غناء الارض هو مجموعة قصائد ونصوص نثرية (بالفصحى وبالدارجة) كتبت علي مدي زمني طويل من التسعينات وحتي قبام ثورة ديسمبر في العام 2016 تم تكوين مجموعة غناء الأرض والتي قامت بتلحين وغناء بعض هذه النصوص حين بدأت الدعوة لبدء عصيان مدني في ديسمبر 2016 واستمرت هذه المجموعة في الغناء والتوثيق لبعض أحداث الثورة منذ 2016 وحتى الآن
وسأقوم في هذا البوست باستعراض بعض أعمال مجموعة غناء الأرض والتي تم تداولها عبر وسائط التواصل الاجتماعي والتي لم تجد حظها الى الان في البث عبر القنوات الاعلامية في السودان تكونت المحموعة في العام 2016 من شخصي غبد الله جعفر الملحن محمد عبد الرحيم حمدتو الفنان وليد يوسف الفنانة فدوى فريد فنان الطمبور كباشي جعفر وانضم الي المجموعة لاحقا بعض بدء وفض اعتصام القيادة عدد من الفناتين والمتخصصين في مجال الموسيقي وتقنية المعلومات منهم الفنان الشاب إيهاب جعفر الفنانات عفراء علي أفراح الزيتونة وشباب الموسيفي وتقتية المعلومات عبد الوهاب خليل أبوبكر عبد الله جعفر عبدو كرومة أخمج علي محجوب أول اعمال المجموعة كان في ديسمبر 2016 في أنشودة ديسمبر والتي تم تحديثها في ديسمبر 2018 و2019 باضافة الفيديوهات والموسيقى
ياثورة من نيلين وفكرة وامنيات اكتبنيا علي قسيمة الشعب مهرك أغنيات وارسمينيا علي الدفاتر وردة من تعب الغلابا وخطوة في الزمن النضيف علمينا الضحكة في الليل المغبرن بي دموع الحسرة والغم والنزيف طلي كان يبرد حشا الامات من الحزن الموزع بين سجون الوجعة واحلام الرغيف يا ثورة جاية من الغبائن ودمعة الخلق الرمت شوق انتظار جيتك علي تعب الرصيف ياثورة من نيلين وفكرة وامنيات لملمينا من الشوارع والمواجع والمطارات المغسّلة بي دموع الذكريات لملمينا من البهادل والدرادر والفضل جوانا من طين المسادير اغنيات لملمينا من المسافة الفاصلة بين الحسرة والحلم المدد في بيوت الطين رفات ياثورة من نيلين وفكرة وضي شموع سوقينا من وسخ الشوارع الطاهرة للحلم المدد فينا مابين المقابر والدموع سوقينا للصبح البساسق في وجع قلب البنيات الابن ينسنا ملامحنا ومواعيد الرجوع
باسم الله تسقط بس باسم الشعب تسقط بس باسم العالم الانساني تسقط بس صدور أولادنا في وش الرصاصة مغس شباب رص الهتافات رص لا خائن ولا خائف ولا مندس هتاف أماتو تسقط بس وتسقط بس عشان تطلع علي ليل الغلابا شمس وتسقط بس عشان أم الشهيد تلبس عبايات الصبر سندس وما تندس ولا نندس ولا نكتب مسادير الهتاف بالدس وتسقط بس عشان اولادنا تهتتف تاني تسقط بس اذا ليل الظلم عسعس وشان زيف الدقون ينقص ومن صنم الفساد نقتص وبي دم الشهيد بالنص نكتب بكرة دستور الفضيلة حرس ونتعوذ من ليلا ضلامو كبس من الخناس اذا وسوس ومن إفك الدقون والمس من التاريخ نشيل شرف الكتابة مقص نقص صفحة زمانك قص نقصك قص ومنك يالبشير نقتص لا طابت ضهور أولادنا لا دفتر حسابنا نقص ونتحاسب حساب بالنص عن الشهدا وركوب ضهر الضلالة فرس تواريخ الظلم والخوف حين وش الخليفة عبس زنازين الغبن والوجعة حين صوت الفضيلة كرس وجع رك الشمال في الحجرة والبلد الجنوبو غتس ونتحاسب حساب بالنص لا قهر الرجال بنسوهو لا دم الشهيد برخص ونهتف الف تسقط بس
علي هدب العيون شلناك براحات لي وطن عامر مرقنا عليك في ديسمبر المرسوم نزيف شهدا وقلب صابر وشفناك في عيون الناس مغتغت بالحزن ساتر وديسناك في قلب البنيات البغزلن من دموع فقرا الدروب باكر وطن للعزة لا مجلوب ولا منهوب ولا منكوب ولا غادر ........ مشينا عليك بي شهدانا لا كلينا لا ملينا من شيل الهجيرة وقاف ولاقيناك وكت شرقن صباحاتك علي النيلين نخيل وضفاف وغنيناك سلام الاف علي الشهدا وعلي الكبن دموع وجع الغبينة رعاف سلام الاف علي الكتبن غناوي الثورة في التاريخ نضال وعفاف سلام الاف علي الولد السلاحو هتاف سلام الاف علي البلد السلاحو هتاف .........
