أزمة اللون الاسود .. لماذا وكيف ومتى حدثت الأزمة (حلقة 1-4) من كوش بن حام إلى جورج فلويد القتيل الأمريكي هذه الايام
سلام عليكم في منبر مؤتمر خريجي جامعة الخرطوم تحية واحترام دا التسجيل الأول فيما يتعلق بمسألة العنصرية وسأتحدث الآن عن اللون الأسود وبنشوف في الوقت الحاضر أن العنصرية racism موجهة في المقام الأول إلى اللون الأسود إلى الناس الصبغة بشرتهم سوداء.
القصة دي ليه؟ دا سؤال مهم جداً جداً عشان نحنا نشوف الظاهرة ونشخصها بشكل علمي ما استطعنا عشان بعد داك نفتش الحلول لأن مسألة العنصرية دي مسألة خطيرة جداً جداً ومسألة بتعمل أزمات في كثير من الشعوب للناس البيمارسو العنصرية نفسهم وطبعاً الناس الممارسة عليهم العنصرية لأنها بتعمل انشقاقات في المجتمع وتعطل الاقتصاد وتؤدي إلى الحروب الأهلية زي ما حاصل عندنا.
جزء من حروبنا الأهلية وواحد من أسبابها هي العنصرية التي تؤدي إلى الإقصاء الاجتماعي والاقصاء السياسي والاقصاء الثقافي ومن ثم الاقصاء الاقتصادي.. إذن دي مسألة مهمة جداً إنكم أنتم هنا كشباب وشابات مستنيرين أننا نتفاكر مع بعض ودا مواصلة لنقاشاتنا الماضية و سأحدثكم الآن من وجهة نظري عن لما اللون الأسود في هذه اللحظة التاريخية.. لكن قبلها لما نرجع وراء شوية سنجد أن الإنسان الذي يحمل اللون الأسود كان هو الأقوى وكان هو المسيطر في مصر والسودان.
الحضارة الفرعونية الكوشية وكانت شيء واحد ما كان في حدود اسمها أسوان أو حدود بين الشمال والجنوب يعني ما كانت موجودة حدود وكانت الحضارة تتحرك بشكل سلس وسهل جداً.. صحيح كان في صراعات بين الملوك والأسر لكن المساحة كانت مفتوحة على بعض كل الوقت.. كانت تلك حضارة قوية جداً وكان اللون الأساسي لصبغتها هو اللون الأسود اللون الأسمر ودي معلومة معروفة علمياً.
وليس فقط الحضارة الكوشية الفرعونية وهم حاجة واحدة إنما أيضاً كان في الحضارة الأثيوبية ما قبل أكسوم ثم ستأتي أكسوم لي قدام.. أكسوم دي عاصرت في معظم وقتها الممالك المسيحية في السودان.. وكان في حضارات في غرب أفريقيا بناها الإنسان الأسود وكانت حضارات قوية جداً بدورها وكان في حضارة قديمة جداً في جنوب أفريقيا وكانت قوية جداً بدورها.. وكان الإنسان الأسود هو أول من صحى وكان عنده القوة وهو العمل الآلهة وهو العمل العلم الموضوعي وصهر النحاس والحديد واكتشف الذهب واكتشف العلاقات الاجتماعية وعمل الزراعة وعمل الاستقرار وآلف الحيوانات يعني استخدم الحيوانات الأليفة ودا كله عمله الإنسان الأسود الإنسان الذي يحمل صبغة لون سوداء لأن المناخ واللحظة التاريخية كانوا مناسبين.
كانت درجة الحرارة كويسة وكان في موية في معظم الأماكن دي وليس كالمناطق الباردة جداً التي صحت بعد زمن طويل ما زي المناطق الأخرى في العالم الفيها ظروف مناخية صعبة أنما كانت الأماكن التي حدثتكم عنها كلها فيها جو مناسب وما كان في تصحر في السودان ومصر وهما منشأ الحضارة وكانت الأرض فيها واحات وأنهار والصحراء الغربية التي نراها اليوم واسمها الصحراء الكبرى كانت في يوم من الايام تعج بالأفيال والحيوانات الأليفة والمتوحشة والغابات.. كان في حياة وكانت مأهولة بالسكان.. في دراستي عن سكان السودان رأيت أن الناس الكانو موجودين والقبائل التي سمت نفسها "جموعية" - دي قفزة سريعة عشان أوضح ليكم- القبائل التي سمت نفسها جموعية والزغاوة الموجودين في مناطق كتيرة في السودان في دارفور وفِي الحدود مع تشاد والفزانيين الذين يسكنون جنوب ليبيا ديل كلهم كانوا من جذر واحد وكانوا سكان الصحراء الغربية وكانوا يسكنون المنطقة من وجبل عوينات لغاية الشهيناب وديل في يوم من الأيام هم العملوا حضارة الشهيناب قبل الحضارة الكوشية الفرعونية ودا موضوع آخر.
لكن بحكي ليكم أن المنطقة دي كانت غنية والإنسان الأسود كان قوي جداً وأقول ليكم معلومة مهمة جداً أن الإنسان الأسود هو من أول الشعوب التي اخترعت في الحقيقة بيع البشر وكانوا ببيعوا اليهود وقد وجدت في وثائق عديدة أن الكوشيين والفرعونيين كانوا ببيعوا اليهود للروم وللعرب.. في وثائق زي دي موجودة باللغة الإغريقية ووثائق أخرى بلغات مختلفة ووثائق موجودة باللغة العبرية تقول أن الكوشيين والفراعنة وهم حاجة واحدة في مصر والسودان كانوا عندهم قدر من العبودية ومن الشعوب الاستعبدوها كانوا اليهود والقصص مسجلة في كتابهم التوراة كونهم كانوا في مصر وكانوا مستعبدين واستعبدوا مرة من المرات لمدة ١٠٠ سنة أو أكثر كجماعة كاملة لكن دائماً كانوا يستعبدون كأفراد.. أنا بحكي القصة دي لأن من هنا بدأت مأساة اللون الأسود و ح أقول ليكم كيف.
إذن كان اليهود يستعبدون كأفراد وكجماعة كاملة كما استعبدهم البابليون في زمن نبوخذنصر حسب ما ورد في التوارة وما ورد في وثائق أخرى.
كان في صراع بين اليهود وبين الكوشيين هذا الصراع أدى إلى تكون وثيقة سرية.. اليهود جزء من ثورتهم على القوة الكبيرة الطاحنة الضاربة دي كانوا بيتداولوا وثائق سرية في حرب على العدو.. ودا عدو طبعاً الزول الببيعك وبيضطهدك ويستعمرك ويجيبك كلك ويشغلك مزارع ويخليك تبني الأهرامات.. فقاوم اليهود بأنهم عملوا بروباغاندا حرب من تحت لذم اللون الأسود.. أول من ذم اللون الأسود في وثائقهم السرية تحت هم اليهود ولزمن طويل جداً كانوا بقولوا لبعض أن ديل الناس السود واللونهم أسمر درجتهم أقل عند الإله الرب وهم موجودين في الأرض كقوة ضاربة لكن درجتهم أقل بعد داك في المستقبل أعيد كتابة التوارة نفسها وأعيد صياغتها وكلما قوي اليهود وضعفت حضارة اللون الأسود الأسمر كلما أعيدت كتابة التوراة بشكل معلن وبشكل صارخ لحد ما وصلت أن كوش ابن حام الأسود ملعون.
تقريباً هكذا الامر ودي في لحظة تاريخية متقدمة بعد ما كوش أصلاً اختفت.. لكن من هنا أنا جاييكم لي حاجة خطيرة ومهمة أنه من هنا بدأت ملامح أزمة اللون الأسود تظهر. التسجيل الثاني حول ما أسميته أزمة اللون الأسود متى وكيف ولماذا حدث هذا؟! تحدثنا في التسجيل السابق عن أن أول من بدأ مسألة شجب اللون الأسود هم اليهود ولم يكن في الحضارات الأخرى أبداً حاجة زي كدا بل أن الإغريق في الإلياذة وصفوا السودانيين الكوشيين بإنهم طوال القامة شديدي الوسامة وكانت الألهة تجتمع في جبل البركل الكلام دا موجود في الوثائق الإغريقية واللون الأسود لكم يكن مشجوب أبداً وكان دائما هو لون الألهة والمكان الذي تجتمع فيه الألهة لتقرر في شأن الكون هو المكان الذي يسكن فيه الرجل الأسود يعني الألهة نفسها ساكنة مع السود يبقى الألهة نفسها يمكن أن يكون لونها أسود و الوقت داك لأن الدفق الحضاري والإمكانيات والقوة العند الناس السود الذين صنعوا هذه الحضارة توحي بأن هناك إرادة قوية إذن هنالك تسكن الألهة.. دا موجود في الوثائق الإغريقية.
وأثينا كان فيها عبودية شديدة جداً حتى أني قرأت في إحدى الوثائق أن أفلاطون أو أرسطو قال أن ٤٠٪ من سكان أثينا كانوا عبيد من سلوفاكيا ومناطق شرق أوروبا والتى تتكون الآن من رومانيا وألبانيا وتشيك وبولندا وجزء من النمسا وغيرها ودي المناطق الكانوا اليونانيين بجيبوا منها العبيد الذين يعملون في المنازل والمزارع ولم يكن الرجل الأسود بعد بالرغم من أن الحضارة اليونانية جاءت في بداية سقوط حضارات الرجل الأسود أو الإنسان الأسود رجلاً وامرأة وبنعرف الكنداكات الحاكمات وبنعرف قوتهم وبالتالي كانت حضارة الإنسان اللونه أسمر أو أسود وما كان في شجب أبداً.. بعد اليهود جاءت الحضارة العربية الإسلامية وعملت دور في تصعيد ذم اللون الأسود وبعد صحت الحضارة الغربية وجدت أن السود تضعضعوا وضعفوا وانتهوا فعملت مساهمة كبيرة في الإساءة وفِي جعل معضلة اللون الأسود تصل مستواها الحالي الحاصل في أمريكا الآن.. ح أقول ليكم بالتفصيل وأتمنى إني ما أسرف في الكلام و ح أحاول أختصر إذن.. حالياً انتهينا من اليهود واليونانيين والرومان وعندما أتوا كان اللون الأسود لسه عنده قوة بالتالي الرومان كانوا بتحالفوا ويحاربوا ويتصالحوا مع الكوشيين وكانوا موجودين في الحدود وكان في تعاون وصحيح أن اليونانيين في لحظة ما صعد نجمهم بعد انهيار كوش بشكل كامل وبعدها جاءت مروي وحتى أول ملك مؤسس لمروي الحديثة (الملك اركماني) مخترع الإله أبادمك إله الحرب رأس الأسد .
ونجد في الوثائق أنه كان عنده أستاذ يوناني يعني مربيه كان يوناني مما يعني أنه كان في تداخل برغم من أن حضارة السود بدأت تتضعضع لكن كان هناك دائماً احترام للون الأسود.. لما جاءت الحضارة العربية الإسلامية حدث شيء مهم جداً.. لكن قبلها أعود لنقطة مهمة وهي أن اللون الأسود كان في الحقيقة أقوى من العرب وأقوى من الناس الموجودين في هذه المنطقة والعرقية التي تسمي نفسها عرب هم ما بيض إنما سُمر أو حُمر.. العرب الأصليين ونراهم في اليمن وعمان والامارات ونراهم في مناطق كتيرة مختلفة في السعودية والسعودية فيها تنوع كبير لأنها فيها ناس من بخارى وناس من سمرقند ومن كل أنحاء العالم الإسلامي بسبب المناطق المقدسة التي نحترم وجوها ناس كتيرين والنَّاس البتشوفوهم لونهم أبيض ديل ما عرب العرب دائماً لونهم أسمر أو أحمر غامق.
ما حدث أنه في بداية صحوة العرب وقبل الإسلام بقليل وإحساسهم بالوحدة كان المستعمر لهم في ذلك الوقت أسود في اليمن أو عمان وكانوا هم الأحباش من حضارة أكسوم المسيحية وهذا وقت متأخر يعني في حوالي ٥٢٥ - ٦٥٠ ميلادية كانوا هم مستعمرين تلك المناطق وكانوا ببنوا الكنائس وكانوا في لحظة من اللحظات لما صحت التجارة وبدأ نجم مكة يصعد فالقصة دي ضايقت الأحباش شوية بإعتبار أن أكسوم كانت مسيطرة على خطوط التجارة في البحر وخطوط التجارة في مناطق الجزيرة العربية وكانت مستفيدة من الحاجة دي وورد في القرآن أن أبرهة الحبشي أراد أن يدمر الكعبة.. أنت إذن لا تستطيع أن تواجه شخصاً بهذه المقدرات لكن واجهته طير أبابيل يعني وجه بالأسطورة أنت كبشر لا تستطيع مواجهته يبقى دا ما ممكن تستعبده مستحيل طبعاً فهو عنده قوة ضاربة وعنده اقتصاد وإمكانيات أكبر منك وما ممكن طبعاً تستعبده.. الحاجات البسيطة التي نسمعها في التاريخ مثل عنتر بن شداد وبلال وكدا دي فلتات تحصل لأن أصلاً مسألة العبودية دي كانت عادية في البشرية.. انك تقبض زول أو زول يهدي ليك زول دي كانت مسألة عادية جداً لكن ما كان شائع أن الزول الأسود عبد يعني رقيق مستحيل كان الوقت داك وما كانت trend لغاية الآن.. لكن ما حدث قبل الإسلام بشوية أن العرب صحت وحصلت بروباغاندا حرب ودا زول عدو جاي يكسر حاجاتكم وأصلاً هو محتلكم وببني في كنائس في منطقة اليمن في صنعاء وعدن وفِي عمان وكمان عايز يكسر مناطقك المقدسة والكلام دا قبل الإسلام يبقى بدت بروباغاندا حرب الوقت داك.. وبروباغاندا الحرب دي أعيد كتابتها في لحظات تاريخية مختلفة ولما العرب بقوا أكثر قوة وجاءت الحضارة العربية الإسلامية ووصلوا لغاية الصين بكل سلاسة.. استعمروا بلاد الفرس في ساعات ثم مشوا مناطق باكستان والهند و ح يجي تاج محل لي قدام وبعداك وصلوا لغاية الصين بكل سلاسة ثم فتحوا مناطق البحر الأبيض المتوسط من القاهرة إلى طرابلس والقيروان والجزائر والمغرب لغاية ما وصلوا الأندلس بكل سلاسة لكن ما حدث عندما وصلوا السودان والرجل الأسود لم يستطيعوا وهذا الرجل الأسود كان مسجل في التاريخ بأنه عنده مقدرات عجيبة وبضرب السهام مش في الرأس أو الصدر إنما في العين يعني ديل ناس مدربين جداً وعندهم حضارة وإمكانيات برغم تضعضعهم وبرغم أن حضارتهم لم تعد كما كانت وكانوا في لحظة ضعف وبدأ كدا اللون الأسود يضعف.
