لم افرغ من كلماتي ناعياً بن البادية حتي تدلي أليَّ من اعلي هاتفي نعي "فَافُوية"..
فإبتسمت ..!!
يا لها من رحلة !!
هي كلها سبعطاشر سنة مكثتها هُناك وخرجت كَتِيهِ موسي من غير عودة إلي ارض الميعاد ..!!
تساءلت في حيرة ما هذا الحشد من العواطِف والإنتماء وكأنما توقفت حياتي كُلُها هُناك وانا بن السابعةُ عشر ؟
الشفيف محمد يوسِف موسي ..
قال ...
كُلُ عاطفة تجيب عواطِف
والمشاعِر ما بتروح ....
الحديث عن "فافوية" ببدأ " بالتُكُل" ورائحة الكِسرة البايتة .. داك إسمو "طبق الكِسرة" ..
والغريبة بِقعُد سنوات طِواااال " كَطبق كِسرة " لا بفوت لا بموت لا بِترقي !!
كَك كِدا دا بس طَبَق الكِسرة ..!
والله تتطاير بعقلي الذكريات وتتقاذفُني الخواطِر كَوِرد سرابات الحَمام إلي ماءِ السُكر او دفق حبات العيش له ارضاً ومخيلتي وحالي كمن يريد إدخالَ "بشكيرٍ" في فتيل بنسلين !!!
نحنا ناس بحري لا نعرِف المطاعِم طبعاً ..
ربما نتوقف عند دكان "صالِح اليماني" اللِصِق بيت ناس سيف بادي بتاع عمك تنقو المجاور لي مستشفي بعشر بتاع المجانين ..
بي كُورية مَوَردَة او بستِلة فول وزيت سِمسِم عليها جِبنة او موية جِبنة حسب الفَكة زيادة مِلِح !! ..
انا ابداً ما شُفتَّ لي زول مجنون جابوه مستشفي بعشر دة !!!
اول مرة امشي مطعم أقُعد وآكُل ساقني ليهو محمد عبدالله اخو "اشولي" نسيب محمد ميرغني الفنان ..مطعم جوار وطنية بحري ، مرة غِشيتو في النقل الميكانيكي كان سايق المارسيدِس البيضا بتاعة محمد ميرغني وزير الخارجية !!
إذ ما ذلتُ اتساءَل وقد تركني ود " فاطنة عبدالله" هذا في حيرة من امري كيف لِرَجُلٍ كهذا عزيز قومِهِ ان يآكُل في مطاعِم السابِلة الكرماء بعيدي الأهل والأمهات ؟
ساعة جيت اركَب قِدام لقيت لي عِلبة مِكياج زحيتا وضِحِكتَ !!
قال لي ابداً يا عادل دي عربية ناهِد ابو عَكَر "وزير مفوض" في الخارجية ما بتفرُز عربيتا من عربية الوزير !!!!
وناهِد ابو عكر دي دبلوماسية سودانية "سمحة" لابسة موضة الظاهِر ناس اللنغاز ديل ركبوها التونسية ، عشان كِدا إستغربت من حمدوك دة إحتمال يكون كَوَن حكومتو دي والنور كان قاطِع !!! فديك رفدوها ودي رفدوها ، شِن جاب لي جاب !!
بدر الدين عوض والِد دكتورة منال بدر الدين وناس جاز العقارِب كانوا مزعجين الحي دة إزعاج شديد بالبرووفَات بتاعة جاز العقارِب ودايماً ما اشوف ليك كمال كيلة داخِل عليهُم اقوم انسي كِلمة استاذ دي اقولو إزيك يا كمال احياناً ما بِرُد لي السلام !! متخَيل لي فاكِر نفسو خواجة !!
ادخُل المطبخ اها كان لقيت بامية مطبوخة بي لحمة ضان بقعُد عندهم واجُر لي جلابية من جلاليب صلاح" سُرنجة" ولدا واقيل هناك ..
لقيت اي لغاويس بواصل لغاية بيت "فافوية" بالنفاج ادخل المطبخ افَتِح الحِلل ..
البيوت دي كانت كلها فاتحة في بَعض بي نفاجات ..!!
بقوم ازازي بين أمونة وفافوية ..
