|
|
 *** موية موية .. جغمة جغمة .. بقة بقة .. ***
|
سلام ليكم كلكم يا اهلنا وسلام خاص لأهلي الغلابة من الشعب الطيب وجمعتكم مباركة إن شاء الله
بمناسبة أزمة الموية الفي البلد ’ بلد فيهو بحريــــــــــن يكيلن العين , ويرون الدنيا كلها , برضو اهلنا عطشانين
موية موية ,, جغمة ,, جغمة ,, بقة ,, بقة
بنخلص حقنا منكم يا الضيقتوها علينا ...
العطش آ ناس العطش عدو الإنسان والحيوان
الموية شريان الحياة, إن عدمت الموية تاني فضل شنو ,
ياهو الموت زاتو بعد كده !!! , اي حركة في الدنيا دي وخسوسا البيت بالموية .
الشراب ا ، لأكل ، الوضوء، النضافة ، كلو برا الموية ما ببقى ضمة.
الشكية لي الله لحقتوا تقرطوا الموية ؟؟؟؟ الله بهلها من السماء ورحم العباد بالماء والهواء .
جيتو إنتو تحمدو سيدكم كملتوا الخراب كلو . ما فضلتو شيء من خراب ودمار, بكل الطرق والسبل , قبلتوا على الموية وبتدوروا تعطشوا الناس بعدما جوعتوهم ؟؟؟
كل شيء عرفناه النهب ، السلب ، اللفحي ، الهجائم ، الرجائم ، الكضب ، إنتهاك الحرمات ، بيوت الأشباح ، الإعتقالات ، والخج في الإنتخابات .
التزوير، و التجارة ،بالدين , قتل الأبرياء وأكل مال اليتامى.
تأكلوا الأكلتو بت بابكير , ويلم فيكم مرض السل يخرت لحمكم ويخلي عضامكم زي جناح الطير ,,
بنيتوا العمارات ومليتوا البنوك بالدولارات ، ضيقتوا المعيشة على خلق الله , وشردتوا الناس وشتتوهم بالبلود. وقسمتوا البلد نصين....
وبعد ده كلوووو لا كليتوا لا مليتوا , برضوا بتتسابقوا على عذاب البسطاء من الشعب الفضل!!!
السويتوهو كلووووو ده ما كفاكم ولا غناكم ، وما شايفين روحكم ظالمين الشعب المسكين .مخير الله ..
الشعب البقابض رزق اليوم باليوم ! الغلابة البعيشوا بي رزق اليومية برضو لحقتوهم وداقرتوهم في رزقهم البسيط.
و شلتوها منهم جبايات وحق نفايات , هو نفايات زاتو ما عندهم عشان تجوا تزاحموهم في رزق اليومية الملقط بي عرق الجبين وما لاحق يملأ .الهين .
يرجعوا آخر اليوم وجع في اليدين والكرعين , وهموم تكفي كل الفاتوا والقاعدين من الحيين والميتين .
وبي حالتهم دي كلها برضو ساكنهم وتلاقطوا منهم ؟؟
يلقطكم دابي الحواشات اليرقدكم ود الأحد كلكم في فد يوم ..
زي ما لقطتوا رزق الغلابة والتعابة وسويتوه عمارات وعربات.
ده كلو عرفناهو ، كمان بتدوروا تحرموا خلق الله من الموية ؟؟؟؟ الموية الزرقاء دي يا الشرفانين !!!!!
بحريـــــــــن إتنين شاقات البلد نصين , يشقكم تمساح الدميرة ويخلي باقيكم مخاريق و ركب ....
ناس بري ان تاوقوا ساي بالحيطة بشوفوا الموية الجارية من طرف البحر .