فما حدث أن العرب أصلاً في لحظة الحرب دي كان عندهم حرب سابقة مع أكسوم وكان فيها ضحايا كثيرين من العرب وكان فيها استعباد لهم وكان فيها اضطهاد لأديانهم الوثنية المحلية والتي هم يحترمونها ويحبونها فكانت الحرب فيها اضطهاد لهم وكان عندهم بشكل مستمر مشكلة مع اللون الأسود لأنه كان الأقوى وكان الذي يضطهدهم وقبلها وجدوا إرث اليهود وهم زاتهم عملوا أشعارهم وبروباغندا حرب كثيفة جداً ضد اللون الأسود.. ذم شديد جداً للون الأسود وأحاديث صحيحة ومزورة للون الأسود وتم إعادة كتابة هذه الأحاديث بشكل مستمر وهذا الأدب الشعبي تم إعادة صياغته بشكل مستمر في لحظات كتيرة من التاريخ.. يعني هو في بدايته ما كان كدا واتفاقية البقط ذاتها ما زي ما انتو متصورنها.. لأ أبداً.. أول شيء اتفاقية البقط جاءت في أسوأ مراحل حضارة الرجل الأسود وكانت متراجعة جداً وشبه سقطت. هناك بالجوار بقية الحلقات
06-06-2020, 10:16 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
ازمة اللون الاسود.. لماذا وكيف ومتى حدثت الأزمة.. حلقة 2-4
دا التسجيل الثالث حيال ما نسميه أزمة اللون الأسود.. كيف ولماذا حدث هذا ومآلات ذلك لحد ما نصل لأمريكا وما يحدث فيها الآن.
ما حدث في الحقيقة أن العدو الأقوى للعرب والكان جنبهم وكان منافسهم على الأرض والمياه وطرق التجارة وكان منافسهم على الحضارة هم الناس اللونهم أسود الموجودين على حدودهم في أثيوبيا زي ما قلنا أكسوم وكانوا مستعمرنهم ومافي أي عربي استعمر أثيوبيا ولا في أي عربي في التاريخ دخل جيش إلى السودان أو أثيوبيا لم يحدث ولا مرة في التاريخ يبقى الناس ديل مشكلة.. دا كان في الماضي وخلي التحولات التي ستحصل لي قدام ودخول الإسلام ودي قصص حصل process تاريخي بعد تضعضع حضارة الإنسان الأسود التي كانت تتضعضع بشكل مستمرة نسبة للظروف المناخية في المقام الأول ونسبة لظروف عديدة جداً ككل الحضارات العظيمة التي انتهت في بابل وفِي الصين وحضارة الأنكا في أمريكا وحضارات اليونان وروما.. الحضارات أصلاً عندها دورة بتبدأ وتنتهي شيء نجده في التاريخ.
ما حدث أنه كان هناك بروباغاندا حرب عظيمة جداً واستلف العرب ال retoriks التي عملها اليهود ضد الكوشيين وضد المصريين وقصة كوش بن حام الأسود ودي كلها تم إعادة كتابتها وصياغتها بشكل مستمر.. كما تم إعادة كتابتها وصياغتها في اليهودية تم استلافها وإعادة كتابتها وصياغتها خلال فترة ازدهار الحضارة العربية الإسلامية وخلال الصراع الأول بتاع الفتوحات وكان في حرب ولم تكن بالسيوف فقط والعرب وفِي الحقيقة مش العرب بس والمثل المعروف بقول "الحرب أولها كلام" والكلام معناها أن الناس متشاكلين والكلام ما كويس وفيه نبذ.
فالحرب أولها نبذ وشتائم وتلك كانت بروباغاندا الحرب.. الأدب الكثيف الموجود في ذم اللون الأسود لأنه زي ما قلنا اللون الأسود كان يضطهد العرب.. ونحن الآن نتحدث عنهم تحديداً ولا نشجب ولا نقيم هنا والقصة دي جواها "بكيج" وحاجات كتيرة جداً وفِي تحولات تمت في السودان وفِي تحولات تمت في أثيوبيا وفِي تحولات تمت في الغرب الأفريقي ومناطق البربر.. دي كلها تحولات كبيرة جداً تمت في التاريخ لاحقاً ونحن نتحدث في لحظة محددة قبل الإسلام بشوية وبداية الإسلام وبداية الفتوحات وحتى كمان في لحظة ما بقى الغراب رمز للشؤم وهذا لم يحدث عبطاً كاختراع أو أسطورة كدا ساكت إنما جاءت من الصراعات العملية والدنيوية دي والاقتصادية والمعيشية والصراع على الحضارة وطرق التجارة وغيره.
فما حدث أن العرب شاركوا مشاركة فاعلة بعد اليهود في إرساء دعائم شجب اللون الأسود للأسباب العملية الأنا قلتها دي وفِي لحظة ما تم هزيمة الإنسان اللون بشرته سوداء بشكل كامل وبقى ما عنده حضارة تذكر بالذات بعد انهيار الممالك المسيحية في السودان.. كان في حضارة أكسوم قائمة في ذلك الوقت وكانت مستعمرة الجزيرة العربية ثم كان في الممالك المسيحية في السودان دا في لحظة الانهيار والتي استمرت ألف سنة.. والحضارات دي قديمة جداً وأنا أعني قبلها بعداك الحضارة المسيحية في السودان استمرت ألف سنة والإسلام في السودان ليهو ٥٠٠ سنة ما اكتر.. قصدي تم تبنيه رسمياً سنة ١٥٠٣ أو ١٥٠٤ ميلادية بصعود الدولة السنارية.. وأعني كلمة "رسمياً" هنا.. لكن خلال الفترة المسيحية بدأ تضعضع اللون الأسود والحضارة ما عادت بتلك القوة لذلك مافي أهرامات خلال الفترة المسيحية ولا أثار عظيمة.. بدأ الانهيار بشكل مستمر بعد انهيار مروي وكانت أعظم وكانت أقوى وبعداك جاءت الممالك المسيحية وكانت أضعف واللي هي المقرة ونوباتيا وعلوة لكنها كانت عظيمة أيضاً ولما العرب صحو جو شافوها وكتب المسعودي وكم زول تانين عن إنها كيف كانت عظيمة والمباني في علوة كانت من القرميد وكان في نظام سياسي واجتماعي جيد جداً لكن هذا النظام تضعضع بشكل مستمر إلى أن جاءت اتفاقية البقط التي تمت لأن العدو ما قدر ينتصر عسكرياً فتمت مساومة ما.. ولكن الجيش العربي تم صده بقوة وبالقوة اذ اذن لم يستطع أن ينتصر مما زاد من بروباغاندا الحرب وزاد ال retoriks تجاه اللون الأسود كأنه شؤم لأن كل الأرض فتحت للعرب ما عدا السود.. يبقى دي زودت مسألة أزمة اللون الأسود أكثر.
دا كله كان أخف قدراً لأن معظمه كان retoriks أدبية لكن ما حدث أنه عندما صحت الحضارة الأوروبية أو ما يسمى بحضارة الرجل الأبيض حدثت حاجة خطيرة جداً.. في الفترة من سنة ١٥٠٠- ١٦٥٠ ميلادية بدأت الحضارة الأوروبية الغربية تصحو ووجدوا أنهم محتاجين لموارد لأن مناطقهم في أوروبا كانت فقيرة فبالتالي كانوا محتاجين يغزوا العالم عشان يوفروا موارد لبناء الحضارة الحالية دي.. في اللحظة ديك وجدوا أن الرجل الأسود كان أضعف ما يكون وكان في أضعف لحظاته من الفقر والتخلف والجهل وحضارته ضاعت وما عاد عنده أسطورة وما عنده فخر بذاته فعملوا أدب خطير جداً وقالوا مقولة خطيرة هي أن الإنسان الأسود نفسه في الحقيقة هو جنس أقل من الجنس البشري ليبرروا استعباده واستغلاله وليبرروا اضطهاده وبالتالي هو زيه زي الحيوان.. ديل علماء الاجتماع الغربيين في لحظة محددة تبع السياسة والببرروا للملوك والأمراء ويبرروا للجيوش لتفعل فعلها وتجلب لهم العبيد.. هذا ما فعلوه قسموا الجنس البشري لستة أجناس أحطها الجنس الأسود واعتبروه جينياً لا يساوي البشر.. دي أخطر حاجة حصلت.
وأيضاً وجدوا الأدب اليهودي والأدب العربي المكتوب رغم أن اليهود لم يستعبدوا زول والعرب برضو ما استعبدوا الإنسان الأسود وفِي الحقيقة إذا نظرنا إلى مصر في العهد المملوكي كان العبيد هم الألبان والشركس والفرس وغيرهم يعني كان استعبادهم للون الأسود ضعيف جداً وجاء فيما بعد وليس بكثرة بعد أن تضعضع اللون الأسود بالكامل وانهارت ممالكه وحضاراته كلها بالكامل.. نرجع للغربيين إلى أوروبا التي أحضرت ملايين البشر كعبيد وكان أول من فعل ذلك هم البرتغاليين والهولنديين وعندنا هنا في هولندا ميناء هارلم وهناك ميناء هارلم في أمريكا.. لما تخلقت أمريكا. التسجيل الرابع والأخير من جانبي وأسمع منكم ما عندكم وأثق بكم دا التسجيل الرابع حول ما أسميته أزمة اللون الأسود كيف؟ ولماذا؟ ومتى حدثت؟ ومآلاتها كنّا نتحدث عن أخطر أزمة حصلت للون الأسود.. الأزمة بلغت الحلقوم -قمتها كما يقولون- عندما صحت الحضارة الغربية وقلنا أول من صحو وخاضوا البحار كانوا البرتغاليين والهولنديين والأسبان وبعدهم جاء الإنجليز والفرنسيين ديل الناس الرواد وديل الناس الاستعبدوا الإنسان الأسود حقاً وجابوه أوروبا ثم رحلوه إلى أمريكا ثم مناطق الكاريبي.. جابوا ملايين البشر بالذات من مناطق غرب أفريقيا زي نيجيريا والسنغال وغانا وغينيا والأماكن الزي دي وكان في غزوات كثيفة مستمرة للبشر تحت دعاوي محددة ذكرتها في التسجيل الفات وكانوا هم محتاجين لأنهم ينهضوا بالزراعة والصناعة في أوروبا فكانوا محتاجين للأيدي العاملة فجابوا ملايين البشر وهنا بدأت كتابات كثيفة تتحدث عن أن الإنسان الأسود هو أصلاً عبارة عن عرق منحط وأصلاً هو في مقام الحيوان.
دي كانت أخطر لحظة في التحول الحصل في أزمة اللون الأسود والبروباغاندا الخطيرة دي ظلت في خواطر الناس رغم أنها بدأت في سنة ١٦٠٠ تقربياً وتتابعت بشكل مستمر خلال الأعوام من ١٧٥٠ إلى ١٨٠٠ ثم بعد ذلك بدأت الكتابات وبدأت الكشوف التي أظهرت أن الإنسان في الحقيقة جين واحد ثم بدأ منع تجارة الرق من الغرب نفسه وأول من بدأها هم البريطانيين ثم الفرنسيين والأمريكان لكنهم كانوا تشبعوا و العبودية كانت مستمرة ثلاث قرون تم في خلالها ترحيل ملايين الملايين من الأفارقة إلى أوروبا وأمريكا وتحديداً أمريكا اللاتينية ومناطق الكاريبي.. الناس ديل كانوا بجيبوا الأقوياء لذلك ترى الآن أن الأمريكان السود وسكان الكاريبي أجسامهم ضخمة لأنهم كانوا ينتقون الناس الأصحاء والنَّاس الضعاف كانوا بموتوا في السفن أو بيمرضوا فيتم رميهم في الماء للحيتان والقصة دي كانت عادية ومبررة بأن هذا ليس إنسان زيه زي الخروف اذا مرض في السفينة بترميه عادي للحوت وهو حي.. المسألة دي كانت عادية جداً خالص وكانوا بيضروبوهم بالسياط وبيقددوا اذانهم وعيونهم وكانت مسألة طبيعة جداً وما كان عندهم أسماء يعني المولد البجي من أم ما عندها زوج وأي زول بنوم معاها عادي ولما يولد ولد فأصلاً ما عنده أب وهي ترضعه ويأكل ويشرب عشان يمشي يشتغل في المزرعة أو المصنع وعنده اسم واحد بس ما عنده أب وما عنده اسم ثاني أو اسم عائلة.. تلك هي المأساة وفجاجة الإنسان إلى عهد قريب والمسألة دي استمرت في خواطر الناس بشكل مستمر ولغاية الآن في بعض البيض مؤمنين بالحاجة دي أو يفتكروا أن الإنسان الأسود دا منحط إلى هذه اللحظة.
بالتالي الشرطي البسيط الذي عمل هذه العملية وخنق الزول دا هناك في أمريكا هذه الأيام عنده هذا الشعور بأن الزول دا ما تام بشر والمسألة دي عادية وبكون زعلان منه لأنه هو حالياً أخذ حقوق كاملة مع أنه ليس كذلك وديل العنصريين لغاية الآن بفكروا كدا.
دي مبنية على الأدب الكثيف الذي ذكرته لكم قبيل.. وكمان في حاجة خطيرة جداً أنه في الحقيقة داخل الاستنزاف الكثيف الحصل للإنسان الأسود والإنسان الأسود هو ذاته درجات وألوان ولكن أنا بقصد الناس التم استعبادهم ديل بعداك حصل ليهم حاجة خطيرة جداً هم والمناطق التي قدموا منها.. تم افقارها وتم استنزاف إمكانياتهم وتم تجهيلهم وتم بشكل مستمر جعلهم أميين بالتالي لم يجدوا التعليم الكافي ويبقى إذن إتكيتهم ضعيف وهم ذاتهم مرات كثيرة جداً ما بيقدروا يستوفوا شروط التحضر والمدنية كلها لأنه زول ما متعلم ولم يمنح فرصة وأصلاً كان فقير وجد جده فقير وأرضه ذاتها فقيرة لأنك سلبتها كل شيء مواردها وإمكانياتها وسلبت إنسانيته أيضاً.. يبقى إذن الزول دا بكون ناقص تعليم وناقص مستوى معيشي واقتصادي وبالتالي مستواه الاجتماعي ما زيك أنت كأبيض أو كإنسان ما تم استعبادك ووجدت كل الحقوق كاملة أمامك.
يبقى مرة أخرى الأزمة مستمرة والأزمة دي باختصار كبير جداً ما بتنتهي إلا الإنسان الأسود يرتقي إلى مستوى الحضارة ونرجع تاني للأمام ويمتلك زمام المبادرة من جديد وما بتتحل غير كدا.. يعني الآن لو في دولة سود زي اليابان عندها إمكانيات رهيبة مؤكد أن الإنسان الأسود دا سيستقبل في كل الفنادق لأنه بيدفع و سيقبل في كل الجامعات لأنه ح يدفع أو يجيب ليهم علم وح يستقبلوه في جميع المطارات لأنه بدفع قروش زيادة أو هدايا زيادة وعنده ذهب زيادة وعنده قروش زيادة وعنده علم زيادة يبقى مؤكد ح يكون زول ما بتقدر عليه أنت أضعف منه ح تستعبده كيف دا أولاً.. ثانياً ما بتقدر تقول عنه منحط لأنه عنده إمكانيات أفضل منك وعنده علم أفضل منك وعنده فهم أفضل منك وبتصرف أفضل منك وأقوى منك.. أنا عارف أن هذه عملية طويلة جداً لكن على الأقل الناس لما تفهم الصورة المحددة دي بتقدر تشخص العلة وقبل ما نقول كيف يتحضر الإنسان الأسود لازم نعمل قوانين صارمة لإدانة العنصرية ونعمل أدب كثيف وتوعية لإدانتها بأنها حاجة فجة جداً ومن يمارسها هم الناس المنحطين فعلاً والأقل تعليماً والنَّاس اليمينيين المتطرفين وكمان الأيديولوجيا بتاعتهم بليدة في كل أنحاء العالم وديل موجودين في كل أماكن الأرض وموجودين عندنا في السودان.
واثناء نهوض الغرب الاوروبي في القرن السادس الميلادي وحتى الان العرب "بيض ام سمر ام سود" متضررين مثل البشر الاخرين وينظر لهم باحتقار وتنتهك بلادهم ومواردهم البشرية والمادية كما الاسيويين والهنود الحمر مع اختلاف الوسائل والازمان.
وعلينا كلنا ان نواجه النزعات العنصرية وكل اشكال التمييز ومواجهة منابع العنصرية والتمييز بالتوعية والتثقيف وأهم النقاط وضع القوانين الصارمة لمحاربة العنصرية والتمييز اي كانت اشكاله والعمل على تعلية معاني حقوق الإنسان وأن الإنسان دا آدمي مهما كان عرقه ولونه ومهما كان جندره ودينه وثقافته ومظهره فهو حاجة واحدة ويستحق التكريم مهما كان فقير أو غني متعلم أو أمي مزارع أو راعي غنم سمين أو ضعيف معاق أو صحيح في كل الأحوال الإنسان دا كائن مكرم والجين بتاعه موجود من بلايين السنين ومخزنة فيه شفرات الإنسانية وشفرات الذكاء الذي جعل الإنسان منتصراً فوق الأرض هذه موجودة عند كل البشر.. إذن كلنا مفترض نحترم بعض وليس ذلك وحسب بل مفترض نحترم الحيوانات والطبيعة نفسها وإن لم نفعل ذلك لن نصنع حضارة وسنظل في حروب وتشققات مع بعض وفِي النهاية سندمر موارد بعضنا البعض وهذا ما يحدث في السودان الآن وكل ارجاء الشرق والإقليم الذي نعيش فيه.. دي محاولة مني زي ما بقولو فزلكة تاريخية لتحليل أزمة اللون الأسود كيف ولماذا ومتى بدأت؟ وما مآلاتها وإمكانية المعالجات الممكن نعملها كمهتمين ومخلصين..
تحية لكم ومحبة أكيدة
06-06-2020, 10:19 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
لماذا تبنى السودانيون المسيحية ثم تركوها وتبنوا الإسلام؟ حلقة 3-4.. تابعة أزمة اللون الاسود
شباب وشابات مؤتمر خريجي جامعة الخرطوم تحية واحترام أنا ح أعمل سلسلة تسجيلات صوتية جديدة مواصلة لموضوع أزمة اللون الأسود كيف ولماذا حدثت؟ وقبل دا عملت عدة تسجيلات وشكراً لردود الفعل الكويسة اللي جاءتني من التسجيلات الماضية وشجعتني أواصل.. الآن نحن سنتحدث عن موضوع مهم جداً متعلق بالسودان و ح نرجع للتاريخ شوية ودا التسجيل رقم ١ وسأبدأه بسؤال وبعداك سنتفرع فيه ونجي من خلاله إلى الواقع.. لماذا تبنى السودانيون وأعني سكان حوض النيل الجنوبي هنا - السودان المعرف الآن بحدوده الحالية - لماذا تبنى السودانيون المسيحية بين الأعوام ٤٠٠ - ١٥٠٠ ميلادية يعني المسيحية استمرت في السودان ١٠٠٠ سنة ثم تركوها وتبنوا الإسلام رسمياً - وأقول رسمياً - سنة ١٥٠٣ ميلادية بداية العهد السناري والكلام دا طبعاً عنده علاقة بكلامنا الماضي.. لماذا حدث هذا وهنا بقفزة صغيرة أرجع ليكم لأمريكا التي تحدث فيها مشكلة الآن بين البيض والأفارقة السود.
الناس ديل في الحقيقة قبل بس ٧٠ أو ٨٠ سنة تبنوا الإسلام برضو رسمياً كجماعة وليس كدولة طبعاً وما بالضرورة الجماعة كلها لكن بعض السود وعملوا منظمة مهمة جداً اسمها "أمة الإسلام" ومحمد علي كالاي مثال ساطع من أعضاءها وقبله مالكوم إكس الذي جاء إلى السودان وحج إلى الكعبة.. لماذا حدث هذا؟ اسمحوا لي بعدة تسجيلات صوتية للإجابة على الأسئلة دي وتوضيح مدى إرتباطها بالواقع والتحولات التاريخية التي تحدث في تاريخ المجتمعات البشرية.. وأهم شيء هنا ولازم أكون واضح وصريح معاكم وأوضح أنني لا أنطلق من أي منطلقات أيديولوجية وما عندي هدف سياسي من هذا السرد ولا أسعى إلى تمجيد عرق محدد أو دين محدد أو جماعة أيديولوجية محددة أياً كانت ولا كمان العكس.. أنا هنا أدعي وأزعم صادقاً معكم أنني أريد أن أحلل ظاهرة العنصرية تاريجياً واجتماعياً ومآلاتها في الواقع المعاش لنا جميعاً وزي ما قلت العنصرية في الحقيقة مسألة بتعطل التطور الاجتماعي لأنها بتعمل انشقاقات في المجتمع وتؤدي إلى مواصلة التأخر الحضاري والتأخر التكنولوجي.. أي مجتمعات فيها عنصرية شاذة دائماً العنصرية موجودة لكن لما تفيض المجتمع يتدمر يعني ما بقدر يستوعب التنوع وهذا ما أدى إلى انهيار الحضارات السابقة زي الحضارة الاغريقية وقلنا المرة الفاتت لماذا انهارت الحضارة الاغريقية ولماذا انهارت الحضارة الرومانية ولماذا انهارت الحضارة العربية الإسلامية ولماذا أمريكا الآن مهددة بالانهيار.. لنفس الأسباب بالمناسبة لكن الآن سنواصل في الأسئلة التي طرحتها وهي أسئلة صعبة جداً وسأحاول ربطها حقاً بالواقع وجعلها مناسبة فعلاً للواقع.
ح نجيب التاريخ أمامنا عشان نقدر نقرأ الواقع لأن التاريخ موجود كمخيال في الأدب الشعبي وفِي وعي الناس.. دائماً التاريخ موجود لأنه مكتوب ويعيش بين الناس ويتم استخدامه في صراعات الواقع والحاضر بشكل مستمر.. دي مبررات مهمة جداً لازم الناس تنتبه ليها الناس الشوية البسمعوا الكلام دا ويصبروا عليه وديل الناس المهمين وأنا قلت حسب وعيي أنا ديل الناس البصنعوا التاريخ ويصنعوا التحولات.. دائماً التاريخ بالمناسبة يصنعه ناس شوية لكن عندهم الرؤية وعندهم العزيمة لذلك الناس الشوية ديل مهمين جداً عندي وتحية واحترام لهم وأتمنى أن يسمعوني ويشعوروا بأني جزء منهم على الأقل يدوني هذا الشرف حتى إذا ما بستاهله.. هذه المقدمة عشان أجيكم للكلام الصعب وربط التاريخ بالواقع والإجابة على الأسئلة السابقة التي ذكرتها وهي: لماذا تبنى السودانيون - أعني سكان حوض النيل - المسيحية ثم بعداك تبنوا الإسلام ثم نمشي لما يحدث الآن في أمريكا بالضبط وما تنسوا التسجيلات التي عملتها قبل دا وأوضحت فيها كيف بدأت أزمة اللون الأسود ومتى بدأت وأول retorik لذم اللون الأسود والتي بدأها اليهود ثم بعد ذلك كُثفت أيام الحضارة العربية الإسلامية نسبة للصراع الواقعي الكان معاش والدائر بين الأحباش والسودانيين الكوشيين و الأحباش الأكسوميين الكانوا مستعمرين جنوب الجزيرة العربية وكانوا دايرين يهدوا الكعبة إن لم تكن تلك الأسطورة الرائعة المقدسة إنّو جاءت طير أبابيل يعني كانت قوة رهيبة لم يستطع الإنسان في الجزيرة العربية أن يتصدى لها لحد ما جاءت طير أبابيل ثم بعد داك لما صحت الحضارة الغربية ساهم الإنسان الغربي بدور كبير جداً في ذم اللون الأسود لأنها وجدت إمكانيات الإنسان الأسود في أكثر مراحلها ضعفاً وبالتالي أمكن استعباده وصنع علماء الاجتماع الغربيين تلك الرؤية بأن الإنسان الأسود منحط لدرجة الحيوان وقد ذكرنا هذا الكلام المرة الفاتت.
هذه مقدمة فقط لأبرر لكم ما أريد أن أقول وعشان تكونوا جاهزين للفكرة القادمة التي سأطرحها التسجيل الأول دا مجرد مقدمة ومبررات لأهداف هذا السرد وهو كتير فوق يعني الناس البتابعو السرد دا ما ح يفهموا كل شيء وأتمنى الناس المهتمين والقلنا هم شوية ومرحبتين حبابهم وهم مهمين جداً أتمنى يرجعوا فوق ويشوفوا نحنا قلنا شنو في الموضوع. دا التسجيل رقم ٢ فيما يتعلق بموضوعنا الحالي.. لماذا تبنى السودانيون - وأعني هنا سكان حوض النيل - المسيحية بين الأعوام ٤٠٠ - ١٥٠٠ ميلادية ثم تركوها وتبنوا الإسلام.. لماذا حدث هذا؟ ودا ضمن حديثنا في إطارنا الكبير والعريض عن أزمة اللون الأسود متى وكيف ولماذا حدثت وبنعاين لمآلات الواقع.. يعني كلامنا ما عن التاريخ ولا عن الأحداث القديمة.. أبداً لا.. نحن نحاول تحليل الظاهرة الموجودة في رؤوس الناس حالياً والاسمها العنصرية.. لماذا اللون الأسود تمارس عليه عنصرية أكبر من بقية الألوان والعنصرية طبعاً موجودة دائماً ضد ألوان أخرى كثيرة.. لكن لماذا اللون الأسود تحديداً.. دا موضوعنا وقلنا فيه كلام كتير فوق ومنمر حسب مواضيعه المحدده وعناوينه.. نرجع إذن إلى كيف سادت المسيحية ولماذا؟ قبل المسيحية كان في سلطة الإله أبادمك مباشرة وهي سلطة سياسية وسلطة أيديولوجية حكمت السودان حوالي ٦٠٠ سنة وخلال هذه المدة كان هناك نظام اجتماعي فيه طبقات اجتماعية محددة وبالتالي هنالك صراع بين البشر داخل الإطار الجغرافي وبين البشر الأخرين المقيمين حول الإطار الجغرافي المحدد الذي تحكمه سلطة الإله أبادمك رأس الأسد إله الحرب ودا كان صنيعة الملك العظيم أركماني مؤسس مروي الحديثة سنة ٣٥٠ قبل الميلاد وانتهت الحضارة المروية سنة ٣٥٠ ميلادية ولو تلاحظ دي حوالي ٥٠٠ ل ٦٠٠ سنة.. دائماً الحضارات عندها دورة شبيهة بذلك رأيناها في الحضارة اليونانية التي استمرت بنفس القدر والحضارة الرومانية واستمرت بنفس القدر من القرون تقريباً وشفناها في الحضارة العربية الإسلامية التي ازدهرت حوالي ٦٠٠ سنة أيضاً من سنة ٦٨٠ - ١٢٥٠ ميلادية تقريباً وانتهت باجتياح التتار لمركزها الأساسي في بغداد سنة ١٢٥٠ ميلادية ثم عم الظلام.. شرحنا فوق لماذا يحدث هذا وحدث كذلك في السودان بالنسبة لسلطة الإله أبادمك وحضارة مروي التي تضعضعت لأن الناس لم يستطيعوا آنها إدارة التنوع فتبنى قدر من الناس المضطهدين أيديولوجيا مختلفة باسم المسيحية لضرب العدو المتصور في تلك اللحظة وهو المنتمي للإله أبادمك وتم تبني المسيحية رسمياً في السودان لمدة ١٠٠٠ سنة من سنة ٤٠٠ - ١٥٠٠ ميلادية.. ما حدث أنه خلال هذه الفترة أيضاً تخلقت طبقات اجتماعية وتخللتها صراعات داخل الجغرافيا والجماعات المحددة والجماعات الفي الحدود والخارج الجغرافيا.. صراعات شديدة جداً جداً أدت في النهاية إلى انهيار المسيحية لماذا؟ لأن أخر عهد للمسيحية ونحن نعرف أن أكثر مملكة مستقرة وقوية كانت مملكة علوة وكانت موجودة في مدينة سوبا الشرقية الموجودة جغرافياً الآن في شرق الخرطوم.