لكن غالِباً ما أرسي عند فافوية !!
ونرسل مازن ود محاسِن لي امونة خالتي تجيب لينا كورية ملاح من هِناك ..
ول نرسِل كابتِن الجِد لي فافوية " فايس فيرسا " الشي الجميل إنو هِن عبارة عن بيتين مفصولين بي حيطة فيها نفاج بابو زنكي يتلزا وررر تدخُل غادي علي امونة وررر تجي بي جاي علي فافوية بي جاي زي بيبان البارات في افلام الكاوبوي يوم الأربحا في تلفزيون السودان ساعة كان تلفزيون !! ..
المطبخين بيناتُم في شُباك كبير من غير باب دي تطبُخ بي هِنا وديك شادة حِللا بي هناك والرطانة شغالة ، انا ساعة ازورِن بقول ليهِن ادوني المفرمة دي بفرُملَكَن اللحمة ، فادخل رقائق اللحمة بي فوق المفرمة تطلع بي هناك لحمة مفرومة بسون منها الكُفتة بعد يلخبتوها بالشمار ودي طبعاً رفاهية ، وافرُم واصغي لحديثِن العذب الجميل ،
وبمناسبة الرُطانة دي ، دي لُغة حنينة جداً ،
انا ما بفهما لكن بحِسها ، زي حقيبة الفن يوم الجِمعة واللمين برهان يقول ليك جسمي المنحول براهو جفاك يا جميل الزي ، براهُو براهُو..
يعني شنو مثلاً ؟ زي بروة الصابون مثلاً..
وبعدين اذا جا خبر موت في الكلاكلات ول امبدات ول الحاج يوسِف من الدُغُش ، ترفع توب الساكوبيس الفي وشَك وإنت نايم في الحوش وتقُش عينيك من القضا عشان تشوفِن ، كان امونة ، كان آمنة طاهِر ، كان نور الشام او زينب احمد ول فافوية ..
تشوف تيبانِن منصولات قُصاد الكَريشة ، والراس كاشِف والمساير يضايرَن فيها حول اللضان وتنزِل لا تِحِت تشوف السيقان وجزمة الزيزي السودا ، ونقة رطانة ما تفهَم منها إلا كلاكلني ، أُمبدني ، هاج يوسفني ، وريحة سيدي علي ول بت السودان يجيبا ليك الهوا في سريرك داك ، اقوم اقولهِن بي صوت الصباح المقروش داك " شوف الكريشة" !! ها حريم غطن بطونكَن دي !!!
إلي إلي ويي بيويي ود شامة مسوب القني ، يا مجنونة إنتي ..
هذا كان يعني عندي الحُبُ والجماااااال والسلاااااام ..
والإنتِماءُ والطمأنينة في هذه الكرةُ الأرضية المتأرجِحة في هذا الكون ...
🌹🌹
الغدا حصير مفروش في الوطة بكون مطوطو رب يختوهو وتدقشو بي كراعك فو ينفَرِش !! وجردل نخُت فيهو قالِب تلِج كان بي هِنا ول بي هناك قعدنا اكلنا فيها ..!!
قِمَة الإشتراكية العِلمية ، تحير كينز وآدم سميث مؤسسين نظرية العد التناقُصي في ركايز عِلم الإقتِصاد .. ..!!
ودي صِفات وجدتها هنا في امريكا الشمالية عند "الهاترايتس والمنانايتس" احدثكم عنهم في رِحاب اوسع ..
محمد عباس ود فافوية زول سكوت ما بتكَلَّم كتير شغال في شركة شيكان للتأمين بتاعة عز الدين السيد !!
بعد ما ناكُل "وندشا" اقوم اشاغِلا ليك !!
اقول ليها عليك الله يا فافوية شَلَخوكِ بالموس دي وفصدوك قَطَّعوا وشِك دة كِدا ما خلوا فيه جمبة سالمة عشان في اللاخِر تجي تعرسي عباس دة ؟
تقول لي يا ود شامة والله إتَّ اكتر زول شاعِر بي وجعي وفشفاشي المهرود دة !!!
