الكابلي دا جزو أصيل من السودان ومن غناهو ومن ثقافتو ومن جمالو …ومن لغتو …ومن أي حاجه ياخ عشان كدا لما يقولو الكابلي مات ….لا شعورياً بتحس إنو في قيمة عظيمة مشت …وهناك ظلام كثيف قد سد الأفق …ومصاب جلل قد وقع .. لأنو كابلي يقتسم معنا التاريخ والجغرافيا والشعور وأفراحنا….. ( كابلي ) لما يغني بغني لي أي زول … بغني لي سودانية سمراء بتعمل في ( الغدا ) وصوت الراديو يحمل عبر أثيره كابلي وهو يصدح شايفك طربانة …فيملأها إحساساً وشجون وأخرى في طريقها للعمل ..وكابلي يداعب مخيلتها وأي صوت زار بالأمس خيالي …!! وثالثة تكاد الغربه أن تفتك بها فيأتي صوتك عابرا للقارات … … للجار والعشير ال كان أبوك بديه للغني والفقير ال كان أبوك حاميه ( يطبطب ) عليها فتمنحها طمأنينة وثبات ..بذكرى أبيها أينما كان غريب والغربة أقسى نضال كابلي فنان النخب والمثقفين من أجيال نهلت من معين الثقافة وارتوت …! مكتبتهم فيها صنوف من الكتب تكفي مؤونتها ل ( تتريس ) جيل وتراه أمام كابلي صامتاً وجل وفي الأفق يصول تهتز دواخله المتخمة بالمعرفة عندما تعلو آهات كابلي وتهبط وهو يعيد الكره في ضنين الوعد لتلامس الآهات سقف السحاب والشجن وخيال الشعر يرتاد الثريا … ( كابلي ) فنان الشعب وهو المتبتل الغارق في تراثه وتفاصيله العاشق لإرثه ..المتبحر في سودانيته يضرب النوبه معه في ساحة المولد البهية فتئن وترن ….ويحلق معه العاشقون دراويش في حضرة المكان ….وسر الليالي ( كابلي ) عراب الوطن فعندما ( يطلع ) في عتبات سلم الموسيقي نرتقي معه سلالم المجد …. وإنتا عندي كبير... و حبي ليك كتير والقومه ليك يا وطني.. شيلوه.. وزيدوه.. وطن الجمال.. والله إنت ذاتك عندنا كبير شديد يا كابلي وحبنا ليك كتير إلا حال الدنيا … كابلي فنان المحبين وملهمهم عندما يغني بحسو إنو بغني ليهم هم بس ….فينفجر شلالًا رويا ….. بجهجه العشاق ويكشف عن شعورهم بمجرد أن يلامس صوته المشحون دواخلهم الملتهبه والحالة بتبقى ظاااااهرة …فحسك يخترق المستور يا كابلي وينال من عاشق متخفي نال منه سهم صوتك فأرداه أسيرًا يعترف حبيبة عمري تفشى الخبر و وذاع و عم القرى و الحضر كابلي فنان كل الناس وحبك للناس خلاني أحبك تاني عشان كدا يا كابلي اليوم في السودان ليس كسابقة وأنت الآن في خشم كل سوداني … الله ياخ ….قالو الكابلي مات ….!! بقولوها من جوه كدا وبي حسرة الموت حق …ولكن لفرط حضورك يكون فقدك وألمك وأنت الحاضر في وجدان شعب وضمير أمة… نلوح من الخرطوم ومن كل المدن في السودان الذي عشقت وكل السودانيين في المهاجر والأصقاع بدون فرز نلوح يا كابلي ونرفع أيادينا جميعنا مودعين بالأكف والمنديل …✋ واقفين على حيلنا يا كابلي نشيعك من على البعد بالدعوات والدموع …. الوطن الذي أحببت تتقاسمه المحن والتقاطعات في هذه الأيام ….لكنك غنيت ( شان البت سعاد اصلي عارف جنها في زول بيركز ويتستر ) ….!! نبشرك يا كابلي إننا راكزين ومنسترين ….ركزة يغني عليها الكابلي ونصطف اليوم جميعاً فالمصيبة كبيرة والفقد حار لقد رحل رمز …وفقدنا أيقونة……وكابلي فات … وماهو عارف قدمو المفارق …يا محط امالي السلام السلام عليك حياً وميتاً … ورحمة الله تغشاك وإن شاءالله في الجنة يا مهذب قدلة يامولاي حافي حالق مع السلامة يا فخيم ….!!✋
الطيب عبد الماجد
يا سلاااااام ،،، ماحنقدر نكتب أكثر مما كتب الطيب عبد الماجد له جزيل الشكر والعرفان والعزاء لكل الأمة السودانية .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة