|
|
 اليكم في بلاد الشتات (احباط الغربه) قصيدة عزمي احمد خليل
|
يمه جيت راجع عشانكم
وغربتي مليت دروبها
حزن دائم ودمعه كابه
وكل حاجه كمان غريبه
وناس قدر ما تحب عيونها
ما بتلاقي عيون حبيبه
شوق معذب وذكرى مره
وسيره ما بنقدر نسيبها
كل حاجه هنا بدراهم
وبي طرق قاسيه وصعيبه
بلدي أعظم وناسها اصدق
وعيشتهم في الدنيا طيبه
وان غلت في بلادنا حاجه
حتى كان قمره بنجيبها
أصلو عيشة الغربه قاسيه
وحتى ناسها كمان عجيبه
عزنا وعزة بلدنا فتنا منها وانخدعنا
موج سراب ودانا ليها ونحن سرنا وانقطعنا
قلنا رايحين قلتي لا لا ويمه قولك ما سمعنا
ودابو قولك جانا واقع إلا قبلو كمان وقعنا
ونحن مما فتنا دارنا في العيون يوم ما ارتفعنا
التمن يا يمه غالي ونحن ليهو الروح دفعنا
هم كبير ودرب خطير وسكه تب ماليها معنى
لا دراهم لا مظالم نحنا بس للعز رجعنا
الحياه لحظات قصيره يمه وين نلقاها تاني
وين بنلقى رضا الحبايب صبحوا يا حليلهم أماني
وبلدي مما فت منو ديمه سيرتو معذباني
والمكان الرحت ليهو أصلو يوم ما كان مكاني
ما قدرته أحس بفرحه والجمال غيركم عماني
وعقدة الذنب بي فراقكم يمه والاحباط شقاني
شلته دمعي وباقي شمعي وجيت أفتش عن حناني
ولو هربت أنا من بلادي كيف حاهرب من زمانى
يمه جد الغربه ذله والشقى اليوم هو المهاجر
يومو حسره وليلو آهات وعيشتو هم ما ليهو آخر
حتى ناس بلدي الهناك البسالمك يمه نادر
وحتى أقرب اقربائك لا بيحن ليك لا بيزاور
كل واحد يقضي ليلو ساهي في أوهامو ساهر
مره يحلم باللواري وهمو يصبح أغنى تاجر
ولما يصحى يبكي تاني لما يشعر روحو خاسر
أصلو دنيا الغربه سراً البيكشفو ما بيسافر
يمه أغفري لينا جينا لي بلدنا ولي ترابها
كلمي النيلين تصفق والصداقه تضوى بابها
والعصافير المهاجره خلى يبقى النيل شرابها
وتوتي بي خضرة جروفها وضىء أماسيها ورحابها
والمدن الزاهيه ترقص بكره بيرجعوا كل شبابها
وكل واحد فات بلادو ضاق شقا الغربه وعذابها
حس إنو بلادو أجمل مهما كل الغاليه جابها
أصلو عزك في بلادك وفيها سيرة الموت حبابها
|
|
 
|
|
|
|
|
|
|
|
Re: اليكم في بلاد الشتات (احباط الغربه) قصيدة عزمي احمد خليل (Re: هشام هباني)
|
الاخوان لاعزاء الصادي والقردابي
تحياتي لكم
والله يا والخليفة ما جرسه لكن قلنا نغير ليكم شويه ، ونمس الوتر الحساس
لكن انت الايام دي الزيك منو ربنا يديم الهناء
القردابي
ياهو زاتو ياخوي وعندو كمان حان الزفاف وانا حالي كفن بوصفو
العم والخال هشام
ابــــــ نضال واحمدـــو
تحياتي لك وانشاء الله تكونوا كلكم بخير في بلاد العام سام وجميع السودانيين
وربن يرد الغربه ونلتقي في بلاد تجمع كل الطوائف والممل . بالمناسبه الشغل بياخذ كل الوقت والواحد مالاقي طريقة يكتب لانو في حاجات وحقائق كثيره تستحق الرد عليها هنا في البورد لكن انشاء الله من الان تلقانا دائما .
جمال هباني
| |
|
|
|
|
|
|
| |
الصادق خليفة
ALGARADABI
هشام هباني
فيس بوك
تويتر
انستقرام
يوتيوب
بنتيريست