بي قوة عين وإهمال يدخلكم موسوعة جينيس العالمية ، تقوموا تقرطوها عليهم وتضيقوها وتعطشوهم بالأيام ؟؟
عطش عدــــــيل كده والبحر يقدل في نص البلد و موجاته تتخابت ليل نهار تقالد القيف؟ يقلدكم نكير واحد ورا التاني زي ما استكتروا الموية على عباد الله ؟؟
موية !!!! موية يا ناس !!! موية الله البهلها على العباد . تمسكوها وتعطشوا الناس ؟؟هسه عليكم الله ما بتخجلوا ؟ دي ما خيبة كبيرة عليكم قدام كل العالم ؟
قاعدين في القصور وتأكلوا من الصباح للسحور , وتشربوا العصائر والشواهي واللذي منو يا تجار الدين . وتحرموا الناس من موية البحر؟؟
تشربوا الزاد المو رقاد بركة رب العباد وخير المراد,,
شاحدة ليكم الله تشربوا موية نار تحرق حشاكم وتهرد بطونكم ، زي ما هردتوا حشا الغلابة وضيقتوها عليهم وين ما قبلوا.
تضيق عليكم وين ما قبلتوا وموية النار تشربوها جغمة جغمة وتسقوا رفاقتكم بقة بقة , كل واحد فيكم يتكي التاني ويرسف حلقوا, لامن تبقوا ساردين فاقد التعليب....
غايتو بعد سواتكم الما سبقكم عليها فرعون زات نفسو ، باقي ليكم تتربسوا الهواء ,, آآي والله ياهو الفضل ليكم الهواء زااتو.
تقوموا تعملوا جباية وضريبة على هبوب الله , وتمنعوا بيع الهبابات في السوق . عشان المهمشين والغلابة الما عندهم مرواح, ما يتهببوا ,
النعمنو هبيبهم بنقص ليكم الهواء الفي سماء الله والرسول,..
وتقصروا العمم والتياب والطرح في السوق , عشان الغلابة برضو من ابهاتنا واعمامنا ما يتهببوا ,, و امهاتنا وبنوتنا ما يتهببن بي طرف توبهن وطرحتهن .
كل الرجال تحموهم لباس العمم , آآي عشان ما يتهببوا , يتهببوا ليه ؟؟؟ يلبسوا طواقي بس..
قوم يا ابو العفين لف السوق واطلق شفعك من كلاب الأمن الملقطهم من طايوقك, وقول ليهم امسكوا الهواء من عباد الله ,
ياهو الفضل ليكم هو بس , حتى الجرائد بعدما يقروها الناس ، شيلوها منهم من المواصلات , عشان ما يتهببوا بيها.
الشعب ده ما لازم يموت عشان إنتو ترتاحوا , آآي يموت كلو , وتقعد إنت والديناصورات رفاقتك المعاك .
تقدلوا وتبرطعوا بي حقهم النهبتوهو وسرقتوهو, تقعدوا براااااكم تتراقصوا ، مو ياهو ده تفكيرك آآآآ المشاتر ؟؟
اكيد نافوخك بقول ليك كده , مو نافوخ مصوفن ومعفن ..
لكن مي دايمة ليك يا المنطط عينيك، ومدرق إضنيك .
وحات الله مي دايمة ليك ام بنايا قش ... هلا ،، هلا على الختروا وخلوها كيمان كيمان القروش ..
و مشوا فاضيين قبلهم وقبالهم معلمين الله من فضائل الدين.. اطراهم كان فيك قلب !!
كان بتدوم كان دامت لي غيرك, اتلفت عاين وراك وقدامك ، جوة وبرة البلد، وشوف الظلمة الزيك ,
جارت عليهم الدنيا وبقوا عبرة لمن يعتبر. وحق الناس الله بخلصوا في الدنيا دي قبال الآخرة , كان بتخافوا الله وبتتذكروا الموت البفرق الناس, لو بتطروا القبر وعذابو.
لكن الزيكم يا ابو العفين وجماعتك التانيين ناس دنيا سااااااي ودنيا ما زي دنيتنا وكل خلق الله , لا لا إنتو دنيتكم حقتكم براكم , معاكم الأباليس والشياطين البشبهوكم , مبروكين عليكم
يا ويلكم وسواد ليلكم من عذاب الغلابة.. يا ويلكم وسهر ليلكم من دعوة المظاليم المافي بينها وبين رب العباد حاجز ولا حجاب..
اتقوا الله ووقفوا ظلمكم الفات كل ظلم العالم ، و رجعوا الموية للعباد.
بخلص منكم عطشهم بقة بقة ,, وجغمة جغمة .. اللهم آمين
يمهل ولا يهمل .
ودعتكم الله
|
|
 
|
|
|
|
|
|
|
 Re: *** موية موية .. جغمة جغمة .. بقة بقة .. *** (Re: osama fadlalla)
|
Quote: لاخت اسماء
سمعنا تحت تحت انو فيه سباكسيين قفلوا البلوفه ..وكده
وبعدين ود الباوقه في البوست بتاعو بيدعو رجال الدين لتفسيرهذه الظاهره ...
فما تشفقي محلوله باذن الله |
اسامة ود عمي فضل الله حبابك آآ يابا[
ديل الليلهم مشاتر يا ود امي
النعمنو فهمهم بقول ليهم ظلم الناس كلوووو حلال عليهم ويتاجروا بالدين زي ما دايرين
علا لما نطالبهم بالحقيقة والقصاص ، بقعدوا يسوا بطبططهم ودجلهم وعمايلهم الزكمت كل الأنوف
وبع ده يغالتوك في ود عينك ,,
دحين يا خوي فش غبينتك ساي في كل حاجة بتوجع البلد واهلو
وكتر من الدعوات عليهم
يمهل ولا يهمل
كتتتتر خيرك يا اسامة على الطلة الحنينة . تسلم يابا/B]
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: الاخت اسماء
سمعنا تحت تحت انو فيه سباكسيين قفلوا البلوفه ..وكده
وبعدين ود الباوقه في البوست بتاعو بيدعو رجال الدين لتفسيرهذه الظاهره ...
فما تشفقي محلوله باذن الله |
الله يبشّرك بالخير والله يا عصام جبرالله.... لا خلاص يا أسماء... انت ولا كان تتعبي زاتو، الموضوع ده مسكوه ليك تب!
| |
|
|
|
|
|
|
|
|
 Re: *** موية موية .. جغمة جغمة .. بقة بقة .. *** (Re: مريم بنت الحسين)
|
| Quote: الله يبشّرك بالخير والله يا عصام جبرالله.... لا خلاص يا أسماء... انت ولا كان تتعبي زاتو، الموضوع ده مسكوه ليك تب! |
مريم يا بت امي حبابك ,,
كدي كلميني آآ خية
دحين انتي عطشانة ؟؟
ولا حاسة بالعطاشة يا حليلك ..
وينو يا يمة عصام جبر الله ؟؟
وحات الله شككتيني في عويناتي امات نضارات قعر كوباية
والله صحي
جريت تاني ودنقرت وصنقعت وصريت وشي وبحلق لامن عيني برقن
واطمنت ماني غلتانة تب
وقلت يا حليلا مريومة بتكون عطشت سااااااي من بوستات العطش والموية المشتهيها الطشت
دحين يا خية الكتب الكلام ده
اسامة ود فضل الله
مو عصام ود جبر الله
والله صحي
الله يديهم العافية الإتنين
تسلمي يا مريومة الحبيبة وغالية
بالحيل مشتاقين لي طلتك الحنينة زيك
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: مريم بنت الحسين)
|
Quote: هههههههههههههههههههههههههههههه...
والله يا اسماء الما بعطّش شنو!! ما شايفاني ساكه لي خمسة بوستات... ولو ما بكري بحذف لي بوستاتي...كان لحدي حسي اكون جاريه ورا عشرين...
|
لووووولز مريومة
خلاص يا بيبة انا مكابراك تب
بكري ده ما بنقدر
والله صحي
علا يا بت امي انا ببراك بي جردل موية ملان تلج
والله صحي
حباب طلتك ياخ
والبركة في الضحيكة دي
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: أستاذة أسماء يا إنسانة...ربنا ينصرك وينصر كل المظلومين فى السودان..هذه أوجاع شعب ممزق..
|
قرشي عابدون الزول الجميل والصحفى القدير
مشتاقين يا قريبنا
معقولة ياخ نحن في بلد واحدة
لوم اسفيري وكدة لووولز
شكرا يا قرشي ياخ لي طلتك الجميلة زي دواخلك
ونلتقي إن شاء الله
كل الود
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: هسع باقي ليك... الدين زاتو، مش خربوه؟؟؟
الناس ديل ح يحولوا نهار الناس، إلى ليل حالك حتى يخوون كخواء الثور أو كما قال.
