في بورتسودان، هناك الشمس بتكوي الهدوم والكلام دا بيجلطك قررت حكومتنا العظيمة إنها بيتاسس لتجربة جديدة في الحكم هو الحكم بالمصادفة هو القال منو انو عندنا حكومة هي دا ما نادي لمعاشيين والعابدين الله قياما ونايم وقعاد والسبح الفيات يا حبة وزير الخارجية — هو أرفع درجة في دبلوماسية السودانية لكين ما مسكين دوريش وكمان مغبي ويطلع يقرأ ورقة كرتي بدل ورقة مجلسو الموقر وزولنا واقف بكل ثقة، لافح ليهو الكلام لايمين ولاشمال، هولا عارف إنو العالم كلّو قاعد يشوفه وهو بيعلن سياسة خارجية ما عارف منو اللي كتبها! واحد من المراقبين قال دي ما غلطة… دي منهج عمل في حكومة كميل ود ادريس الخرفان الوالي ظريف لكين بس امكن ينجلد خلال الاسبوع ؟ زولنا طالع في احتفال رسمي، واقف لط انا اللي ما عندي منصب رسمي بخاف من الفضيحة الاجتماعية بكون سكران عديل ما بمرق من بيتنا لكين دا شدة وصل قمة السكر بقي زي الغرقان في برميل مريسه وكمان مكبّر الله أكب" وبضحك في نفس اللحظة… دي اظنها سكرة يني ذاتا مزيج نادر بين البهجة والتكبير مابتلقاه ديل إلا في حكومة الامل الكرتونية صناع في الأزمات أما مساعد قائد الجيش، فهو حالة فريدة في الصباح يقول لن نسمح باندماج ولا آخر جنجويدي بالله عليك انت جادي وبعد ساعتين، قائده يقول سنقوم بدمج قوات الدعم السريع داخل الجيش انت يا مرسيلة العرقي كارب ولا شنو ارحم الناس البلد نشف العرقي القوي مع قلة الاكل بقتل عديل والمواطن قاعد بين التصريحين زي الطالب البقرأ منهج فيزياء ومقرر دراما في نفس الوقت.
وزير الإعلام فتح ليهو صدره وقال-- يا أمريكا ما تتدخّلي في شؤوننا!” وفي نفس اليوم، رئيسه ذاته يطلع - “نرحّب بمبادرة ترامب!” يعني باختصار الحكومة دي ما ضد أمريكا… هي ضد تنسيق كلامها. رئيس الوزراء؟ هذا أسطورة أخرى أكبر إنجازاته لحد الآن إنو افتقد سير العفش في مطار بورتسودان ووجّه بصيانته ياخي دي حكومة ولا إدارة مطار مدني ؟! واحد قال انو دي شروط خدمة الرجل هو عدم الاهتمام بالقضايا السياسية الكبري وباقي الدستة من الوزراء… ناس لدرجة إنو لو شفت واحد في الشارع وقال ليك أنا وزير ، طولي تتصل بالأمن العام تتأكد ناس ما عارفين نفسهم وزراء… إلا بيوتكم، والسواقين، والسكرتيرات البنلن ليهم الشاي
وفي النهاية، كل الزحمة دي، كل العبث دا، كل التناقضات دي… ديل ما بشبهوا السودان زي ما قالوا زمان ما بشبهوا الناس البتشيل البلد على ضهرها. ما بشبهوا تاريخنا ولا قيمنا دي حكومة ما بتشبه إلاروحا اللي ح تموت قريب دا … حكومة ضايعة في ذاتها، وبتجرّ البلد معاها في الضياع
انا بقيت اهتف في كل الوسائط يا دراويش العالم تضمنوا مع كامل ادريس وحكومته الدرويشه انا زهجت من الزول دا انتو زي كدا ولا صابرين امكن يمشي بقرار من البرهان #
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير ابو الزهراء
فيس بوك
تويتر
انستقرام
يوتيوب
بنتيريست