كانت قوية جداً وفِي أخر عهدها زارها المسعودي عندما صحت الحضارة العربية الإسلامية وطبعاً الحضارة المسيحية أقدم بكثير من تاريخ تخلق الإسلام.. فزارها المسعودي وابن بطوطة وأخرين وكتبوا أنها كانت حضارة عظيمة ومستقرة والبيوت من قرميد وكان في طبقات اجتماعية محددة مسيطرة وكانت في أواخر عهدها تتبني اللغة القبطية كلغة الرسمية وكان وجهتها المقدسة هي الكنسية القبطية في الإسكندرية.. معظم الوقت الممالك الثلاثة المسيحية اللي هي المقرة ونوباتيا وعلوة كانت وجهتها الاسكندرية.. ما حدث هنا أنه كان في صراع مع جماعات أخرى اللي هي جماعات السودان الأصيلة الكانت طول الوقت داك متبنية أديانها المحلية وهم كانوا الفونج والشلك والنوبة في جبال النوبة والفور في دارفور وجماعات أخرى.. هذه الجماعات كانت معظم الوقت عندها أديان مختلفة عن المسيحية وكان يتم اضطهادها زي الاضطهادات التي تحدث للناس في الإقليم أو العالم كان هذا يحدث لذلك هذه الجماعات حاربت بشكل مستمر السلطة الكنسية المتمثلة في الكنيسة القبطية في السودان إلى أن تم انهيارها سنة ١٥٠٣ ميلادية وصعدت سنار كأيديولوجيا مختلفة وتبنت الإسلام كأيديولوجيا لمحاربة العدو الاجتماعي السياسي والاقتصادي الموجود في سوبا والذي كان في قرونه التاريخية الأخيرة يضطهد السكان المحليين الذين لم يكونوا على قناعة بنظامه السياسي والاجتماعي وكما أنه هو نفسه بدأ يصبح غير منسجم مع إطاره الاجتماعي والسياسي والأيديولوجي نفسه وكان في صراعات كتيرة جداً أدت إلى انهيار النظام المسيحي في السودان زي ما قبلها انهارت المؤسسة السياسية والاجتماعية والحضارية بتاعت الإله أبادمك الذي كان بديل للإله آمون.. هذا كلام بشكل مقتضب ومختصر وممكن نفصل لمن شاء وأراد التفصيل.. ما حدث في لحظة سنار أنه في الحقيقة الناس والجماعات والجيوش التي سعت ونجحت في ضرب وتدمير المؤسسة الكنسية في السودان كانوا في الحقيقة وفِي المقام الأول واليد العليا كانوا وثنيين.. كانوا الفونج والشلك ونوبة الجبال في المقام الأول.. والعرب والجماعات المسلمة تحديداً التي وصلت السودان أنذاك كانت ضعيفة وكانت سلطتها روحية فقط لسبب بسيط جداً وهو أن الجماعات الوثنية اللي هم كانوا الفونج والشلك ونوبة الجبال كانوا في الضد من السلطة دي وكانوا محتاجين لتبني أيديولوجيا ضدها لذلك الإسلام لم يدخل السودان عبر السيف إنما السودانيين أنفسهم تبنوا الإسلام.
وأعني المجموعات الأصلية في السودان تبنت الإسلام كأيديولوجيا مضادة للمسيحية وبذلك تم فعلاً اتحاد على أساس هذه الأيديولوجيا.. وفِي حديثنا عن النزعة العنصرية وكيف تخلقت أزمة اللون الأسود وكيف أن المضطهدين بيتخذوا أيديولوجيات محددة لمحاربة مضطهديهم وهذا ما حدث بالضبط للأمريكان الأفارقة وجماعات منهم تبنت الإسلام لذات الهدف الذي لأجله تبنى السودانيون الإسلام في سنة ١٥٠٠م تقريباً كأيديولوجيا مضادة للمسيحية في زمانها.. والأشياء لا تقاس ببعضها البعض وح نحكي اللمحات التاريخية. يتواصل
06-06-2020, 10:20 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
دا التسجيل الثالث في موضوعنا المحدد الآن لماذا تبنى السودانيون - أعني سكان حوض النيل هنا - المسيحية ثم تبنوا الإسلام رسميا؟ برغم معلومة مهمة جداً جداً وهي أنه في لحظة نشأت الحضارة العربية الإسلامية لحظة انطلاقتها الأساسية والشرارة القوية أراد المسلمون أن يدخلوا السودان لأنها كانت نوبيا أرض الذهب لكنهم لم يستطيعوا.
ونعرف القضية المعروفة والمشهورة في التاريخ أن السودانيين كان عندهم سهام بتصل العيون يعني كانوا مدربين جداً وبالتالي الإسلام وجماعات وجيوش الحضارة العربية الإسلامية لم يستطيعوا دخول السودان - ونحن هنا لا نقيّم وإنما نحاول أن نقرأ التاريخ لنصل إلى هدفنا من هذا النقاش - دي معلومة مهمة جداً لأنو بعداك حصلت تحولات كبيرة جداً وقام السودانيون أنفسهم وآخرون ليس السودانيون فحسب بتبني الإسلام والعرق العربي في مصر ومصر أصلاً هي قبط يعني Egypt والفلسطينيين ليسوا بعرب والسوريين ليسوا بعرب والعراقيين آشوريين وبابليين وأكراد موجودين حتى الآن كلهم تبنوا الإسلام وتبنوا العرق العربي لأسباب محددة ولما نمشي ليبيا الليبيين موجودين منذ آلاف السنين ومؤكد أنهم ما عرق عربي وكذلك التونسيين والجزائريين والمغاربة هم أصلاً أمازيغ وبربر نعرف ذلك ولكن العرب دائماً موجودين.
وحدث تبني العرق العربي وتبني الدين الإسلامي لأسباب موضوعية هذا ما أريد قوله.. وقلنا نحن لا نقيّم وإنما نقرأ التاريخ لنصل إلى هدفنا الذي تحدثنا عنه وهو كيف ولماذا ومتى نشأت أزمة اللون الأسود؟ لنحلل ما يحصل في أمريكا الآن وعشان نقرأ حالتنا في السودان ونقرأ الأحوال في أماكن مختلفة من العالم والإقليم.
هذا مهم طبعاً للعلم بالشيء ومهم للتشخيص عشان نلقى العلاج ونتصالح كمجتمع ونخلق صيغة للعيش السلمي المشترك قائمة على الوعي بالذات والتاريخ والحاضر.. أواصل في نقطة مهمة وهي أن السودانيين والنَّاس السود كان دائما عندهم حضارة بالتالي هم لم يشاركوا لا معنوياً ولا مادياً في صناعة الحضارة العربية الإسلامية.. لم نجد أبداً ولا حبشي واحد ولا سوداني واحد حسب ال retoriks الواردة في الإرث العربي الإسلامي في الحقيقة لم يكن هناك figure أو رقم فكري ولا طبيب ولا بتاع رياضيات ولا إنسان متخصص في الحروب زي سلمان الفارسي من السود لم يحدث أبداً. المثال الوحيد هو أنه كان هناك مؤذن اسمه بلال فقط غير كدا مافي لأن الناس ديل كان عندهم حضارة وكانوا مكتفين بذاتهم وكانوا طوال الوقت وأقولها بهذا اللفظ مما لاحظته وقرأته في التاريخ كانوا معادين للحضارة العربية الإسلامية لأنهم منافسين ليها تحديداً لأنه عندهم حضارة أكسوم في الحبشة وعندهم حضارات مختلفة في السودان سابقة للمسيحية وفِي لحظة مجيء الإسلام كان السودان مسيحي ويتكون من حضارة ودويلات محددة هي المقرة ونوباتيا وعلوة وكانت قوية جداً واستطاعت أن تصد الغزو الذي جاءها من الخارج.. هكذا حدث في التاريخ.
وبعد انهيار الحضارة العربية الإسلامية تبنى السودانيون الإسلام والعرق العربي بعد ٢٥٠ سنة من انهيار الحضارة العربية الإسلامية يعني السودانيون ظلوا مسيحيين طوال وقت ازدهار الحضارة العربية الإسلامية كل الوقت إلى سنة ١٥٠٣ ميلادية حيث تم تبني الإسلام والعرق العربي رسمياً سنة ١٥٠٣ ميلادية بصعود سنار السلطنة الزرقاء وقلنا أن الحضارة العربية الإسلامية انهارت في نسختها المزدهرة والقوية والعندها جيوش وعندها فلسفة وعندها قوة معنوية وروحية انهارت سنة ١٢٥٠ ميلادية على يد التتار ولم يعد لها بريق.. تبنى السودانيون العرق العربي بعد ٢٥٠ سنة من انهيارها بالتالي هي ما كانت مهدِد بالنسبة ليهم إنما دي كانت أيديولوجيا تم تبنيها داخلياً مثلما يحدث الآن - وسأضرب مثال والنَّاس المنتمين إلى هذه الأيديولوجيات ما يزعلوا مني - تم تبني الاشتراكية والليبرالية الآن كأيديولوجيا منافسة في إطار الصراع السياسي والاجتماعي.. بالضبط هذا ما حدث.. تم تبني الإسلام ومعظم الجماعات التي تبنت الإسلام تبنت نسخة من الإسلام صنعتها بنفسها يعني معظم الجماعات التي تبنت الإسلام وقالت به ما كانت على قناعة كفاية لذلك ظل الفونج معظم الوقت وثنيين برغم أن الدولة رسمياً أصبحت فيما بعد إسلامية وظل الشلك اللي هم أيضاً حاربوا الممالك المسيحية ظلوا وثنيين برغم أنهم جميعاً حاربوا المسيحية بإسم الإسلام والحروب قديمة بين المكونات السودانية فمثلا المسعودي يقول ان تتار السودان هاجمو علوة سنة ١٣٣٣م ويعني الشلك ونوبا الجبال والفونج .. وظل النوبيين في جبال النوبة مثلهم والفونج والبجا وثنيين معظم الوقت ووثنيين أعني بها عندهم أديانهم المحلية المحترمة واللي هم شايفنها كويسة وما يزال بعضها موجودة حتى الان في شكل الكجور وفِي أشكال مختلفة في جبال النوبة والنيل الأزرق وموجودة في جنوب السودان طبعا.. دي حاجة مهمة جداً لازم ننتبه ليها.
بالتالي كان تبني الإسلام كأيديولوجيا مضادة لفساد الكنيسة المسيحية ولا نتحدث عن المسيحية كدين وإنما نتحدث عن أن فساد الطبقات الحاكمة آنها زمن الدولة المسيحية والتي كانت تضطهد الجماعات الأخرى وتستعبدهم - بالضبط هذه الكلمة - بتستعيدهم وتستولي على أرضهم وبتخدِّمهم سخرة ومجاناً لذلك تم تبني أيديولوجيا مضادة لهذه الأيديولوجيا التي رأوها فاسدة آنها وقلنا نحن لا نقيّم وهذا ما حدث بالضبط في التاريخ وليس في الإمكان أحسن مما كان.. لقد حدث وإنتهى.. تلك لحظة تاريخية علينا أن نقرأها ونمشي لقدام.
أنا أقول أن السودانيون تبنوا المسيحية ثم تبنوا الإسلام ولكن ليس تبنياً فقط وإنما أصلاً السودانيون وهذه الرقعة الجغرافية التي كانت تمثلها كوش أو سمها ما تشاء في التاريخ أو الحضارة الفرعونية الكوشية أو الحضارة الفرعونية كانت هي نفسها مصدرة للألهة ومصدرة للوعي ومصدرة للفهم التكنولوجي والوعي الاجتماعي والسياسي بشكل مستمر.