هسع تفتكري الناس ما بقت تجعٍر عديل كِدا؟!!
تحياتي أسماء الجنيد |
عبد الي اخوي حبابك واريتك طيب
وحات خوتك الناس مش بقت تجعر بس الناس دي بتدور تجري امفكو في الشارع
وقريت ليهم في الراكوبة ا مس حوار مع ناس الشارع في امدرمان بخصوص إنعدام الموية في بلد النيلين !!!!
موية تنعدم في السودان حاجة تغيظ وتقهر بجد..
اها واحد من المارة قال ليهم والله الموية مافي والبلد مولعة نار إلا شديد
نشرك للموية لي انصاص الليالي عشان نملأ البراميل
قلنا الروووووب عديل والله ,,
لكن المغسة يا عبد الحي اخوي الشعب جوعر وقال الروب لكنو لسة ساااااااااكت ودي الوجعة هنا
ربنا يفرجها بس
شكرا لمرورك الجميل اخي الكريم وتسلم كتير
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: الموية شريان الحياة, إن عدمت الموية تاني فضل شنو ,
|
العزيزة أسماء،
كيفك وكيف الأولاد ومشتاقين. والزول الخليتو رواكم دا ما تعب. علي اليمين صاحبي الفاتح الجنيد الشاب الاصفر القيافة، لونو بقى أسود.
بخصوص الموية، الأبواق الكيزانية قالو لينا نحن بنعطشكم عشان تشربوا من الكوثر شربة لن تظمأوا بعدها ابدا.
أنا هسى خايف على الهوا. كمان يقولو لينا ما تتنفسوا واحسن ليكم تشموا ريح الجنة وان رسيحها لتشم من بعد كذا وذكذا ...
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
لووول يا استاذتنا اسما..والله لو صحفى قدير ما عارف !
دى كتيرة على شديد..تعرفى من 2004 عندى القيد الصحفى
بس صحافة صحافة ما مارستها ..اشتغلت مترجم مبتدئ بعد التخريج فى صحيفة
ناطقة بالانقليزية لاقل من تلات سنوات..ودى خبرتى فى مجال الترجمة الصحفية
اها يا اسما بس حنجيب المقدرة من وين مع العربى بتاعنا السمح دا..مرة المدير لقى
اسمو محشور فى مقال للاستاذ عبداللطيف البونى نادانى وقال لى ترجم لى المقال عشان انا
داير افهمو كويس وارد ليهو ...والله اليوم كلو بحك فى راسى عشان اترجم كلامو..فى مترجم فى
الدنيا دى ممكن يترجم مقال لعبداللطيف البونى ..مقال كلو بيكون مليان أم عصيبات وام ضنيبات وعشراقة هههههه
دى يترجموها كيف هسع !!والله الا اكان المدير يرسلنى اول للجزيرة تدريب على لغة ناس الجزيرة لمدة سنتين لوووول
طبعا المشكلة دى مرينا عليها فى علم اللغات..
وفى فترة عملى اتعرفت على ناس جميلين منهم الاستاذ قير تور تونغ عضو المنبر
ياخى شكرا على كلامك السمح يا استاذتنا
واكيد ح نتلاقى قريب
مودتى
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: saif massad ali)
|
Quote:
العزيزة أسماء،
كيفك وكيف الأولاد ومشتاقين. والزول الخليتو رواكم دا ما تعب. علي اليمين صاحبي الفاتح الجنيد الشاب الاصفر القيافة، لونو بقى أسود.
بخصوص الموية، الأبواق الكيزانية قالو لينا نحن بنعطشكم عشان تشربوا من الكوثر شربة لن تظمأوا بعدها ابدا.
أنا هسى خايف على الهوا. كمان يقولو لينا ما تتنفسوا واحسن ليكم تشموا ريح الجنة وان رسيحها لتشم من بعد كذا وذكذا ... |
أديبنا واخونا العزيز حامد يا اهلنا الحنان يا حليلكم والله
والله الشوق بحرين وكنار الجنيد كمان
كيفكم إن شاء الله طيبين إنت والوليدات وامهم الحبيبة الغالية
والله صاحبك ود الجنيد كب الجرسة شديد ونحن هنا ما قصرنا
لكن كان ما بنتلاقى كل مرة كنا كلنا جوعرنا لوولز
كان معانا في إجازة نص السنة ورجع مننا قبل يومين الحمد لله
عارف يا حامد ناس الإنقاذ غلبهم البسوهو وبقوا ما بخجلوا ,
يسوا سواتهم الشينة واي حاجة يتكلوها على الدين
كمان بقوا دايرين يستدلوا على بطشهم وجبروتهم بالقرآن والسنة
غايتو دي اليهود ما سيقوهم عليها
ايامهم دنت ياخوي اصبر ليهم
يمهل ولا يهمل
تسلم يا حامد وسلامنا الكتير لكل المعاك
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: saif massad ali)
|
Quote: وحات خوتك الناس مش بقت تجعر بس الناس دي بتدور تجري امفكو في الشارع
|
حلوة أم فكو دي...
صدقيني الناس تجعر....والله ما شغال بيها.
يدعون الله....برضو ما إشتغل بيهم.
ليه؟
لأنو الناس رضيت بالظلم.
الناس ما متمسكين بالدين.
الناس ماسكة فقط في قشرة الدين.
أو من قلة نحن يوئذ؟
لا...
بل أنتم اليوم كثير، ولكن ((غُثاء)) كغُثاء السيل، ثم لا يبالي الله بكم.
الغُثاء دا يا أسماء، هو الدفيس بتاع القش البتلاعب بيهو السيل كيفما شاء.
لكن...
نهايتهم فيما بينهم ليكون الخزي أكبر.
سلام
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: عمار نجم الدين)
|
Quote: اسماء ازيك
شوفي شغلك يا اختي انا دخلت لي ود الباوقة وقلت ليه سور المصحف 114 بلف واحد مافيهن عليكم بالتقوي
دحين ناس الدين ماعندهم حلل لناس ود الباوقة غير يقولو ليهم بطلو السرقة والنصب والاحتيال |
حباب السيف كيفنك آآآزول واريتك طيب إنت عارف يا سيف يا خوي
عينة ناس ود الباوقة الماسورتهم حلجت ديل هم زاتهم النجدوة للغلابة
عارف ليه
ياها شتارتهم دي وياهو كلامهم المقطوع من النافوخ هو البجيب اجل ناسهم
اسوأ شي الفساد والناس الفاسدة وظلم العباد
لكن كمان الأكتر سوء ياهو عينة الناس البتنافق وتطبل للظلمة
ديل حقهم براهم بعدين
يعني كلمة الحق دي إن ما بتدوروها خليكم بعيد واتفرجوا
لكن مافي داعي للنفاق بإسم الدين ,,
لا حولة ولا قوة إلا بالله العلي العظيم
وحسبي الله ونعم الوكيل عليهم اجمعين
تسلم يا ابو السيوف ياخ على الطلة
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
| Quote: الغُثاء دا يا أسماء، هو الدفيس بتاع القش البتلاعب بيهو السيل كيفما شاء. |
عبد الحي اخوي حبابك يابا
بالحيل بعرفو يا الحنين
إت قايلني بت بنادر ؟ ولا من جيل الحناكيش النسوا قديمهم وسماحة جذورهم ؟
وحات خوتك آآ يابا خيتك غبيشة من بطن الغبش اهلك اهل العوض الحنان يا حليلهم
آآي نعم اتغربت كتير
لكن يات ماتجي إجازة واسافر بمشي الحواشات والجروف
وإجازتي بقضيها وسط الحبان في بطن الحلة
حوامة ساااااي من فريق لي فريق
ومن راكوبة لي راكوبة
اتجغم في القهوة وآكل في البليلة والقيمات
عشان كدي لما اجي مسافرة بفك الجوعارة من دغشا بدري لوولز
والله صحي
صدقت والله في إنه الناس إستمرأت الهوان والذل من الكيزان
والله سكاتهم ده واجعني من جوة
لمتين يعني العالم دي تمرق برة ؟؟ لمتين حا يفضلوا إمعة وتابعين لي ناس منزوعة من قلوبهم الرحمة وبتجاروا بالدين وكتاب الله !!!!