آمنة طاهِر مرت عباس سعيد اخوها كانت عندي تمثل "يوتوبيا الفرح " من النُبل ، وبراح العهد الطيب من السماحة والطيبة والمَّودة والجماااال والسلاااام !!
ويبدو إنها كانت مرة غريبة وسط هذا الدم المترابِط ..
عباس سعيد اخو فافوية دة كان بوادِد زوجتو آمنة طاهِر دي مودة حقيقية ، بي لُغة اليوم "بِحِبها" وهي في واقِع الأمر تستحِق هذا التقدير ، مرة تِتحَبَّ ، انا زاتي كنت بحبها والله !!
ماكانت بتتكَلَّم كتير ربما لِعائق العربي وطلاقة الرُطانة !
انا طبعاً جازِم إنو ما من إنسان يقابِل آمنة طاهِر إلا يقع اسير المودة الغير مشروطة ..
لا تملِك غير إنك تحِبها ..
ما عِندك بهذا الوجه الطيب من خيار بل لا تترك لك خياراً آخَر ..
آمنة طاهِر إمرأة بيضاء من غير سوء !!
تنظُرُ إليها لاتري غير الإطمئنان والرِضا !!
"إلي إلي إلي وي بييييييوووي " يا ود شامة ..!!
مسوبَ القني !! مجنونني !!
آمنة طاهِر لا تُجيد العربي ولكن من حُسنِ دواخِلِها استحسَنُ المعاني والمرامي والمقاصِد !!
واقِعاً والله كُنتُ ألاوي المقاصِد حتي تُلائم حبي لها ؟ وكمان فافوية زي آسيا الناس دي بِتكَلموا بي سُرعة شديدة !!
اتَوَسَطَهُنَّ جالِساً علي الحصير ارضاً وسط الغُرفة بين أسِرَتِهِنَّ وهِنَّ مِكوعات ..!!
واضَعُ رأسي علي رِجل أمي نور الشام وهي تعبُث بشعري الكَث !!
لا أفهُم حتي حديث أمي مَعَهِنَّ ، غير بعضُ كلِماتٍ مُعربة ..
لا أعرِف لماذا هذا الإصرارُ في الإمعان لِنَسبِنا للأُم وكأنَّ الرِجال قد اتوا من عطارد ؟
كثيراً ما اتوقف لهذا التداخُل في "الآنصربولوجي" وهي قبائل الحلفاويين شمالاً ، بعدهُم بجو المحس السَّكُوت وهم متداخلين بالتصاهُر ، ياتي بعدها الدناقلة ..
العُنصُر العربي يبدأ بعدهُم نزولاً بقبائل الشايقية والجعليين ، والبديرية الدهامشة توغُلاً لوسط السودان ..
انا طبعاً والدي خالَف هذا التدَرُج المتوارث فهو من الجعليين البديرية "النافعاب" فتذوجَ "محسية" عشان كِدا بقولوا لي "ود العربي"
وكأنَّ حال أبي كَحالِ موسي الكليم ..!!
ربما جاءتُه بإستحياءٍ كحال بنات يعقوب
إختارنَهُ قوياً اميناً مِفضالَ فجلسَ ابي حتي مماتِه وقُبِرَ جِوار "المحسية" الرطانية وأبيها وأمها وأخاها وترَك جِوار أهلِهِه في الممات كشأن مكوك ملوك النيل ....
ووالله لو إستأجروني كموسي الكليم لأجِرتَهَم ومَكَثتُ وسَط هذه السماحة والجماااال والسلاااام ولا أبالي للزمن وأقبَرُ كما قُبِرَ ابي ..!!
النقل النهري "الوابورات" والنقل المكنيكي قد اتي بهذه القبائل من الشمال وإستقرت هذه القبائل بعد خروج الإنقليز في منطِقة الدناقلة جنوب .. وربما لوجود حدود البحر توسعت شمالاً ..
بحري عِقدها الإجتِماعي يرجع لإنها مدينة عمالية ..
توفي عمنا عباس وتركَ لها اربعة بنات وثلاثة من الفِرسان الأفاضِل ..
فافوية عَلَّمَّت كل الاولاد والبنات ..
فرفدت رغم ضيق ذات اليد الإنسانية بأنبَّل اولاد وبنات مروا عليَّ في حياتي والله !!