بالتالي الألهة دي نفسها بتاعة المسيحية والفهم بتاع الإسلام لم يكن غريباً عليها لأنها هي أصلاً التي صدرته للأخرين وهي مجرد بتستعيده من جديد في شكل جديد وفِي شكل أيديولوجي جديد يواكب اللحظة التاريخية في كل مرة من المرات مثلما فعل الرومان بتبنيهم المسيحية والشعوب المستقرة بالمناسبة والعندها حضارة لا تصنع الأديان والأديان دائماً يصنعها الناس المضطهدين ثم في لحظات محددة في التاريخ ودا موضوع أخر بتتبناها الشعوب التي تنتصر على قاهرها دي القصة بالضبط عشان كدا تم تبني المسيحية في روما وتم تبني المسيحية في مصر وتم تبني المسيحية في السودان وتم تبنيها في أثيوبيا أكسوم وكذلك تم تبني الإسلام في مناطق مختلفة في الإقليم والعالم.
تلك أيديولوجيات عندها علاقة بالصراع الاجتماعي في لحظة محددة والتحولات الاجتماعية والتاريخية في لحظة محددة دا موضوع أخر لكن كان من المهم الإشارة له لنقرأ التحولات في الواقع أنا سأقفز بكم قفزة سريعة جداً إلى الواقع.. نرجع لما يحدث في أمريكا الآن ونقاشنا عن أزمة اللون الأسود متى وكيف ولماذا حدث هذا في أمريكا؟ حدث شيء قريب مما حدث أيام الصراع مع المسيحية وهزيمتها في السودان أو تدميرها ويسمونه خراب سوبا.. مش اختراع مننا لكن اسمه خراب سوبا ويقولوا ليك عجوبة الخربت سوبا عجوبة دي أسطورة التدمير وخلاصة الدمار.. برضو الأمريكان الأفارقة تبنوا الإسلام كأيديولوجيا مضادة للعدو الذي تصوروه أبيض ومسيحي وكان عندهم منظمة اسمها "أمة الإسلام" ومن رموزها محمد علي كلاي ومالكوم اكس ونعرف هذا الكلام جيداً وممكن نقرأه في التاريخ وممكن تشوفه في الإنترنت الآن.. ليس كل السود ولكن جماعات منهم وكذلك جماعات من الأفارقة تبنوا الإسلام كأيديولوجيا ضد العدو الغربي الذي يضطهدهم ويستعبدهم لكن الأحداث ضخمة جداً وهناك أخرين تبنوا المسيحية باعتبار أن المسيحية نفسها العدو الأبيض الأخر هو منشق وفيه ناس كويسين وفيه حقوق إنسان وفيه تكنولوجيا وفِي حضارة لذلك لم تكن الفكرة فقط أن الإسلام يستطيع أن يكون أيديولوجيا مضادة للرجل الأبيض كعرق لأن الرجل الأبيض ذاته كان منقسم لذلك أفريقيا انقسمت وأعني أفريقيا الحديثة وصراعها الحديث انقسم بين الإسلام والمسيحية كأيديولوجيات مضادة للعدو الذي يضطهدهم ويسلب حقوقك ويسلب إنسانيتك.. هذا ما حدث برضو في أمريكا ويحدث بشكل مستمر في مناطق مختلفة في العالم.
والآن نعرف شيء مهم جداً جداً أنه في الحقيقة الأفارقة والعرب والأسيويين معظمهم كانوا مضطهدين عبر قرون من الرجل الأبيض لذلك أي أيديولوجيا أو أي فهم ممكن يساعد الإنسان المضطهد ويقويه ويحقق وحدة جماعته ضد العدو الذي يحتقره ويستعبده ويسلب حقوقه يتبناه وهذا ما يحدث بالضبط الآن وكما نعرف أن العنف الذي يحدث بإسم الإسلام في جماعات أيديولوجية زي القاعدة وداعش وبوكوحرام والشباب الصومالي وما يحدث في أفغانستان وطالبان وهي جماعات متطرفة وعنيفة جداً وبتضبِّح بإسم الإسلام وتجعل لها وحدة بإسم الإسلام لتقابل العدو الأخر الذي يضطهدها.. هذا ما حدث في التاريخ بالضبط وزي ما قلنا نحن نتحدث عن كيف ولماذا نشأت أزمة اللون الأسود.. والنَّاس الما متابعين لهذا الكلام ح يضيعوا في الحقيقة لأن تسجيلاتي الأخيرة دي مبررات في الحقيقة وأنا لا أُدين عرق محدد ولا أتحدث عن إدانة دين محدد ولا تعلية عرق أو دين على أخر ولا أيديولوجيا محددة وتعلية أيديولوجيا أخرى إنما نحاول أن نقرأ مع بعض التاريخ عشان نشوف الواقع ونصلحه ونصنع عيش سلمي مشترك بيننا قائم على حاجة مهمة جداً وهي الاحترام المشترك لإنسانية الإنسان من كان.
دي حاجة مهمة جداً جداً وأنا بحاول أركز عليها قدر الإمكان ومن هنا بحاول أبرر الشرح القاسي الذي قلته في التسجيلات السابقة حول لماذا ومتى وكيف نشأت أزمة اللون الأسود وأصبح الإنسان الأسود هو المضطهد والنَّاس ينظرون له باحتقار في كل مكان.. لماذا حدث هذا.. قلناه في سلسلة التسجيلات السابقة وحاولت أوضح ما عندي في هذه النقطة وتحية لكم ومحبة أكيدة وأتمنى أكون واضح وإلا ح أكون جاهز لأي سؤال أستطيع الإجابة عليه..
محمد جمال الدين
*تم تحويل التسجيلات الصوتية إلى نسخة مكتوبة بواسطة الشابة الهميمة "أمنية جابر " وفق طلب البعض الذي استعصى عليه تحميل التسجيلات الصوتية في الواتساب.. شكرا لها
06-06-2020, 11:50 PM
Moutassim Elharith Moutassim Elharith
تاريخ التسجيل: 03-15-2013
مجموع المشاركات: 1273
Quote: شكرا جزيلا للباحث النحرير محمد جمال الدين. تسجيل حضور ثم عودة لاحقا للمناقشة. ظ
شكرا للتشجيع الجميل.. كلنا نحاول برغم استنزافنا كلنا بالأزمة السياسية المستمرة بلا نجاح ولا مرة واحدة وتلك هي دائرة التخلف.. برجع تاني في وقت افضل.. سلام واحترام
06-07-2020, 07:14 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
هذا المساء ان ربنا سهل بجي بمبدأ فكرة البوست. اظنه غير واضح.. كمان برضو اخوكم غاب من المنبر النير من زمن.. واعرف المعادلات والمجاملات و سايكولوجية الزول السوداني :) .. تحيات واحترامات لكل من مر من هنا
06-10-2020, 09:37 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
ليه يعني ما الشايقية ولا المناصير ولا البساطاب ولا غيرهم؟! بس الجموعية وحيدهم الطلعلتهم مدعين لأصول ليست أصولهم؟! العروبة المستكترة عليهم دي نسبتها في الأثيوبيين كدم أكثر من مصر ولبنان وسوريا وفلسطين وكثير منها في تشاد والنيجر ويواجهون اضطهاد في مالي وإزدراء عنصري في مصر ففي مصر يعتبر العربي أقل مكانة ووجاهة لدى الحضر في مصر خاصة عرب أصوان الواحد لو ما مارس الكذب والتزوير في سودانا دا ما برتاح؟! الزغاوة والجموعية والنوبة وغيرهم محتاجين سودان مزدهر ومحتاجين جهود تبني وطنهم وليسوا بحاجة للمغالطات حول أصولهم
06-10-2020, 11:42 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
Quote: ليه يعني ما الشايقية ولا المناصير ولا البساطاب ولا غيرهم؟! بس الجموعية وحيدهم الطلعلتهم مدعين لأصول ليست أصولهم؟! العروبة المستكترة عليهم دي نسبتها في الأثيوبيين كدم أكثر من مصر ولبنان وسوريا وفلسطين وكثير منها في تشاد والنيجر ويواجهون اضطهاد في مالي وإزدراء عنصري في مصر ففي مصر يعتبر العربي أقل مكانة ووجاهة لدى الحضر في مصر خاصة عرب أصوان الواحد لو ما مارس الكذب والتزوير في سودانا دا ما برتاح؟! الزغاوة والجموعية والنوبة وغيرهم محتاجين سودان مزدهر ومحتاجين جهود تبني وطنهم وليسوا بحاجة للمغالطات حول أصولهم
انت أظنك فهمت غلط.. ارجو منك متابعة البوست للنهاية نحن لسا في البداية
06-10-2020, 11:45 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
النزعات والمشاعر العرقية في السودان واسباب تحريم وتجريم الرق وتجارته .. والقبيلة والطريقة الصوفية والمدنية الجديدة ومستقبل السودان .. حلقة 1-2
دعونا نعاين للسودان من وراء بداية بالسودان الوسيط عشان نشوف كيف كانت التقاسيم العرقية ودورها في المجتمع والسياسة والاقتصاد.. نعاين للسودان أيام الدولة السنارية وما حدث يعني التقاسيم الاجتماعية ثم بعد انهيار الدولة السنارية وهي طبعاً لم تكن وحدها كان في الدولة السنارية confederation بتاع الفونج وبعض الأعراق والقبائل النوبية والعربية اللي هم كانو في confederation بالإضافة إلى البجا وعندهم حاجتهم المستقلة والجعليين عندهم حاجتهم المستقلة والعبداللاب طبعا عندهم حاجتهم المستقلة وناس المقرة ناس دنقلا وكدا كان عندهم حاجتهم المستقلة لكن كلهم تحت لواء الدولة السنارية.
وبعداك كان في سلطنة الفور كانت موجودة وفِي سلطنة المسبعات في لحظة من التاريخ وفِي سلطنة الشلك كانت دائماً موجودة. دا باختصار ال setup بتاع السودان أيام الدولة السنارية يعني السودان الوسيط.
ثم جاء السودان الحديث اي السودان المعاصر والذي يبدأ سنة ١٨٢١ ميلادية ونحن نعاين للحظة دي كويس عشان بعداك بنلقى التقاسيم الاجتماعية والطبقات الأرستقراطية التي صعدت والطرق الصوفية التي تكونت منها الطوائف المحددة اللي قدام بقى عندها دور في السياسة ثم القبائل التي صعدت وانتمت انتماءات محددة وبقى عندها دور في المجتمع وبرضو في السياسة يعني العمد والنظار والمشايخ كان عندهم دور حاسم جداً في السياسة خلال الفترة السنارية كلها وخلال فترة العهد التركي وخلال فترة العهد الإنجليزي وخلال الدولة المهدية وما بعد ذلك وحتى الان.
الوقت داك ما كان مدنية في السودان وبالتالي مافي أحزاب سياسية بتقوم على أي أيديولوجيا زي الإشتراكية أو اللبرالية أو ما شابه ذلك أو حتى أيديولوجيا بتقوم على السلفية الإسلامية كانت دي حاجة نادرة جداً او لا توجد.
لكن كان في دائماً أعراق السودان كان مقسم دائماً على أساس عرقي قبلي عشائري على أساسه تقوم السياسة ثم جاء التصوف بعد شوية عمل تحولات وجاب النظام بتاع الطائفة البتتولد منها أحزاب سياسية.
القبيلة طبعاً بشكل مستمر بتتولد منها أحزاب سياسية ولغاية الآن الحركات المسلحة كلها في دارفور زي الفور بقيادة عبد الواحد والزغاوة كم قسم مناوي وجبريل إلى أخره والمساليت والبيرتي كلهم إما في اتحاد مع حركات محددة أو هم عندهم حركاتهم براهم عشان كدا دارفور فيها تقريباً ١٢٠ حركة والحركات دي عندها علاقة بالتنوع العرقي في دارفور ما نرفض عددها الكتير ساي كدا ونشجبها.
دا الواقع بتاع دارفور التنوع الكثيف دا.. وكذلك كانت الحركة الشعبية في جنوب السودان وكانت في الأساس مكونة من الدينكا والنوير والشلك والحرب الدارت بينهم معروف إنها كانت حرب تقوم على أساس القبيلة في المقام الأول لأنه في المناطق دي ما كان في تصوف بالتالي مافي طوائف لو تلاحظو أحزاب قائمة على الطائفية ما في هناك لكن في حركات ولا مدنية.. لكن في أحزاب موجودة في المركز بتمد يدها هناك وبتجند الناس يإسم الطائفة زمان يعني لكن الآن الحركات المسلحة كلها تتكي على القبيلة . . سندها القبيلة مش في دارفور والجنوب فقط إنما في كل أنحاء السودان.. لما نمشي الشرق بنلقى الأسود الحرة من الرشايدة ومؤتمر البجا وحركة كوش في شمال السودان الاقصى اللي هم أصلاً حلفاويين ومحس وسكوت وشوية دناقلة هي مفتوحة لكل السودانيين حسب دستورها لكن في الأساس قيادتها وعضويتها على القبيلة كما المناصير عندهم حزب "مهجري المناصير" الذي يقوده صاحبنا عسكوري الموجود الآن في الجهاز الإداري للحكومة الحالية.. حتى في الوسط النيلي نفسه الذي حدثت فيه حاجة جديدة.
والبرلمان الديمقراطي الجاي طبعاً ان جاء بلا شك بالقراءات القدامنا دي ستشكله القبائل والطوائف من جديد.. ولو في صورة مختلفة من الماضي.. بس برضو ح يكون غالبه من القبائل والطوائف لكن طوائف جديدة يعني مثلاً ح تجيك قبائل دارفور يعني ح يجوا الزغاوة بهذا الإسم لأن عندهم حركات عندها برنامج حديث برنامج متطور جداً برنامج يقول بحقوق الإنسان برنامج يقول بالوطن الواحد برنامج بقول بالعلمانية زي الحلو برضو قبائل جبال النوبة لكن الأعضاء والقيادة هي قيادة تنتمي إلى جهة محددة وإلى قبائل وعشائر محددة. بجيك عبدالواحد طبعا برضو يعني الجبل دا عبدالواحد بجيب فيه كمية من الدوائر وبجيب في مناطق أخرى في السودان دوائر من المحتمل طبعاً كذلك مناوي حتى لو جاب دائرتين أو ثلاثة أو أربعة كذلك البقية جبريل بجيب كمية من الدوائر ونمشي لناس البجا عندهم مؤتمر البجا أسمه عديل ما باللفة يعني زي حركة العدل والمساواة لا دا أسمه مؤتمر البجا عديل بالدرب ونص النهار.. حركة العدل والمساواة الزغاوية في الحقيقة حركة حديثة ومتطورة ونحن نحترم وقلنا دا نتيجة لتنوع المنطقة وهو تنوع حقيقي وما عندهم فرصة لنيل حقوقهم إلا بهذه الطريقة.