الله غالب يا خوي
اقول ليك حاجة والله الناس الساكتة دي كتاااااااااار مش في البلد بس
والله هنا في الأسافير راقدين بالكوم , البمنع شنو نقول كلمة الحق في زمن الظلم
الناس الفي البلد ربما خايفين من بطش الحكام ,, لكن عن نفسي ما بلقى عذر والله
الناس تخاف من الكيزان وما تخاف من الله ؟؟
كلمة الحق دي ربنا ما امرنا بيها ..
اها الناس الفي السودان قلنا خايفين
الهنا ديل مالهم ؟؟؟
حاجة تحير
تفتح ليك بوست بتاع ونسة وضحك وشعر يجوك كيمان كيمان
تجيب بوست فيهو قضية حياة او موت وتتعلق بحياة اهلنا المهمشين
وتقول الحقيقة المي غبيانة على زول
يقيفوا معظمهم مكتوفي الأيدي متفرجين !!!! إلا من رحم ربي ....
بالجد شيء مخجل
انا عن نفسي سوما بت الجنيد ا بعلنها دااااااوية وللجميع وهنا في البوست ده
والحاضر يكلم الغائب ، إني ديت الشعر إجازة مفتوحة
اللهم إلا هجاء في بنو إنقاذ ’’ تب ما برحمهم تاني إلا ينقلعوا ويريحوا الناس
ولا نامت اعين الجبناء
يمهل ولا يهمل
ودعتك الله وكتر خيرك يا عبد الحي اخوي
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: العزيزه جداً بت الجنيد
تحية طيبة
تسلمي ويسلم قلمك البنقط حكمة ووصف لما الت اليه احوالنا
تسلمي ويسلم قلمك الذي وصف حالة السودان حتى خنقتنا العبره
وان شاء الله كل ما كتبتيه من دعاء يسمعه ملاك ويقول
امين بعد وضعن اخر نقطة في
ما كتبت والله الناس ديل وجعوا البلد حدّ الموت ...
ما فضل عير نقول
مين يشتري النيل
مين يبدل قبة المهدي بفتيل ريحة |
عمار ود عمي نجم الدين ,, حبابك يابا و أريتك طيب
وحباب طلتك الحنينة وكلامك البرد الروح في الزمن البضيق الروح ويشحتفها
تسلم إنت يا ود امي على كل السمح الوشحتني بيهو يا الدخري
ربنا يقدرنا نقول كلمة الحق في الزمن الضلال
وربنا يسمع دعاء المظلوم ويرد الحق لي كل المظلومين
ويبعد من اهلنا الكابوس الجاثم في صدورهم 22 سنة
22 سنة الناس مطحونة وممكونة وصابرة
وديل لسه بتمادوا في عذابهم وبتلذذوا بي قتل الأبرياء من اهلنا الغلابة
صدقت والله ديل ما فضل ليهم شيء ما عملوهو
هسة قالولك ماهم بايعين موية النيل
وحات خوتك قالوا الموية بتتباع بالبرميل في السوق والخلق تشتري فيها بي 25 جنية !!!
موية زرقاء في نص الخرطوم الفيها مقرن النيلين والموية يبيوعها بالبرميل !!!