هي عندي حقاً كَمَن عَّصَرَت كُل الجمال والإنسانية وقدمتا لينا في كآسة زهرية تنظر إليها ماثِلة ..
هو منذل متواضع جداً بهِ اربعة غُرَف و حوش صغير ، ومطبخ قد اكلَ منه حتي النميري الميلوحة ..!!
كلما تَطاوَل الناس في الأسمنتي دَخَل السُحتُ وتِبِعه البُخل وخرجت البَرَكَة من نفس الباب وتعالت الأثَرة وحُب النفس تعالي تِلك الحيطان العالية !! البيوت دي ما فيها باب بِنقَفِل والله !!
وانا عندي قِصة طريفة بحكيها دايماً !!
وهي إنو حتي الحرامية ساعة يضايقُم بوليس السواري بِلِزوا الباب ويدخُلوا آمنين مجاورين !! ..
آمنة طاهِر بتصحي تقولهم بالعربي المكسر واللاهي يا وليدي ما عندنا قروش لكن ادخلي المطبخ أُكلي كان إنتي جعانة لكن ماتنسي اقفلي الباب من الكديسة !!!
هذا سلامُ روح مع الأشياء والأحياء ..
فآمنة طاهِر وصاحبتا فافوية ما عندهُم مُشكِلة إنو الحرامي يِسرِق القروش !!! ، بقدر ما هي اصلاً القروش بنهاية ذلك اليوم الذي مضي ما موجودة كفائض ..
ودة قِمة التوحيد الما مَشَنلو هِن جامعة ازهَر ولا جامعة إسلامية او سرقن من ديوان ذكا !!
لانو الليلة الله في !!
وبكرة الله في كذلك كما الأمس !!
ديل سَبَقَن سيدي علي في مَعرِفة كرم الله تعالي ..
وتذكرت قول السهروردي ..شيخ المتصوفة ..
إن تَكُن لله قائم ..
لم تَكُن بل أنتَّ هو ..
أنتَّ ظِل الشَّمسِ في نِبراسِهِ ..
والشَّمسُ هو ..
كُلما نِلتَهُ ، عنهُ حَصَّلْتَّهُ ، مِنهُ إذ كُنتَّ هو ..
ودي قِيَم عِرفانية حأنتَظِر لغاية ما فافوية تزورني وتقول لي لقيت كلامَك صاح يا وليدي بي غادي !!
لكن صَدِقُوني من إنهُ ما من بص تَحَرَكَ من بصات دنقلا قاصِداً الخرتوم إلا وبه من كانت وجهتهُ بيت فافوية ..!!
🌹🌹
الآن بِذِهابِها فقد إنقطعَ العَشَّم والحِلَل سوادا صُوفَن بقي قُطُن ..
وتُكُلا داك ذهبت بركتو لانو ولدا الكبير محمد عباس هاجر لي بلاد الشحتفة ، زي اولاد أمونة قاموا ساقوها السعودية "ومطعم الإخلاص" الفاتِح بي شباكو علي الشارع إتقفل وتحرك الأسمنتي نحو الشُباك داك زي خدار موية القعوي في الحيط وذهبت بركتو وساعة جات راجعة من السعودية خلتُم ومشت فاتت مقابِر حِلة حمد !!
سيدي علي كانَ يُطعِم الناس بقروش الناس !!
هذا كرَم ..
ويأخُذ الفايض لي جيبو وجيوب اولادو ..!!!
وهذا إستِغلال !!
وكانت فافوية تُطعِم القاصِد، والسابل، والغاشي ، والمحتاج ، والتائه، والمتردية، والنطيحة ، وما اكَلَ السبع ، والغارِم ، والفوق الرقبة ، والماشي، والماكِث ، والعدو ، والجار ، والبعيد ، و الغريم إن وجِد وقطعاً هي لا تُعادي وتُخاصِم !!
ولا ادري ساعتئذٍ من اين تأتي هذه المرأة بهذِهِ الأموال ؟
تِلكَ هي البَرَكة وسِعة الرزق ..!!
أغرِفُوا اللَكِل دة يا بنات !!!
آمِرة فَتُطاع ..
