حسب نصيحة صديقي ( الاوبرابي)( مادينغو) وهو افريقي معرفة قديمة من زمن التاكسي وحتى عصر الاوبر وهو شخصية مرحة جدا وسط السواقين.. قابلني قبل ايام مصادفة امام فندق مشهور في (داون تاون دالاس) بعد غيبة سنوات وبدات علامات الكبر والجلكنة بادية على وجهه كما العبد لله وتسامرنا كثيرا حول المهنة ومتاعبها وكيف تاثرت بالكوفيد وفي اخر اللقاء زودني ضاحكا بنصيحة غالية جدا خاصة بنا نحن الاوبراب الجلاكين في هذه الايام العجاف حيث جففت الكوفيد جيوب الناس من المال وقلوبهم من الرحمة والشفقة وهو امر تاثرت به المهنة... فنصحني بضرورة التحلي بقدرات في الدراما وهي طريقة ذكية لجلب البقشيش تبدأ من المظهر ونصحني ان اقوم بجلب عصا مسنين من اي صيدلية ام تلاتة كرعين ولازم تكون مقزوزة في مكان بارز بجانب المقعد الامامي موازية للدركسون حتي يراها الزبون لاستدرار الشفقة وكمان لازم اثناء القيادة تكنكش في الدركسون مع سردبة للضهر اثناء القيادة وتعمل ليك رجفة وهوزيزة راس لزوم ابانة الجلكنة لكي يتعاطف معك الزبون ويبرك بالبقشيش السخي ومهم جدا عندما تصل للمحطة النهائية لازم تحاول ان تنزل وتمشي مع كعكعة وقحة باهتة بتاعة عجايز لتفتح له الباب كنوع من الاتيكيت وتعمل بعدها مترتع واقع في الواطة قدام الزبون متفنقل .. قال دي بتجيب بقشيش بن كلب الزبون هنا بحت جزلانو عديل... وكمان لو الزبون عندو عفش في الضهرية برضو انزل اتكعكع بعصايتك لحد ما تصل الضهرية ومعاها قنتة بتاعة زول تعبان ولازم العصاية بتاعة المسنين تكون بيسارك وتقوم تحاول تشيل الشنطة التقيلة من الضهرية و معاهنا قنتة بصوت ضعيف وفجأة تقوم واقع بيها في الواطة متفنقل علي ضهرك هنا الزبون ببكي عديل بس اعمل حسابك بشرط ما تزودها عشان الزبون ما اقوم اجيب ليك الاسعاف اشفاقا عليك واقطع عليك رزقك بتقرير طبي من المستشفى وملخصو اقولوا الزول ده كبر وبقى خطر على روحو وعلى الزباين وبالتالي غير مؤهل للمهنة.....لم اضحك في حياتي مثلما ضحكت في ذاك اليوم وانا في حضرة المسنوح مادينفو وهو لازال يصنع المرح وهو في ارذل العمر ( وانا كمان) هههههههه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
هشام هباني
فيس بوك
تويتر
انستقرام
يوتيوب
بنتيريست