النبي ده مو شيتا يجنن عديل ؟؟
حسبي الله ونعم الوكيل عليهم جميعا
يمهل ولا يهمل
كتر خيرك يا عمار اخوي وشكرا على الطلة يا ود الفريق والحلة
تسلم يا رب
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: فيصل محمد خليل)
|
Quote:
لو مافي موية
ما تشربوا عصير
________
جينا نسلم |
يا ناس فيصلنا يا اهلنا المنكم طولنا
سلام بي قلدة محنة يا خوي وتسلم الطلة يا قريبنا
قلت لي نشرب عصير؟
غايتو نحن ناس الجنيد ممكن نشرب عصير قصبنا قصب السكر
لكن الماعندهم قصب ولا عونكليب يلقوا العصير وين
ولا ده يكون عصير نواشف لوولز
ذكرتني نكتة وحوار كان في الإذاعة عن غلاء العيش
يشهد الله سمعت الكلام ده براي
شوف الناس كانت بتتكلم وتحاور في كل اجهزة الإعلام وتقول الدايرة تقولوا
ما زي ناس تكميم الحريات ديل
اها الحوار كان مفتوح وعلى الهواء ولكل الجمهور,, وجايبين مسؤل يرد على إستفسارات الجمهور
اها الناس تشكي وتبكي من غلاء الخبز
وكل زول يتصل يفش غبينتو والمسؤل بسمع والمذيع ما بقاطع زي مذيعين الزمن ده
اها المشاترين كتار يحمدوا الله
نطت حنكوشة في التلفون يشهد الله بالحرف الواحد قالت ليهم
طبعا بي صوت الحناكيش داك
يا جماعة ليس بالخبز وحده يحيى الإنسان,,
شنو إنتو عاملين ضجة و زوبعة في الفاضي وقالبين الدنيا
انا في رأي مافي عيش خلاص ما مهم
الناس ممكن تأكل بسكويت بي لبن لوووووووووووووووولز
نان خلولها صفحة ترقد عليها
المذيع والمسؤل بقوا في التفكهم من الجمهور
نهزوها نهز صاح الناس , وسمعوها الما سمعتوا من يوم صنعوا البسكويت
قال بسكويت بي لبن قال !! وكمان عصير !!
شكرا يا فيصلنا على الإستراحة الظريفة زيك
ما تطول الغيبة بالله
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: اسماء الجنيد)
|
Quote: يا اسماء
ماري انطوانت ، زوجة لويس السادس عشر ،ملك فرنسا، المعدوم في عام 1793 .
الشعب كان ثائر و طالع مظاهرات لانو مافي خبز
فهي طلعت على الشباك وشافت ملاين الفرنسين
طالعين مظاهرات فسالت الحاشية في شنو الناس دي
طالت الشارع
فقالوا ليها طالعين مظاهرات عشان مافي خبزفي البلد
فقالت قولتها المشهورة
لو مافي خبز ليش ما يكلوا جاتو !!!!
|
_______
جاتو نوع من الكعك
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: فيصل محمد خليل)
|
Quote: وحات الله مي دايمة ليك ام بنايا قش ... هلا ،، هلا على الختروا وخلوها كيمان كيمان القروش ..
و مشوا فاضيين قبلهم وقبالهم معلمين الله من فضائل الدين.. اطراهم كان فيك قلب !!
|
سلام يابت الجنيد الاصيلة،
هم الأن مع اللغفى ما متذكرين أى قيامة ولا حساب ، ديل عايشين اللحظة وبس ، والمثل بقول تبنى تعلى تمشى تخلى، دا حقوا يختوهو حلقة فى أضنينهم.
| |
|
|
|
|
|
|
|
|
|
Re: *** موية موية .. جغمة جغمة .. بقة بقة .. *** (Re: Nagat Sid Ahmed Elshiekh)
|
Quote: سلام يابت الجنيد الاصيلة،
هم الأن مع اللغفى ما متذكرين أى قيامة ولا حساب ، ديل عايشين اللحظة وبس ، والمثل بقول تبنى تعلى تمشى تخلى، دا حقوا يختوهو حلقة فى أضنينهم. |
والله صدقتي يا بت الشيخ
حبابك يا خية
وفعلا زي ما قلتي يا نجاة ديل ناسين الآخرة وعذابها
واتعودوا على الكذب والنفاق والخج والتزوير
لكن ايامهم دنت
عشان كده بقوا يبطبطوا
تسلمي يا غالية وشكرا على الطلة يا نوارتنا
| |
|
|
|
|
|
|
| |
اسماء الجنيد
osama fadlalla
مريم بنت الحسين
لؤى
محمد أبوالعزائم أبوالريش
قرشى محمد عبدون
عبد الحي علي موسى
حامد بدوي بشير
saif massad ali
عمار نجم الدين
فيصل محمد خليل
Nagat Sid Ahmed Elshiekh
فيس بوك
تويتر
انستقرام
يوتيوب
بنتيريست