فبجوك الناس ديل في البرلمان تاني وبتجي الطوائف تاني يعني لازم نكون جاهزين للبرلمان الجاي وأنه لازم تكون فيه معالجات محددة.. البرلمان الجاي ح تجي فيه القبائل والطوائف الدينية و ح يجوك ناس حركة كوش المرة دي و ح يجوك ناس الشرق المرة دي الميرغنية ح يكونوا ضعفوا شوية ولكن ح يكونوا موجودين وكذلك حزب الأمة وقيادات الأنصار ح يكونوا موجودين لكن ضعفوا شوية لأن دارفور بتجي فيها دوائر من أماكن تانية ما حقتهم كلها زي المرة الفاتت ٣٥ دائرة من دارفور.. دوائر دارفور كانت ٣٧ وحزب الأمة أخذ ٩٥٪ شفت كيف ونحن نحترم حزب الأمة طبعا. الشرق برضو كان الإتحادي الديموقراطي الآن بعد العملية الحصلت للمعلم الخير في خشم القربة المعلم من الطبقات الحديثة والعذابات الحصلت للناس هناك والميرغني كان غايب وبركته قلت في الأماكن دي والبزنس بتاعه قل فبالتالي شيء طبيعي جداً سياسياً سيقل لكن سيظل موجود.
والطوائف الأخرى في طوائف جديدة صعدت زي شيخ الزريبة وأزرق طيبة ديل كلهم يستطيعون وعندهم تأثير مباشر أو غير مباشر ديل كلهم ح يجوا البرلمان بعدين.
وح تكون في البنيات الحديثة برضو يعني الحزب الشيوعي برضو بجيب دوائر لكن شوية والمؤتمر السوداني ح يجيب دوائر طبعا وهو مهم .. لكن كل البنيات الحديثة واليسار كله وحتى الإسلاميين كلهم مع بعض ما بقدروا يعملوا ربع البرلمان ودي وجهة نظري.. ما بقدروا يجيبوا ٣٥٪ من البرلمان.. دي القراءات التي قرأتها وعندي ليها حسابات قبل كدا عملتها بالحسابات أظن في sudanforall أو في sudaneseonline .. أنا مهتم بالقضية دي ولازم نعاين ليها.
ما أود قوله أن علينا رؤية مجتمعنا .. حقيقة مجتمعنا لغاية الآن جزء كبير منه يعيش في التاريخ والمدنية التي ينادي بها شبابنا الحديث ليست راسخة إلى الآن وغير أصيلة واقتصاديات البلاد لغاية الآن بتقوم على القطاعات التقليدية ولغاية الآن القبيلة عندها دور كبير جداً في السياسة قلنا قبيل كان الدينكا والشلك والنوير الحركة الشعبية مؤتمر البجا نكرر دا لتذكير الناس مؤتمر البجا هو عرقية البجا التي نحترم ونحب وكل الأعراق محترمة ومحببة والرشايدة عندهم حزب أسود الرشايدة حزب أسمه كدا عديل وبعدين حركة كوش دي حركة معرفة تتكون من المحس والسكوت وشوية من الدناقلة والحلفاويين وبعداك حركات دارفور وبعداك حركات في الوسط وكثير غيرها في النيل الأزرق وجبال النوبة فيها ٩٩ جبل يعني ٩٩ قبيلة رافعين السلاح بإسم حقوقهم وهم أعضاء حركتهم في الأساس وقيادة لحركتهم.. ديل برضو بيجو البرلمان شفت كيف.. لازم نكون جاهزين للبرلمان ويكون عندنا أفق لنعالج الأمور مع هذا البرلمان المنوع ليس فقط في كياناته السياسية إنما منوع في ال political وال social setup برضو لأنو ح يكون فيه القبائل والطوائف والأحزاب المدنية بتياراتها المختلفة كلها اليسار المتطرف الشمولي والوسط من الأفندية وبعداك اليمين كلهم ديل ح يكونوا موجودين في برلمان واحد.. شوف التعقيدات دي كلها كيف والتعقيدات دي حالياً عايشة ومعقدة الأمور وبعداك طبعاً في الجيش وهو بعضه محزب حتى الان.
وفِي طبعا الدعم السريع اللي هو إدارة أهلية عشان كدا حميدتي جاب الإدارة الأهلية لأنو عنده إحساس بأن ديل أقرب إليه من الأفندية البنبذوا فيه ديل وبفتكروه ما بفهم مع إنه هو ذكي جداً في الحقيقة كما بالفطرة وبقول كلام مناسب لناسه ومناسب للحظتهم التاريخية ويحقق لهم مصالح مادية ومصالح رمزية وهو زعيم عندهم.. إنت ترفضه كيف؟ إذا أجرم الزول البيجرم يتحاسب بالقانون لكن ما باللعلعة والكلام والإعلام دي مجرد منافسة سياسية تحت غطاء بس ما بتعمل شيء.. برضو لأنه يمتلك القوة الجماهيرية ويمتلك السلاح ويمتلك دعم إقليمي لازم نتعامل مع هذا الوضع.
إذا هو مجرم أمشي المحكمة حاسبه.. صراع سياسي هو عنده جماهير لازم القصة دي نحنا نعاين ليها بشكل معقول جداً ونشوف ضمير مجتمعنا ونشوف بنياته ونشوف لحظته التاريخية حقيقة عشان نقدر فعلاً نعمل أمة ونعمل حضارة ونمشي المدنية فعلاً لكن نحنا كل مرة بنقص الخط التاريخي وما بتواصل.
عشان كدا لغاية الآن في فشل كبير جداً لعدم فهمنا لبنيات مجتمعنا ولعدم إلمامنا بالواقع عشان كدا نحنا عندنا مشروع السودان ٢٠٠.. شكراً لطلعت وإيلاف نظام الدين الأشاروا للحاجة دي وجابوني أنا لخمتكم اللخمة دي كلها لأني في الحقيقة زول متطرف جداً في القصة بتاعة مشروع السودان ٢٠٠ دي وبشوف فيه حياتي عديل كدا وما بالضرورة بفرضه على الأخرين لكن بقول للناس يعاينوا له الناس الفاهمين والعندهم صبر والمهتمين.. المشروع دا هو البودينا للمدينة والحضارة غيره أنا ما شايف وما ممكن ولا بيحصل.. ح ندور في دائرة الفشل المستمر لأنو بكون ما عندنا تراكم بتاع تجربة.. لا تراكم بتاع تجربة سياسية ولا تراكم بتاع تجربة علمية طب وفيزياء وكيمياء ما عندنا صفر تقريباً.. ما عندنا تراكم تجربة في البزنس ولا دراسات بتاعة بزنس واقتصاد وتجارة داخلية وخارجية مافي تجربة مسجلة عشان نعرف التجارب الناجحة نستفيد منها والتجارب الفاشلة نتداركها دا كله ما عندنا.
مشروع السودان ٢٠٠ بعمل دا كله وأنا الآن أدعوكم وعايز أحمد ناس منكم يشتغلوا معانا في مادة كثيفة جداً ممكن إيلاف تجيبها ليكم وفِي تسجيلات صوتية شارحة لمشروع السودان ٢٠٠ وفِي حب ليكم عمره ٢٠٠ سنة بل آلاف السنين ومشروح لماذا السودان ٢٠٠ ما السودان ألفين أو عشرة آلاف.. مشروح شرح دقيق جداً أو هكذا أدعي.
أنا حاولت أرجع للوراء عشان أقول كيف كانت التقاسيم العرقية ودورها في السياسة بالتالي دورها في الاقتصاد وفِي البزنس وفِي تشكيل مخيال المجتمع.. كان في تصارع وكان في تدافع رهيب جداً بين القبائل الموجودة في السودان بشكل مستمر ثم جاءت الطرق الصوفية دخلت المعترك وتولدت عنها أحزاب وتولدت طبقات اجتماعية مثلما دائماً القبيلة والعشيرة موجودة لغاية اللحظة زي ما ضربنا المثال فوق بتتولد عنها حركات سياسية وحركات اجتماعية وطبقات اقتصادية وبزنس وتجارة دا كله حاصل.
طيب خلوني أرجعكم للتاريخ مرة تانية ونقول أن البشرية كانت في الماضي كلها ما السودان بس كانت مقسمة إلى أحرار وعبيد كان الاقتصاد والدولة والسياسة تقوم على هذا النمط في كل أنحاء العالم يعني مش عندنا بس في أفريقيا ولا عندنا بس في الشرق إنما أيضاً في الصين وفِي الدولة الرومانية والدولة اليونانية وفِي كل أرجاء العالم كان العالم في يوم من الأيام ما فيه حقوق إنسان كان مقسم وحقوق الإنسان دي وضعت قريب الإعلان العالمي لحقوق الإنسان اتعمل سنة ١٩٤٨ م.
انو كل الناس متساويين وعندهم حق التعبير وحق الحياة دا سنة ١٩٤٨ م قبلها طبعاً كان في محاولات بشكل مستمر وكان في رواد قتلوا وضبِّحوا وفِي شعوب حاولت تعمل حاجة مختلفة لكن دائماً كانت البشرية مقسمة إلى التقسيمين الفظين ديل لغاية ما الحضارة الغربية وصلت قمتها في القرن التاسع عشر يعني في حدود ١٨١٠م أو حاجة زي كدا يعني وقت قريب أقل من ٢٠٠ سنة تم منع الرق وتم منع تجارته بالقانون لأول مرة في تاريخ البشرية.
شوفو مأساة البشرية دي كيف.. ودا عمله الغربيين وحدهم ولما حاولوا ينشروا الفكرة في الشرق الشرق كله كان رافضها وقيادات الشرق كلها السياسية والاجتماعية رفضت الفكرة مجملاً وأصرت مواصلة الرق وتجارته حتى حوالي العام ١٩٢٠ م في السودان قياداتنا السياسية والاجتماعية كتبت للإنجليز خطاب موجود وممكن تشوفوه الآن باللغة الإنجليزية والعربية اعترضوا فيه على تحرير الرقيق ودا كان لأسباب محددة:
قالوا إنه ستحدث فوضى في المجتمع و ح يحصل انهيار اقتصادي يعي زي قصة كورونا دي المسألة صعبة جداً أولاً ديل لما يتحرروا ح يمشوا يعملوا شنو ح يجرموا في المجتمع وح يعملوا دعارة ومخدرات وفي نفس اللحظة هم ما عندهم مهن وما مؤهلين دا كان النقاش الوقت داك. دا رقم واحد.. نمرة ٢ إنّو ح يحصل انهيار اقتصادي لأن المشاريع ستنهار وكذلك أسر كثيرة ستنهار لأن حياتها قائمة على المخدمين من الرقيق هذا بالضبط حصل في السودان وطبعاً في أرجاء الشرق كله كانت فكرة تحرير الرق مرفوضة الإنجليز فرضوها بالقوة.. إذن عند الإنجليز وفِي الحضارة الغربية دا حصل ليه يعني لماذا تم تحرير الرقيق.. لم يتم في المقام الأول لأسباب إنسانية ولا حقوق إنسان إنما تم لأن الحضارة الغربية هنا والغرب اكتشف الدولة الوطنية ودي كانت حل للأزمات والحروب والكوارث السياسة الكانت موجودة في اوروبا نفسها وكانت بتحصل ليهم .. والتقتيل الكانو بعملوه لبعض اكتشفوا بالصدفة داخل هذا الصراع الدولة الوطنية لأن الحروب الدينية والعرقية كانت عنيفة في أوروبا مثلاً حرب الثلاثين عاماً كانت من ١٦١٨ و ١٦٤٨ ميلادية وقتل فيها ثلث سكان أوروبا.. قتلوا بعض.
الثلث يعني كل ثلاثة أشخاص مات فيهم شخص يعني أسوأ من كورونا بكتير كورونا قتلت ٢٪ من عدد الناس الحرب دي قتلت الثلث يعني ٣٥٪ من سكان أوروبا انقرضوا.. دي واحدة فقط من الحروب والتي كانت دينية بين البروتستانت والكاثوليك والكالفنيين وقصة عارفنها دامية وحروب سابقة غيرها وحروب كبيرة قبلها.
بالتالي اكتشفوا الدولة الوطنية والتي قبلها كانت الأمم كما نعرف تقوم على أساس الدين الواحد والعرق الواحد فهؤلاء عملوا فهم جديد وهو الدولة الوطنية أو دولة المواطنة والزول فيها ممكن يكون دينه مختلف عن بقية الناس وعرقه مختلف عن بقية الناس ويكون مواطن ومحترم.
دي دولة المواطنة اسمها.. دولة المواطنة دي فيها حاجة خطيرة جداً أدت إلى تحرير الرق وتحريم تجارة الرقيق لأن الإقطاعيين كانوا يمتلكون آلاف الرؤوس من البشر الذين يعملون لأجلهم وكان اسمهم النبلاء.
النبيل دا كان بيدفع حصة للحاكم لكن الآلاف ديل بيدفعوا ليهو هو وملكه. قامت الدولة فرضت الفهم الجديد انها أن الثلاثة أو أربعة آلاف ديل يمشوا يشتغلوا لوحدهم ويدفعوا ضرائب مباشرة للدولة وكدا بتحصل الدولة على قروش كتيرة جداً بدل تجي من النبيل بس والكان ح يدفع مثلاً مليون دولار في الشهر بقى الثلاثة آلاف ديل بيدفعوا خمسين مليون دولار في الشهر مثلاً أو مية مليون دولار في الشهر وهم أحرار.