انا لا انعي دامِعاً إمرأة عابرة في هذه الحياة حيث الملتقي والذِهاب !!
نشأتُ وكنتُ اعتقِد الي وقتٍ قريب من إنها إحدي شقيقات والدتي كأمونة وخجيجة ،
كان لا يُقطَعُ في أمرٍ إلا وحضورُ ما تَري وشورتِها يعزِمون بعدها متوكِلين !!
قولوا لي بربكُم !!!!!
كيف لك ان تدخُلَ بيتاً فيهِ تقولُ كلما تريدَ ان تقول وتسمعُ كُلَ ما يُقالُ إليك ..
إذ لا مَخْمَصة ولا مَشَقَّة ..
تلك هي الحياةُ عندي !!!
كُنا نَجلِس في الكراسي علي شارِع شمبات تِحت شجر النيم !!
حتي مرور آخِر ارتال بنات مدرسة العِزبة ذوات الجلاليب الطوبية ..
يجي منادي قالوا ليكُم الغدا !!
تمشي محل موضِع الصينية ولا تعرِف هي في ياتو بيت !!
ناكُل ونُطرِق السمع للرادي نشرة تلاتة مع عمر الجزلي وقباني ومحمد سليمان ضو البيت ، واحمد عبد الرحمن وساعة يجِيبوا صالحين ود الشلالية بكون في إنقلاب ول مصيبة زمان حصلت في البلد !!!
أُمي نور الشام تقولَك ود الشلالية محمد خوجلي صالحين دة زمان في حوش سيدي علي كنا ندقو نشيل كورية ملاحو !!
عادي جِداً يقيف الصباح بروف محمد سعيد حربي عضو مجلِس الشعب اخو فافوية ول عز الدين السيد ، أو عوض دكام ، و دكتور عبدالله سعد ، ول بروف محمد هاشِم عوض ، ول بروف علي بدوي ود سكينة ، ترباس ، حسين شندي ، فيصل العجب ، انس العاقِب ، تيجاني حاج موسي ، وكثيرون بالشُباك داك لي كباية شُب شاي بي لبن مَقَنَّن ومعاه منين وموية زير باردة !!! كراسي بلاستيك وتربيزة خَشَب في وسط الشارِع ..
التَدَيُن الغليظ دة جانا مع ثورة البترودولار ، اول من هاجَر طالِباً للمال هم اولاد الدناقلة والمحس ، فأتوا بهذه الغِلظة الدينية مع ما اتوا به من مال ..
فإنحسرت العفوية والتلقائية وسبط المودة المُشرع ..
كُنتُ عندما آتي من سفري ارتمي في احضان أُمي وخالاتي وأخواتي واهلي وعشيرتي حتي غرباء الجيرة ..!!
فافوية وأمونة مَشَن يخطِبَن بنية لأحد الأبناء!!
قاموا اهل العروس قالوا ليهُم العروس ما بِتٍصَافِح الرِجال !!! ؟
قالولُم كِفِن عاد الكلام دة ؟
قالولم كدي دة !!
قاموا قالوا لي اخو العريس خلاس أمِش إتَّ بي هناك المرة دي قالوا ما بتسَّلِم علي الرجال !!
قالهم هي لكن انا ماني راجل !!
انا اخو العريس !!!
قامت جات العروس مُنقبة ..!!!!!!
شوال فحم اسود متحرِك !!!
فافوية قاتلها سلام ؟
اجابت بإستِحياء !!
اهلاً وسهلاً !!
أمونة قاتلها كدي يا بتي افتحيلنا وشِك دة النشوفو !!
قاتلهُم لا انا منقبة !!!
فافوية قاتليهُم كلموا بِتكُم دي التفتح وشها دة !!
نتأكد للولد دة ما تقوم تطلع لينا ككو !!
زينب احمد بتاع تكسي ضرب ليها غنماية كتلا ..
زِعلت قالت لي بتاع التكسي واللاهي بِلاهي الأنماية الكَتلتيها دي يا بتاء التكسي ، والللاهي واللاهي أهسن من مهمد ولدي دي ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
د.عادل الحكيم
فيس بوك
تويتر
انستقرام
يوتيوب
بنتيريست