بجانب إحدى ستات الشاي في شارع النيل قريبا من القصر الجمهوري الصيني، دار هذا الحوار:
بالله إنت وزير؟
كيف ياخي!
إنت وزير وأنا وزير مين يسوق الحمير!
حمير شنو يا زول؟ إنت وزير دي سمعتها دعم سريع ولا شنو؟
انت وزير شنو؟
وزير الاوقاف وشئون الجن!
كويس الريس عمل وزير للحال الواقف دة.
لأ انا وزير اوقاف مش واقف! ولو ان برضو من اهدافنا رفع المعاناة عن كاهل الشعب.
انت دكتور ولا بروف ولا مهندس
لأ انا دكتور
نساء وولادة، ولا جلدية ؟ أطفال، ولا مخ وأعصاب، أعصاب برضو كويس لأنّ (بشبش) دة (بوّظ) أعصابنا! ولا تكون بتاع اطفال لأنهم مساكين ما بيقولوا الزول دة إرتكب خطأ طبي!
لأ أنا عندي دكتوراة في نواقض الوضوء!
كويس، شهادتك من وين اصلي ولا تايوان؟
يا زول كيف تقول كدة انا شهادتي، حاشاها لا مضروب ولا منقول من النت بتصرف.
وشهادتك جبتها من وين؟
من كوريا الشمالية!
دكتوراة دي ولا صاروخ باليستي؟!
لأ دكتوراة!
وما لقيت في الدنيا كلها غير الولد المجنون دة تمشي تقرأ في بلده؟ هسع لو كان نمت وانت بتناقش الدكتوراة يملوك دخان بمدفع مضاد للطائرات!
عندهم علم تقيل، ديل اتحدوا امريكا التي دنا عذابها!
يا زول اعمل حسابك انت ما دايرهم يرفعوا العقوبات ولا ايه؟
لأ ما خلاص الستة شهور خلصت الليلة!
علم شنو في كوريا الشمالية وعلاقته شنو بنواقض الوضوء؟
جات عليّ انا؟ عندنا زميلنا عامل دكتوراة في اللغة العربية في الصين!
دي تكون مضروبة!
أبدا اصلية لكن بس رخيصة شوية! هناك يدوك على حسب قروشك!
الاوقاف طيب فهمناها الجن دة شنو اوع يكون الجن الأحمر!
لأ، في الحقيقة نحن من الاستقلال ما فضينا من الشكل على الحكم عشان نعمل تنمية وكدة، مؤتمر الاستراتيجية الشاملة قرر ان نحن عشان نعوض السنين الضيعناها في الشكل دي، لا زم نستعين بالجن عشان نقدر نحقق التنمية المستدامة، ونرفع المعانة من على كاهل الشعب. شعارنا في الوزارة: جنا بتعرفو ولا جنا ما بتعرفو!
يعني شغلكم بس تعرفو الجن؟ وايه حكاية كاهل الشعب دي بتقولها كتير! انت من الكواهلة ولا شنو؟
لأ طبعا نحن بنقدم استشارات لأجهزة الدولة حول كيفية استخدام الجن. شعبنا كسلان شوية، بيحبوا يقيلو، واليطلع الفطور ما بيرجع الشغل. الكويس الجن ما بيقيل! وما بيطلع مظاهرات، عمرك سمت الجن عمل ليه عصيان ولا انتفاضة؟
يمكن برنامج اعادة صياغة الجن تكون نجحت! نحن ما قدرتو علينا!
والله نحن تعبنا معاكم جوعناكم وسرقناكم وعذبناكم، وبعد دة قاعدين زي الما حصل شئ، ناس (لواييق) ناس غيركم كان انقرضوا بدري لكن هسع جاينكم بالجن! ما دام الجوع ما نفع!
وأديت القسم ولا لسة
لأ لسة!
ليه؟ جوا ساقوك قبل أداء القسم (للمزيد من التشاور)
تشاور في شنو ؟ لأ انا مشيت في الحقيقة لأداء القسم لكن ما لقيت محل اقيف فيه، لو عايز تأدي القسم الا تصحى بدري وتمشي تحجز الصف!
ليه دة أداء قسم ولا صف عيش؟ انت يمكن ماشي تعمل انقلاب؟! كيف زول يصحى بدري ويمشي القصر لو قاصد خير!
والله نعمل شنو ياخي، الوزراء كتار، وطبعا دة شعار المرحلة، وزير لكل مواطن، الشعب دة صعب ارضاءه، ناس جنهم سياسة، تمشي جنب ستات الشاي، النس كها تنضم في السياسة، تمشي شارع النيل بدل الحب، قاعدين سياسة! عشان كدة مؤتمر الحوار قرّر يكون في وزير قصاد كل مواطن وبي كدة نقدر نكبّر الكوم ونرضي وفد المنافي!
وفد المنافي دة منو؟
لأ دة ما زول، ديل جماعة كدة قلنا الحمدلله شردوا خلوا لينا البلد، أول ما سمعوا بالحوار والحكومة الجديدة عملوا وفد وجوا تاني! شردوا على حسابهم ورجعوا على حسابنا!
وهسع حتأدي القسم متين كان ربنا هوّن؟
أنا كنت عاوز أمشي القصر بالليل احجز محلي في صف القسم بي حجر، لكن قالوا لأ حنعمل جدول، لقيت في الجدول عملوا لي موعد بعد ستة شهور!
يمكن تكون محتاج واسطة ولا حاجة عشان تأدي القسم؟
واسطة أكتر من دة شنو تاني؟ (وأشار الى ذقنه الطويلة)!
لكن دي قالوا براها اليومين ديل ما بتأكل عيش! لو ساعدتها بدبّورة ولا شريط ! يمكن الأمور تمشي! أو تشمي الدعم السريع!
ويظل وزيرنا الهمام في إنتظار دوره ليؤدي القسم، حتى يساهم في رفع المعاناة عن كاهل الشعب ووضعها على كاهل (الجن الأزرق)!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد الملك
فيس بوك
تويتر
انستقرام
يوتيوب
بنتيريست