لأن كلهم ح يشتغلوا وينتجوا ويدفعوا مباشرة للدولة ودي الفكرة الجابت تحرير الرقيق.. دي المسألة الأساسية والأولى.
لما تم تحرير الرقيق في السودان طبعاً لأسباب أخلاقية برضو لكن لأسباب اقتصادية أيضاً في المقام الأول.. لأنه لما يتحرر الرقيق بيمشوا يشتغلوا وعملوا فعلاً بزنس وفعلاً في مشاريع انهارت لكن هم بدأوا مشاريع جديدة وفعلاً حصلت نهضة في السودان وبقى في لحظة ما الجنيه السوداني بيساوي ٣ جنيه إسترليني ووصل ٧ كمان دا بعد تحرير العبيد بي ٧ إلى ١٠ سنوات وهم نهضوا بالبزنس وعملوا واشتغلوا في حاجات كتيرة واشتغلوا برضو في الدعارة وكانت مقننة وبتجي منها ضرائب للدولة واشتغلوا في الخمور وكانت برضو مقننة وبتجي منها ضرائب للدولة واشتغلوا في المشاريع الزراعية واشتغلوا في التجارة واشتغلوا في الجيش واشتغلوا في البوليس واشتغلوا في الخدمة المدنية.
وبنعرف حركة اللواء الأبيض سنة ١٩٢٤ م التي كان معظم قياداتها ناس جذورهم في لحظة ما من الرقيق زي عبدالفضيل الماظ مثلاً وهذا ليس عيباً والوقت داك كانوا مغصوبين والبشرية في لحظة ما كانت مقسمة بهذه الفظاظة والتفاهه والحقارة ولغاية الآن مازالت عواقب الحاجة دي موجودة والإحساس موجود ومازالت التقسيمات الاجتماعية تعتمل داخلها تلك الفظاظة اللإنسانية أن يستخدم الإنسان أخاه الإنسان بالضبط زي الحيوان.
وكان في مجتمعات كثيرة من حقك أن تضبح عبدك أو عبدتك كدا ودي مسألة عادية جداً ولا في زول بسألك كأنها دي دجاجة أو خروف بتاعك بالضبط كدا للأسف الشديد جداً.. البشرية كلها بالإجماع كانت كدا.
نواصل بقية الحلقات في بوستات منفصلة (هما اتنين وهذه الاولى منها من تسجيل صوتي في الواتساب كتبته الشابة الهميمة أمنية جابر.. شكرا لها)
النزعات العرقية في السودان حلقة 2-2 الثانية والاخيرة
معليش طولت عليكم لكن عندي حاجات كتيرة أتمنى الناس المهتمين يصبروا وأنا عارفهم شوية لكن ديل الناس المفيدين وهم البحركوا السياسة وبحركوا التاريخ بقولها كدا عديل. التاريخ دائماً يحركه رواد يعني المجتمع كله جسده لا يتحرك، بتحرك رأسه وبتحرك رواده. مرات بتحرك زول واحد في التاريخ بيحرك معاه كل الجماعة سواء كان زول مكتشف أو عالم أو نبي، بشر واحد، بتلمع الفكرة وفي اللحظة التاريخية المناسبة بتعمل تحول في المجتمع بأكمله وبتجي حضارة كاملة مبنية على الفكرة الرهيبة الجابها الزول دا لكن الفكرة براها ما بتنفع إن لم تكن اللحظة التاريخية مناسبة وفِي جمهور بسمعها وفِي ناس يستطيعوا أن يعملوا من أجلها ويضحوا من أجلها.
المهم نرجع للعهد الإنجليزي وأقصد التحول في الطبقات الاجتماعية الحصلت، أنا ذكرت أنه كان في أسر محددة وطبقات محددة اللي هي مبنية على الإدارة الأهلية بجزئيها القبلي العشائري والطائفي الديني المستند على الطرق الدينية أساساً، وما كان في أحزاب سياسية تقوم على المدنية لأن المدنية كانت بطيئة جداً جداً. عشان تُنشأ أحزاب مبنية على المدنية، إشتراكية وأحزاب يمينية إسلامية زي الأخوان المسلمين دي أخدت وقت طويل جداً، ما بدأت إلا مؤخراً جداً في الأربعينات وتأثيرها ما حصل فعلاً إلا في الستينات. بعداك جاء ناس الترابي وعبدالخالق محجوب من اليسار وجوا ناس محمود محمد طه والجمهوريين بدأوا الحزب الإشتراكي وهكذا بدأت الأيديولوجيات الليبرالية، محمد خير المحامي كان ليبرالي، ومنصور خالد كان ليبرالي يعني ديل ما إشتراكيين ولا إسلاميين بالمعنى الأيديولوجي الحديث. ديل أحزابهم مبنية على الاقتصاد الحديث اللي هو اقتصاد الخدمات، ديل هم المعلمين والمهندسين وناس الزراعة الممكننة، الزراعة التقليدية كانت حقت القبيلة لكن الزراعة لما بقت ممكننة بقى في إتحاد نقابات الجزيرة ودا الحزب الشيوعي عنده فيه دور، والسكة حديد والكلام عن العمال وإلى أخره والحزب الشيوعي للآن قاعد في النقابات عشان كدا. هو مزعج الناس في تجمع المهنيين لأنه بالرغم من إنّو شوية لكن دوره التاريخي كبير جداً جداً يعني من الثلاثينات والأربعينات والعنوان بتاع جريدة الميدان كلنا نعرفه "يا عمال العالم اتحدوا" مش عمال السودان بس دي أيديولوجيا جاية من برا، أيديولوجيا كبيرة ونحن نحترم. وكذلك حركة الإخوان المسلمين قائمة على الموظفين في البنوك والمعلمين وموجودة في الجامعات ومعظم الطوائف ما عندهم ناس في الجامعات. *لازم نربط التحول السياسي والاجتماعي بالتحول الاقتصادي ودا كلام حقيقي لأننا عشان نمر من اللحظة التاريخية لازم نحدث اقتصادنا عشان يواكب العالم الحديث ويواكب التكنولوجيا وننافس التكنولوجيا الحاصلة حولنا في الإقليم ونعمل التكنولوجيا في اقتصادنا عشان نواكب الإقليم ونواكب العالم، مؤكد منافسة كبيرة جداً. لازم تمكنن الزراعة وتمكنن الرعي لأن الرعي ذاته فيه ماكينات للحليب وماكينات للعمل بها وفِي أسس علمية لكيفية النهوض بالزراعة وبالرعي والذي في الأساس هو أس اقتصاد السودان. فالسودان لغاية الآن الأس بتاع أفقه هو الزارعة بأنواعها المختلفة والثروة الحيوانية لأنو عندنا ثروة حيوانية كبيرة جداً، والعالم عارفها وجيدة جداً في إمكانياتها، بالتالي علينا أن نحدث دولتنا ونعمل كلنا لذلك وعلمائنا أيضاً بياطرة وأطباء والقانونيين، علماءنا عموماً مفروض يجهزوا أنفسهم لمرحلة النهضة والحضارة أنا بفتكر.
في معلومة مهمة جداً أشرت إليها كم مرة وهي أن البنيات في الماضي التي تقوم على أساسها السياسة، وتقوم على أساسها الدولة ويقوم على أساسها الاقتصاد بتاع الدولة وعصب الحياة ومعاش الناس وأمنهم كانت دائماً هم بنيتين: بنية القبيلة وبنية الطائفة، وبنية الطائفة ذاتها حديثة نسبياً يعني بنية الطائفة التي نعرفها الآن نشأت في أخر أيام الدولة السنارية. الدولة السنارية لما نشأت كانت حلف قبلي عشائري بالكامل ثم بعداك جاءت الطرق الصوفية بحيث أن الطرق الصوفية مثلت ما يشبه النداء بالمدنية الآن، كيف؟. تلك نقطة مهمة جداً وسأرجع تاني للواقع الآن وكيف اللحظات التاريخية بالمناسبة بتشبه بعض عشان كدا إذا ما بقينا على وعي بها ما بنستفيد من تجارب الماضي ما بنصطحب تجارب الماضي معانا عشان نستفيد منها. لما بدأت الدولة السنارية وخلينا نترك ما قبلها ونمسك بس الدولة السنارية، كانت حلف قبلي عشائري بالكامل وواضح جداً جداً، وكانت جميع الممالك الأخرى خارج إطار وجغرافية الدولة السنارية كانت برضو مسماه بإسم أعراقها وقبائلها زي سلطنة الفور وزي سلطنة المسبعات حتى لو ما إسم قبيلة هي معروفة موجودة في جنوب كردفان، وزي سلطنة الشلك بالإسم، والبداويت في شرق السودان الذين كانوا معظم الوقت في إطار الدولة السنارية لكن كانوا مستقلين.
أرجع ليكم كيف التصوف في زمانه كان بيشبه المدنية الآن، والأشياء لا تتشابه لكن التصوف والطرق والطوائف دي في زمانها كانت ثورة لأن القبيلة كانت هي كل شيء، إنت حلنقي إنت فونجي إنت أنقسنا إنت شلكاوي إنت فوراوي إنت مساليت إنت زغاوة إنت جعلي إنت شايقي دي خلاص حاجة واحدة وإنت في إطار قبيلتك تمارس السياسة وتمارس المجتمع وهكذا، لكن لما جاءت الطرق الصوفية خلت الزول البجاوي والزول الشايقي والزول الجعلي والزول الشلكاوي يستطيعوا أن يقعدوا في حلقة ذكر واحدة ودي كانت ثورة في زمنها.
بالتالي الطرق الصوفية استوعبت القبيلة وتصالحت معها ومشوا مع بعض بسلاسة، ولكن برغم ذلك كانت دائماً القبائل أعلى وكانت الطرق الصوفية ادنى مرتبة من القبيلة لأن القبيلة دائماً أكثر تماسكاً وعندها الأرض حقتها.
الأرض دائماً حقت القبيلة أما الشيخ بيجي يبني المسيد بتاعه وبيهدوه له هدية في معظم الأحوال في التاريخ، ومذكور في طبقات ود ضيف الله وفي أماكن أخرى أن الشيخ الفلاني جاء وناظر القبيلة أو عمدة القبيلة أعطاه أرض، وبكونوا في تصالح مع بعض بكون الشيخ عنده مهام بعملها في المجتمع مختلفة عن المهام البعملها ناظر القبيلة أو بتعملها قيادة القيبلة.
والقبيلة مهمة لأنه دائماً كانت عندها حاجتين مهمات جداً عندها الأرض وعندها الجيش والفرسان البيقاتلوا، والصوفية مرات قليلة في التاريخ ومؤخراً فقط استطاعت أن تنهض بجيش، لكن دائماً الجيش كان جيش القبيلة حتى في عهد المهدية لما المهدي قام بثورته اضطر يمشي غرب السودان لأن القبيلة أقوى وأحضر قبيلة التعايشة لأن جيشهم منظم.
ولغاية الآن القبيلة مهمة لأنها منظمة ولو أردت الآن أن تعمل حزب حديث سميه ما تشاء ح ياخد منك سنين عدداً و ستضطر إلى إحضار قروش التمويل من الخارج غالباً، من الخليج أو من مصر زي الأخوان المسلمين أو من روسيا أو من بعثات أو من العراق أو من سوريا أو تتعب تعب شديد جداً عشان تجمع قروش عضوية براك يعني تكون أنت مستقل بذاتك، زي الجمهوريين وتقعد ٥٠ أو ٨٠ سنة. و ستظل بعداك برضو أقلية زي كل الأحزاب الحديثة وليس الجمهوريين فقط إنما الجمهوريين والشيوعيين والليبراليين بأشكالهم المختلفة والآن المؤتمر السوداني بقدر تمدده هو حزب حديث وعنده أفق لكن برضو مازال محتاج شغل.
القبيلة كانت دائماً أقوى وبعدها الطريقة التي كانت تعتاش على القبيلة وفِي تصالح معها، أصلاً مافي شيخ حارب القبيلة مباشرة ومافي صراع بين القبيلة والطائفة لكنها كانت بتشبه نظام المدنية الحالي الذي ينادي به الشباب الآن. المدنية دي أساساً جابوها الإنجليز وجدت بشكل بسيط أيام الأتراك لكن المدنية بمعناها الحديث، المدنية بمعنى الخدمة المدنية وأن يكون في معلمين وأطباء ومهندسين وغيره درسوا الجامعات ويستطيعوا أن يعملوا معاشهم عبر المهن وليس الزراعة التقليدية والرعي التقليدي.
هذا ما كان في التاريخ كله وهذه هي المناشط الاقتصادية الأساسية لشعبنا.
ما أحاول قوله وما حدث هو أن التصوف جعل الناس يتسامحوا أكثر مع بعض ويتضامنوا أكثر مع بعض وفِي نفس اللحظة يستوعبوا قبائل مختلفة، لكن ما نافس القبيلة وظل دور القبيلة دائماً موجود لما يمشوا في السياسة ولما يعملوا ثورة في التاريخ زي الثورة المهدية. دائماً الطائفة مصطحبة القبائل بدون صراع كتير وفِي التاريخ حصلت ثورات كتيرة جداً غير مرئية بالنسبة لينا ما زي الثورة المهدية، وفِي بعداك مشاكل وصراعات لأن السودان واسع جداً ولما جاء ناس من غرب السودان تصادموا مع الناس في وسط السودان وقصص كتيرة جداً ما كان في وعي بذاتنا الجماعية ومشاكل كتيرة حصلت.
