*ياربي السودان سنة (2042) حا يكون كيف؟!.. *وانجازاتو شنو؟!.. *طبعاً لو سألت أي مواطن عادي في أي حتة حا يقول ليك : *ياخ خلينا في حالنا !!..ّ لأن هذا لن يكون من أولوياته .. *ولن يكون من إهتماماته .. *وكفاية عليه همومه وبؤسه و(شلهتته) واحباطاته !!.. *حا يفرق معاه شنو لو السودان سنة (2042) حا يصدر القمح ولن يستورد (شوال) واحد !!..ّ *والرغيفة حا تبقى ب(50) قرش ..ّ *حا تفرق معاه شنو لو السودان عمل تجربة ناجحة لصاروخ عابر للتروس إسمه (توم هجوك)؟!.. *خليكم من الصاروخ .. *حا تفرق معاه شنو لو السودان تفوق على رواندا في معدل النمو الإقتصادي والتطور التعليمي و الصحي والأمني؟!.. *ما حا تفرق معاه أي حاجة .. *لأنه في الوقت داك احتمال يكون في عالم تاني !!.. *فر بجلده إلى مكان آخر خارج وطن الجدود .. *أو فقد عقله وأصبح يلعب (بلي) مع الشفع و يجري وراء الجدادة و العتود !!.. *أو شبع موتاً وأصبح فريسة للدود !!.. *والشيء الوحيد اللي ممكن يحصل في السودان انه البلد حا تكون قاعدة (تتفرج) على كل دول العالم (النايمة) بتتقدم - حتى الصومال - ونحن محلك سر .. ومحلك (برطم) !!.. *وطبعاً دا يعتبر إنجاز في حد ذاته .. *الفرجة إنجاز !!.. *وعموماً .. *وتاني عندنا سؤال .. *لو ربنا مد في الآجال و(عينة) وأمثال (الفريق أول) حميدتي .. والتنابلة (الموزيين) .. و(إبرهة).. والمتكوزنين .. و(برطم) .. و الخبراء الإستراتيجيين .. ومبارك الفاضل وبتوع (الطرف التالت) ..والخ........ *وغيرهم وغيرهم لسسسسسسة قاعدين كيف حا يكون وضع السودان و السودانيين؟!.. *نسينا نذكركم .. *لعل الذكرى تنفع (الممكونين) .. *في خلال اسبوع واحد فقط : *عضو المجلس السيادي (الإنقلابي) أبوالقاسم برطم يقول : تلاعب حدث في اتفاق اسعار الكهرباء وسنتخذ إجراءات .. *وبعده .. *عضو مجلس السيادة عبدالباقي الزبير يقترح دمج فاتورة النفايات مع الكهرباء .. *وبعده .. *عضو مجلس السيادة سلمى عبدالجبار تطلع على موقف الإمداد الكهربائي بالبلاد !!.. *يعني الحمدلله عندنا مجلس سيادي (كهربائي) !!.. *ويجي واحد راسو مدوقس يقول ليك يا ربي السودان سنة (2042) حا يكون كيف؟!.. *يا رب لا (تبرطمنا) ولا تخوزقنا .. *وّ *الله في ..
عناوين الاخبار بسودانيزاونلاينSudaneseOnline اليوم الموافق 02/04/2022
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل هلال
فيس بوك
تويتر
انستقرام
يوتيوب
بنتيريست