مناحة المتاريس يا وجعة قبايل العيد وكت غابت شموس ضحك الوليدات وانكسر خاطر البلاد الواقفة ما بين المتاريس والقبور وقف الزمن بالخوف وقت شقن رصاصات الغبن بالحسرة توب الليل وجع بين الخيام والسور شهق المكان بالحسرة وانسدت ينابيع الدموع بالعبرة في طرف المدينة الضج بي صوت الرصاصات الموزعة في الشوارع والصدور شربن نوافير المدينة الدم بكن دفقن دموعا علي رحيل صوت الوليدات في عيون الناس غياب وحضور قضية الموت وقت دارت حروب الردة ما بين الهتاف والطلقة لا هجعن عيون اماتنا لا طلعن قبايل العيد شموس وبدور ولا انفشت غبينة العسكري السفاح ولا كفن سيول الدم وقت سالن علي الاسفلت شلال نور نجيمات الفجر شهدن جريمة العسكري السفاح قبايل العيد بكن كتبن مناحات المتاريس المدرعة بالهتاف ضد الشهادة الزور منو البقدر يهدهد في حشا الأمات هدير الشوق اذا لاحن مع الاحلام بسيمات الوليد الزين بروق وعطور منو البقدر يهدهد في نصايص الليل مناحات العشق والشوق اذا شالن نسايم الليل علي النجمات وجع قلب البنية الحور وا حسرة ونسة الشلة ما بين المتاريس والهتافات والغياب المر صدي الذكري وبكا النيلين علي حضن الاراضي البور
خطوة خطوة وتنصلب يا ليل علي شدو الغنا الضحّاك ضفيرة آهة آهة وتنسكب يا نيل علي حزن الضفاف موال دميرة غنوة غنوة ويصبح الحزن المشتت فوق جبين الناس ضريرة صفقة رقصة وزينب العرس البينسج من بكا الأطفال حريرة ياتو زينب زينب السمرة الكست جرح المسا المحمول علي النيل المكتف بالهزيمة ضفاف وجع زينب الحرف البسجل سقطة الولد السجد ساعة الوقوف الطال فزع زينب البت النخيل الوجّعت زمن الكتابة وزادت الأحلام متع تبكي زينب تغسل الدم المدفق فوق تياب الليل جريمة وتاني تبكي وتمسح الهم المفرق في بيوت الطين هزيمة وتحكي زينب عن وطن شايلاهو غيمة وتبدا تكتب قصة الحزن الموزع في قلوب الناس سماح وتبدا ترسم روعة الحلم البيطلع من جروف النيل صباح وتبدا تشرق عزة الصحو البيسطع في ليالي الجوع كفاح وتبدا تلعن لعنة الخبز الخرافة وشهقة البلد الجراح وتبدا تنشد قيرة قيرة وصبي يا مطر المني المخزون رعاف دقي سيرة وعطري الزغرود هتاف تاني ضحكة وتتكي البت النخيل اللابسة هم الناس عفاف تتولد في الناس قصيدة وينهض الوطن الزفاف
.................................
أنا مشتهيك بس يابلد
سيل دمعتك والليل برد لا نمت لا وجع المسافات المستّف فيك غمد لا جيت ولا فتّر غناك حزنك ولا شوقك خمد آه يا بلد يا آهة طالعة من الوليدات في الغياب والنوم شرد يا دمعة من حلم البنيات السراب والشوق ورد يا حسرة من وجع الغلابا الصابرة والعيشة النكد آه يا بلد كحل عويناتك من الغبن المشتت فيك رمد زيف الضلال وابليسك الملعون سجد لا شال همومك مرة لا شكرك حمد حد ما مشيت علي بكاك ما لقيتي حد وانا يا بلد متكول علي ضل الضحي النصب خوازيقك عمد محمول علي الوجع المدد فوق ضهور الناس لبد سرقت أباليسك صباح الضحكة والنيل والبلد وأنا مشتهيك بس يا بلد حلما يهاجر في عيون الناس سعد صبحا يتاوق في رضا الامات ولد زي الزمان والفرحة جد من تاني تنبت فوق ضفاف النيل بلد
........................
زينوبة
ندهت عليك من ليلن مغبرن بالحزن والخوف من نارن مولقدة في القلب والجوف من النيل الأبت تحمل نزيفو جروف تعالي تعالي يا زينوبة من حلم الفقاري سيوف ويا حميد تعال اكسي الغناوي حروف من البت الرمت دمعاتا فوق كتف الغناوي خصل من الولد المباري الهم محل قبل من الكضبة الأبت تكمل تعالي تعالي يا زينوبة واسقي الظالمين حنضل وياحميد تعال اسمع بكا الأمات من الغمة الأبت ترحل من الحزن المدد في قلوب الناس بحر من الدمع البفيض يملا البوادي مطر من الغبن الصبح من طول ليالي الهم قدر تعالي تعالي يا زينوبة واسقي الصابرين كوثر ويا حميد تعال واسمع بكا الجارين ورا حلم الرغيف في الحر أمرقي امرقي يا زينوبة من وجع الغلابا نغم أمرقي أمرقي من بلدا مستفة بالغبن والغم ويا حميد تعالي جيب القصيد والنم نغني نغني لي الصبح المجرتق بالعرق والدم امرقي امرقي يا زينوبة خلي العالمين تنجم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست