمل كيف قبال يومين انا مش جبت كم كيلو ؟؟ فيرد انا عارف ياخى المهم كلمتك ... تكلمنى ليه - اصيح محتجا - ما تتصرف امرق هسة امشى ليهم قبال ما يمشو ... فيطلق ايمن اخر طلقات صبره ... هو شنو اتصرف .. المطرة تجى ترجعنى البيت الكهربا برضو اسكها ليكم فى الطين والمطر انا زول ولا ورل ...يا زول اقول ليك حاجة ما ماشى اى حتة وانت والبروفات العاملين مهمين اشترو شمع وانتو جايين !
|
|
 
|
|
|
|
|
|
|
 Re: ثرثرات تحت المطر ! (Re: ALGARADABI)
|
اها ... بعد المطرة ما وقفت شوية - يعنى لسه فى رزاز - ذهبت مشوار كدا مررت فيه امام فندق المرديان وكنت مثل الراقص تارة امسك بطرف حائط مبتل من لطف الله بنا انه لم يكن حاملا لاى تيار كهربائى وحينا تاتى يدى فى عمامة شخص يمشى امامى وهالنى ان المياه كانت تصل (الركب ) فلم يجد المارة وعابرى شارع القصر والطرق الداخلة والخارجه منه بدا من خوض المياه - وزى ما تجى تجى - فيما تمسك البعض بحرصه على حذائه الذى حمله على يديه مجتهدا فى كفكفة البنطال الى ما فوق الركبة اذا تيسر ذلك بينما لجا مرتدى الجلاليب لعضها ، اما المعضلة الاكبر مع الذين برفقتهم (حريم ) كبيرات فى السن او صبايا زميلات عمل ودراسة فهؤلاء اضطروا لمشى الهوينى ممسكين بايادى البنات لتفادى السقوط وفى وسط كل هذا تماما تعطلت حركة سير المركبات الخاصة بالطبع لان المركبات العامة اختفت ولاذ معظم اصحابها بمركباتهم فى (شوارع ميتة وعالية ) لتفادى المياه قدر الامكان بينما اغتنم (ميكانيكى متجول ) رداءة الطقس وسوء المنقلب فى مكنات (النزين ) التى تعطب سريعا مقارنة بمكنات (الجاز ) وقد رايت ذاك الشاب سعيدا وهو يشعل سيجارة بللها الندى وينفثها وهو يلاحق فى الزبائن ... دقيقة يا حاج اشوف الدكتورة دى قبالكم لانو عندها شفع محجوزين فى الروضة .... ثم يعود وهو يحمل ادواته فى علبة حديدية جعل لها رباطا وسيرا يحملها به على ظهره يعود وهو يردد يا جماعة روقو كلو ببقى حلو قبل ان يامر السائق بالتنحى عن (الكبوت ) لاجراء الفحص الاولى والحق ان الفتى كان نشطا ورمحا وبدا لى كمتطوع لجهة عدم مفاصلته فى الاسعار ، اما اكثر المشاهد ايلاما فقد كان مشهد احد الاشخاص وهو يحمل على ظهره شيخا عجوزا يحمله فوق ظهره بينما يمسك الشيخ بيد مرتجفة ملف اصفر مثل تلك التى تحمل (صور الاشعة ) وقلل من المنا جميعنا وقوف سيارة نزل منها شاب وهو يدعو الشاب الذى يحمل الشيخ للدخول وركوب العربة وكان منظرا سودانيا وانسانيا مريحا .
واجمل مافى كل تلك المشاهد روح الدعابة والتعليقات البهية والرطبة مثل رطوبة الاجواء التى كان المنتظرين فى مواقف الحاج يوسف واركويت والصحافات يطلقونها مثل ان (قرنق كراعو خضرا ) وان والى الخرطوم (دقس ) فى البناء الهندسى لطرق وشوارع العاصمة بينما وجد بعض الطلاب ان (الشرة ) فى انتظار المركبات العامة قد اوجدت من حيث لا يحتسبون اجواء مؤاتية (للخلط ) ومد جسور الونسة مع الزميلات واللائى انصرفن فى احايين عديدة للسعى من اجل اجراء مكالمات هاتفية مع ذويهن عبر هواتفهن النقالة او عبر محلات الاتصالات التى اكتظت بطالبى اجراء المكالمات حتى يطمئن الاهل ان العقاب بخير لكنه مقطوع فى قلب العاصمة وفى تقديرى ان بعضهم- الطلاب وبعض الموظفين - تمنى لو ان مثل هذه المطرة تاتى يوميا ورب صدفة ومطرة وشرة خير من الف ميعاد فى بنشات !
| |
|
|
|
|
|
|
|
|
|
Re: ثرثرات تحت المطر ! (Re: محمد حامد جمعه)
|
Quote: يا زول اقول ليك حاجة ما ماشى اى حتة وانت والبروفات العاملين مهمين اشترو شمع وانتو جايين !
|
يعنى بلغة الشفع والرندوك اكلو ناركم...
بينى وبينك نحن مرات بنكترها شويه على اخوتنا الصغار.
| |
|
|
|
|
|
|
|
|
|
Re: ثرثرات تحت المطر ! (Re: محمد حامد جمعه)
|
الاخ محمد كيف الحال وطاب يومك
ما كملت لينا راكوبتكن الحصل ليها شنو ؟؟
بعدين اخوك دا جاب كم كيلو لحم اقصد كهرباء ؟؟
بعدين تلفونكم بتاع البيت مقطوع حسابات اخوك دا ضربو كيف ؟؟
| |
|
|
|
|
|
|
| |
محمد حامد جمعه
اساسي
ALGARADABI
A.Razek Althalib
المكاشفي الخضر الطاهر
فيس بوك
تويتر
انستقرام
يوتيوب
بنتيريست