يا جماعة… السودان الآن حالو زي الزول الوقَع في حفرة وما لقى زول يطلّعو… قاموا الجماعة جابوا ليهو كامل إدريس وقالوا ليهو – “أنقذو”. الزول شاف الحفرة، شاف المريض، شاف البلد… قال- – “طيب… عندكم سلّم؟ – قالوا ليهو: لا. – طيب عندكم حبل؟ – قالوا- لا. – طيب عندكم جن؟ – قالوا- لا… لكن اتكلم إنت في الإعلام، يمكن يطلع الجن منو ”.
ياخي دي ما حكومة… دا مسلسل كوميدي!
رئيس وزراء… بالريموت كنترول
كامل إدريس دخل القصر لقى الوضع كالآتي
غرفة السيطرة والتحكم عند العساكر الزر الأحمر عند الأمن الميزانية عند لجنة الظل والمفتاح… عند زول ما معروف وين ساكن يعني الرجل رئيس وزراء… لكن شغّال “ديكور متحرك”. زي لافتة “مفتوح” في محل مقفول.
خطابه السياسي؟ يا دوب ناقصو يقول "تقدّموا يا رجال! بدل يقول “وقفوا الحرب”، بقى يقول “استعادة السيادة!” “الحسم العسكري!” “دحر المليشيا!” ياخي يا كامل… ده كلام رئيس وزراء ولا قائد معسكر الدفاع الشعبي؟
نحنا دايرين رئيس يقول “البلد ولّعت… أوقفوها”. مش رئيس يعمل فيها مذيع نشرة عسكرية. حكاية الـ100 مليار؟
دي ما خطة… دي نكتة** الرجل قال ليك: “هنجمع 100 مليار دولار لإعادة الإعمار”
يا زول… ده السودان ولا دبي مول؟ ده خزائن الدولة ولا شنطة عريس؟ ده اقتصاد منهار ولا حساب ولي عهد بترول؟
نحنا لو شفنا 100 مليون دولار، بنرقص! إنت داير 100 “مليار”؟ ياخي أبعد مننا… خلي الجن يضحك.
علاقته بالدول؟ الزول دا مشي السعودية جا عيان زي علاقة “الشاهد” بالفرح… موجود وما محسوب** الخليج يتعامل مع البرهان أفريقيا تقول ليهو: “منو ده؟” الأمم المتحدة تسمع ليهو زي ما تسمع لـ"محاضر ورشة" ورغم ده، الرجل كل يوم لابس بدلة جديدة وماسك فايِل، تقول بجيب حق العالمين.
الإنجازات؟
أها… ربّطوا الحزام** حصيلة حكومة كامل إدريس خلال أشهر:
لا سلام
لا وقف نار
لا غذاء
لا كهرباء
لا اعتراف دولي
لا إنجاز
لكن عندنا كم كبير ماشاء من مؤتمرات… تصريحات… شعارات… ولجان! والشعارات دي زي “ورق الصلصة”… منظر ساي وما في فايدة.
الصورة الذهنية للرجل في الشارع السوداني معلّقين ليهو ألقاب زي “رئيس وزراء جوجل ترانسليت” “المدني الوحيد في اجتماع عسكري” “الزول الطيب الملطوش” “زول قالوا ليهو أقيف… قام اتكلم”
والله السودان محتاج إسعاف… وكامل إدريس محتاج امشي يستمتع بالمعاش
يا جماعة… والله كامل إدريس رجل محترم جداً لكن وضع السودان دا عايز زول يشيل بلد، ما زول يشيل مايك! السودان الآن محتاج زول يعرف يطفّي النار، موش زول يقول “نعم… النار قوية لكن عندنا رؤية!”
الرجل مرهق، متعب، تايه، محاصر بثلاثين جهة، وبقى زي مساعد تدريس في فصل مليان شياطين.
عشان كده… لو في سرير فاضي في العناية المركزة … يا ريت نبدأ بي كامل… أما السودان؟ ده محتاج غرفة عمليات بحجم دولة. وانا منتهي السعادة بالدفاية حقتي الجديدة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
صديق مهدى على
Arif Nashed
فيس بوك
تويتر
انستقرام
يوتيوب
بنتيريست