بعد حديثنا عن الاقتصاد الحديث نرجع للمدينة وخليني أقول ليك كلمة مدنية وأفقها شنو تحت ضوء تجاربنا في الماضي. قصة المدنية التي ينادي بها الناس الآن قصة معقدة جداً تحتاج إلى تركيز وتسامح وأنا الآن لن أستطيع أن أوفيها حقها لكنها بتشبه لحظة التصوف في نهاية الدولة السنارية، كيف؟. ليه الناس ديل هسا بقولوا مدنية، ليه بتلقى الشباب ديل رافعين يدينهم وبتلقى الشاب عمره ٢٥ سنة أو ١٧ سنة يقول ليك "مدنياااووو مدنية مدنية" ليس الموضوع أنها ضد العسكرية ليس كذلك، أبداً لا. المدنية دي المقصود بها انو نحنا كلنا كسودانيين متساويين، كلنا واحد، بجميع أعراقنا وقبائلنا وطوائفنا كمان المرة دي. الطائفة الكانت زمان بتجعل الناس مع بعض ومافي غيرها لا مدنية ولا غيرها كان في هي بس "الطائفة"، الآن أصبحت القبيلة والطائفة ما كفاية لاستيعاب الناس لأن هناك اقتصاد جديد هو اقتصاد المدينة، الاقتصاد الحديث الممكنن، وفِي تكنولوجيا جديدة وفِي طبقات اجتماعية جديدة مختلفة عن القبيلة والطائفة، والاتنين موجودين بكثافة لكن المدنية الجات دي برغم ضعفها لكنها تمثل فلنقل ٣٠٪ من النظام الاجتماعي.
المدنية الآن تنادي بأنه يا جماعة نحنا عندنا فهم جديد يستطيع أن يستوعب القبيلة ويستوعب الطائفة ويستوعب البنيات الحديثة، كلنا يا جماعة نستطيع أن نكون مع بعض بلا عرق وبلا طائفة وبلا تمييز نستطيع أن نكون "مدنية". هذا ليس بشأن الجيش فقط يعني المدنية ما مقابلة للجيش أونحنا يا جماعة ما دايرين الجيش يحكم، لا الموضوع أكبر من كدا "يا عنصري ومغرور كل البلد دارفور" دي فيها إشارة إلى أننا نستطيع تجاوز العرق عبر المدنية نفسها ونستطيع أن نتجاوز الطائفة عبر المدنية نفسها ومش نتجاوزهم بس بل نصطحبهم معنا. التجاوز دا معناه إنك تلغي الزول لكن نحن نريد أن نصطحبهم معانا، كل الناس تكون موجودة في إطار دستوري وعقد اجتماعي مقبول لكل الناس، تلك هي قضية المدنية باقتضاب شديد جداً. وأنا عندي دراسة إسمها "الدولة والمجتمع المدني" شغال فيها من سنة ٢٠٠٩ لغاية الآن لكن منشورة طبعاً.
نحن نحتاج إلى أن نقرأ مجتمعنا ونتصالح معه كلنا ومحتاجين نشوف العيوب ونتجاوزها، وبدأنا بالعنصرية في نقاشنا هذا وشرحنا أن العنصرية حاجة بغيضة جداً لأنها بتميز الناس على أساس الدم وهذا يجب أن يتوقف لأنه ثبت علمياً وثبت إنسانياً وثبت أخلاقياً أن البشر كلهم واحد والجين واحد وأنت بتكون غبي وبليد إذا بتصنف الناس على أساس العرق أو الدم، وإذن العيب فيك إنت. دا من أهم المبادىء الأساسية أننا كلنا نلتزم بحقوق الإنسان وكل سوداني عنده كامل الحق في ممارسة حياته كمواطن سوداني بدون أي شكل من أشكال التفرقة لا السياسية ولا الاقتصادية ولا الاجتماعية ولا كل الأشكال ولا على أساس الشكل أو إنك سمين أو ضعيف أو على أساس إنك بنت أو ولد أو على أساس إنك جندر مختلف أو بتلبس لبس مختلف أو بتتكلم بطريقة مختلفة دي طريقتك وأنا أحترمها. علينا أن نحترم تنوعنا فعلاً في المبدأ ودا بتم بنشر الوعي في المقام الأول وبتم في المقام التاني والمهم برسم وتوطيد القوانين التي تجرم كل أشكال العنصرية أياً كانت لازم تتضمن في الدستور وتفصل في القوانين دي من الحاجات المهمة وبعداك بتبقى المدنية عندها قيمة بالنسبة لكل الناس.
حالياً في ضرورة أن القبائل دي تنبثق منها أحزاب عشان تدافع عن مناطقها لأنه في الحقيقة نحنا ما عندنا مدنية وما عندنا إحترام لبعض وما محترمين تنوعنا السياسي ولا الاقتصادي ولا الجهوي ولا العرقي ولا اللوني ولا التاريخي ولا الثقافي ولا أي شيء، بالتالي في قبائل محددة رافعة السلاح وعندها قضايا محددة متبنياها وهذه الحركات بتكون عضويتها قبائل وبتكون قيادتها من القبائل والقيادات دي ممكن تكون مهندسين وممكن تكون أطباء وممكن تكون قانونيين أو رعاة أو مزارعين أو ناس ساي محترمين لكن هم يمثلون ويطالبون بقيم نبيلة. جميع الحركات المسلحة الآن إذا راجعت دساتيرها بتلقاها رافعة قيم نبيلة قيم إنسانية وعندها علاقة بحق المواطنة وحق جميع الناس، صحيح عندها مطالب لها علاقة بالمكان المحدد والجهة المحددة والجماعة المحددة لأن هناك مظلومية تاريخية أكبر في الحتة دي لكن عندها أفق وطني وأفق مدني وقياداتها معظمهم متعلمين. عبدالواحد محمد نور كان زميلنا في جامعة الخرطوم وصديق عزيز جداً بالنسبة لي على سبيل المثال وخريج قانون في زمنا وهو زول راقي جداً وبالمناسبة كنّا شغالين في حركة واحدة هي حركة الطلاب المحايدين لما كنّا في الجامعة، مثلاً عبدالواحد ذهب إلى دارفور والجبال واستقر فيها وبدأ حركته من هناك لكن هي حركة وطنية وبرنامجها وطني ومطروحة لكل الناس لكنها انطلقت من هناك وعندها قضية برضو هناك في دارفور وهكذا بقية الحركات التي نحترم جميعاً. وهكذا مؤتمر البجا وهكذا أسود الرشايدة وأهلنا الرائعين في جبال النوبة أهل الحضارة الذين نحترم وهكذا أهلنا النوبيين في شمال السودان. نحن كشعب عندنا قضايا يجب أن ننظر إليها.
وفِي الحقيقة ممكن أقول ليك أن هؤلاء الناس عملوا على تثوير القبيلة يعني دا ما النمط القديم للقبيلة لأن القبيلة زمان كان عندها ناظر وعندها عمدة في الإدارة الأهلية والطائفة عندها شيخ، أما الآن القبيلة أصبح عندها قيادات متدربة وقيادات متعلمة بتقود القبيلة من أجل قضايا محددة ولكن المرة دي لا تدافع عن القبيلة فقط إنما تدافع عن حقوق الناس الما عندهم وسيلة للدفاع عن حقوقهم غير أن يتخذوا هذه الوسيلة، لأنه لا توجد طائفة في معظم الأماكن دي والطائفة مستوى أعلى من القبيلة، فمافي طائفة والمدنية إلى الآن ما بقدروا يأسسوا بها أحزاب تتبني قضايهم مباشرة.
تلك هي القضية الحبيت أشرحها وسميتها "تثوير القبيلة" وهم عندهم قضايا مشروعة جداً لكن تثوير القبيلة دا برضو هو مرحلة بإتجاه المدنية الكاملة عشان يكون السودان فعلاً دولة المواطنة دولة المدنية الكاملة دولة الحقوق والواجبات للمواطن بالكامل بغض النظر عن القبيلة والعشيرة والطائفة والأيديولوجيا والحزب السياسي نفسه أياً كان. تلك مشاركة مني وأنا كلي سعادة بكم وأتمنى أسمع منكم
وشكرا.
في الختام ملاحظة: تلك كانت الحلقة الثانية والاخيرة من موضوعنا هذه المرة (النزعات العرقية في السودان) راجع الحلقة الأولى بالجوار.. (من تسجيل صوتي في الواتساب كتبته الشابة الهميمة أمنية جابر.. شكرا لها)
محمد جمال الدين
06-12-2020, 06:04 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
Quote: سلام مشرف.. معليش للتاخير.. لسا مزحوم.. بس حاجة بسيطة الرمزية صنعت الواقع الذي نعيش (لا يهم أين كانت مكة جغرافياً والكلام الزي دا) المهم أن رمزية مكة وقريش صنعت الواقع بعدها كل الوقت وانسجمت او حاربت اساطير الآخرين.. وحتى هذه اللحظة ويحاربونها بذات المنطق.. بعد الحقيقة مطلوبة طبعاً لكنها متأخرة عن فعل الرمزية التي جعلت لنا ولداً عظيماً مثلك إسمه: محمد (عباس) المشرف😆 دا كلام سريع مني برجع ليك وسعادة بيك
--- مداخلة بتصرف من الفيسبوك.. حاجة كدا سريعة.. ونواصل
02-04-2023, 01:49 PM
Muhib Muhib
تاريخ التسجيل: 11-12-2003
مجموع المشاركات: 4084
عشان كدا لغاية الآن في فشل كبير جداً لعدم فهمنا لبنيات مجتمعنا ولعدم إلمامنا بالواقع عشان كدا نحنا عندنا مشروع السودان ٢٠٠.. شكراً لطلعت وإيلاف نظام الدين الأشاروا للحاجة دي وجابوني أنا لخمتكم اللخمة دي كلها لأني في الحقيقة زول متطرف جداً في القصة بتاعة مشروع السودان ٢٠٠ دي وبشوف فيه حياتي عديل كدا وما بالضرورة بفرضه على الأخرين لكن بقول للناس يعاينوا له الناس الفاهمين والعندهم صبر والمهتمين.. المشروع دا هو البودينا للمدينة والحضارة غيره أنا ما شايف وما ممكن ولا بيحصل.. ح ندور في دائرة الفشل المستمر لأنو بكون ما عندنا تراكم بتاع تجربة.. لا تراكم بتاع تجربة سياسية ولا تراكم بتاع تجربة علمية طب وفيزياء وكيمياء ما عندنا صفر تقريباً.. ما عندنا تراكم تجربة في البزنس ولا دراسات بتاعة بزنس واقتصاد وتجارة داخلية وخارجية مافي تجربة مسجلة عشان نعرف التجارب الناجحة نستفيد منها والتجارب الفاشلة نتداركها دا كله ما عندنا.
الاستاذ محمد جمال الدين طبعا من نقاشك في بوستات الحقيبه اسميتك الرجل الحقيبه .. علي ما اذكر اظنك طرحت مشروع سودان 200 هنا او طرحت كلام عنه وانا اشعر بالاسف لاني ما شاركت فيه ولكن لدي نفس الاحساس بان هنالك شعور بالعجله لحل مشكله السودان السودان. لازم نطلع علي هذا المشروع. فاخرجه للنور..
.. بخصوص البوست انا تعلمت جمله مهمه جدا . الفشل في اداره التنوع بيقود الي عنصريه ابشع من الموجوده اصلا. خطابك الكوشي المركزي ( كوش مركز الحضارات وصانعه الاديان) علي الاقل دا فهمي له و لبعض النصوص في البوست اعتبره معتدل
معتد ونبرته ليست بالحداده او الايمانيه المطلقه بحقيقتها مثل بشاشا له المحبه . بتعطي احساس انك ممكن تغير رايك في هذه النقطه بالتحديد لو توفرت الادله والاسباب المنطقيه. هذه محمده في نبره الكتابه والاسلوب .. بي مناسبه الادله وانا ليس بالضروره باحث عنها هل هنالك ادله وحفريات علي تحليلك التاريخي هل كتابتك هنا تحليل لتاريخ حدث ام انه تصور منك لتاريخ حدث ودا تحليلك انت. هل الكتابه هنا سرد للتاريخ او ما تظنه تاريخ . انا عايزك تواصل في سردك الاستفسارات هنا من اجل المعرفة لاني حقيقي ما بعرف تاريخ السودان القديم . انت ايضا لديك حديث مهم فارجوا المواصله .. . في بوستي الاخر , عندي راي وعايز اتجاهل التاريخ شويه وما بستغرب لو انا ما عندي الوعي المناسب لرويه دور التاريخ السوداني في حل الازمه الحاصره والمعاصره. وانا هنا علشان اتعلم..النهايه المهمه لي انو مشروع السودان ينجح..
استفسار هل لديك مجموعه في الواتس؟ كيفبه الانضمام للرد والنقاش ولي معرفه عضمك وزياده وعينا
02-05-2023, 09:41 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5378
Quote: علي ما اذكر اظنك طرحت مشروع سودان 200 هنا او طرحت كلام عنه وانا اشعر بالاسف لاني ما شاركت فيه ولكن لدي نفس الاحساس بان هنالك شعور بالعجله لحل مشكله السودان السودان. لازم نطلع علي هذا المشروع. فاخرجه للنور.
أيوة المشروع شغال بحد أدنى من القوة العاملة وبجهد ذاتي خالص.. ولسا مؤكد عندك فرصة تشارك ونسعد بإهتمامك.. برجع لبقية مداخلتك في وقت آخر أفضل لأنها غاية الأهمية عندي.
أزمة اللون الأسود:
والآن أضع رابط ندوة اللون الأسود من يوتوب واعود في وقت أرحب إلى مهيب المهيب. تسجيل صوتي: ندوة ازمة اللون الاسود (لون البشرة السوداء/السمراء) متى وكيف ولماذا عبر التاريخ وفي السودان وفي كل مكان
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد جمال الدين
Moutassim Elharith
منتصر عبد الباسط
Muhib
فيس بوك
تويتر
انستقرام
يوتيوب
بنتيريست